Read Moyon Naga HIBREEU 3 Bible Online

HIBREEU 3 - Moyon Naga bible

HIBREEU 3

¹Chukhaenache thangbaen tungnii khaena Thangnang ing yngeen ynthiing kauw kanae ae, kenuw ing kenriir Chongthang re Aanchung Jaethiim Jesu Khrista havi khaene ikharpeehruw.

²Mosi ing thachafhuw om yngkheh ing Thangnang eensungna rukuum atuvaang, ama ingkho Aanchung Jaethiim ing pham athin ampa ningnakho thachafhuw ing omba.

³Changvakonchu asapa Jesu Khrista chuve Mosi chungna athiseh ing alaar isasehva, havi vaange een athi ing een aatu mee ing ympah aphava.

⁴Een vakhae mee yngkheh ing atuva, changvakonchu peeh vakhae aatu chuve Thangnang vatah.

⁵Mosi chuve Thangnang eensungna meenae atu thachafhuw yngkhehva, amanche Thangnang ing vaknuwting riirvachii vakhae khaena ichongva.

⁶Changvakonchu Khrista chuve Thangnang eensung taklina amansir asapa thachafhuw yngkhehva. Inuw ing thona isa vokhehkho ningmandenchu achiniipha ing icheep ing bachuwther manuwve, inuw ama a-eenchu vamuw.

⁷Chutahnache ynthiing laetha ing ariir chuve, atanii nenuw ing Thangnang iruurchu siitanuwve,

⁸paamfhuwna chaang aennii aerae arumah ae vaangkhe, nenbarungriir manpir mahruw.

⁹Amanche nenfhuwven ae inche kichu chaang yngenpae, vokhehkho enuw ing kum somanrii sungna kanongtu emupae.

¹⁰Chukhaenache ki ing ama suwnthar taklinache inempak nungaemah ingka kariir, “Enuw apha om bakhaena embarungriir aasirting sina, amanche enuw ing kalamchu manghuw mahsae.

¹¹Chukhaenache kabarung isii ing chongreep katu, enuw ing utaraenkho kaja basumnii nache varuwhmahnii ae.”

¹²Kauw kanae ae, ynriimruw, chang-mahnave achuw yngkheh ningna thacha omahnii isamah barungriir omnaka iring Thangnang tanii yngheer arusa.

¹³Changvakonchu achuw yngkheh nenuwchu isii mare inche ymmanpirniimah khaenache, atarae inii aomraenne anasiirna yngkheh yngkheh ynthohsaruw.

¹⁴Yngkhaena ynchii imbe inuw ing aburna basenka icheep ing ymbarungriir ngamniichu achiniipha ing bachuwther manuwve, inuw Khrista thohche sarup iphahak chuvamuw.

¹⁵Haviva ynthiing thiimziih ing ariirchu, “Atanii nenuw ing Aafhuw iruurchu siitanuwve, nenfhuw fhuwven aeng ataklina enrumah vaangkhe nenbarungriir manpirmahruw.”

¹⁶Achuw aepae Thangnang iruurchu siiaeka arumah aechu? Mosi ing Ijeep tanii ahenruw ae khamah paekhang?

¹⁷Achuw ae taklinache Thangnang ing kum somanrii sungna abarungriir inungaemah jaehchu? Paamfhuwna isii rang aeka ithii ae taklina khenmah vakhang?

¹⁸Vokhehkho achongriir amanjiimah ae ningna aja basumnii nache ruwhmahnii ae tamah naka achuw ningna chongreep atuva?

¹⁹Chukhaenache inuw ing ymmusa, amachuve enuw enthacha omah inche varuwhcheh mahsae.