Read Moyon Naga HIBREEU 6 Bible Online

HIBREEU 6 - Moyon Naga bible

HIBREEU 6

¹Chukhaenache Khrista khaena chongburchu bathen manuwka, inuw ing areer suwhnii yntongting ma taartaruw, ithii nong chaap tanii barungriir ihuungnii, Thangnang yndennii,

²baptais itu khaena ynchuwpeeh, rusae taklina kik ynthoh, ithii ihangring vokhehkho ichen naemah vajeer khaena athar abur mangiirsamah manuw.

³Thangnang ing irupeeh nave havi inuw ing tusataruw.

⁴Athar ynriirpeeh vasah, thangbaen tanii kikthuur aphavasah, ynthiing laetha ymphahak vasah,

⁵Thangnang isa chongsae vokhehkho hungvivachii suwnthar ruwreng emanghuw vasah mee aeng isii ting embukreeh tahna,

⁶enuwchu athar vokheh barungriir ihuungnii khaena yntharreehnii ruthaangthaang mahnii, yngkhaena ynchii imbe enuw ing Thangnang sapachu athar vokheh khros taklina theh aeka, Jesu chu yndang ing ningjak apeehpae.

⁷Chungtanii khuw vanuh vanuh isuwrchu ain ae vokhehkho ruwbaar atuae khaena chimuw bajaang ynla ruwruwchu Thangnang tanii borva.

⁸Changvakonchu iring re ichuwr hangmuwng nave, ama ruwruwchu ikanii omahsa, vokhehkho siraap phavachii ynneengsa, achiniideh chuve mi sungna ikaangchu vatah.

⁹Changvakonchu kauw kanae ae, kenuw ing neningna jinge ichii ing chongkhang nungle, manlaenpeehchu phatanuwve nengkhaena isasehchu omchirna.

¹⁰Thangnang chuve ichummah changchii mahva. Ama ing nenongtu vokhehkho akhaena nenuw ing ningsiih mandang chuwka ynthiing ae ningna nenbomchu bahirmahnii.

¹¹Nenuw amee siir ing achiniipha ing ningmandenchu areer suwhnii ing ikhaangcheh nache nenbarungriir iruwhchu nemandang kenuw ing kengadiksahnah.

¹²Kenuw ing nenuwchu thaachah tanuwka tamah ung, changvakonchu thacha aeka ikhaang encheh ajaarna Thangnang ing chongreep atu empha enuw vaang tatanuwka kenchiiva.

¹³Thangnang ing Abraham ningna chongreep aturae saarkhiina iparfhuw areen ruming iruwng omah khaena ataksah ruming parka saarkhii atu.

¹⁴Ki ing chongreep katunah, naningna bor pivakachii amanche natuti bahsuwm manemva kata.

¹⁵Jinge ichii ing Abraham inche hengkhaangka Thangnang chongreep aphapa.

¹⁶Yngkhaena ynchii imbe mee aeng enchungna iruungseh rumingchu par aeka saarkhii atunah ae, amanche acheepnii khaenache saarkhii entu inche enganahnii chaapna amanchiniinah ae.

¹⁷Chukhaenache Thangnang abarungriir ynreeh arumahchu chongreep aphavasah ae ningna athiseh ing mandangning achii khaena asaarkhii inche amancheeppa.

¹⁸Havanene ynreeh arumah vokhehkho Thangnang ningna ynchaenii omah ynniimeh i omna. Chutahnache ihungruwhnii ymphanii khaena itaenmuw inuw ing ymmaana heom ningmandenchu icheep ing ymbachuwnii khaena ipirpak thona isa ymphanii khaenava.

¹⁹Inuw ing ymphasah ningmanden havi ynlaetha karnii ruwkuwng khawmnii thoh aanghakva, havirap inge atatak ing icheepchak vokhehkho thangbaen rumniieen ynsuwh sungtingche ivaruwh vamuw.

²⁰Jesu ing inuw vakhae khaena asung tingche maen ing varuwhka vokhehkho Melkijedek pham inuwzii ing ichuwr naemah ing aanchung jaethiim visa.