Read Moyon Naga 1 JOHON 5 Bible Online

1 JOHON 5 - Moyon Naga bible

1 JOHON 5

¹Jesu chu Eekarpeehva ichii ing athacha mee chaapchu Thangnang sitiva; vokhehkho achuw mee yngkheh ing ampachu aning mansiih nave asiti chukho aning amansiihva.

²Jinge ichii ing inuw ing Thangnang siti aechu ynning ymmansiihsa ichii ymmanghuwsa: amachuve Thangnang aning amansiih vokhehkho achonghak vakhae amanjii iva.

³Thangnang chu aning amansiih ichii ichuve achonghak ynjii chuva vokhehkho achonghakchu inuw yngkhaena iruwpak mahva,

⁴akhaechuve Thangnang siti chaap ing laaruw paam achehnah vokhehkho inuw ynthacha inche laaruw paam ymbathiih chehva.

⁵Achuwva laaruw paam achehchehchu? Jesu i Thangnang sapava taka athacha meepang inche achehcheh vatah.

⁶Chii vokhehkho sii thoh ynruw ing ijuwngchu Jesu Khrista va; chiipang thohchen mahva changvakonchu chii re sii thohche ijuwngva. Amanche laetha rap inche havi chumna taka saarkhii apeehsa, akhaechuve laetha ichuve ichumva.

⁷Saarkhii ynthummeh omna:

⁸Ynthiing laetha, chii vokhehkho sii ipae; hava ynthummeh ae inge ynchimchak ing saarkhii apeehsae.

⁹Inuw ing mee ningtanii saarkhii ynthachanah, changvakonchu Thang-nang saarkhii chuve iruungsehva. Amanche Thangnang ing asapa khaena saarkhiichu apeehpa.

¹⁰Chukhaenache Thangnang sapa ningna athacha mee inche havana saarkhii i abarungriirna omna, changvakonchu Thangnang athachamah mee chuve ataksahchu mare om ababuwnah; akhaechuve Thangnang ing asapa khaena saarkhii pika ariirchu thacha mahsa.

¹¹Saarkhiichu haviva: Thangnang ing ichen naemah iringnii ympeehpa, havana iringnii ichuve asapa ningna omna.

¹²Asapa aru mee inche iringnii aphapa; achuw yngkheh asapa arumah inche iringnii phamahsa.

¹³Thangnang sapa rumingna athacha nenuw vakhae ningna ichen naemah iringniichu omna ichii ynghuwnii khaena ki ing neningna kajebaziihva.

¹⁴Haviva Thangnang ningna barung ngamniichu: Ama ing amanden inuwzii ing inuw ing niihsa manuwve ynsiipeehnah.

¹⁵Chukhaenache inuw ing aningna yngheniih chaapchu asiisa ichii manghuw manuwve, inuw ing aningna yngheniih vakhaechu kaphapa ichii ymmanghuwsa.

¹⁶Achuw yngkheh ing auwnae ing isii atu munave, akhaenache ama ing thampeeh rasiing amanche Thangnang ing iringnii ringkumchu pivaata. Havi kariirnii chuve ithii phaniimah isii omna ichiichu kariirniiva. Ithii phanii isii chukho omna. Amachu havi khaene thamruw kachiimahva.

¹⁷Ichummah nongchaap isiiva, amanche ithii phaniimah isii omna.

¹⁸Thangnang ningna ong mee vakhae ing isii tujaehmah ichii inuw ing ymmanghuwsa; Thangnang ningna ong mee inche ataksah rukuum yntusana, amanche isamah ing atakchu vaparchehmah.

¹⁹Inuw i Thangnang tanii vamuw, vokhehkho laaruw paam aangkheng i isamah dernache ongna ichii ymmanghuwsa.

²⁰Thangnang sapa ing juwngka ynningna ynghuwnii ympeehpa ichii ikho inuw ing ymmanghuwsa, atak ichuve ichum Thangnang chuva. Inuw vakhae i asapa thoh yntuw ing ichum Thangnang thohche ongmanuw. Havi ichum Thangnang chuva vokhehkho ichen naemah ringkum chuva.

²¹Kaning mansiih kasitiae, ichummah lae ruthaksii tanii yndah ing ongruw.