Read Mpumpong Matyôos 10 Bible Online

Matyôos 10 - Mpumpong bible

Matyôos 10

¹Yésus ɛ ɓúzī jóó óphōn kām nɛ ōɓá ɓɛ̄. Ɛ jüe ɓɛ́ də́ə́ ɛ́sɔ íɓyǒla ɓɛ̄ ísisímb nɛ ɛjwom mɛ́kpay myɛ̂ɛs nɛ mimbi mī íjám ɓyɛ̂ɛsa.

²Milwōmtwōm kām nɛ mīmbá mīték mín mɔ̄ɔ̄ máā: Mot ɛsɔ́k ɛ́, Símɔn ɓɛ̄ jōō nāá, Pyɛ̂ɛ ɔ̂, ɓá nɛ Ándéa mwânaāŋg, nɛ Zwák ɓá nɛ Zwâŋ ɓwán ō mí Zeɓeɗe.

³Nɛ Fílíp ɓá nɛ Ɓaatelemî, nɛ Tómas ɓá nɛ Matyôos mot lapô, nɛ Zwák mwán mí Alfê, nɛ Taɗē,

⁴nɛ Símɔn mot ɗākɔ̄ɔ̄ ɛ̄ kúl yɛ̄, nɛ Yúɗas Iskayôt mot ā ɓɔ́ma Yésus ɔ̂.

⁵Ɛsɔ́k nāá, Yésus ɛ kɛ̂nd ɓot kām nɛ ōɓá ɓīnɛ́ɛ̌ŋ ɛ́, ɛ ɓúzī nyēē lɛ́ɛ́ nɛ nɔ̄ɔ̄ nāá: «Ɓyá a tɔ́ ɓɛ ɓót ō ɗí ta ɓɛ Óyúɗɛn ɓâk. Ɓyá a ní thɔ́k tí ikhanda i ɗí tí cǐl ɓwǎs Samalí ê.

⁶Kū dā tɔ́ká ɓɛ ɓɛ̄l ɓót ɓɛ̄ Ízaɛ́l, ɗí ɗɛ íthɛmɓɛ i ɗí ɓí í ɗímb ɓîk.

⁷Ɓī tītyāā tūnd zyē nɛ zyē nāá: “Də́ə́ mí Zɛɛ̄mb í í kúnɔɔ.”

⁸Ɓī jwóm mímbɛ̂l, ɓī gbɛ́l mímûŋ, ɓī cís mízízaām, ɓī sɔ́ íɓyǒla ɓɛ̄ ísisîmb. Ɓi ɓye yɛ́ títoōk, thɔ́k jüeká ɓot títoōk.

⁹Ɓyá a nwɔŋ míchyaŋ mī mɔnī ɓɛ́ sā nɛ gól, gú nɛ zanj, gú thɔ́k yīl ɗí ɗakɛ gól ékɛ́, ɓī gbā yɛ́ tí ɛɓɛp ɛ̄ kānd wēn.

¹⁰Mot a a nwɔ̌ŋ myanj tí nāá, ɓyá á gbá ísínɔŋ. Dā tɔ́ká nje nɛ kānd mót ɗí nɛ wɛ́ tí nól ô, nɛ isapát ɛ̄ ɗí nɛ ɓyɛ́ tí mɛkoō ê. Ta nwɔ̌ŋ syuk. Mí lɛ̄ɛ̄ ɗyáŋ nɛ dɔ nāá, ɛɗēē ɛ̄ sɛ́l lí dalá nɛ ɛɗüǐs pyaāt ɛ́ sála ê.»

¹¹«Tí ikhanda nɛ mɛ̄l mɛ ɓí wā ní ték mák ɛ́, nyēē jíaká gú í nɛ khul ɛɓɛ nɛ mot wā kpɛl ɛ́ɓakɛl ɓén ɔ̂, náǎŋ ɛ́, ɓī ɗí ɓɛ yɛ̄ ī kɛ́ kum tɛ́m yɛ̂ɛs ɓí wā kpáŋ ê.

¹²Tɛ́m ɓí wā ní tí njāā ték ékɛ́, nyēē lɛ́ɛ́ká nɛ ɓot ō njāā ték nāá: “Zɛ̌mb ɛ jüē ɓěn ɓyɛ̂ɛsa ɛpyaala.”

¹³Í wā ɓɛ nāá, ɓot o njāā ték ɓá á ɓakɛl ɓén nák ɛ́, mɛsüesol mēn mɛ jüê ɓɛ́ ɛpyaala. Sá gwát ɛ́, ɓot ō njāā ték ɓɛ́ wā ɓɛ ta ɓɛla nɛ nēn nák ɛ́, ɛpyaala lēn lī ɓúla ɓɛ yēn

¹⁴Ɓot ɓɛ́ ɗî ta ɓakɛl ɓén, ɓɛ̄ ɓyēn ɛ́gwók mɛ́kɛ́l mēn nâk, gbɔ̄mká tí njāā ték, gú tí khanda têk, ɓī púp[3] mɛpuūmb mɛ natā ɓén tí mɛkoō mēn ê.

¹⁵Í ɗyaāŋ ték mɛ́ lɛ̄ɛ̄ ɓēn twóó oceece nāá, mwēs Zɛ́mb wā cyúkɛl mítɔɔ̄p pāká ɓá nɛ ɓot ékɛ́, pɔ̄nɛ́s ɓót ō khanda ték yá á thaŋ yīl ɓót ō Sɔ́ɗɔm nɛ Gɔmɔ̂ɔ.»

¹⁶«Ɓyɔ̂ɔ o tí ɓā. Mi kɛnd ɓén wák ɛ́, ɗakɛ íthɛmbɛ pāká okhɔy. Cāŋkā phɛ̄ ɗakɛ lwɔ̂ŋ, ɓī ɗí ɓot o ɗí tí tela ɓák ɗakɛ mɛ́pep.

¹⁷Ɓī gú ɓakɛl nɛ dɔ nāá, ɓot ɓá á put ɓén ɓɛ mɛ́phānj mɛ̄ mítɔɔ̄p mī Óyúɗɛn. Ɓɛ̄ ɓī ɓén nɛ izɛmbɛ ɓɛ mínjāā mī míndakla myɔ̄ɔ̄.

¹⁸Ɓɛ̄ nwɔ́ŋ ɓén, ɓɛ̄ kɛ́ tɛ́l ɓén sɔ̂kphɔ̌mb miŋgɔ́mina nɛ mikūmāndē tí ɛsú lám, tí nāá, ɓyá á lɛ́ɛ́ ɓɛ́ ɓá nɛ ɓot ō ɗí ta ɓɛ Óyúɗɛn ɓák ɛ́, sá ɓí ɗí tí gú zinjá nyaām ê.

¹⁹Tɛ́m ɓɛ́ wā tɔ́ nɛ nēn ɗyaāŋ ékɛ́, mot a a gwók ɓā tí sá ɓí wā lɛ́ɛ́ nɛ ɗakɛ ɓí wā lüǐ pyaāŋ ê. Tɛ́m wā ɓɛ nāá, ɓí ǐ lüii ékɛ́, Zɛɛ̄mb á á jüe ɓén mɛkɛ̂l.

²⁰Nɛ dɔ nāá, yá ǎ ɓɛ ɓyɔ̂ɔ ɓot oték wā lüii. Sá gwát Sisímb Sāŋg wēn yá á ɓɛlǎ nɛ nēn.

²¹Mot á á ɓɔ́ma mwânǎŋg wɛ̄ tí nāá, ɓɛ dó ɛ. Sāŋg ɛ ɓɔ̄mā mwán tí nāá, ɓɛ dó ɛ. Ɓwán ɓɛ̄ lūmlā nɛ osāŋg ɓɔ̄ɔ̄ nɛ onaāŋg ɓɔ̄ɔ̄, ɓɛ̄ ɓɔ̄mā ɓɛ́ tí nāá, ɓá á dó ɓɛ̂.

²²Mot nyɛ̂ɛs á á nimb ɓén tɔɔ̄p wâm. Sá gwát ɛ́, mot wā jísɔɔ mítūŋ mīnɛ́ɛ̌ŋ myɛ̂ɛsa ɔ́kɛ́, á á pɔm.

²³Tɛ́m ɓɛ́ wā lûmla nɛ nēn tí ŋgúma khanda ékɛ́, kāmbká ɓī tɔ̄ ɓɛ yīl khanda. Mɛ́ kū lɛ́ɛ́ ɓén tí oceece nāá, Mwán mí mot á á ɓākā zye, ɓyɔ̂ɔ ta ɓā ɓoma íkhanda ɓɛ̄ Ízaɛ́l ɓyɛ̂ɛsa.

²⁴Phōn ā ā tháŋ yêkle yɛ̄, phala ta thaŋ mása wɛ̄.

²⁵Yɛ̂ɛsa í dā je nāá, phǒn ɛ ɗí ɗakɛ yêkle yɛ̄, phala ī ɗí ɗakɛ mása wɛ̄. Í ɓɛ̄ nāá, ɓɛ́ ɛ́ nyɛl ɛ́dot sāŋg njāā nāá Ɓɛlzeɓúl nâk, í ɓot ō njāā ték wā ɓɛ ta ɓū jóaa ɗyáŋ ɛ!»

²⁶«Mot a a kāmb ɓɛ́ phɛ̄, sá yɛ̂ɛs ɗí sɔlā ékɛ́, yá á ɓāndā gbɔ́m ɓɛ̌ koōl. Yīl ɗí tí sɔɔ̄ ékɛ́, yá á ɓāndā nyén tí ɛɓyakɔɔ.

²⁷Sá mí lɛ̄ɛ̄ ɓén tí khɔmwaāl ékɛ́, kɛ̄ ɓākā lɛ́ɛ́ká yɛ́ tí mwēs. Yīl ɓɛ́ lüii ɓén mɛtapla tí mɛlɔ́ ékɛ́, kɛ̄ lɛ́ɛ́ká yɛ̄ tí mɛphānj.

²⁸Ɓyá a kámb ɓót ō ɗí nɛ khul ɛ dā dó nje ték ipúnd ɓyɛ́ nɛ ɓyɛ́ ta dó sisímb ɓâk. Dā kámbká nje ték Zɛ̌mb nyɛ mot ɗí nɛ khul ɛdó ípúnd nɛ sisímb, ɛ kɛ́nd ɓyɛ́ ɓɛ ɗú ɛ kɔ̌m ti nɛ kɔ̄m ɔ̂.

²⁹Ɓá a ɓɛ̄ tí ɓɔ́ma ínínɔɔ̄n īɓá ta ɓye tyâa mɔnī? Ísu ɗɛ í ɗí ɗyaāŋ ékɛ́, gwát yā ā ɗúma ta ɓɛ tí kpɛlā Sāŋg wēn ɗí ɓɛ jwóó ɔ̂.

³⁰Jwok gwát nɛ gwát ɛ́, ā ā jōk ɓīm mímyɛ́s mī phwóŋ ɗí tí miló myēn ê.

³¹Ɓyá a gwók phɛ̄ ɓā. Sɔ̂kphɔɔ̄mb mí Zɛɛ̄mb ɛ́, ɓí nɛ nɔm ī tháŋ ínínɔɔ̄n ɓyɛ̂ɛs!»

³²«Mot wā myam sɔ̂kphɔ̌mb ɓot nāá, ɛ phōn waām ɔ́kɛ́, má á myam thɔ́k nāá, ɛ waām sɔ̂kphɔ̌mb Sāŋg waām ɗí ɓɛ̌ jwóó ɔ̂.

³³Sá gwát mot wā kála sɔ̂kphɔ̌mb ɓot nāá, a a ɓɛ̄ waām ɔ́kɛ́, má á kála ɛ́ thɔ́k sɔ̂kphɔ̌mb Sāŋg waām ɗí ɓɛ̄ jwóó ɔ́kɛ́ nāá, a a ɓɛ̄ waām.»

³⁴«Ɓyá a sîmsa nāá, mi zyē tí iɓwaās ɓík nɛ ɛpyaala. Ma a ɓɛ̄ ta zye nɛ ɛpyaala, sá gwát ɛ́, mi zyē nɛ ɗɔmb.

³⁵Nɛ dɔ nāá, mi zi ɓɛ̄s pāká mwâmotóm nɛ sāŋg, pāká mwâmumá nɛ naāŋg, pāká phōmbǒl nɛ ndɛl.

³⁶Mizīzyūŋ mī mót myá á ɓɛ ɓót ō njāā wɛ̄.

³⁷Mot kpɛ́l sāŋg gú naāŋg i tháŋ mɛ́ ɔ́kɛ́, ā ā dálā nɛ ɛɗi mót waām. Nɔ̄l kpɛ́l mwán ī tháŋ mɛ́ ɔ́kɛ́, ā ā dálā nɛ ɛɗi mót waām.

³⁸Mot ɗí ta khɛ́ɛ́ kólos wɛ̄, ɛ ɗū mɛ́ ɔ́kɛ́, a á ɗi môt waām.

³⁹Mot wā cwáŋ nɛ cyuk yɛ̄ ɔ́kɛ́, á á ɗímbɛl yɛ̂. Sá gwát mot wā dól cyuk yɛ̄ tí ɛsú lám ɔ́kɛ́, á á ɓākā ɓyela yɛ̄.»

⁴⁰«Mí lɛ̄ɛ̄ ɓén twóó oceece nāá, mot kám nāá, ɓī ɗî ojóŋ ɓɛ̄ ɔ́kɛ́, ɛ gū nāá, ɛ kam yɛ́ tí ɛsú lâm. Í ɓɛ̄ nāá, ɛ kam yɛ́ tí ɛsú lám nâk, ɛ gû nāá, ɛ kam yɛ́ tí ɛsú ɛ̄ mót ā thes mɛ ɔ̂.

⁴¹Mot wā ɓakɛl mgbɛ́sel mitɔɔ̄p mí Zɛɛ̄mb, tɔɔ̄p nāá, í mgbɛ́sel mitɔɔ̄p mí Zɛɛ̄mb ɔ́kɛ́, á á ɓye ɛ́kɔɔ ɗɛ mgbɛ́sel mitɔɔ̄p. Thɔ́k ɛ́, mot wā ɓakɛl mót kāmb Zɛ́mb, tɔɔ̄p nāá, í mot kāmb Zɛ́mb ɔ́ nâk, á á ɓye ɛ́kɔɔ ɗɛ mót kāmb Zɛ́mb ɔ̂.

⁴²Mot wā jüe mímwāāthɛ̄mb ŋgwát tí ndɔŋ óphōn ɓám ɓák ísu kíkɔɔ̄p mɛ́ɗyūū mɛ̄ télā, tɔɔ̄p nāá, ɛ phōn waām ɔ́kɛ́, ɛkɔɔ lɛ̄ lá ǎ ɗîmb.»