Read Moyon Naga AMANDANG 5 Bible Online

AMANDANG 5 - Moyon Naga bible

AMANDANG 5

¹Iruwngpham ongniina ong akik tachang nache ynjuwr thiim-buwrchu ynziih ing ruwkuwrka vokhehkho ahak sarii ing ahakchu kamu.

²Amana ipirpak vaarmee ing uungka amanthangchu kasii, “Ynjuwr thiimbuwrchu achuw ing barangcheh vaata amanche ahak aechu achuw ing bakhiicheh vaata?”

³Thangbaen tanii, laaruw paam tanii amanche kuurdong tanii achuwti ingkho ynjuwr thiimbuwrchu barangcheh mahnii vokhehkho paacheh mahnii.

⁴Ynjuwr thiimbuwrchu abarangcheh vokhehkho aapacheh omah khaena ichap ing.

⁵Amana upa kaarna yngkheh ing kaningna ariir, “Chapmah! Enla, Juda sungkhur tanii nongsha Devit tuti tanii yngkheh ing achehpa amachuve ynjuwr thiimbuwr re ahak sarii aechu aamongpa.”

⁶Iring laetha aere upa ae ongnii ruwrak nache ithii tanii hangring Jaotichu ingiir kamu. Atakchu Thangnang tanii laetha sarii ae, mik sarii vokhehkho rakii sarii paarna. Atakchu laaruw paamna ajenchiir vasahva.

⁷Ama ing vakka iruwngpham ongniina ong akik tachang tanii ynjuwr thiimbuwrchu averi.

⁸Amana ynjuwr thiimbuwrchu ama ing averiraenche iring laetha manrii aere upa somnii ariimanrii aechu Jao tingche vatiih pohsae. Amana enuw ing seemruwr re ynthiing aeng Thangnang enthamrae enchichak richii barim isa ynthufhuwchu yngkhehter achiae.

⁹Amana enuw ing ithar la entu, “Ynjuwr thiimbuwr re ahak nabarangcheh i matik icharap vachii. Natak itheh aeka Thangnang khaena nasii ynta inche laaruw paam mee vakhaechu naatenpa.

¹⁰Ama ingkhe Thangnang aaruwng paamne rukuum namantusae vokhehkho laaruw paam puhvaatae.”

¹¹Amana athar vokheh paamkhuw kathiirtah nache vaarmee inempak ae ing iruwngpham ongniina iring laetha manrii amanche upa aechu ihir aeka ingiir ae,

¹²amana uung aeka la entu: “Ithii vasah hangring Jaoti inempak aanrusa, ama ing hae, lerchii, iveernii, vokhehkho ruwreng, ympahsahnii aaraang i atatak ing aanrufhuwsa.”

¹³Amana thangbaen tanii, laaruw paam tanii, kuurdong tanii, chifhuw tanii vokhehkho reentaang aajaeh tanii laetha aeng la entuchu kasii, “Iruwngpham ongniina ongre Jaotichu ympahfhuwva, vokhehkho ynjasuwh, alaar isa vokhehkho achehchir inche, ichen naemah ing ynruwfhuw rasiing.”

¹⁴Amana iring laetha manriimeh aeng “Amen!” ta aeka abasang ae, vokheh-kho upa aenche khup aeka arum ae.