Read Moyon Naga HIBREEU 9 Bible Online

HIBREEU 9 - Moyon Naga bible

HIBREEU 9

¹Amaensa chongiir nache ynthiing nongtufhuw re laaruw paam khaena ynthiing nongtufhuw om.

²Havana rumniithaam asungnache ka asae ynniimeh om. Amaensana jaemi barengnii vokhehkho ynthiing tar asiihniichu ombaata; havichu ynthiing apham enchii.

³Avomaniinii laedenpeen tuknungchu ynthiingna ynthiingseh enchii.

⁴Amanache ningsiih sana barim ynthunii vokhehkho ataklina sana ing ynrom chongiir upu om, upu sungnache isahfhuw manna ithinnii sana bukam, adeen isuwm Aaron rumor vokhehkho chongiir ynziih rungpeeh om.

⁵Ama taklinache enlaar isa cherubim embatha ynniimeh inche sana upuchu embaruw amachu ningchuwh ongnii apham enchii. Havana peeh vakhae khaene atarae kenuw ing adiing aneh phanii ing ichong chehmah ung.

⁶Atii hava vakhae i achichirna jaethiim inche apha vakhaena amaensa rumniithaam sungnache varuwhka nong atu.

⁷Changvakonchu avomaniinii ka sungting chembe jaethiim anumpang ing kumna vokhehpang ivaruwhchak vatah. Changvakonchu ataksah khaena vokhehkho mee aeng enraar khaena ipifhuw sii ynvaeru ing varuwhmah.

⁸Laetha ynthiing ing havi ymmansiisa, amaensa rumniithaam amachu laedenpeen yndaarka aomlaenche, ynthiingna ynthiingseh apham tingche varuwhnii lam ymmong mahri.

⁹Rumniithaam havi inge ataraennii khaena buwtinnii ynsuwhna. Havi inge buwtinnii om chuve kikthuur ipeeh vokhehkho chaatha ipeeh ichii inge arum mee ae ruwthuwh mapung mampha chehmah.

¹⁰Enuw ing tuva enchii chuve isahnii innii vokhehkho entaksah ynchaamnii khaena reentaang aajaeh nong entunii vatah. Hava vakhae i yntehnii aphachu aphamahri raentaang tuva enchii chuva.

¹¹Changvakonchu kik ing ynseem-mah iruungseh vokhehkho mapung aphaseh rumniithaam thoh ynruw ing isa thengnii khaena Khrista ing Aanchung Jaethiim ing juwngsa.

¹²Keer vokhehkho siirti sii thoh ingmahka, Aafhuw sii thohrap inche aangkheng khaena vokhehpang ynthiingseh apham nache varuwhka ichen naemah ikarpeeh ymphapa.

¹³Siirchar re keer sii vokhehkho siirti ynla apuur ing ithik naka hakchaang ynthiingnii khaena manthiing nave,

¹⁴ichen naemah laetha ajaarnache Thangnang ningna buw reenrudeh ing ataksahrap chaatha ing ympideh Khrista sii inche iring Thangnang rukuum itunii khaena, ithii nong tanii ichum ynraar ynghuwnii ruwthuwhchu ajaehmeh athi ing imanthiingpeeh vaate.

¹⁵Havi khaene amaensa chongiir derna ong isiicher tanii ikarpeehnii khaena yngkheh ing ithii khaenache a-een vasah mee aeng iphapham isuwh ichen naemah chongreepchu iphanii khaenache, Aafhuw chuve ithar chongiirna eenuwmpeeh chuva.

¹⁶Ithiinii omnii nache, aseem mee inche ithiipham suwhna.

¹⁷Ithii asuwhtah nache ithiiniichu anehva, aseem meechu aring raentaang utaraenkho ruwreng omah.

¹⁸Chukhae-nache amaensa chongiir nache sii ynvaeru ing nongruw ynsen rumah.

¹⁹Vajeer chonghak inuwzii ing Mosi ing chonghak vakhae mee ae ningna ajeerraenche ama ing sii vokhehkho siir sii re keer siichu chiithoh, isen samuwr thoh, hisop abahchu chika thiimbuwr re mee vakhae taklinache ithikka ariir,

²⁰“Haviva sii ing chongiirchu hakka ynjiinii khaena chonghak ympichu.”

²¹Aanuwnache aanghakjaeh ing rumniithaam re nongruw tunii peehchae chaapchu sii inche aathikpa.

²²Vajeer chonghak inuwzii ing peehchae vakhaechu sii inche amanthiing chirpa, sii ynta chumah naka isii kuhnii yntanga omah.

²³Thangbaenna om peeh aandangnii ynsuwh aechu hava ae inge manthiing vachii ing buksa, changvakonchu thangbaenna om peeh chuve hava vakhae itanii isaseh chaatha ipifhuw ruwhna.

²⁴Ichum aanru kik ing ynseem ynthiing apham nache Khrista ing varuwhmah, ama ing thangbaen nache varuwhka inuw ynchangden nache atarae Thangnang maana yndangna.

²⁵Aanchung Jaethiim aenche ynthiingseh apham nache akumsiir sii thoh ynruw ing ivaruwh ae. Changvakonchu Khrista chuve apha vakhaena ympisahnii khaena varuwhmah,

²⁶amachu vanave Aafhuw ing laaruwpaam abaselimna ijachaam khaangva chiiva. Changvakonchu atiive suwnthar ahungchiim phane Aafhuw ing ataksah rapchu chaatha ing ympisah ajaarna isiichu irennii khaena vokhehpang yndangsa.

²⁷Laaruw mee vakhae vokhehpang thikva taruw, changvakonchu aanuwnache vajeer ombaata.

²⁸Havi vaange Khrista ingkho mee aanem ing isii enrangchu iripeehnii khaena vokhehpang ataksah rapchu ipifhuw ing ympidehsa. Ama ing isiicher khaena mahka, Aafhuw chu ahahsah mee aechu ikarpeehnii khaena avomaniinii yndangvaata.