Read Moyon Naga 1 JOHON 3 Bible Online

1 JOHON 3 - Moyon Naga bible

1 JOHON 3

¹Enruw Thangnang ing aajaehmeh aning ymmansiihva! Aningsiih i aajaehmeh ipirva ynchii imbe, inuw vakhae i Thangnang sitichu ynsuwhsamuw-atatak ing ynsuwh-samuw. Havi khaenava laaruw paam mee ing inuwchu ymmanghuwmah i: Yngkhaena ynchii imbe Thangnang emanghuwmah tahnava.

²Kauw kanae ae, atiive inuw Thangnang siti samuw, changvakonchu ynchii ynsuwhvataruw ichii chuve manghuwkiir mahmuw. Khrista inche aandanglaenche inuw i ama vaang tavataruw, akhaechuve atakchu iseengjaeh ing muvataruw.

³Achuw yngkheh ing Khrista ningna ningmanden mangom nave Khrista ing ynthiing vaang atak manthiing vaata.

⁴Achuw yngkheh ing Thangnang vajeer chonghakchu bakhii nave isii miraarchu aningna omna. Akhaechuve vajeer chonghak yngkhii ichuve isiiva.

⁵Khrista ijungtheng i isii kuhnii khaenava vokhehkho aningna isii yntangakho omah ichii i nemanghuwsa.

⁶Chukhaenache achuw mee yngkheh ing Khrista thoh ongjaeh nave, ama ing athar vokheh isii tumahnii; changvakonchu isiichu tunave Thangnang chu mumahsa vokhehkho manghuwmahsa.

⁷Kasiti ae, achuw ingkho nenuwchu imanchaemah rasiing, Khrista ing ichum ynthiing vaang inge achuw yngkheh ing ichumchu tutanuwve ichum ynthiing meechu vachuw.

⁸Achuw yngkheh ing isiichu tujaehnave ama umlae meesa, akhaechuve abasenlimna umlae chuve isii atuva. Umlae ing atu ari chaapchu mamaangnii khaena Thangnang sapa i ijuwngva.

⁹Achuw yngkheh inche isii tujaeh-mah nave Thangnang siti chusa, akhaechuve Thangnang taklina omchu aningnakho omsa; amanche Thangnang chu ampa vakhaka isiichu tumahsa.

¹⁰Havi inge Thangnang sitiae re Umlae siti aantheepniichu iseengkiir ing amandangsa. Achuw yngkheh ing ichumchu tumahnaka vokhehkho auw anaechu aning mansiihmah nave Thangnang siti chumahsa.

¹¹Abasenlimna nenuw ing nensii isa chongchu haviva; inuw yngkheh yngkheh ningsiih omvaan chiiva.

¹²Inuw Ken khavaang tamah vaan-chiiva; amave umlae meeva, amatah nache anaepa Abel athehva. Ken ing yngkhaena amachu athehva? Akhaechuve Ken ing atu ari chaapchu ynraarka, anaepa Abel ing atu ari chaapchu achumtah nachenva.

¹³Kauw kanae ae, laaruw paam mee aeng ibatir khang ae nakho ngikmahruw.

¹⁴Ithii bathen muwka iring tingche huungsamuw ichii inuw ing ymmanghuwsa, amachuve unae aechu ynning ymmmansiih tahnava. Achuw yngkheh ing aning mansiih chehmah nave ithii ruwreng dernache ongjaehna.

¹⁵Achuw yngkheh ing auw anaechu batir nave ama meechu mikthehva, miktheh khaena chembe ichen naemah ringkum omahsa ichii i nemanghuwsa.

¹⁶Havi inge ningsiih i ynchiiva ichiichu ymmanghuwsa amachuve, Khrista ing inuw yngkhaena aringkum ympidehsa. Chukhaenache inuwkho unae khaena ynringkum i pivaan chiiva.

¹⁷Savangpa yngkheh ing auwnae ing adeen samahchu munaka, engkhaena abarungriir imongmah nave, ynsaangkhe Thangnang kaning kamansiihva tachehvate?

¹⁸Kasiti ae, ningsiih ichii ive chong ymbuwh muwka ichonghak chumahva; nong ing yndang ichum ningsiih chuva chiiva.

¹⁹Havi inge ichum tanii vamuw ichii manghuw vaanchiiva; amanche Thangnang ningna barungriir mangam vaanchiiva.

²⁰Ruwthuwhna ihungsuwh ing imanraar nave, Thangnang chuve ruwthuwh ruwreng chungna mangkaangsehna vokheh-kho aangkhengna amanghuw chirsa ichii inuw ing ymmanghuwsa.

²¹Chu-tahnache kauw kanae ae, ruwthuwhna ihungsuwh ing imanraarmah nave, Thangnang maekungna thona isa yndeensa.

²²Aningna ynniihsah vakhae ymphasa, akhaechuve achonghak ymmanjii vokhehkho apensannii yntutah nachenva.

²³Ama achonghak chuve Jesu Khrista ningna ynden vokhehkho Khrista chonghak ing ariir yngkheh re yngkheh ningsiih omva nenchiiva ichii ynjiicheh chuva.

²⁴Achuw yngkheh ing Thangnang chonghakchu manjiinave, Thangnang thohche yngkhehpang ing onghaksa. Thangnang ing laetha ynthiing ynningna ynjepeeh khaenache, Thangnang re inuwchu yngkhehpang ing omsamuw ichii ymmanghuwsa.