Read Moyon Naga AMANDANG 18 Bible Online

AMANDANG 18 - Moyon Naga bible

AMANDANG 18

¹Havi aanuwdehna iruungpak ruwreng adeen amanche aningtanii isaseh ireng thohche ynruw ing, thangbaen tanii vaarmee inche laaruw paamna ijuwngchu kamupa.

²Ama ing ipirpak senruwr inche va-uungsa: “Sanuwchu tiihsa! Ipirpak Babilon chu tiihsa! Atiive umlae ae ongniichu ynsuwhsa, ynthiingmah laetha chaap ae vokhehkho ynthiingmah ae, yntirsuwhpak vaati ae ongniichu ynsuwhsa;

³akhaechuve ynthiingmah vakhae ajuw inche mee vakhaechu baruwpohsa, vokhehkho laaruw paam iruwng vakhae inche naamak entuhakpa, amana laaruw paamna lerchii itaar ae inchenkho ama inungae ajaar inche savangchu hungsuwhsae.”

⁴Havi aanuwnache thangbaen tanii senruwr yngkheh ing ariir kasii, “Kamee ae, nenuw sanuw kha aningtanii hungsuwhruw, changmahnave ataklina isii omnakhe, vokhehkho vajeer phavachii nakho ynvaeva nenta!”

⁵Isii arang ingkhe thangbaen phanii ing hanganjaapsa, vokhehkho Thangnang ing ichuwhmah anongtu vakhaechu aansiichirpa.

⁶Ama ing ympeeh vaangkhe aningna chenkho piruw, amanche anong inuwzii ingkhe aningna manthuw nuwna piruw; ama ing amanvaenohnii kam nakhe arutum manthuw nuwna manvaenohruw.

⁷Aajaehmeh ataksahchu ympahva vokhehkho ikeva, havithoh ynchimchak ing ijachaam ijaniichu aningnache piruw. Asanaensah ing ariirnah: Hane ki iruwngnuw ing ongning, ki muwkhuwnuw mahping, ki ing ijachaamchu utaraenkho manghuw mahning!

⁸Havi khaenache inii nikheh pangna ataklina riirae mangkhiing, vokhehkho venchaam chiilaar ama ing phavaata. Mi ing kaangvaata, akhaechuve ataklina vajeer atu i Aacheh Aafhuw Thangnang va.

⁹Amana rupanuw thohne naamak ituna ikaam ae laaruw paam iruwng chaap aeng ikaang mikhuwhchu emuraenche uung aenaka chappeh vaatae.

¹⁰Enuw ingkho laarkhehting ngiirvaatae, akhaechuve sanuw ijachaam nache ynvaeva enchii ynchik aenaka tavaatae, “Ijaniisapa! Ijaniisapa! Nangve iruungpak khuwruung vachii, nangve ipirpak khuwruung vachii, O Babilon! Apha mongtehpang sungna nataklina vajeer thengsa!”

¹¹Lerchii itaar laaruw mee aenche akhaena chap aeka ajapeehpae, akhaechuve mee achuw ingkho ijuwrfhuw peehchu athar vokheh iriipeeh mahsae,

¹²achuw ingkho ensana, rupa, amen iruwpak rung ae, vokhehkho amen iruw ynreenrung, isa isa peen, isen re hikok machu peen, la, amanche isen peen; amen iruwpak thing chaap amanche busae ha tanii ing ynseem peehchae vokhehkho pithrae, siir re ynnaarjaeh rung;

¹³amanche Sinnamon, maromaram, ynthufhuw barim isa, mir ichii maro, vokhehkho ningsiihnii richiibarim; vomrip vokhehkho thou, jaam re gehu, siirdaar re jao, sikuur re sikuur gari, suwh chupae.

¹⁴Amana lerchii itaar mee aenche sanuw ningnache enriir, “Nang ing naadik peeh vakhaekha naningtanii taensae, vokhehkho isa isa peehchae chaap aekha omah chirsae, amanche atii vokheh utaraenkho tuwhmah ae tanii!”

¹⁵Havana rupanuw ajaar inche lerchii itaar aenche savang fhuwraang suwhkhang ae nare, ataklina isuwh ijachaamchu chiiae naka yndahpak inche ngiir aenaka chapvaatae amanche jaapeeh ae naka tavaatae,

¹⁶“Ijaniisapa! Ijaniisapa! Ynnaarjaeh peen, hikok isen machu, isenjor, amanche sana ing, rupa ing, vokhehkho amen iruw ynreenrung ing ynthong iruungpak khuwruung havi ichu!

¹⁷Apha mongtehpang sungna lerchii vakhae ichu paamchirsa.” Ruwkuwng vakhae aaruung aere asungna ong mee chaap ae, aahuur ae amanche chifhuwna ong aeka enringnii entaar vakhae ae ing yndahpak ing ngiir aeka,

¹⁸vokhehkho sanuw ikaang mikhuwhchu emutahnache chapsae, “Havana iruungpak khuwruung thohne aanghak reentaang omahrideh!”

¹⁹Amana enuw ing pirkhuwh inche ymbuk aeka chapsae, vokhehkho jaasa aeka enriir, “Ijaniisapa, ijanii-sapa, iruungpak khuwruungchu sanuw ichuva! Chifhuwna ong ruwkuwng adeen mee aangkheng ing amen iruwpak alerchii jaarna savang fhuwraang isuwh ymphamah vakhangni! Apha mongtehpang sungna ama maangchirsa!

²⁰Sanuw takline nenrotha manroh-ruw, O thangbaen, O ynthiing ae vokhehkho chongthang ae amanche jaephar ae, akhaechuve ama ing nentaklina atu ari khaenakhe Thang-nang ing ataklina vajeer atupa!”

²¹Aanuwnache iruungpak vaarmee inche rungshum vaang ichii rungchu jechuwmka chifhuw tingche renka ariir, Havi vaange iruungpak khuwruung Babilon chukho ithipak ing renvaata, amanche atii utaraenkho vokheh yntuwhmahnii;

²²amanche taamfhuw iruur vokhehkho mee ae iruur isa chaap, baasi vokhehkho tumpeeh iruur, hava vakhae chaap i naning tanii atii vokheh ynsiimahnii! Nongtufhuw om taklina atusii arisii achuwkho athar vokheh utaraenkho yntuwhmahnii; amanche rungshum yntak huwruwsa athar vokheh utaraenkho ynsiimahnii;

²³amanche jaemi irengchu nataklina utaraenkho ynrengmahnii; rakhii iniikho utaraenkho omahnii. Laaruw paamna nalerchii itaar i ahae ompakna, vokhehkho ichummah nalaetho inche laaruw paam mee chaapchu namanchaepa!

²⁴Babilon taklina vajeer atupa; akhaechuve jaephar aere ynthiing ae vokhehkho laaruw paamna atheh vakhae ae siichu khuwruung nache yntuwhsa.