Read Moyon Naga 1 PITAR 1 Bible Online

1 PITAR 1 - Moyon Naga bible

1 PITAR 1

¹Jesu Khrista, chongthang Pitar ki ing-Pontus na, Galatia na, Kappadosia na, Asia na, vokhehkho Bithinia na ynjarnong chuwka lamkhii ing ong ae,

²Apa Thangnang ing amandenna eeteerka vokhehkho asii inche imanthiingka, Jesu Khrista chongriir ynjiinii khaena alaetha inche ymmanthiing: Neningnache tungsiih re idaechu hungnemseseh ynsuwhrasii.

³Inuw ing Jesu Khrista ampa Thangnang chu manpahtaruw. Akhaechuve aningsiih iruungpak inche Jesu Khrista ithii tanii ihangring ajaarna ithar ringkumchu ympeehpa. Havi inge iringnii ningmandenchu ymmangompa.

⁴Chukhaenache Thangnang ing amee ae khaena asiih lerchiichu iphanii inche maating yngensahva. Ama ing thangbaen nache maangmahvachii, jungthukmah-vachii vokhehkho chuwrmahvachii nengkhaena ynsiihpeehpa.

⁵achiphana mandangnii khaena thoraang atuvasah Manlaenpeehchu nenthacha ajaarna nenuwchu yngahpeehpa.

⁶Atarae apha amongpangtine reentaang aajaeh ing nentaklina imansin naka ija vakhang tanuwre, ama khaena nenrotha manrohruw.

⁷Mi ing mansehtuhkhang manuwre maangvachii sana ithi ing amen iruwpak ynthiing nenthacha ingkhe Jesu Khrista chu aandanglaenche ympah, ynjasuwh vokhehkho alaar isa nenphanii inche nenuwchu chaang yngenniiva.

⁸Imu nenphamah Aafhuw chu nenuw ing nening nemansiihsa; vokhehkho atarae nenuw ing Aafhuw chu nemumahrap ingkho nenthachasa, amanche ariirnii isamah ing vokhehkho rotharoh thohche nenrotha nemanrohsa,

⁹Nenthacha aphor inche nenlaetha karnii manlaenpeehchu nenphapa.

¹⁰Thangnang ing nenuwchu ipivachii manlaenpeeh kikthuur khaene jaephar aenche ynriimpak ing jongneh aeka vokhehkho itohneh aeka enuw ing enjeerpa.

¹¹Khrista ing ijachaam khaangnaka vokhehkho nuwting alaar isa phavachiichu, embarungriir sungna om Khrista laetha inche maen ing saarkhii pika ajeerchu utaraenche suwhva chiiva ichii khaena enuw ing enjong ae.

¹²Thangnang ing havana jaephar ae ningne amandang chuve enongtuchu entaksah khaenamahva changvakonchu nengkhaenava, thangbaen tanii ynthiing laetha ajenbathen ajaarna isa chong aatong mee aenche havi khaena nening nache emanthangpa. Havi khaene vaarmee aengkho manghuwcheh nungka enchiinah.

¹³Chukhaenache nenvakhar diiriim-chu chiimther nuwna, nenbarungriir suwrruw; amanche Jesu Khrista ing ajungindanglaenche neningna ipivachii tungsiih nache ningmanden aangkhengchu mangomjaehruw.

¹⁴Chongriir ynjii naepang ae vaang, nenuw ajae mamaenna nemanghuw mahrae isamah nemanden thohkhe aanghak ing omahruw,

¹⁵changva-kocnhu nenuwchu yngeen Thangnang ing ynthiing vaang, nentu nenri aangkheng nache manthiingruw.

¹⁶Jinge ynziihsa: “Nenuw manthiing-ruw, Ki ynthiingping.”

¹⁷Amanche mee vakhae anongtu inuwzii ing adongchang omru ing vajeer atuchu nenuw ing apa tatanuwka nengeen vanave, laaruw paamna nenring raenne akhaena ynchik ing ringruw.

¹⁸Nenuw ing nemanghuwsa amachuve nenfhuw nenpa tanii ihungom ikaanii omadeh ing iring ae eningtanii ynkarpa, amachu maangvachii sana vokhehkho rupa ing mahva,

¹⁹changvakonchu ynthiingjaeh changmahka buw areenmahdeh jaoti vaangche ichii amen iruwpak Khrista sii ynchenva.

²⁰Atak i laaruw paam aanseemmah rirae basenka Thangnang ing aateer vasahva, changvakonchu nengkhae-nache achipha iniine amandangpehva.

²¹Ithii tanii manringka alaar isa apeeh ama ajaarnache Thangnang ningna nebarungriirchu nemangamva, amatah nache nenthacha vokhehkho ningmandenchu Thangnang ningnache omba.

²²Atii nenguw nenae aechu ynthiing ing nening nemansiihnii khaenache ichumchu manjiinuwna nenlaethachu nentaksah ing manthiing nuwna, barungriir iruwh ing yngkheh yngkheh ningsiih omruw.

²³Akhaechuve iring vokhehkho ichen naemah Thangnang chongsae ajaarna maangvachii amuw ingmahka, maangmahvachii inche nenuwchu athar ymbaringpa.

²⁴Ynthiing thiimziih ing jinge ariirsa, “Mee vakhae hakchaang ichuve fuwrthoh aanghak vatah, vokhehkho enlaar isa vakhae ikho riipaar thoh aanghak vatah. Fuwr inche chongna amanche rii inche chuwrna,

²⁵changvakonchu Thangnang chongsae chuve ichuwr naemah ing omjaehna.” Haviva neningna isa chong yntongchu.