Read Moyon Naga HIBREEU 5 Bible Online

HIBREEU 5 - Moyon Naga bible

HIBREEU 5

¹Aanchung Jaethiim chaap vakhae amee tanii iteerka, enuw changdenna Thangnang ningna chaatha pinii vokhehkho isii khaena ipifhuw pinii khaenache pham athinva.

²Ataksahkho asuurnii om khaena amanghuwmah ae vokhehkho araar mee ae thohche iduwrjaeh ing ikhaang chehva chiiva.

³Amanche ataksahkho isuur khaena mee ae isii khaenapang kikthuur pivachii mahva, changvakonchu ataksah isii khaena khom vachiiva.

⁴Achuw tanga ingkho ynjasuwh phamchu ataksah ing iraangmah, changvakonchu Aaron ningna Thangnang ing a-een vaangkhe amakho a-eenva.

⁵Amavaange Khrista ingkho aanchung jaethiim ynsuwhnii khaena ataksah ympahmah, changvakonchu aningna ampa Thang-nang ing ariir, “Nang i kasapa chuvachii; atanii iniine nangchu kabaringvachii.”

⁶Thangnang ing reentaang denkheh nakho ariirsa, “Nang chuve Melkijedek inuwzii ing ichen naemah jaethiim ynsuwh sachii.”

⁷Jesu ing laaruw paam mee vaang apaar raenche ithii tanii ikarpeeh acheh Thangnang ningnache ipirpak ing chapsaka vokhehkho amik richii ynta thoh ynruw ing thamsaka aniihsah, vokhehkho Thangnang chu chiika amandensah khaena asiipeeh.

⁸Atakchu Thangnang sapa vakhangnare ijachaam akhaang inche chongriir ynjiinii atamsahpa.

⁹Jesu ing ynthiingjaeh ynsuwhka achongriir amanjii vakhae khaenache ichen naemah manlaenpeeh phanii ynsuwhsa,

¹⁰amanche Thangnang ing atakchu Melkijedek vaang aanchung jaethiim ruming apeehpa.

¹¹Kenuw ing havi khaena riirva kenchii inempak omna, changvakonchu nenuw ing nenrisiimah khaenache neningna iriirpeehnii ruwna.

¹²Apha inuwzii ing nenuw chuve aanchuwmee hunginsuwhva nenchii inche, achuw yngkheh ing nenuwchu Thangnang chongjeer amaensana abasennii athurfhuwchu athar vokheh imanchuw vachii ing omna; nenuw ing ynchae peeh savanenchii changdenna shangkhom inpehva nenchii ing omnachuw.

¹³Yngkhaena ynchii imbe shangkhom ainjaeh mee vakhae ing ichum ynraar manghuw chehmah; akhaechuve ama naepang pehna.

¹⁴Changvakonchu ynchae peeh chuve upa ae khaenava, enuw ing isamah isa engkhaechehsa.