Read Moyon Naga AMANDANG 1 Bible Online

AMANDANG 1 - Moyon Naga bible

AMANDANG 1

¹Jesu Khrista ningtanii amandang i Thangnang ing ithupak ing hungsuwh vachiichu ameenae ae ningna amansiinii khaenache aningna apeehva; amanche havi ynghuwnii khaenache avaarmee chu ameenae Johon ningna ajenbathenpa.

²Amana hava vakhae i kamu taka Johon ing mee vakhae ningnache ariir. Amachuve Thangnang ing ajeer chongsae re Jesu Khrista ing ichumva taka amandang vakhae chuva.

³Havane ynthin ynthiing chongsae vakhae i aapa, aarungae vokhehkho amanjii mee vakhaechu nungae ringkum aphachupae. Akhaechuve hava vakhae i hungsuwhchir vachii apha ynneeng tangsa.

⁴Johon ing Asia sungna om ruwrthiing sariina abaziih: Ataniinii, ajaenniinii vokhehkho hungvivachiina amanche Aafhuw iruwngpham ongnii maana ong ae laetha sarii tanii tungsiih re idaechu neningna omrasiing,

⁵amanche thachafhuw om saarkhii, ithii tanii hangring aren vokhehkho laaruw paam iruwng ae aapuh Jesu Khrista tanii chukho omrasiing. Inuw vakhaechu aning ymmansiih vokhehkho isii tanii asii inche yngkar,

⁶amanche Thangnang rukuum tunii khaena inuwchu iruwng lipah jaethiim ymbasuw aningnache alaar isa vokhehkho aanchung ruwreng omrasiing. Amen.

⁷Enruw, ruwrduh kaarna jung-thengna! Atakchu aatheh ae ynvae ing vokhehkho laaruw paam mee vakhae inche muvaatae. Amana laaruw paam mee vakhae ing akhaena bakhik vaatae. Havi suwhrem vaata.

⁸Ataniinii, ajaenniinii vokhehkho hungvivachiina Aacheh Aafhuw Thangnang ing ariirnah, “Ki aren chuping vokhehkho achiniii chuping.”

⁹Nengarang Johon ki nenuw thoh thangbaen iruwngpaam khaena ijachaam akhaang nong nentufhuwhak ing, Thangnang alaar isa mandangnii vokhehkho Jesu ing ajemandang ynthiing chongsae vakhaechu katongtah nache chiirikpaamna om Patmos ichii nache yngkhum ingka ongping.

¹⁰Aafhuw aanii nikhehna laetha ynthiingna kaonglae tumpeeh ynling varaang ichii ipirpak iruur yngkheh ing ariir katuknungna kasii,

¹¹“Nasii chaap i thiimbuwrna baziih nana Asia sungna om ruwrthiing sarii ae ningna, amachuve Ephisia, Smilna, Pargamum, Thijataria, Sardis, Phildelphia amanche Lodisia eningtinge bathenla taka ariir.”

¹²Achuw senruwrva ta ingka kavaanlehtah nache, jaemi ynrengnii asae sarii om kamupa.

¹³Jaemi ynrengnii ruwrak nache Mee Sapa pingeng ichii apeendiir inche akhi ajupha vokhehkho ynchiimnii sana inche abarungna abadaar yngkheh kamu.

¹⁴amanche asamchu samuwr vokhehkho ruwbuwr ivaarvaang ipuur, amikchu mi ichuwhvaang ichiisuwhpak,

¹⁵akhichu yntaeh vasah ynleen siirsiir pingeng ichiivaang vokhehkho aaruurchu suwr rusavaang ipir,

¹⁶akik tachang ing aesii sarii achi, abae tanii chem yngee asae ynnii itheng. Amaechu siimchim inii vaang ynleen.

¹⁷Atakchu kamu tahnache akhi basuwrna ivatiihsah ing. Changlaenche akik tachang inche kataklina siika ariir, “Ynchik mahra, ki aren chuping vokhehkho achinii chuping.

¹⁸Ki iring chuping! Ajae ithii ing, changvakonchu atii ring ingka ichen naemah ing paarning; vokhehkho ithii re longkong longtingchu kachipa.

¹⁹Atii ynchii isuwhva, amanche ynchii hungsuwh vachiiva ichii namu vakhae i baziihra.

²⁰Kakik tachangna namu ichiisuwh aesii sarii re jaemi ynrengnii sarii ae chuve: Aesii sarii inge ruwrthiing sarii rukuum itu vaarmee chupae amana jaemi ynrengnii sarii inge ruwrthiing sarii chupae.”