Read Moyon Naga AMANDANG 13 Bible Online

AMANDANG 13 - Moyon Naga bible

AMANDANG 13

¹Amana saklaang yngkheh chifhuw tanii hungsuwh kamu. Ataklina arusae sarii, arakii suum amanche arakii ae nache phurchii yngkhehter omka enrusae nache Thangnang manchaenii ruming yngkhehter ynziihsa.

²Himfhuw pingeng ichii saklaang yngkheh kamu akhichu ivom khika amana abae inche nongsha pingeng ichii. Aningnache tangkhonglae hae, iruwngpham ongnii vokhehkho aatuaricheh aangkheng amansirpa.

³Arusae yngkhehchu asuh ing om changvakonchu idam. Amana mee vakhae ing ingik ae thoh ynruw ing aanuw enjii.

⁴Mee aeng tangkhonglaechu enrum, ama vaang saklaang tingkho aacheh ruwrengchu apeehtah nache mee aeng hava saklaang ikho jinge enrum ae, “Saklaang havi pingeng ichii achuw omne vokhehkho ataklina achuw ing inafhuwcheh vachiiva?”

⁵Saklaangchu ningharnii vokhehkho ynchaenii chong apeeh amanche tha somanrii ariimanrii yncheh jaarniikho ruwreng apeehpa.

⁶Abae mangaangka Thangnang taklina vokhehkho thangbaenna ongchaap ruming parka iraang.

⁷Amana athar ynthiing ae taklina laar tuknaka chehnii vachii aningna apipa, amanche jaati chaap, chong vokhehkho lipah vakhae taklina ruwreng apeehpa.

⁸Laaruw paam mee vakhae ing rumvaatae; laaruw paam anseemmah rirae Jaoti thiimbuwr iringniina ruming ynziih mee vakhae mahnaka, reentaang vakhae inchembe atakchu rumvaatae.

⁹“Aana ipaar chaap inche siisa rasiing!

¹⁰Ynsuwrvachii chaapchu ynsuwrvaatae; chem ing ynthehvachii chaapchu chem ing thehvaatae. Havi Thangnang ynden ynthiing aenche ikhaangcheh re thacha omvachiipae achiiniiva.”

¹¹Reentaang saklaang yngkheh chuve laruw tanii hungsuwh kamupa. Atakchu Jaoti vaang arakii ynniimeh suwmka tangkhonglae vaang ichong.

¹²Ahaarpa tangkhonglae kuurna aruwreng chaapchu abaraknii amana laaruw mee chaapchu ahaarpa saklaang asuh idamchu amanrumpae.

¹³Mee aeng muva enchiina mi seemka thangbaen tanii laruwting ymbuknii iruungpak laetho amandang.

¹⁴Saklaang kuurnache itu aruvakhae laetho inche laaruw mee vakhae aasiirting amansiae, chem ing suhka ihangring kha aruthaksii ynseem naka irumnii khaena ariirpa.

¹⁵Ahaarpa saklaang ruthaksiichu ihuwh thinnii khaena avomaniinii saklaang inche arupa. Amana chembe saklaang ruthaksii inche chongcheh naka arummah chaap aechu thehvaata.

¹⁶Saklaang inche isiing, iruung, savang, sara, suwh ae, ruwkuwrjoh ae, amanche mee vakhae chaap engkik tachangna changmahka embachirna buwtinnii amantuae.

¹⁷Havana buwtinnii i omah mee achuw ingkho peeh ynrii vokhehkho ijuwr chehmahnii ae; ama chuve saklaang ruming changmahka aruming masing chuva.

¹⁸Havane losing suwhnii omna. Amanghuw mee inche sha masingchu teenrasii akhaechuve havi mee yngkheh masingva; amana amasing chuve 666 va.