Read Moyon Naga AMANDANG 19 Bible Online

AMANDANG 19 - Moyon Naga bible

AMANDANG 19

¹Havi aanuwna thangbaen tanii mee inempak iruur ing ynteenka ariirvaang hava chong i kasiipa, “Halleluja! Manlaenpeeh, alaar isa vokhehkho ruwrengchu Thangnang ningna omna.”

²Akhae-chuve Aafhuw avajeer vakhae chuve ichumva vokhehkho ichum ynthiing chuva; Aafhuw ing laaruw paamchu ichuwhmah ing amamaang sanuwchu ataklina vajeer atupa, vokhehkho Aafhuw meenae aechu atheh khaena ataklina Aafhuw inche huw aripa.

³Chutahnache athar vokheh enuw ing uungsaereeh, “Halleluja! iruungpak khuwruung amamaang mikhuwhchu ichenmahdeh ing hangkhukna!”

⁴Upa ae somnii ariimanrii re laetha ipaar manrii aenche vatiih aeka iruwngpham ongnii nache ong Thangnang chu rum aeka enriir, “Amen! Halleluja!”

⁵Amana iruwngpham ongnii tanii iruur yngkheh ing ariir, “Thangnang meenae ae, Aafhuw chu ijaaka arum iruung isiing vakhae ae, inuw vakhae Thangnang chu manpahruw.”

⁶Amana mee inem iruur vaangche chii inempak vokhehkho ipirpak bicheeh huwruwsa pingeng ichii ing havi ki ing kasiipa, Halleluja! Akhaechuve Aachehchir Aafhuw Thangnang inche paarsa.

⁷Inuw ing rotha manroh manuwka athiseh ing nungae sataruw; inuw ing Aafhuw chu manpah vaanchiiva, akhaechuve Jaoti rakhiinii aphachu ahenphapa, amanche sanuw inchenkho ynthongsa.

⁸Amana ynreenjerjer, iseeng, ynnaarjaeh limon peen iniinii khaenache aningna apeehpa; akhaechuve ynnaarjaeh limon peen chuve ynthiing ae ichum ynthiing nong chuva.

⁹Amana vaarmee ing kaningna ariir, “Havi baziihra: Jaoti rakhiinii nache imaar a-een mee aechu aajaehmeh bor aphapae.” Vaarmee inche havikho ariir pareeh, “Hava vakhae i ichumpak Thangnang chong chuva.”

¹⁰Amana atakchu irumnii khaena ki ing amaensok nache ivakhupsah ing. Changlae ama ing kaningna ariir, “Amakha tumahra! Ki i nang vaang vokhehkho Jesu saarkhiichu apeeh ae unae aethoh meenae ynsuwhhak yngkhehping; Thangnang chu rumla. Akhaechuve Jesu asaarkhii ipeeh chuve Thangnang chongsae amanthang chehnii laethava.”

¹¹Aanuwnache ki ing thangbaen ynrangchu kamupa, amanche sakuur ivaar chukho omsa. Amana aongnii mee chuve thachafhuw re ichumva, ama inche ichum ynthiing ing vajeer tuka laar atukpa.

¹²Amana Aafhuw mikna mi ichuwh marip ireng vokhehkho arusae taklina iruwng phurchii ae, Aafhuw mahnaka reentaang achuw tanga ing amanghuwmah ynziih vasah rumingchu om.

¹³Amanche sii ing ynthik vasah Aafhuw ing asing peen vokhehkho arumingchu Thangnang chongsae iva achii.

¹⁴Amana thang-baen laarchang aenche ivaar, iseeng, ynnaarjaeh limon peen niika sakuur ivaar taklinache ong Aafhuw chu aanuw enjiipa.

¹⁵Amanche jaati vakhaechu ithehnii khaenache Aafhuw baetanii yngeepak laangchem ahensohpa; changvakonchu Aafhuw ing enuwchu siir rumor inche ngahpeeh vaatae, amana Aafhuw ing Aachehchir Thangnang barungsii vomrip chii chaniinii nache achanii.

¹⁶Aafhuw peenna vokhehkho adiirriim nache iruwngna iruwng amanche Aafhuwna Aafhuw taka ynziih vasah ruming yngkhiingchu om.

¹⁷Aanuwnache vaarmee yngkheh inche inii taklina ingiirchu ki ing kamupa; amanche minvaen rikna ama ing ynjaap vaati aangkhengna ipirpak inche va-uungsa, Thangnang imaarne thengruw.

¹⁸Nenuw ing iruwng ae ensha, aapuh ae ensha, aatuaricheh ae ensha, sakuur ae taklina aongnii ae ensha, ruwkuwrjoh ae, isiing iruung meenae aekho, mee vakhae ae enshachu isahnii khaena yngkongruw.

¹⁹Sakuur taklina ong Aafhuw vokhehkho alaarchang ae taklina laar tukvachii ae saklaang vokhehkho laaruw paam iruwng chaap ae ing ipurpak ing yngkong aechu ki ing kamupa.

²⁰Amanche saklaang thohche ynruw ing aanuwzii ichummah jaephar buwtinnii iraangka mee aechu laetho tuka amanchae vokhehkho aruthaksiichu amanrum thohche akhumpae. Hava ynniimeh ae ichu enringsen ing mi ichuwhjaeh khursung tingche ajerenpae.

²¹Amanche areh vakhae ae chuve sakuur aongnii Aafhuw abaetanii ahensoh vasah laangchem inche atheh chirpae; vokhehkho vaati aenche enshachu encheh vakhae ensahpa.