Read Moyon Naga AMANDANG 9 Bible Online

AMANDANG 9 - Moyon Naga bible

AMANDANG 9

¹Avorunganii vaarmee inche atumpeehchu atumpa. Amana thangbaen tanii aesii yngkheh laaruw paamna jungbukka idong naemah khur longtingchu aningna apeehpa.

²Idong naemah khurchu abarang tahnache mi ichuwhtanii mikhuwh hangthengka amikhuwh inche inii vokhehhko paam aangkhengchu amanthim dehpa.

³Amana mikhuwh tanii khaeruwng inempak aechu laaruw paamna thengsae. Amanche eningnache rungmanchiih ing areen haechu apeehpae.

⁴Ening nache laaruw paam fhuwr er ing imuwng vakhae vokhehkho saangthing aechu mamaang mahruw changvakonchu embachirna Thangnang ing ahak omah mee ae chuve mamaangruw taka ariirpa.

⁵Tha runga sungna enuwchu ijachaam ipeeh arupa. Ama ijachaamchu ithehnii ingmahva, changvakonchu rungmanchiih hae ing ajeenvaang ijachaam ipeehnii khaenava.

⁶Changlaenche mee aeng thiknung nge tavaatae changvakonchu ithiichu tuwhmahnii ae, enuw ing thiknungka tavaatae changvakonchu ithii inche eningtanii taenvaata.

⁷Khaeruwng aechu yngen tahna laar ituk isi pingeng ichii ae, amanche enrusaechu sana phurchii ing yngkhum pingeng ichii ae.

⁸Ensamchu rupanuw sam pingeng tikna amana enghachu nongsha ha pingeng ichii ae.

⁹Siir barungphu pingeng ichii eniisa, sakuur aeng laar envatuklae enghuwrusa omvaang embathachu ahuwrusa om.

¹⁰Rungmanchiih pingeng ichii enrumee suwmna amana ajeen mee aechu tha runga vakhae nakvachii hae om.

¹¹Enuwkho aapuh ae iruwng omna. Ama iruwngchu idong naemah khur aapuh vaarmee yngkhehva, aruming chuve Hebreeu ing Abaddon amana Grik ing Apolion achiiva.

¹²Ahaarpa ijaanii chuve aaraenpa amana enruw, ijanii asae ynnii thengvachii omna.

¹³Amana avosariinii vaarmee ing atumpeehchu atumpa. Amanche Thangnang maana arakiing manrii sana thiimkung tanii iruurchu kasiipa.

¹⁴Amana tumpeeh ichi ingkho vaarmee kuruk aeting ariir, “Iruungpak Iuphrates iva kuurna ynphuwp vaarmee manrii aekha bathenruw.”

¹⁵Amatah nache vaarmee kuruk aenche vaarmee manrii aechu embathenpa. Akhaechuve kum, tha, apha ichichak nache laaruw mee aampum manriina ynthum ae ithehnii khaena enuwchu yngkhumpae.

¹⁶Amana sakuur laarchang aechu million chanii chakpae ichii kaningna ariirpa.

¹⁷Haviva karuvaamna kamu sakuur aechu. Aongnii ae barungphu-chu mi vokhehkho yndupsip ing idaangpae. Sakuur rusae aechu nongsha rusae pingeng ichii ae amana embaena mikhuwh vokhehkho idaang ing hungsuwh.

¹⁸Amanche sakuur ae baetanii ihangsuwh mikhuwh vokheh-kho idaang aenche laaruw paam mee ae manriina ynthumchu atheh ae.

¹⁹Akhaechuve sakuur haechu embaena vokhehkho enrumi chaapna omsa. Enuw enrumichu arusae om baruwr vaang tiknae, amanche amachu mee ynsuhnii khaenache ensichinniipa.

²⁰Amu chehmah, asii chehmah vokhehkho isi achehmah sana, siir, rung amanche thingrung irum vakhae aechu havana riirae mangkhiing inge athehmah ae laaruw mee areh aenche havi enrum taniichu hungangheer mahsae.

²¹Havijaeh mahka mee entheh, mee emanchae, ichuwhmah naamak changmahka mee lerchii embaruwh taniichu hungangheer mahsae.