Read Moyon Naga AMANDANG 2 Bible Online

AMANDANG 2 - Moyon Naga bible

AMANDANG 2

¹Ephisia na om ruwrthiing vaarmee ningna baziih: Akik tachangna aesii sarii chika, sana sarii jaemi ynrengnii kaarna isi aningtanii chongthen chuva.

²“Nanongtu vakhae ipirpak ing nahentu nahenri amanche ijachaam nabadaar vakhae kamanghuwsa. Isamah nongtu aechu nabadaar chehmah, chongthang mah ae barukna chongthang pung achii aechu nang ing chaang en ae chiika chummahsae ichii natuwhkha kamanghuwsa.

³Nang ing nakhaangcheh, kakhaena nabarungriir tiirudehing ijachaam aajaeh nabadaarsa vokhehekho jamahchii.

⁴Changvakonchu ataklina kamanraarniichii omna amachuve, nang ing amaensa raennii ningsiih kha nabathenpa.

⁵Aajaehmeh ipha ing nang itiivachii ichii kharla! Ajae abasenpeh raennii namanden vaangkhe ithupak ing nabarungriir huungla, changmahnave naningna thengningka jaemi ynrengniikha amin peenva kata.

⁶Changlaenche Nikolitans aeng entu enrichaap kabatir vaang, nenuw ingkho enuw ae i nenbatirsa.”

⁷Ynthiing laetha ing ruwrthiing ae ningna ariir i aana ipaarchaap ing siiruw! “Achuw yngkheh isii laar acheh meechu Thangnang ingkhonna imuwng ringkum thing aanlachu isah manphava kata.”

⁸“Smilna ruwrthiing rukuum itu vaarmee ningna baziih: Thikka athar hangnring aren vokhehkho achiniideh tanii chongthen chuva.

⁹Ijachaam inempak napha ing vokhehkho sara naeriing ing omnachii-atatak chuve nang savang nachii ichii kamanghuwsa! Nataklina Jehudi mah aenche Jehudi pung ta aeka engabu aenche isamah ing ichong aechu kamanghuwsa; enuw aekha umlae mee ynsuwh ruwrpae.

¹⁰Ijachaam aajaeh henphava nachii khaenache nabarungriir manjamahra. Rungaera! Ichamah umlae ingkhe nabarungriirchu ennii khaena nisuummeh sungna achuw yngkheh chuve kaeshum ting ithin naka jaavanenta. Amachu ithiinii vakhangnare khaangther nana imandenteehra, amana chembe ki ing iringnii phurchii pivakachii.”

¹¹Ynthiing laetha ing ruwrthiingna ariir i aana ipaarchaap ing siiruw. “Isii laar acheh meechu avomaniinii ithii inche mansuhcheh mahnii.”

¹²Pargamum ruwrthiing rukuum itu vaarmee ningna baziih: “Havi yngeepak chem asaeniimeh adeen tanii chongthenva.

¹³Nang una paarnachii ichii kamanghuwsa, amana-khe Seitaan iruwngpham ongnii omna; amanche nang ing karuming icheep ing nabachuwther vokhehkho Seitaan apaarnii nakhe nengkuurna kasaarkhii ynsuwh thachafhuw om Antipas athehrae nang ing kaningna ynthacha chiikha bathenmahchii.

¹⁴Changvakonchu nataklina topoh chuve kamanraar nahchii: Balaam ing Balak manchuwka Isrel siti aechu lae ting empeeh isahfhuwchu isahnii khaena, ichuwhmah naamak itunii lamting amansiae.

¹⁵Amavaang ichii ing nengkaarna Nikolitans ae enu ynjii mee omnachuw.

¹⁶Atarae nang nabarungriir ithupak ing huungla! Changmahnave entaklina thengningka kabaetanii chem inge laar tukvakata.”

¹⁷Ynthiing laetha ing ruwrthiingna ariir havi aana ipaar chaap ing siisaruw. “Achuw yngkheh isii laarchu acheh mee ningnache ynthuurjaehka om isahfhuw mannachu pivakata vokheh-kho achuw ingkho amanghuwmah aaraang mee chupang ing manghuw vachii ivaar rung taklina itharpeh ruming ynziihchu pivakata.”

¹⁸Thiatira ruwrthiing rukuum itu vaarmee ningna baziih: “Thangnang sapa amikna mi ichuwh pingeng ichii amanche akhi ynleenpak siir pingeng ichii Thangnang sapa tanii chongthenva.

¹⁹Nanongtu, naningsiih, nong natu, thacha, ikhaang nacheh, natu chaapkha kamanghuwsa. Abasenpeh raenniikha ithi ing atarae natu nari chaapkha kamanghuwsa.

²⁰Changvakonchu nataklina kaman-raar nahchii amachuve: Jezebel ing jaephar ping taka Isrel siti chaap aechu ichuwhmah itunii vokhehkho lae ruthaksii ting empeeh sha isahnii ting abatheem aanuwzii aechu ataraen phana na enjaehnah.

²¹Ama rupanuw kha abarungriir ihuung kahahva changvakonchu ama ing ynthiing mahchu ynthen adapa.

²²Rungaera, ama rupanuw i ajaarnii manak vakata amanche amathoh naamak entutanii barungriir huungmah aenave, enuw chukho manak vakata;

²³amanche aanuwzii chaap vakhae thehva katae. Amanache ki i vakhar chaap vokhehkho barungriir chaap aatoh yngkhehva ichii ruwrthiing chaap ing imanghuw vaata, vokhehkho nentu nenri nong ing iphaphamchu pivakachuw.”

²⁴Changvakonchu Thiatira na ong isii tuning achiimah changchii nuchu manjii ningka achiimah, umlae barungriir avakharmah nenuw vakhae taklina chembe ija peehrikchu mandermah ningchuw.

²⁵Changvakonchu kajuwngmahri raentaang, neningna omkha icheep ing bachuwtherruw.

²⁶Isii laar acheh vokhehkho achimahri raentaang kanongruw atujaeh ningna, “Paam ipuhnii ruwrengchu pivakata;

²⁷ama ing siir rumor chinaka paam puhvaata vokhehkho pir bukam vaang bakhiicheh vaata.

²⁸Kapa ningtanii ruwreng kapha vaang, ki ingkho aningna ziing aesii tangbangchu pivakata.”

²⁹“Ynthiing laetha ing ruwrthiing-na ariir i aana ipaar chaap ing siirasiing!”