Read Mpumpong Máákus 4 Bible Online

Máákus 4 - Mpumpong bible

Máákus 4

¹Yésus ɛ ɓúzī ɓākā nyɛl ɛ́lyákɛl ɓót sukúl ɛ́kɛ́l ɛ mí Zɛ̌mb ɓɛ̌ mwɔ̄ŋ jembě Galilê. Mɛthum mɛ ɓót mɛ̄ ɓúzī gwêsla ɓɛ̄ lúŋ ɛ̂. Ɛ ɓúzī kā kalɔɔ tí ɓyɛ̂l ɛ ɗí ndíndiīl. Ɓyɛ́l ték ā ɓɛ tí mɛɗyūū, ɓot ɓɔ̂ɔ ɓɛ cīnd.

²Ɛ ɓú jijüe ɓɛ́ sukúl tí thūnd ísínɔŋ, ɛ thītháŋ tí iɓwoŋa. Nyɛ nɛ nɔ̄ɔ̄ nāá:

³«Gwōkɛ̄lkâ! Tí wūl mwēs ɛ́, nɔ̄l mót ā ɓɛ ɛ́ ɛ́ tɔ́ ɓɛ̌ pyeēmb yɛ̄ tí ɛkɛ̄ myam mɛ́phɛk.

⁴Ɗakɛ ā ɓɛ tí ɛtɔ́ nɛ ɛmyam ékɛ́, lyúk ɛ́ɓīm ɛ̄ phɛk lí ɓúzī ɗuma tí ɛphanj ɛzyé, inɔɔ̄n ɓī tɔ́t yɛ̂ɛs.

⁵Līl ɛ́ɓīm lī ɗúmā tí ɓwaās íkus, ɓwaās ték ta pip. Í dá pas ɛ́hoo.

⁶Tɛ́m jüēs yā ka zye ékɛ́, ī dá ɗís phɛk ték ɗīs ê. Ī süās tí lúk tyâa mipeēnd.

⁷Līl ɛ́ɓīm lī ɗúmā tí pyaāt mínjüīnīnī. Ɗɛ myā zi gwéé ékɛ́, mí ɓúzī pílɛl mɛ́phɛk. Mɛphɛk mɛték mɔ̂ɔ ta kā gûm.

⁸Sá gwát, lyúk ɛ́ɓīm lī dá kɛ̄ ɗuma tí tyaa ɓwaās. Mɛphɛk mɛték mɛ̄ pâs, mɛ̄ gwêe, mɛ̄ sā mítû. Myúk mítú phǔm mɛkām mɛ̄lɛ́l mɛ̄lɛ̂l, myúk mɛkām twōō twōō, myúk thyet thyet.»

⁹Yésus ɛ ɓúzī lɛ́ɛ́ nāá: «Mot ɗí nɛ mɛlɔ́ mɛ̄ ɛ́gwók ɔ́kɛ́, ɛ gwôk!»

¹⁰Tɛ́m Yésus ā ɓɛ ɛ́ ɛ́ ɓɛ́sa nɛ mɛthum mɛ ɓót ékɛ́, milwōmtwōm kām nɛ mīmbá myɛ̄ nɛ ɓot o ɓá nɛ nɔ̄ɔ̄ ɓā kikɛ ndɔŋ ɓák ɛ́, ɓɛ̄ ɓúzī jí ɛ́ nāá: «Í yɛ̄ ú dā lüǐ nɛ ɓot nɛ iɓwoŋa ê?»

¹¹Yésus ɛ ɓúzī ɓɛ́s nɛ nɔ̄ɔ̄ nāá: «Zɛɛ̄mb ɛ́ ɛ́ jüe ɓyɔ̂ɔ isá ī mísɔlā ī ɗí tí Də́ə́ yɛ̄ ɓîk. Sá gwát ɓɛ̄l ɓót ɓɔ̂ɔ ɓá á dā gigwōk ɓyɛ́ zinjá iɓwoŋa

¹²Í ɗyaāŋ ték ɗí nāá, “Ɓɛ̄ tí ɛgū jüāk, sá gwát ta ɓɛɛ. Ɓɛ̄ gū gwókɛl, sá gwát ta gwôk. Í ɓɛ̄ nāá, ɓɛ̄ gwōk nák ɛ́, Phú ɓá á lúm míkɔŋ nɛ mɛɓyóó mɔ̄ɔ̄ ɛ́, Ɓɛ̄ ɗū Zɛ́mb. Zɛɛ̄mb thɔ́k ɛ jú ɓɛ̂!”»

¹³Phúla ték ɛ́, Yésus ɛ ɓúkā jí nɛ ɓot ɓā ɓɛ náǎŋ ɓák nāá: «Ɓyā ā nyéé gú mɛ́tīmbɛɛ̄l mɛ yúk ɓwoŋa, á ɓyá á gú mɛ́timbɛɛ̄l mɛ ɓīl ɓyɛ̂ɛsa nā?

¹⁴Mbɛel mɛphɛk ɛ̄ mot myám ɛ́kɛ́l ɛ̄ mí Zɛɛ̄mb ɔ̂.

¹⁵Phuūm nyī ɗúmā tí ɛphanj ɛ zyē. Ɛphanj ɛzyé lí nɔŋlǎ nɛ ɓot o gwók ɛ́kɛ́l ɛ̄ mí Zɛ̌mb ta ɓwɛɛ nák ɛ́, Sátan ɛ zí kpās ɛ̄ɗüis ɓɛ́ lá tí milyém ɓâk.

¹⁶Nyīl phúm phɛk nyā ɗuma tí ɓwaās íkus. Ɓwaās íkus í nɔŋlā nɛ ɓot o gwōkɛ̄l ɛ́kɛ́l ɛ̄ mí Zɛɛ̄mb, ɓɛ̄ ɓyé lɛ́ khāŋlā, nɛ mimyaŋla ɓâk.

¹⁷Sá gwát ɓáa ɓɛ̄ nɛ mipeēnd, ɛɓūklā lɔ̄ɔ̄ lí ŋgúl pháŋ. Tɛ́m ɓīɓyɔ̄k íthēsā nɛ ɓīɓyɔ̄k mítūŋ kūl ɓɛ́ tí tɔɔ̄p ɛ́kɛ́l ɛ̄ mí Zɛɛ̄mb ékɛ́, ɓɛ̄ ɗúma.

¹⁸Ɓwaās mínjüīnīnī pyaāt yīl phɛk yā ɗuma ékɛ́, í nɔŋlǎ nɛ ɓot o gwók ɛ́kɛ̂l, Sá gwát, ɛcel ɛ̄ lyém tí isá ɓɛ̄ íɓwaās nɛ mikɔ́ŋ mī ɛ́kūm ɛ̄ sī nyík zí kā nwɔŋ mīl mímbi mi mɛ́gómb myɛ̂ɛs ɓí í máta ɛ́kɛ́l nāá, lá a gúm phûm.

¹⁹Sá gwát ɛ́, minjeā mí íɓwaās, nɛ mikɔ́ŋ mī ɛ́kūm ɛ̄ sī, nɛ mīl mínjeā myɔ̂ɔ thɔ́ mát ɛ́kɛ̂l, lɔ̂ɔ ta kā gúm sínɔŋ.

²⁰Tyaa ɓwaās pyaāt yīl phɛk yā ɗuma ékɛ́, í ɓɛ̄l ō gwōkɛ̄l ɛ́kɛ̂l, ɓɛ̄ gbā lɛ́ tí ɓûk, ɓɛ̄ gūm phûm ɓâk. Ɓák phǔm mɛkām mɛ̄lɛ́l mɛ̄lɛ̂l, ɓák mɛkām twōō twōō, ɓák phǔm thyet thyet.»

²¹Phúla ték ɛ́, Yésus ɛ ɓúzī jí nāá: «Mot ɛ tí tumb lámba tí nāá, á á ɓúmɛl ɛ́ nɛ ɓwomb gú thɔ́k ɛ swóŋgɛ̄l ɛ́ sī ɗɔɔ̄ŋ ɛ́? Ɓā ā túmb lámba tí nāá, ɓá á ka ɛ́, ɛ́khɛ́lɛm tí kwōŋ ɛ̄?

²²Sá yɛ̂ɛs ɗí sɔlā ékɛ́, yá á ɓāndā gbɔ́m ɓɛ̌ koōl. Yīl ɗí tí sɔɔ̄ ékɛ́, yá á ɓāndā nyén tí ɛɓyakɔɔ.

²³Mot ɗí nɛ mɛlɔ́ mɛ̄ ɛ́gwók ɔ́kɛ́, ɛ gwôk.»

²⁴Yésus ɛ ɓúzī ɓākā lɛ́ɛ́ ɓɛ́ nāá: «Ɓī gú ɓakɛl nɛ sá ɓí ɗí tí ɛgwók ê! Zɛɛ̄mb á á jwok ɓén nɛ jwoka ɓí jwók mísāwā mī ɓɛ̄l nɛ yɛ́ ékɛ́, ɛ ɓákā kɛl ɓén yīl.

²⁵Nɛ dɔ nāá, mot ɗí nɛ sínɔŋ ɔ́kɛ́, ɓá á ɓākā kɛl ɛ́ yīl, ɛ ɗí tí ɛsūl. Sá gwát mot ɗí ta ɓɛ nɛ yɛ́ ɔ́kɛ́, ísu ɓīɓyɔ̄k ɛ́ ɗí nɛ yɛ́ ékɛ́, ɓá á ɗüis ɛ́ yá.»

²⁶Yésus ɛ ɓúzī ɓākā lɛ́ɛ́ nāá: «Də́ə́ mí Zɛɛ̄mb í nɔŋlǎ nɛ ɗakɛ mót myám phɛk tí pyeēmb yɛ̄ ê.

²⁷Ísu ɛ dâ, ísu ɛ jêm, sá ɗí ékɛ́ í nāá, nɛ mwēs nɛ pum ɛ́, phɛk ī tí ɛkpás nɛ ɛgwêe nyɛ ta gû.

²⁸Iɓwaās ɓí sā nāá, phɛk ī pás ê, ī sā mítû, mitú mīték mī sā phûm.

²⁹Tɛ́m phɛk ɗí í í lel ékɛ́, mot pyeēmb ɛ nyɛ́l ísɛ̄ɛ̄ nɛ kphālā wɛ̄. Nɛ dɔ nāá, í í kúl tɛ́m mɛmwɔ́ka.»

³⁰Yésus ɛ ɓúzī ɓākā jí nāá: «Ní nɛ khul ɛ̄ jwok ká Də́ə́ mí Zɛ̌mb nɛ wɔ́ɔ́ mbi sínɔŋ? Í wɔ́ɔ́ mbǐ ɓwoŋa ní ɗí nɛ khul ɛnwɔŋ ká tí ɛlüǐ tɔɔ̄p Də́ə́ mí Zɛɛ̄mb ê?

³¹Də́ə́ mí Zɛɛ̄mb í nɔŋlǎ nɛ ɓǔm phɛk ɓɛ́ jóó nāá, mutâad ê. Í phɛk ɗí tí ɓuú twɔ́kɔɔ tí ndɔŋ mɛ́phɛk ɓɛ́ ɗí tí ɛɓɛ mâk.

³²Sá gwát ɛ́, tɛ́m ɗí í í pas ékɛ́, yɔ̂ɔ thɔ́ gwêe ī tháŋ mɛ́phɛk myɛ̂ɛs ɓɛ́āā tí thwɔ̄ɔ̄ ê. Í sá míláá mī ɗí nāá, inɔɔ̄n ɓɛ́ nɛ khul ɛ zí sum mɔ́k mɔ̄ɔ̄ ték ê.»

³³Yésus ā ɓu ɓiɓɛla nɛ mimbi mi íɓwoŋa mīnɛ́ɛ̌ŋ tí ɛlyákɛl ɓót sukúl ɛ́kɛ́l ɛ mí Zɛɛ̄mb. Ā lilyákɛl sukúl ték tí tɛ̄lā ɗí nāá, ɓot ɓyɛ̂ɛs ɓā gigwókɛl ɛ ɓák ɛ́, ɓɛ̄ gwók ê.

³⁴A a lilüii nɛ nɔ̄ɔ̄ ta nwɔŋ ɓɛ́ iɓwoŋa. Sá gwát ɛ́, tɛ́m ɛ́ mú ɓá nɛ ophōn ɓɛ̄ ékɛ́, ɛ jüē ɓɛ́ mɛtimbɛl mɛ̄ték myɛ̂ɛsa.

³⁵Tí ɓíkokō gwát nɛ gwát ték ɛ́, Yésus nɛ ophōn ɓɛ̄ nāá: «Nī sɔ̂ɔ ka ɓɛ̄ nyīl cǐnd jembe.»

³⁶Ɗakɛ ɓā ɓɛ ɓɛ́ ɛ́ ɓɛ́sa nɛ mɛthum mɛ ɓót ékɛ́, ophōn ō mí Yésus ɓɛ̄ ɓúzī tɔ́ ɓá nɛ ɓɔɔ Yésus tí ɓyɛ́l Yésus ā ɓā ɓɛ ték ɔ̂. Í i ɓɛ thɔ́k nɛ ɓɛ̄l óɓyɛ́l náǎŋ.

³⁷Ta ɓwɛɛ nák ɛ́, ánénén khúŋ ɛ ɓúzī nyɛl ɛ́pupɛl ī sâ óɓwōk. Mɛɗyūū mɛ̄ nyɛ́l ɛ́ní tí ɓyɛ́l ɛ́ɓuuɓu.

³⁸Í ɓyela náǎŋ ɛ́, Yésus ɛ tí dɔ́ tí ɓyɛ́l ɓɛ phûs, ló kɛlā tí ɛɓwōŋɛ̄l. Ophōn ɓɛ̄ ɓɛ ɓúzī jem ɛ́ nɛ ɛjóó ɛ. Ɓɔ̂ɔ nɛ nɛ̄ nāá: «Ndə́ə́, wā ā ɓɛ́ɛ́ nāá, ní ǐ jüe ká?»

³⁹Yésus ɛ ɓúzī jem, ɛ khākɔ̄ɔ̄ nɛ khûŋ. Nyɛ nɛ mɛɗyūū mɛ̄ jembe nāá: «Kāt ɛ́sá óɓwōk!» Khúŋ ɛ dá kāt ɛ́pupɛl, ta kā ɓɛ tel nɛ yīl sínɔŋ.

⁴⁰Náǎŋ Yésus ā ka jí nɛ ophōn ɓɛ̄ nāá: «Ɓí gwōk ɓā yɛ̄? Ɓyɔ̂ɔ ɓyá a ɓá ɓɛ nɛ ɛɓūklā?»

⁴¹Sá gwát ɛ́, ophōn ɓɛ̄ ɓā ɓɛ tí ɛgwók ɓyǒla óɓwɔ̄ŋ. Ɓɛ̄ ɓú lilɛ́ɛ́ nāá: «Nɔ́k ɛ wɔ́ɔ́ mbi mót ɗí ɗék nāá, nɛ khûŋ, nɛ oɓwōk ō mɛ́ɗyūū ɓɛ̄ tí ɛɗúɛl lüii yɛ̄ ɔ̂?»