Read Moyon Naga AMANDANG 22 Bible Online

AMANDANG 22 - Moyon Naga bible

AMANDANG 22

¹Khuwruung lam arikchimbang nache Thangnang vokhehkho Jaoti iruwngpham ongnii tanii hung-suwh aechu iseeng ing yndangkiir ynreen iringnii chii iva yngkheh vaarmee ing kaningna ymmansiipa.

²Amana iva taang paangkheh paangkheh tingche aanla asiksik ing ynla iringnii thingburchu om, ama aanlachu atha siir nache ynlasa; amana thingbur ana inche laaruw mee vakhae ina damniichu ynsuwhsa.

³Ama khuwruung nache Thangnang siraap ynchiikho omahnii, changvakonchu Thangnang vokhehkho Jaoti iruwngpham ongniichu amanache omvaata, amana ameenae chaap aenche atakchu rumvaatae;

⁴enuw ing amaechu muvaatae, vokhehkho arumingchu embachir nache yntha vaata.

⁵Amanache jaen ichii atii vokheh omahnii, Aafhuw Thangnang inche engkhaena irengchu ynsuwh naka amanche enuw ing ichen naemah inche paarvaatae.

⁶Vaarmee inche kaningna ariir, “Hava vakhae chong i ichumva vokhehkho thachafhuwva, jaephar ae ningna alaetha apeeh Thangnang inche avaarmeechu ameenae ae ningna ithupak ing suwhvachii vakhaechu mansiinii khaena ajenbathenpa,

⁷amanche enruw, ki ithupak ing juwngva kata.” Hava thimmbuwr sungne jaephar ae chongriir vakhae i amanjii meechu alaepah isapakva.

⁸Johon ki ing hava vakhae i kasii vasah vokhehkho kamu vasahchir chuva. ki ing kasiirae vokhehkho kamu raenche, kichu ymmansii vaarmee akhi maanache vakhupsa ingka karumpa;

⁹changvakonchu kaningna ama ing ariir, “Amakha nang ing tumahva nachiiva! Ki chuve nangthoh, Thangnang jaephar nauw nanae aethoh, vokhehkho hava thiimbuwr chongriir vakhae amanjii aethoh meenae ynsuwhhak yngkhehping. Thangnang chu rumla.”

¹⁰Amana vaarmee inche kaningna ariir, “Hava thiimbuwrne amanthang vakhae chong havi thuur nana siimahra, yngkhaena ynchii imbe aphachu hunganeeng tangsa.

¹¹Isamah atu mee aenche isamahchu tujaehrasii, amanche ynthiingmah mee inche changche manthiing mahjaeh rasii, amanche ichum ynthiing inche ichumchu turasii, ki i achinii re abasennii vokhehkho adongnii chuping.”

¹²“Enruw, ki ithupak ing jungtheng ynthongning! Ama ama anongtu inuwzii ing kaningtanii nongmen ipifhuw chaap jenreen vakata.

¹³Ki i Alpha vokhehkho Omega chuping, aren vokhehkho achinii, abasennii vokhehkho adongnii chuping.”

¹⁴Ynthiingkiir ing apeenchu achaam achuw yngkheh meechu bor aphava, enuw ing iringnii thingbur aanlachu isah phavaatae amanche khuwruung suwngkung sungtingche ivaruwh phavaatae.

¹⁵Taangna chaap ae chuve utiae vokhehkho disuur meepae, naamak itu aepae vokhehkho mikthehpae, ruthaksii arum meepae, amanche ynraar nong ituae chaap chupae.

¹⁶“Jesu ki ing ruwrthiing mee ae chaap khaena neningna havana vakhae i saarkhii ipeehnii inche kavaarmee kajenchiirva. Ki chuve Devit tuti tanii junginlaar ireng ziing aesii tangbang chuping.”

¹⁷Laetha ingkho amanche rakhii iniinuw inchenkho ariir, “Huungla! Amanche aasii mee inchenkho huungla tarasii. Vokhehkho achii iraar ama inche thengrasiing, iringnii chiichu amanden mee inche amen ichah ing ngareh inche risarasiing.”

¹⁸Havana thiimbuwr inge amanthang vakhae i aasii mee chaapna saarkhii kapeehnah: Achuw yngkheh mee ing chongriir takline ber bunaka manthi nave, Thangnang ing aningna havana thiimbuwr sungne ynziihka om riirae mangkhiingchu vehapvaata,

¹⁹amanche achuw yngkheh mee ing havana thiimbuwr inge amanthang chongjeer vakhae tanii rinave, Thangnang ing iringnii thingbur vokhehkho ynthiing khuwruung tanii, vokhehkho thiimbuwr sungna ynziihka om vasahna arutumchu ripeeh vaata.

²⁰Hava vakhae khaena saarkhii apeeh Aafhuw ing ariirnah, “Atatak ing ichumva! Ki ithupak ing juwngva kata.” Juwnglo, Aafhuw Jesu!

²¹Aafhuw Jesu tungsiihchu ynthiing mee aethoh ynruwhakjaeh ynsuwhrasii. Amen.