Read Moyon Naga AMANDANG 3 Bible Online

AMANDANG 3 - Moyon Naga bible

AMANDANG 3

¹Sardis ruwrthiing rukuum itu vaarmee ningna baziih: “Thangnang tanii ynthiing laetha amanche aesii sarii adeen ningtanii chongsaeva. Nang ing natu nongkha kamanghuwsa amachuve, naruming i iring ruming reenkhang taniikho ithii vachii!

²Nang ynternana vokhehkho thikvachii ing om aekha manpirla, akhaechuve Thangnang maana nanongkha mapung aphava ichii ing tuwhmahsing.

³Ajae abasempehrae isa chongsae naraang vokhehkho nasii vakhaekha yndenla; amanche nabarungriirna thinjaeh nana athar barungriir huungla. Hane athar hungantermah taniive ynruwvaang thengva kata, changlaenche naningna thengva kachii aphachu nang ing manghuwmah tanii.

⁴Sardis ne nenuw topoh chuve ataraenpha barungriir itiimah omnachuw. Enuw mee ae chuve kithoh ivaarjaeh peen singhakva kenta, akhaechuve ynteer aruchupae.

⁵Isii laar acheh meechu ivaar peen mansing vakata, amanche ringkum thiimbuwrna ynthin arumingchu manpur mahning. Kapa vokhehkho vaarmee ae maana kameepae taningka yndang ing riirva kata.

⁶Ynthiing Laetha ing ruwrthiingna ariir i aana ipaar chaap ing siisaruw.”

⁷Philadelphia ruwrthiing rukuum itu vaarmee ningna baziih: “Devit tuti tanii ing longting chika aamongchu achuwngkho akamchehmah amanche ama ing akamchu achuw ingkho aamong chehmah ynthiing vokhehkho ichum ningtanii chongsaeva.

⁸Natu nari vakhaekha kamanghuwsa. Enla, Achuw ingkho imong chehmah vachii eenkhaar barang ingka kasiihsa. Nang naruwreng topoh omna, amanche kachong nangahsa vokhehkho karuming i siidamahchii.

⁹Enla, umlae ruwrkheh ae entakcha Jehudimah aeka Jehudi pung enchii mee emare om changchii aechu henruw ae ningka nakhi bakhongna irum vaatae amanche ki ing kaning kamansiihsachii ichiichu enuw ing manghuw vaatae.

¹⁰Kajaera i isajaeh ing nangah khaena laaruw mee vakhaechu chaang ennii aphanache ki ing nangchu badaarpeehva kachii.

¹¹Ki ithupak ing juwngva kata. Achuw ingkho naphurchiichu ariniimah ing icheepther ing bachuw jaehra.

¹²Isii laar acheh meechu kapa Thangnang sejaam uchu mansuwh vakata. Amatanii utaraenkho suwhmahnii akhaechuve ataklina kapa Thangnang ruming re kapa Thangnang paam ruming baziih vakata amachuve, thangbaen paam kapa Thangnang tanii ijungtheng ithar Jerusalem re ithar karuming chuva.

¹³Ynthiing laetha ing ruwrthiingna ariir i aana ipaar chaap ing siisaruw.”

¹⁴Lodisia ruwrthiing rukuum itu vaarmee ningna baziih: “Thachafhuw om, ichum saarkhii, Thangnang ing aseem aren chongsaeva.

¹⁵Nanong vakhae kamanghuwsa. Nang idaekho daemahchii, amanche ynsakho basak mahchii. Ajaenkho natak i changchen jaehtah siingnata.

¹⁶Amatah nache natak i idaekho idaemah, ynsakho ynsamah vachii khaka natak i bathen vakachii.

¹⁷Savang ning, kadeen chirsa, kataklina ivaeh omah ing nachiinah changvakonchu laethana chembe natak i ijachaam vokhehkho ningchuwhnii, sara, mikchu vokhehkho asae ing omnachii.

¹⁸Amatah nache naningna kariirpeeh nahchii amachuve, kaningna ynthiingjaeh sana iriira amanache savang fhuwraang suwhvaanta, peenkho iriinana ningjaknii asae ing omchiikha mangkhumla vokhehkho richii barim isa iriinana namik aekha inuwrla amanache ynthiingkiir ing muvaanta.

¹⁹Kaning kamansiih chuve kaasaenah. Kariirpeehchii i manernana isii tanii hunganrisara.

²⁰Enruw, ki ing eenkhaar kungna ngiir ingka kaachumnah, achuw yngkheh ing kasenruwr i siinaka eenkhaarchu barang nave, aningna varuwh ningka amathoh sahakva kata amanche ama ing kithoh isahhak phavaata.

²¹Isii laar acheh meechu kaaruwngpham ongnii nache kabuumna mangongva kata. Yngkhaena ynchii imbe katak kho isii laarchu cheh ingka kapa ongnii iruwngpham ongniina ongning.”

²²“Ynthiing laetha ing ruwrthiingna ariir i aana ipaar chaap ing siisaruw.”