Read Moyon Naga AMANDANG 11 Bible Online

AMANDANG 11 - Moyon Naga bible

AMANDANG 11

¹Khaap uurnii thor pingeng ichii yngkheh kaningna ipika ariir, “Hangiir nana Thangnang rumniieen re thiimkung kha vauurla, amanche rumniieenna arum mee aekha teen aera.

²Changvakonchu vaapa ngiirnii taangtanii chaap uurmahra; amakha mara; ama aekha reentaang mee aeting ympivasahva, enuw ing ynthiing khuwruung i inii nisommanrii ariinii sungna bavae ae naka chiiniirii vachiipae.

³Kasaarkhii ipeehnii khaena mee ynniimeh jenchiir vakata, amanche enuw ing inii lising yngkheh chanii somruk sungna kajaera tongvaatae.”

⁴Enuw ensaarkhii ynniimeh chuve oleep thing re jaemi ynniimeh iva amanche ataraene laaruw paam Aafhuw maensokna ngiirnae.

⁵Achuw yngkheh ing enuwchu mansuh nave embae tanii mi hangchuwh naka basuwm vaatae; Achuw yngkheh ing entaklina mansuh kata achii vakhaechu thehvaatae.

⁶Minvaen yndaarnii ruwreng endeensa, amachuve enuw ing isa chong enjeer raenche khuwchu suwrmahnii, enuw ing yndenruw manden ae nave chiichu sii abasuwnii, laaruw paam manvar ae naka ina pungnii changchii ruwrengchu endeensa.

⁷Isa chong entongchu emanchi chakna idong naemah khur tanii saklaang hungsuwh naka entaklina laar tuknaka thehvaatae.

⁸Amana ithii aechu eng Aafhuw enthehnii Sodom re Ijeep lam sungnache yntor vaatae.

⁹Inii nithum abarii sungna laaruw mee vakhae ing ibuwr vaatae amana idimkho rumahnii ae.

¹⁰Amana ithii ae mee ynniimeh khaene laaruw paam mee chaap ing enrotha rohnaka yngkheh yngkheh kikthuur ympiae naka kuurva tuvaatae, akhaechuve havana jaephar ynniimeh ae inge inempak laaruw mee ningna ijachaam enjenreen tahnava.

¹¹Changvakonchu inii nithum aanuwting Thangnang ihuwhchu eningna ruwhnaka hangring vataereeh, changlae mee vakhae ing inempak entakchu chiivaatae.

¹²Jaephar ynnii aenche thangbaen tanii senruwr ing hava tingnge hangkarruw achiichu ensii. Amana aarumah mee aenche engenlae ruwrduh kaarna thangbaen phanii ing ynjaapsae.

¹³Changlaen siimche ipirpak linglaang thengsa amanche khuwruung suumchu jungtiihka mee lising sarii ithii ae amana areh aenche entu enrina ynraar chaap ikuhnii khaena thangbaen Thangnang chu enthamsah ae.

¹⁴Avomaniinii ijaniichu ynlaensa: Enruw, avomanthumnii ijaniichu theng ynthongna.

¹⁵Amana avosariinii vaarmee inche atumpeehchu atumtah nache thangbaen tanii iruur aajaeh ing jinge ariirchu kasiipa, “Laaruw paam taklina ipuhnii ruwrengchu Aafhuw vokhehkho Eekarpeeh ningnache, ichen naemah ing ipaar ynsuwhrasiing.”

¹⁶Thangnang maekungna iruwngpham ongniina ong upa ae somnii arii manrii aenche Thangnang chu rum aeka

¹⁷jinge emampah ae, “Kemanpah sahnahchii Aacheh Aafhuw Thangnang! Nang chuve ataraennii amanche ajaennii vachii, atiive naruwreng richiika ipaar nabasenpa!

¹⁸Thangnang yndenmah mee aenche enthir fhuwrsa, changvakonchu naepang upa naeru ing ynthiing ae, nangchu ynchiisah ae, nameenae ae vokhehkho jaephar aechu enongmen ipeehnii amanche laaruw paam aamaang aechu mamaangnii khaena aphachu ahenphapa!”

¹⁹Thangbaen nache Thangnang rumniieen ynrangka asungna chongiir upu omchu kamu; changlaenche tenglungpa ynleh iruur rusa, linglaang vokhehkho ipirpak ing iriir ibuw.