Read Mpumpong Matyôos 23 Bible Online

Matyôos 23 - Mpumpong bible

Matyôos 23

¹Phúla ték ɛ́, Yésus ɛ ɓúzī lɛ́ɛ́ nɛ mɛthum mɛ ɓót nɛ ophōn ɓɛ̄ nāá:

²«Iyêkle ɓɛ̄ ílɔ́a nɛ Ofatizyɛ́ŋ ɓɛ́ nɛ ló-sɛ̄ɛ̄ ɛ́timbɛl ílɔ́a i mí Moís.

³Ɓí dala ɛ́gwôk, ɓī sā ɗɛ ɓɛ́ lɛ̄ɛ̄ ɓén ê. Sá gwát ɛ́, ɓyá a ɓaŋa mɛ́koō mɛ̄ kɛnd mɔ̄ɔ̄. Nɛ dɔ nāá, ɓā ā kɛ̄ ɗakɛ ɓɛ́ lɛ̄ɛ̄ ɓót ê.

⁴Ɓɛ́ dā gú ɛ́kaŋɛl ɓót mimbepok mi mɛ́ɗil, ɓɛ̄ kɛ́l ɓɛ̄ myá tí mɛɓyak, ɓɔ̂ɔ ɓot oték ta kúna nɛ mimbepok mi mɛ́ɗil miték kūnā nɛ jiīn tí ɛkɛm ɓɛ̂.

⁵Misāwā myɔ̄ɔ̄ myɛ̂ɛs mi nje ték tí ɛsú ɛ nāá, ɓɛ̄ nyên sɔ̂kphɔ̌mb ɓot. Í sá ték sā nāá, ɓɛ̄ ɓɔ́sɛ̄l mitilā mī áchāāchānj ɓɛ̄ ɓiɓwāt myɛ́ tí mɛphɔ̌mb nɛ tí mɛɓɔ́ ê. Ɓɛ̄ ɓɔ́sɛ̄l mímbe mi míkānd myɔ̄ɔ̄.

⁶Ɛkpɛl ɓɛ́ ɛtüát tyâa iɗiī tí ipyaāt ɓɛ̄ íɗína, nɛ tí minjāā mī míndakla.

⁷Ɓɛ́ kpɛl nāá, ɓot ɓɛ̄ sīsüês ɓɛ nɛ ɗūū tí ipyaāt i mɛ́thum, ɓɛ̄ jōō ɓɛ́ nāá: “Yêkle.”

⁸Sá gwát, ɓyɔ̂ɔ ɓyā ā dálā nɛ ɛjóóaa nāá: “Yêkle.” Nɛ dɔ nāá, ɓi da ɓɛ̄ nɛ yêkle gwát. Thɔ́k ɛ́, ɓěn ɓyɛ̂ɛs ɓí ɓwán ɓɛ̄ ónaāŋg.

⁹Ɓyá a jóó mót tí sī nyúk nāá: “Sāŋg wâm.” Nɛ dɔ nāá, Sāŋg wēn ɛ da ɓɛ̄ ŋgwát, nɔ̄l ɗí ɓɛ̌ jwóó ɔ̂.

¹⁰Ɓyá a sáŋ nāá, ɓɛ̄ jóó ɓěn nāá, “mot mɛlyôo”. Nɛ dɔ nāá, mot mɛlyóó ɛ da ɓɛ̄ ŋgwát, Kilîs.

¹¹Tōmbá tí ndɔŋ wēn ɛ́ dalǎ nɛ ɛɗi sɛ́l ɓot ō ndɔŋ yɛ̄.

¹²Nɔ̄l ɓēn nôl ɔ́kɛ́, á á sulaa. Nɔ̄l súl nól ɔ́kɛ́, á á ɓénaa.»

¹³«Ɛkɔ̌p nɛ nēn iyêkle ɓɛ̄ ílɔ́a nɛ Ofatizyɛ̂ŋ, ɓyɔ̂ɔ ɓot o míkɔ̂ŋ! Ɓí tí ɛɗyuɛl ɓót zyě Də́ə́ mí Zɛɛ̄mb, ɓyɔ̂ɔ ɓot oték ɓyá a nî. Thɔ́k ɛ́, ɓyā ā ɓyēt nāá, ɓot o kám ɛ́ní ɓák ɛ́, ɓɛ̄ nî.» [

¹⁴«Ɛkɔ̌p nɛ nēn iyêkle ɓɛ̄ ílɔ́a nɛ Ofatizyɛ̂ŋ, ɓyɔ̂ɔ ɓot o míkɔ̂ŋ! Nɛ dɔ nāá, ɛkam ɓén ɛnwɔŋ míkús mī ɓúá ɓyɔ̄ɔ̄ ísínɔŋ ɓyɛ̂ɛsa. Tɛ́m kūl nāá, ɓī sā mindakla ékɛ́, ɓyā ā lí tɛ̂l, i zyeē ɓyá á nyên. Í yɛ́ têŋ Zɛ́mb wā pɔ́nɛs ɓɛ́n ɛ́lyeelyel ī tháŋ ɓɛ̄l ɓót ê.»]

¹⁵«Ɛkɔ̌p nɛ nēn iyêkle ɓɛ̄ ílɔ́a nɛ Ofatizyɛ̂ŋ, ɓyɔ̂ɔ ɓot o míkɔ̂ŋ! Ɓí í ɓoma sī, ɓī ɓómā mâŋ, tí ɛsáŋ nāá, ɓī ɓyéla ísu mot ŋgwát, ɓī nyūŋgɛ̄l twóó mísɔn yēn. Tɛ́m ɗí ɛ mú mot wēn ékɛ́, ɗú ɛ̄ kɔ̌m ti nɛ kɔ̄m lī gwōk khós nyɛ̄, ikɛnd iɓá ī tháŋ ɓyɔ̂ɔ!»

¹⁶«Ɛkɔ̌p nɛ nēn ɓyɔ̂ɔ ɓot o lyākɛ̄l ɓót zyē ɓyɔ̂ɔ nɛ thīm ɓâk. Nɛ dɔ nāá, ɓí lɛ̄ɛ̄ nāá: “Mot ɛ́ kana tí ɗín ɛ njāā Zɛ́mb nâk, yá a ɓɛ̄ nɛ nɔm. Sá gwát, ɛ́ kana tí ɗin ɛ gól ɗí twóó njāā é nâk, ɛ́ dalǎ nɛ ɛlwóndɛ̌l lüii yɛ̄.”

¹⁷Ɓyɔ̂ɔ ɓǎthīm ɓâk, nɛ miŋgwoŋg mîk, í yɛ̄ ɗí nɛ nɔm, gól ɛ́, gū njāā Zɛ́mb sā nāá, gól ī chánjɔɔ kê?

¹⁸Ɓí ɓākā lɛ́ɛ́ nāá: “Mot ɛ́ kana tí ɗín ɛ pyaāt mɛ́tûnka nâk, yá a ɓɛ̄ nɛ nɔm. Sá gwát, ɛ́ kana tí ɗín ɛ mɛ́tûnka ɗí kwɔ́ɔ́ pyaāt mɛ́tûnka é nâk, ɛ́ dala nɛ ɛlwóndɛ̌l lüii yɛ̄.”

¹⁹Ɓyɔ̂ɔ ɓǎthīm ɓâk! Í yɛ̄ ɗí nɛ nɔm, mɛtûnka mɛ̄ ótīt ɛ́, gú thɔ́k pyaāt mɛ́tûnka sā nāá, mɛtûnka mɛ̄ ɗî ɛ́chānchānj ê?

²⁰Mot kánā tí ɗín ɛ̄ pyaāt mɛ́tûnka ɔ́kɛ́, ɛ́ kana náǎŋ tí ɗín ɛ̄ pyaāt mɛ́tûnka, nɛ mɛtûnka mɛ ɗí kwóó ték mâk.

²¹Mot kánā tí ɗín ɛ̄ njāā Zɛ́mb ɔ́kɛ́, ɛ́ kana náǎŋ tí ɗín ɛ̄ njāā Zɛ́mb ɛ́, nɛ Zɛɛ̄mb nyɛ mot ɗí twóó njāā ték ɔ̂.

²²Mot kánā tí ɗín ɛ̄ jwóó ɔ́kɛ́, ɛ́ kana tí ɗín ɛ̄ síǎ də́ə́ mí Zɛɛ̄mb, tí nɛ Zɛ̌mb mot ɓá ɗi tí sía ték ɔ̂.»

²³«Ɛkɔ̌p nɛ nēn iyêkle ɓɛ̄ ílɔ́a nɛ Ofatizyɛ̂ŋ, ɓyɔ̂ɔ ɓot o míkɔ̂ŋ! Nɛ dɔ nāá, ɓí jüē Zɛ́mb ɛkɔɔ kām lɛ̄ ísínɔŋ ɓyɛ̂ɛs, kum tí ikā ī mɛ́nuūp, tí nɛ mimbi mi íkā myɛ̂ɛs ɓɛ́āā tí ipyeēmb ê. Ɓī ɗyámɛ̄l yīl ɗí nɛ nɔm tí lɔ́a ê. Ɗakɛ ɛ́sá sá ɗí ɛ́dalá ê, nɛ ɛsá ɛ́nwɔŋ, nɛ ɛɗúɛ̌l lüii mí Zɛɛ̄mb. Sá ɓí dálā nɛ ɛsá é têŋ, ta ɗyamɛ̌l ɓuɓuka ték.

²⁴Ɓyɔ̂ɔ ɓot o lyākɛ̄l ɓót zyě ɓyela nāá, ɓí nɛ thīm ɓâk, ɓí syaŋ mɛ́ɗyūū mēn nɛ mɛje tí ɛkámb ɛ́min thyûŋ. Sá gwát ɓyɔ̂ɔ tí ɛmǐn Yāŋgā thindî.»

²⁵«Ɛkɔ̌p nɛ nēn, iyêkle ɓɛ̄ ílɔ́a nɛ Ofatizyɛ̂ŋ, ɓyɔ̂ɔ ɓot o míkɔ̂ŋ! Nɛ dɔ nāá, ɓí dā süesɛl íkɔ́p nɛ ipelés ɓyēn ɓɛ míkɔŋ. Ɓyela nāá, ɓɛ twóó ték, í lwōndlā nɛ isá ī ɓí ɗí tí ɛjyúú nɛ ɛɗɛ́s ɓót ɓyá tí cyuk ókhatakhō ê.

²⁶Wɔ Fatizyɛ̂ŋ ɗí nɛ thīm ɔ́, ɓā nyēē süesɛl kɔ́p yɔ́ ɓɛ twóó, i zyē kɔŋ ték wá á fûp.»

²⁷«Ɛkɔ̌p nɛ nēn iyêkle ɓɛ̄ ílɔ́a nɛ Ofatizyɛ̂ŋ, ɓyɔ̂ɔ ɓot o míkɔ̂ŋ! Ɓí nɔŋlǎ nɛ mɛvit mɛ ɗí mɛ́ ɛ́ lɔmbǎ pyāmb mâk. Tí ɛɓɛɛ mɛ́ ɓɛ̌ koōl ɛ́, má a ɓá nɔ́mɔɔ ɗyáŋ. Ú kɛ̄ jüák nák ɛ́, twóó ték ɛ́, ilūm iɓɔl, nɛ ikpákla.

²⁸Ɓyɔ̂ɔ thɔ́k, ɓí ɗyaāŋ. Tí mís mɛ̄ ɓót ɛ́, ɓí nyēn nāá, ɓí mizwēs, ɓyela nāá, milyém myēn mí lwōndlā nɛ mikɔ́ŋ, nɛ ɛɓyôo.»

²⁹«Ɛkɔ̌p nɛ nēn, iyêkle ɓɛ̄ ílɔ́a nɛ Ofatizyɛ̂ŋ, ɓyɔ̂ɔ ɓot o míkɔ̂ŋ! Ɓí ɓot o yāŋ mɛ́vit mɛ̄ ógbɛ́sel o mítɔɔ̄p o mí Zɛɛ̄mb nɛ ɛgbá ínaŋgā tí mɛvit mɛ mízwēs mī ɓót ɓâk.

³⁰Ɓí lɛ̄ɛ̄ nāá: “Zyɔ̂ɔ zī ɓɛ̄ tí tɛ́m ósǎŋg-phǎmb ɓēs nâk, phú zyɔ̂ɔ zá a gbā mēs mɛ́ɓɔ́ tí ɛdó ógbɛ́sel o mítɔɔ̄p o mí Zɛɛ̄mb.”

³¹Tí lɛ̄ɛ̄ā wēn ték ɛ́, ɓī tí ɛkam nāá, ɓí chīlā ɓót o ɓā dó ogbɛ́sel o mítɔɔ̄p o mí Zɛɛ̄mb ɓâk.

³²Pha, tɔ̄ká nɛ yɛ́ ɓɛ sɔ̂k. Süānjɛ̄lká sá ósǎŋg-phǎmb ɓēn ɓā nyɛl ê!

³³Ɓyɔ̂ɔ onwɔ́ŋ ɓâk, chīlā ígúukaa ê! Ɓí sīmsā nāá, ɓyá á sá wɔ́ɔ́ mbi ɛ́zyeēl tí ɛpɔm tí pɔ́nɛ̂s ɗú ɛ̄ ɗí ta ɗím lîk?

³⁴Í sá ték ɗí nāá, má á thes ɓēn ogbɛ́sel o mítɔɔ̄p o mí Zɛɛ̄mb, nɛ ocêl, nɛ iyêkle ɓɛ̄ ílɔ́a. Ɓyá á dó ɓɛ̄l ɗyaāŋ, ɓī dō ɓɛ̄l tí ɛɓomɛl ɓɛ́ tí okolos. Ɓī ɓī ɓɛ̄l nɛ izɛmbɛ tí minjāā mī míndakla myēn, ɓi cītā nɛ nɔ̄ɔ̄ ikhanda nɛ ikhanda.

³⁵I zyeē, mɛchía mɛ ɓót ō ɓā dóaa ta ɓɛ nɛ mɛsɔ ɓák ɛ́, má á süee tí miló myēn. Ī nyɛ́l tí chía mí Áɓɛl, mot ā ɓɛ zwēs ɔ́, ī kɛ́ kum tí nyīl mí Zakalî, mwán mí Ɓalakí ɓyā dó ɛ pāká njāā Zɛ́mb ánénén nɛ pyaāt mɛ́tûnka ɔ̂.

³⁶Mí lɛ̄ɛ̄ ɓén twóó oceece nāá, myána mi mɛ́süee mɛ ɓót ōték ɛ́, myá á ɗuma tí miló mī ɓót ō ɓíliīk.»

³⁷«Ɓot ō Yotósalɛm, ɓot ō Yotósalɛm, ɓyɔ̂ɔ ɓot o ɗí tí ɛdó ógbɛ́sel o mítɔɔ̄p o mí Zɛɛ̄mb nɛ ɛdó nɛ mɛkɔ̄k ɓɛ̄l ō Zɛ́mb thes ɓēn ɓá ɓâk. Í í sá íkɛnd i thyūŋ ɗí mí í sáŋ ɛ́gwésɛl ɓén tí nāá, má á ɓútɛl ɓén ɗakɛ áɓyaā kúú ɓūtɛ̄l ɓwán ê, sá gwát ɛ́, ɓyɔ̂ɔ ta kpɛl!

³⁸Ɛ́chāak ɛ́, Zɛɛ̄mb ɛ mú tí ɛzī cǐn njāā Zɛ́mb wēn.

³⁹Nák ɛ́, mí lɛ̄ɛ̄ ɓén nāá, tí ɛnyɛl ɛ́chāak ɛ́, ɓyá ǎ kā ɓākā ɓɛɛ mɛ̂, ī kɛ́ kum tɛ́m ɓí wā lɛ́ɛ́ nāá: “Zɛ̌mb ɛ Lɛ́mɛl nɔ̄l ɗí tí ɛzye tí ɗín ɛ̄ mí Ɗâ ɔ̂!”»