Read Mpumpong Máákus 7 Bible Online

Máákus 7 - Mpumpong bible

Máákus 7

¹Ofatizyɛ̂ŋ nɛ ɛɓīm lɛ̄ íyêkle ɓɛ̄ ílɔ́a ɓā ɗüis ɓɛ̌ Yotósalɛm ɓák ɛ́, ɓɛ̄ ɓúzī gwêsla ɓɛ ɗá mí Yésus, ɓɛ̄ lúŋ ɛ̂.

²Ɓɛ ɓúzī ɓɛɛ nāá, ɓɛ̄l ophōn ō mí Yésus ɓɛ̄ tí ɛɗɛ nɛ mɛɓɔ́ ta chánjɔɔ. Í tían nāá, ɛɗɛ ta süesɛl mɛ́ɓɔ́, ɗakɛ mɛ́tum mɛ̄ óɗá ɓɔ̄ɔ̄ ɓá ɗi tí ɛlɛ́ɛ́ ê.

³Tí ɛɓɛɛ nák ɛ́, Ofatízyɛ̂ŋ nɛ Óyúɗɛn ɓyɛ̂ɛsa, ɓɛ̄ tí ɛɗúɛl mɛ́tum mɛ̄ óɗá ɓɔ̄ɔ̄. Ɛsɔ́k nāá, ɓɛ ɗɛ̂ kɛ́, ɓɛ́ nyēē süesɛl mɛ́ɓɔ́ mɔ̄ɔ̄ ɛ́nwɔŋnwɔŋ ɗakɛ mɛ́tum mɛ̄ óɗá mɔ̄ɔ̄ ɓá lɛ́ɛ́ ê.

⁴Tɛ́m ɓɛ́ ɓūlā ɓɛ mɛ́phānj ékɛ́, ɓɛ́ nyēē süesɛl mɛ́nól mɔ̄ɔ̄ ɗakɛ mɛ́tum mɛ̄ óɗá mɔ̄ɔ̄ ɓá lɛ́ɛ́ ê, ɛsɔ́k nāá, ɓɛ ɗɛ̂. Ɓɛ́ thɔ́k tí ɛɗúɛl mɛ̄l mɛ́tum mɛték ɛ́ɓuuɓu. Ɗakɛ ɛ́süesɛl ókwol, nɛ ithak, nɛ mɛpheē ɛ́nwɔŋnwɔŋ.

⁵Ofatizyɛ̂ŋ nɛ iyêkle ɓɛ̄ ílɔ́a ɓɛ̄ ɓúkā jí nɛ Yésus nāá: «Í yɛ̄ sā nāá, ophōn ɓɔ́ ɓā ā ɗūɛ̄l mɛ́tum mɛ̄ óɗá káɓīnā ɓā lyûk ê? Ɓɛ́ ɗɛ̄ íɗóó nɛ mɛɓɔ́ ta chánjɔɔ tí tɔɔ̄p yɛ̄?»

⁶Yésus ɛ ɓúzī ɓɛ́s nɛ nɔ̄ɔ̄ nāá: «Izaí ɛ́ ɛ ɓɛ nɛ kham tɛ́m ā lüii tɔɔ̄p wěn ɗakɛ Zɛ́mb ā lɛ́ɛ́ ɛ ê. Ā lɛ́ɛ́ ɛ nāá: “Kúl ɓót ékɛ́ í ɗúɛ̄l mɛ̄ tí ikwoōnd ī nup. Sá gwát lyém wɛ̄ ú ɛ́cetaceta nɛ naām.

⁷Gós-óɓúkɛl ɓɛ́ ɗí tí ɛsá tí ɛsú lám ékɛ́, Í títoōk. Nɛ dɔ nāá, isá ī ɓɛ́ ɗí tí ɛlyákɛl ɓót nāá, Ɓɛ̄ ɗúɛl ɓík ɛ́, ɓyā ā ɗüís ɓɛ yâm, Ɓí tē tí ɓɔ̂ɔ ɓot oték.”

⁸Ɓí lyūk mɛ́tyuūŋ mí Zɛɛ̄mb, ɓī ɗūɛ̄l mēn mɛ́tum.»

⁹Yésus ɛ ɓú ɓākā lɛ́ɛ́ nɛ nɔ̄ɔ̄ nāá: «Ɓí í küíí tí ɛlúm kɔŋ nɛ mɛtyuūŋ mí Zɛɛ̄mb, tí nāá, ɓyá á ɗúɛl mɛ́tum mēn.

¹⁰Tí ɛɓɛɛ nák ɛ́, Moís ā lɛ́ɛ́ nāá: “Ɗūɛ̄l sɔ̄ŋg nɛ nɔɔ̄ŋg.” Ɛ ɓákā lɛ́ɛ́ thɔ́k nāá: “Mot lə́ə́ sāŋg nɛ naāŋg ɔ́kɛ́, ɓɛ́ dala ɛ́dó ɛ̂.”

¹¹Sá gwát, ɓyɔ̂ɔ ɓí lyākɛ̄l ɓót nāá, mot ɛ nɛ khul ɛlɛ́ɛ́ nɛ sāŋg nɛ naāŋg nāá: “Sísā ɓɛ̄ nāá, mi vɔ́l ɔ nɛ yá ékɛ́, í kɔ̄ɔ̄ɓâŋ. Í tian nāá, mɛphɔ̄k mí kwom tí ɛsú ɛ mí Zɛɛ̄mb mâk.”

¹²Í ɗyaāŋ ték ɓí ɗí tí ɛjüě mbi mót ték zye nāá, ɓākā sá sínɔŋ tí nāá, ɓá á vɔ́l ósāŋg nɛ onaāŋg e.

¹³Í náǎŋ ɓí ɗí tí ɛkalɔɔ tí mɛtum mɛ̄n ɓí ɗí tí ɛlyákɛl ɓót má mák ɛ́, tí nāá, ɓyá á gbanj ɛ́kɛ́l ɛ̄ mí Zɛɛ̄mb ê. Í thɔ́k nɛ thūnd ísínɔŋ ɓí ɗí tí ɛɓākā sá ɓī nɔ́ŋlā nɛ ɓīnɛ́ɛ̌ŋ ê.»

¹⁴Phúla ték ɛ́, Yésus ɛ ɓúzī ɓākā jóó mɛ́thum mɛ ɓôt, nyɛ nɛ nɔ̄ɔ̄ nāá: «Gū kɔ́njká mɛlɔ̂, ɓī gwók sá mí wā lɛ́ɛ́ ɗék ê.

¹⁵Sá yɛ̂ɛs ɗüís ɓɛ̌ koōl ī nī twóó nól mot ékɛ́, yā ā lɔ́s ɛ̂. Sá gwát, sá lɔ́s ɛ́ ékɛ́, ī yīl gbās twóó mot ékɛ́, lɔ́s ɛ́ ê.

¹⁶Mot ɗí nɛ mɛlɔ́ mɛ̄ ɛ́gwók ɔ́kɛ́, ɛ gwók ê!»

¹⁷Ɗɛ Yésus ā ɓɛ ɛ́ ɛ́ ɓɛ́sa nɛ mɛthum mɛ ɓót mīnɛ́ɛ̌ŋ ɛ tɔ́ ɓɛ̌ njāā ékɛ́, ophōn ɓɛ̄ ɓɛ̄ ɓú jí nɛ nɛ̄ nāá: «Yīnɛ́ɛ̌ŋ ɓwoŋa í tian nāá yɛ̄?»

¹⁸Ɛ ɓúkā ɓākā jí nɛ nɔ̄ɔ̄ nāá: «Ɓyɔ̂ɔ ɓī kā ɓākā ɓɛ míŋgwoŋg ɛ? Ɓyā ā gū nāá, yá a ɓɛ̄ sá nī twóó nôl mot é lɔ́s ɛ?

¹⁹Sá nī twóó nôl mot é yā ā kúm ɓɛ̌ lyêm. Í tɔ̄ twóó mɔ̂. Phúla ték, ɛ kɛ́ nak yɛ́ ɓɛ̌ kwɔɔ̄k.» Mɛkɛ́l mí Yésus ā lɛ́ɛ ɗyaāŋ mák ɛ́, mā kam ɛlɛ́ɛ́ nāá, ɓɛ́ nɛ khul ɛɗɛ íɗóó ɓyɛ̂ɛsa.

²⁰Ɛ ɓú ɓākā lɛ́ɛ́ nāá: «Yīl gbɔ̄m tí nôl mot ékɛ́, í yízaāŋ ték lɔ́s ɛ́ ê.

²¹Nɛ dɔ nāá, iɓyǒla ɓī ósīmsā tīnd mót nāá, ɛ sâ imɔlā, nɛ jyûu, nɛ ɛdó ɓôt,

²²nɛ ɛgús ɛ́kɔnd, nɛ ɛgómb ísá ī ɓót, nɛ ɛsá ɓyǒlǎ lyêm, nɛ ɛsá míkɔ̂ŋ, nɛ ta ɓɛ nɛ tɛ́m tí sá jüāk mɛ́tyuūŋ e, nɛ mɛ́zyūŋ, nɛ ɛlüii ɛ́ɓyóóɓyóó nɛ mín mɛ̄ ɓôt, nɛ ɛɓén ɛ̄ nôl, zī kā nwɔŋ lúk lyém.

²³Í iɓyǒla ɓɛ̄ ísínɔŋ ɓīnɛ́ɛ̌ŋ ɓyɛ̂ɛsa ɓí ɗüis twóó lyém mí mot, í ɓyɔ̂ɔ thɔ́k lɔ́s ɛ̂.»

²⁴Phúla ték ɛ́, Yésus ɛ ɓúzī péma tí yízǎŋ pyaāt ɛ tɔ́ ɓɛ pák ɓwaās Tîi. Ɛ ɓúzī ní tí wūl njāā, ta sá nāá ɓot ɓɛ̄ gû nāá, ɛ mú tîn. Sá gwát ɛ́, ɓot ɓɛ́ ɛ ɓanda gû nāá, ɛ mú náǎŋ.

²⁵Nák ɛ́, nɔ̄l múmá ɛ ɓúzī gwók tɔɔ̄p mí Yésus tí ɛlüiiaa. Mumá ték a a ɓɛ tí kúl ɓót Óyúɗɛn. Ā ɓyɛ́l ɓɛ̌ Silí tí cǐl ɓwǎs Fenesî. Mwâmumá wɛ̄ ā ɓɛ tí ithēsā ī ɓyǒlǎ sisîmb. Mumá ték ɛ dá zye, ɛ zī ɗuma Yésus tí mɛkoō, nyɛ nɛ nɛ̄ nāá: «Mí í dakla nɛ nɔɔ̄, sɔ́ ɓyǒla sisímb tí nól mwâmumá waām.»

²⁷Yésus ɛ ɓúzī lɛ́ɛ́ nɛ nɛ̄ nāá: «Ɓā ɓyét nāá, ɓwâthɛɛ̄mb ɓɛ̄ ɓā ā ɓā nyēē ɗɛ ɓɛ̄ jîl. Nɛ dɔ nāá, yā ā nwɔ́ŋ nāá, ɓɛ̄ jüē ɓwán ɓɛ̄ óphyé iɗóó ī ɓwâthɛɛ̄mb.»[3]

²⁸Mumá nɛ nɛ̄ nāá: «Í ku yɔ̂ɔ ɗyaāŋ Ɗâ, sá gwát ɛ́, ɓwán ɓɛ̄ óphyé, ɓɛ́ ku thɔ́k tí ɗɛ mɛ́nyuŋ mɛ̄ íɗóó kút sī têble ɓwâthɛɛ̄mb ê.»

²⁹Yésus nɛ nɛ̄ nāá: «Tɔ̂, tí tɔɔ̄p tyâa ɛkɛ́l lɔ́ līnɛ́ɛ̌ŋ ɛ́, ɓyǒlǎ sisímb í náǎŋ í í ɗüis mwán ɔ̄ tí nôl.»

³⁰Mumá ɛ ɓúzī süís ɓɛ̌ njāā wɛ̄. Ɛ́ kɛ̄ ɓyela mwán njínjɛɛ̄s tí dɔɔ̄ŋ ɛ́pyɛɛ, a a kā ɓɛ nɛ ɓyǒlǎ sisîmb.

³¹Phúla ték ɛ́, Yésus ɛ ɓúzī kpáŋ tí ɓwaās Tîi, ɛ tháŋ ɓɛ̌ ɓwaās Siɗɔ̂ŋ tí ɛɓúla ɓɛ pák jembě Galilê. Ɛ́ thītháŋ ɓɛ pák cǐl ɓwaās íkhanda kām.

³²Ɓɛ̄ ɓúzī zye ɛ́ nɛ áná ikɔ̄lā ā ɓɛ thɔ́k ta lüii ɛ́nwɔŋnwɔŋ ɔ̂. Ɓɛ̄ ɓúzī dakla nɛ Yésus ɓɔ̂ɔ nɛ nɛ̄ nāá, ɛkɛ́l ɛ mɛɓɔ̂.

³³Yésus ɛ ɓúzī nwɔŋ mót ɔ́nɔ́ɔ̌ŋ ɛ tɔ̄ nɛ nɛ̄ ɛ́cetaceta nɛ mɛthum mɛ ɓôt. Phúla ā ɓɛ ɛ́ ɛ́ síl ɛ́gbá ɛ́ phiīn tí mɛlɔ́ ékɛ́, ɛ ɓúzī syɛɛ mɛ́tɛ́l tí phiīn ɛ kūnā nɛ jém yɛ̄.

³⁴Phúla ték ɛ́, Yésus ɛ ɓúzī ɓén mís ɓɛ ɛ́kó ɛ súlā mísweēs. Nyɛ nɛ mot ɔ́nɔ́ɔ̌ŋ nāá: «Efáta!» Í tian nāá: «Ɓɔ̄ŋg e!»

³⁵Títɛɛ̄l ŋgwát ɛ́, mɛlɔ́ mɛ̄ mót ɔ́nɔ́ɔ̌ŋ ɛ́, mɛ̄ dá ɓɔ́ɔ́ŋgɓɔ̄ŋgê. Jém yɛ̄ ī pɔ̂k, ɛ nyɛ́l ɛ́lüii ɛ́nwɔŋnwɔŋ.

³⁶Yésus ɛ ɓúzī lɛ́ɛ́ nɛ ɓot o ɓā ɓɛ náǎŋ ɓák nāá: «A a gwók nāá, ɓɛ́ ɛ́ lɛ́ɛ́ mót sínɔŋ.» Sá gwát, tɛ́m yɛ̂ɛs ā lilɛ́ɛ nɛ ɓot nāá, ɓá a lɛ́ɛ́ mót sínɔŋ ékɛ́, ɓɔ̂ɔ ɓā da ɓaka lilɛ́ɛ́ ī thâŋ.

³⁷Ɓot oték ɓā ɓɛ ɓɛ́ ɛ́ ɓū kám sá têk, ɓɛ̄ līlɛ̄ɛ̄ nāá: «Sá yɛ̂ɛs ɛ́ ɗí tí ɛsá ékɛ́, í nje ték tí ɓū nwɔŋ. Ɛ tí ɛsá nāá, ɓǎná-ikɔ̄lā ɓɛ̄ gwók ê. Itālüíí ɓī lüíi!»