Read Moyon Naga AMANDANG 17 Bible Online

AMANDANG 17 - Moyon Naga bible

AMANDANG 17

¹Kamfhuw sarii adeen vaarmee sarii sungna yngkheh inche kaningna vakka ariir, “Huungla, ichuwhmahna athang isipak iva inempakna ong ama inche vajeer phavachiichu ki ing mansii kachii.

²Laaruw paamna iruwng chaap aeng rupanuw thohne naamak nongchu entuhakpa, vokhehkho laaruw paam mee aechu naamak juw inche baruwsae.”

³Amana laetha inche paamfhuw tingche iruwka, vokhehkho Thangnang chu thosii thosamah ruming ing isip, arusae sarii, arumi suum om isentuh saklaang taklina ong rupanuw yngkheh ki ing kamupa.

⁴Amana rupanuw inche isentuh mare om peen singka, sana ing, amen iruw rung ing amanche mukta ing ynthong; vokhehkho akikna yntirsuwh ing isip, amachuve naamak nong iseengmah peeh ing isip sana kam achi.

⁵Abachir nache ithuwhpak chong, iruungpak Babilon, ichuwhmah rupanuw vokhehkho laaruw paamna yntirsuwh peeh amnuwva ichii ing ynziih ruming om.

⁶Amanche ynthiing vokhehkho Jesu khaena atheh ae saarkhii sii inche ynruw rupanuw amachu ki ing kamupa. Ki ing atakchu kamutah nache ariirfhuw chahdeh ing karuw riimsa.

⁷Amana vaarmee inche kaningna ariir, “Nang ynchii khaena naruw iriimva? Ki ing naningna rupanuw re saklaang ing enreen arusae sarii, arumi sarii om chong ithuwhpakchu riirpeeh kachii.

⁸Nang ing saklaang namukha atii ongmahsa, ama kurdong tanii hungsuwh ynthongna, amanche imaangnii tingche ama ing sina. Amana laaruw paam abasen-limna iringnii thiimbuwrna enruming ynziihmah laaruw paamna ipaar aenche saklaangchu ynsaangkhe ichiivakho ta ae naka, vokhehkho ithengchu emuraenche inempak enruw riimvaata.”

⁹“Havane losing suwhnii omna. Arusae sarii khachuve rupanuw inche aongnii bung sarii chuva;

¹⁰amanche arusae aekha chuve iruwng sariipae; rungameh ae chuve buksae, yngkheh chuve omna, reentaang ae chuve thengmahri ae; amanche ama ing thengnaka apha topoh ongvachii ing omna.

¹¹Amana iring vasah chang-vakonchu iringrihmah saklaang ataksah rapchu avairiihnii iruwngva, vokhehkho avosariinii taniiva, ama ing imaangnii tingche sina.”

¹²“Nang ing namu vasah arakii suum om aekha iruwng lipah ataraen phapha aphamahri iruwng suum chuva; changvakonchu enuw ing iruwng ae vaang saklaang thohche apha yngkheh khaenapang ruwreng phavaatae.

¹³Enuw inge barungriir yngkhehpang ing omsae amanche enghae vokhehkho enruwrengchu saklaang ningtingche empeehpa.

¹⁴Enuw ing Jaoti taklinache laar tukvaatae, changvakonchu Jaoti inche a-een vasah ae, aateer vasah ae vokhehkho thachafhuw aanuwzii ae thohche ynchangnaka enuwchu chehvaata, akhaechuve ama i Aafhuw na Aafhuw va amanche iruwng vakhaena iruwng va.”

¹⁵Amana vaarmee inchenkho kaningna ariir, ichuwhmah rupanuw ing chii omchaap taklina ong nang ing namu ae i mee ae, jaati ae, suwnthar siti ae vokhehkho chong chaap ae chupae.

¹⁶Nang ing arakii om suummeh re saklaang namu ae inge ichuwhmah rupanuw i batirvaatae; enuw ing adeensah vakhaechu ripeehchir ae naka aruwhnaen ing mavaatae; enuw ing ashachu savaatae vokhehkho mi sungna chenkho bathu vaatae.

¹⁷Thangnang chongjeer chaapchu asuwhchir mahri raentaang ama ing amandenchu itunii khaenache barungriir yngkhehpangnii vokhehkho saklaang ningnache iruwngpaam pinii khaenache embarungriirna athinpa.

¹⁸“Nang ing namu rupanuw i laaruw paam iruwng vakhae taklina ipaar iruungpak khuwruung chuva.”