Read Moyon Naga 1 JOHON 2 Bible Online

1 JOHON 2 - Moyon Naga bible

1 JOHON 2

¹Kaning mansiih naepang ae, nenuw vakhae isii nentuniimah khaenache ki ing neningna hava vakhae i kabaziihva. Achuw yngkheh ing isii tunave, apa Thangnang ningna inuw yngkhaena eenuwmpeeh Jesu Khrista omna.

²Changpang mahka yntaklina isiicher vakhaechu Aafhuw Jesu Khrista jaarna yngkuhva vokhehkho inuw yngkhaenapang khommahva, changvakonchu mee vakhae isiicher chukhomva.

³Inuw ing Aafhuw chonghak vakhae manjii manuwve, Aafhuw chu inuw ing ymmanghuwva.

⁴Achuw yngkheh ing Aafhuw chu kamanghuwsa tanaka achonghakchu manjiimah nave, changchii meechu ynchaenii chong ing ichongva vokhehkho aningna ichum omahva.

⁵Changvakonchu achuw yngkheh ing Aafhuw chongchu manjiinave, Aafhuw chu atatak ing aning amansiih mee yngkheh chuva. Chukhaenache Thangnang thoh onghakmuw ichiichu iseengjaeh ing ymmanghuwsa.

⁶Achuw mee yngkheh ing Thangnang thoh onghakping tanave, Jesu Khrista ing atu arichaap manjiiva chiiva.

⁷Kaningsiih kaarang ae, hava kabaziih i aden ing itharpeh chonghak mahva, abasenlimna heom nemang-huw vasah baruw chonghak vatah.

⁸Changvakonchu ki ing neningna atarae kajebaziih chonghak i tharna, akhaechuve hava ichum i Khrista ningna vokhehkho neningna yndangna. Yngkhaena Ynchii imbe ynthimchu aaraenpa amanche ichum ireng inche aenpa.

⁹Achuw yngkheh ing irengna ongning tanaka auwnaechu batir nave, ama meechu ataraenpha ynthim nache ongjaehna.

¹⁰Achuw mee yngkheh ing auw anaechu aning mansiih nave, ivaar nache ongva, mee isiiting mambuknii vachii aningna yntanga omah.

¹¹Changvakonchu auw anaechu batir nave, ynthim nache ongjaehna; ama mee inche uting isiping ichii manghuwru ing ynthim nache sina, yngkhaena ynchii imbe ynthim inche amamupa.

¹²Kasitiae, ki ing neningna kabaziihnah, akhaechuve Khrista ajaarnache nentaklina isii vakhaechu akuhchirpa.

¹³Ampa vakhae neningna kabaziihnah, akhaechuve abasenlimna heom vasahva ichii nenuw ing nemanghuwsa. Suwnthar naepang ae neningna kajebaziihnah, akhaechuve isiichu nenuw ing nenchehpa.

¹⁴Kasiti ae neningna kajebaziihnah, yngkhaena ynchii imbe apa ichiichu nenuw ing nemanghuwsa. Ampa vakhae neningna kajebaziihnah, nenuw ing abasenlimna heom vasahva ichii nemanghuwsa. Suwnthar naepang ae neningna kajebaziihnah, amachuve nenuw pirther nachuw; amanche neningna Thangnang chongchu omna, vokhehkho isiichu nenchehpa.

¹⁵Laaruw paam vokhehkho laaruw paamna om peehchae vakhae i nening mansiih mahruw. Laaruw paam i nening mansiih tanuwve, apa Thang-nang chu nening mansiihmah sachuw.

¹⁶Laaruw paamna om aangkhenglaang ynsha ing eedik isii icher, laaruw mee ing amu vokhehkho aadik vakhae, mee ing aangaenii laaruw paamna om vakhae i apa Thangnang ningtanii mahdehva; hava vakhae ichuve laaruw paam tanii vatah.

¹⁷Laaruw paam vokhehkho asungna om mee ing aadik vakhae i achiimnii apha naena; changvakonchu Thangnang ing amanden amanjii mee vakhae chuve ichen naemah ing ringvaata.

¹⁸Kasiti ae achiniichu junganeengsa! Khrista arumah meechu thengvaata ichii i neningna maen ing ynthang vasahva; atiive Khrista arumah inempak hungindangsae, havi inge achiniichu ynneengsa ichii ymmang-huwsa.

¹⁹Hava mee ae i inuw yngkaar tanii mee mahpae, chukhaenache inuwchu ymbathenpae; enuw ae i yngkaar taniipae vanave yngkaarna ongvachiipae. Amatah nache ymbathen ae inge inuw yngkaar tanii mahpae ichii iseengjaeh ing yndangnii khaena ymbathenpae.

²⁰Changvakonchu nenuw chuve laetha ynthiing ing ymmansip vasahva, chutahnache nenuw vakhae ing ichumchu nemanghuwsa.

²¹Chukhae-nache neningna kajebaziih i nenuw ing ichumchu nemanghuwmah khaena mahva; changvakonchu nenuw ing nemanghuw vasah khaena chenva, vokhehkho ynchae ichii ive utaraenkho ichum tanii mahva ichii nemanghuwsa.

²²Changmanuwve, mee ynchae ichii i achuw chuva? Jesu i eekarpeeh chumahva tanaka ariirchu Khrista arumah mee chuva-ama ing ampa vokhehkho asapa chu rumahsa.

²³Achuw yngkheh ing asapa chu rumahnave ampa chukho arumahva, achuw yngkheh ing asapa chu runave ampa chukho aruva.

²⁴Chukhaenache nensii vasahchu neningna omjaeh rasii. Nenuw ing abasenlimna nensii vasahchu nening-na omjaeh nave, nenuwkho apha omba khaena asapa re ampa ningnache omjaehva nenta.

²⁵Havirem iva Khrista ing yngkhaena chongreep atuvasah ichen naemah ringkumchu.

²⁶Havana kajebaziih i nenuwchu manchae kenchuw ynchiiae khaenava.

²⁷Changvakonchu nengkhaena chembe Khrista ing ynthiing laetha inche ymmansip vasahva. Havana laetha i neningna aomraentaang, nenuwchu ynchuwnii ompakmah. Laetha inche aangkhenglaang ymmanchuwpa, ama ing ymmanchuwchu ichumva, ichummah chumahva. Laetha ing ymmanchuwchu manjiiruw amanche Khrista thohche yngkhehpang ing omjaehruw.

²⁸Kasiti ae, apha om bakhaena ama thohche ynneengjaehruw, ama ajungtheng iniina aandanglaenche thona isa ing ynsipnii khaena amanche ynning ynjak ing ymmae ithuur ymphaniimah khaena chenva.

²⁹Khrista ichuve ichum ynthiing chuva ichii i nemanghuwsa; atiive nenuw manghuwruw amachuve, ichum atu mee aechu Thangnang siti chupae.