Read Moyon Naga JEMS 4 Bible Online

JEMS 4 - Moyon Naga bible

JEMS 4

¹Laar isuwh vokhehkho ynnahnii isuwh vakhae i utanii thengka nenuw nengkaarna isuwhva? Nening-tanii isuwh churmah vakhang? Amachuve, nenuw nentaksahna nemanden om ingkhe ynnahnii nensung-sahna isuwhmah vakhang?

²Nenuw ing nemandennah, changvakonchu deencheh mahchuw; chutahnache mee nenthehnah. Nenuw kaamnachuw changvakonchu ipha chehmahchuw, akhaechuve nenuw ing havi khaene henthammah sachuw.

³Nenuw ing neniihnah changvakonchu phacheh mahchuw, akhaechuve ikenii kuurva khaena ynraar ing neniihpa.

⁴Thacha fhuwmah mee ae! Laaruw paam thoh ynchaarhak inge Thangnang thoh yngharniiva ichii i nemanghuw mahva! Achuw mee yngkheh ing laaruw paam i aarang ynsuwh naka tanave, ataksahrap Thangnang ajeeehnii mee chuva.

⁵Ynthiing thiimziihna jinge ariirsa, “Aafhuw ing ynningna ongii khaena aseem laetha aningsiih ing aruwmjaehchu nenuw ing ikaniimahva ichii ing nemandenva?”

⁶Changvakonchu Aafhuw inchembe tungsiihchu inempak ympeehsa; chutahnache jinge ariirsa, “Thangnang ing ynding mee aechu rupeehmah, changvakonchu ynjuursah ae ningnache tungsiihchu apeehnah.”

⁷Chukhaenache Thangnang derna ongruw, eentheem umlaechu chehruw amana chembe neningtanii taen-vaata.

⁸Thangnang chu ineengruw amanche ama ingkho nenuwchu eeneeng vaata. Isii icher mee ae nengkik manseengruw vokhehkho barungriir ynniimeh ynthuw nenuw nenbarungriir manthiing rasiing.

⁹Ijachaam apha ningchuwhniichu ynsuwhruw, bakhikruw vokhehkho chapruw. Nemanii ynjakha ichapting manguurruw.

¹⁰Nenuw nentaksah ingkhe Aafhuw maana ynjuursa ing ongruw, amanache ama ing nenuwchu imanruung vaata.

¹¹Kauw kanae ae, nenuw yngkheh ing yngkheh taklina isamah ing chongmahruw. Nenuw achuw yngkheh ing auw anae taklina vajeer tunave Thangnang chonghak taklina ama ichongsahva, vokhehkho chonghakchu vajeer atuva. Chukhaenache nang ing vajeer chonghak i vajeer tutaniive, vajeer chonghak amanjii meemah vachii, changvakonchu vajeer itu mee vachii.

¹²Ikarpeehkho acheh re ymmaangkho acheh vajeer chonghak eepeeh yngkhehpang omna. Chutah-nache nauw nanaechu vajeer itu nang achuwvachii?

¹³“Atanii changmahka atuknuw inuw ing khuwruung tingse simanuwka amanche kumkheh ongmanuwka vokhehkho seerbaar taartaruw ichii mee ae, atarae aphane huungruw;

¹⁴yngkhaena ynchii imbe atuknuw ynchii suwhvaate ichii nenuw manghuw mahchuw. Nenringkum i ynchiiva? Nenuw i apha mongteh pangna rudaechii bukka aanuwting omahchak khajaeh vatahchuw.”

¹⁵Havana nemanden changdenne nenuw ing jinge ichii ing nenriir inche sakvaata, “Aafhuw ing amanden ynsuwhnave, inuw ing ringmanuwka hava vakhae i tuvataruw.”

¹⁶Changvakonchu ataraenbe nenuw ing ynding chuwka ruungchichuh nachuw. Havana nengandingnii i sakmah.

¹⁷Chukhaenache isachu ynchiiva ichii manghuwka isa atuchehmah meechu akhaena chembe isiiva.