Read Moyon Naga 1 PITAR 5 Bible Online

1 PITAR 5 - Moyon Naga bible

1 PITAR 5

¹Khrista ing ijachaam apha saarkhii ipeehjaeh mahka yn-dangvachii alaar isachu karutum ynvae upa yngkheh ynsuwh ki ing, ruwrthiing sungna upa ae nenuwchu kathohsahnahchuw.

²Neningna ymmansir jao ruwrkheh aekha itumah arumah vaang taru ing, tuningka ichiipak ing icheerpeeh aeruw, kaaniiva nenchiipang ing tumahruw changvakonchu atatak ing tuningka ichii ing itupeehruw,

³neningna icheernii khaena ymmansir entakli-nakhe aafhuw vaang taru ing, enuw ing nenu manjiiva enchii yngkheh ynsuwhruw.

⁴Amana aanchung jaocheer ing ajungindanglaenche nenuw ing chuwrmah vachii alaar isa phurchiichu phavanenta.

⁵Amavaangche naepang ae nenuw upa ae dernache siruw. Amanche nenuw nengkheng yngkheh ing yng-kheh taklina ynjuursah thoh ynruw ing rukuum ynturuw, akhaechuve, “Thangnang ing ynding aechu rumah, changvakonchu ynjuursah ae ningnache tungsiihchu apeehnah.”

⁶Chukhaenache aacheh Thangnang kik dernache nentaksah ynjuursaruw, amana chembe apha acharaenche ama ing nenuwchu eethoh vaata.

⁷Nenjanii aangkheng aningna verenruw, akhaechuve ama ing nengkhaena ymmandenpeehnah.

⁸Ynriimjaehruw, hahjaehruw. Nenuwchu eejeehnii Umlae inche nongsha vaang ynlenka achuw yng-khehchu isahnii khaena ajongnah.

⁹Nenuw nenthacha mancheep nuwna atakchu rumahruw, akhaechuve havi vaange laaruw paamne nenguw nenae ae inchenkho maesa engaantuwhfhuw vasahva ichii nenuw ing manghuwruw.

¹⁰Nenuw ing apha topoh khaena ijachaam nenpha aanuwnache, ichen naemah Khrista alaar isa khaena nenuwchu yngeen, tungsiih aangkheng Aafhuw Thangnang atakrap inche imanthiing vaata, imanehther vaata vokhehkho imanpir vaata.

¹¹Aningnache ichi naemah ruwreng aangkheng om ynsuwhrasii. Amen.

¹²Thachafhuw ing kateen unae Silas ajaarna neningna itomsak ing chongthen havi kabaziihva. Ki ing nenuwchu ithohsa ningchuwka kachiinah vokhehkho saarkhii kapeehsahnah amachuve nengiirnii havi ichumtatak Thangnang tungsiih chuva.

¹³Babilon ruwrthiingna ong Thangnang ing aateer nensarnuw ingkho salaam ynjepeehsahnah, amanche kasiti Maak ingkho ympeehsahnah.

¹⁴Yngkheh yngkheh ningsiih ibeeng yntum nuwna salaam ynturuw. Khrista ningna ong nening nache idaechu omrasii.