Read Moyon Naga 2 PITAR 1 Bible Online

2 PITAR 1 - Moyon Naga bible

2 PITAR 1

¹Jesu Khrista, meenae vokhehkho chongthang ynsuwh Simon Pitar ki ing, inuw yngkhaena Thangnang vokhehkho eekarpeeh ynsuwh Jesu Khrista ichum nache kenuwthoh ynruw ing amen iruwpak thacha aanghak ing ymphahak ae ningna:

²Thangnang re inuw Aafhuw Jesu Khrista nemanghuw khaena tungsiih vokhehkho idaechu neningna henthisehseh rasiing.

³Thangnang ruwreng inche Aafhuw atakshrap alaar isa re isa inche inuwchu yngeen atakchu ymmanghuw ajaarna iringnii vokhehkho Thangnang yndennii aangkheng ynning nache ympipa.

⁴Aafhuw ing ynning nache athiseh iruungpak vokhehkho amen iruwpak chongreep vakhaechu ympisahpa, amatah nache hava vakhae ajaarne nenuw ing hakchaang inuwzii ing nemanden laaruw paamna om imaang tanii ihangring phatanuwka, Thangnang ta ynsuwh iphahakniichu nengaansuwhnii khaenava.

⁵Havi khaena rapche nenuw ing nentu nenri chaapna nencheh vakhae nenthacha taklinache isachu vemangomruw, isa nache yng-huwnii;

⁶vokhehkho ynghuwnii nache nentaksah yngahchehnii; yngahchehnii nache ikhaangchehnii; ikhaangcheh-nii nache Thangnang yndennii;

⁷Thangnang yndennii nache unaethoh ningsiihhaknii; amana unaethoh ningsiihhaknii nache ningsiihchu mangomruw.

⁸Hava vakhae i nening nache vaehmahdeh nave, inuw Aafhuw Jesu Khrista chu icheep ing ynghuwnii khaena hava vakhae inge nenuwchu nenchehmah vokhehkho aanla omahchu ibasuwmahnii.

⁹Aangkhenglaang havi aningna omah mee chuve, aningna om baruw isiicher amanthiingchu bahirka, ynneengna om amuchehmah mikchu vaang tasa.

¹⁰Ama khaenache kauw kanae ae, nenuwchu yngeen vokhehkho eeteerchu acheepnii ing athiseh ing idiktherruw, nenuw ing havi jinge tutanuwve utaraenkho nengkhi mansiimah tanuw;

¹¹vokhehkho Aafhuw Jesu Khrista alipah nache ivaruwhnii nengkhaenache ynriimjor ing ipivaata.

¹²Chukhaenache nenuw vakhae ing manghuw tanuwka neningna om ichum nache icheep ing omkhang tanuwre, havi khaene neningna apha om bakhaena manthangva kata.

¹³Ki ing khurpeenthaam sungne kaong raentaang nenuwchu ynthangpeeh chumna ichii ing kamandenva.

¹⁴Akhaechuve inuw vakhae Jesu Khrista ing kaningna ynjeerpeeh inuwzii ing, khurpeenthaam havi bathenva kachii aphachu hunganeeng hak haksa ichii kamanghuwsa.

¹⁵Amana kathik aanuwting apha vakhaena nenuw ing hava vakhae i nengaansiinii khaena kacheh vakhae tusava kata.

¹⁶Akhaechuve kenuw ing inuw vakhae Aafhuw Jesu Khrista aruwreng ipir vokhehkho atak ijungthengchu neningna kemanthang laenkhe hungsa vemansa tumah ung, changvakonchu Aafhuw aruungniichu kemikrap ing kemusah mee chupung.

¹⁷Jesu ing ampa Thangnang ningtanii athang isa vokhehkho alaar isachu apha khaenache, iruungpak alaar isa ampa senruwr ing ajeriir, “Havi kaning kamansiihpak kasapa chuva, ataklina ki inempak pensakning.”

¹⁸Vokhehkho kenuw ing Aafhuw thohche ynthiing bungna kengonglaenche, hava senruwr i thangbaen tanii kenuw ing kensiiva.

¹⁹Amatah nache keningna om Thangnang tanii chongsaechu athiseh ing icheep sehsehva; hava chongne nenuw ing khuw avaarmahri raentaang vokhehkho nenbarungriirna ireng ziing aesiichu ahungsuwh mahtaang, ynthim aruwvaena jaemi ireng nache nenbarungriir nemanruwh vaangkhe nenuw isajaeh ing turuw.

²⁰Ynthiing thimziih ing ajeerchaap vakhae i barungriir tanii ihungsuwh yntanga omah ichiichu amaensana manghuwruw.

²¹Thangnang chongjeer i mee ningtanii ihungsuwh changchii mahva, changvakonchu ynthiing laetha ing ataklina ongvaangka amanchongpehva.