Read Mpumpong Lókas 10 Bible Online

Lókas 10 - Mpumpong bible

Lókas 10

¹[3] Phúla ilüii iték ɛ́, Ɗá ɛ ɓúzī ɓākā tɔ́p ɓɛ̄l óphōn mɛkām tɛ̄n nɛ mɛ̄mbá nɛ ōɓá. Tí nāá, á á nyēē kɛnd ɓɛ́ ōɓá ōɓá, tí ikhanda ɓyɛ̂ɛsa, nɛ ipyaāt ɓyɛ̂ɛsa ɓyā ɓɛ nāá, nyɛ mot ték á á tɔ́ ê.

²Ɛ ɓúzī lɛ́ɛ́ nɛ ophōn ɓɛ̄ nāá: «Pyeēmb í í tǘsa, sá gwát, osɛ́l ɓā ā ɓû. Ɗaklaká phɛ̄ nɛ mot pyeēmb ték nāá, ɛ thês osɛ́l ō wā zī ɗüis íɗóó ɓyɛ̄ ɓâk.

³Tɔ̄kānâ, mí kɛnd ɓén wák ɛ́, ɗakɛ ɓwán ɓɛ̄ íthɛmbɛ twóó okhɔy.

⁴Mot a a nwɔ̌ŋ myanj ɗí nɛ khul ɛ kɛ̌ mɔnī gú thɔ́k wūl myanj ɗí nɛ khul ɛkɛ ɓīl ísínɔŋ é, gú inalɓwaās isüîs. Mot a a ɗímbɛl tɛ́m tí zyě tɔɔ̄p mɛ́süesol.

⁵Tɛ́m ɓí wā ní tí njāā ékɛ́, nyēē lɛ́ɛ́ká nɛ ɓot ō njāā ték nāá: “Zɛɛ̄mb ɛ jüê ɓén ɓyɛ̂ɛs ɛpyaala.”

⁶Í wā ɓɛ nɛ mot ɗí tí ɛkam ɛ́pyaala twóó njāā ték ɔ́ nâk, Zɛ̌mb ɛ jüê ɓěn ɓyɛ̂ɛs ɛpyaala. Í wā ɓɛ ta ɓɛ nɛ mot kpɛ́l ɛ́pyaala ɛ ték ɔ́ nâk, Zɛɛ̄mb a á jüe ɛ́ ɛpyaala.

⁷Dā ɗiká tí njāā ɓɛ́ wā ɓakɛl ɓén ɔ̂. Ɓī ɗɛ̄ sá yɛ̂ɛsa ɓɛ́ wā jüe ɓén é, nɛ dɔ nāá, sɛ́l ɛ́ dalǎ nɛ ɛɓye myána mī ísɛ̄ɛ̄ ɓyɛ̄. Ɓyá a sá, ɗüis tí wúk njāā, khaŋga tí wǔl njāā.

⁸Ɓí wā ní twóó khanda, ɓot ǒ khanda ték ɓɛ̄ ɓɛlǎ nɛ nēn nâk, dā ɗɛká sá ɓɛ́ wā jüe ɓén ê.

⁹Ɓī cís mímbɛ́l ɓí wā ɓyela tí náǎŋ mîk. Ɓī lɛ̄ɛ̄ ɓót ō khanda ték nāá: “Də́ə́ mí Zɛɛ̄mb ī mú ndumɛ nɛ nēn.”

¹⁰Tɛ́m ɓí wā ní tí yīl khanda, ɓot ō khanda ték ta ɓɛlǎ nɛ nēn ékɛ́, tɔ̄kāná tí ikphaāk, ɓī lɛ̄ɛ̄ nɛ ɓot ō khanda ték nāá:

¹¹“Zí í pup mɛ́puūmb[4] mɛ̄ khanda yēn nata ɓés tí mɛkoō ékɛ́ tí ɛlyúk ɓén má. Sá gwát ɓí dala ɛ́ gú nāá, Də́ə́ mí Zɛɛ̄mb ī mú ɛ́kúnɔɔ kúnɔɔ nɛ nēn.”

¹²Ī ɗyaāŋ ték mɛ́ lɛ̄ɛ̄ ɓén nāá, mwēs Zɛ́mb wā cyúkɛl mítɔɔ̄p pāká ɓá nɛ ɓot ékɛ́, pɔ̄nɛ́s ɓót ō khanda ték yá á thaŋ yīl ɓót ō Sɔ́ɗɔm.»

¹³«Ɛkɔ̌p nɛ nēn, ɓyɔ̂ɔ ɓot ō khandǎ Kotazîŋ. Ɛkɔ̌p nɛ nēn ɓyɔ̂ɔ ɓot ō khandǎ Ɓɛtsaída, nɛ dɔ nāá, mɛsimbā mā sɛ́ɛ ɓɛ yēn mák, mɛ̄ sɛ̄ɛ̄ ɓɛ̌ khanda Tîi nɛ khandǎ Siɗɔ́ŋ nák ɛ́, phú ɓot ɓɛ̄ íkhanda iték ɓɛ́ ɛ ɓwát mikhuta, ɓɛ̄ ɓīā mɛ́süiī tí ɛlyákɛl nāá, ɓɛ́ ɛ́ lúm míkɔŋ nɛ mɛɓyóó mɔ̄ɔ̄.

¹⁴Í yɛ́ mí lɛ́ɛ́ ɓén nāá, mwēs Zɛ́mb wā cyúkɛl mítɔɔ̄p pāká ɓá nɛ ɓot ékɛ́, pɔ̄nɛ́s ɓót ō khanda Tîi nɛ Siɗɔ́ŋ ɛ́, yá ǎ kǔm yēn.

¹⁵Í kā ɓɛ ɓyɔ̂ɔ ɓot ō khandǎ Kapɛtnaúm nâk, ɓí sīmsā nāá, Zɛɛ̄mb á á ɓén ɓén ɓī kɛ́ kǔm ɓɛ̌ jwóó ɛ́? Kât, á á kū dā sul ɓén sul é ɓɛ̌ pyaāt mímûŋ.»

¹⁶Yésus ɛ ɓúzī ɓākā lɛ́ɛ́ nɛ ophōn ɓɛ̄ nāá: «Nɔ̄l wā gwók ɓén ɔ́kɛ́, nyízaāŋ ték ɛ́ ɛ́ gwók mɛ̂. Nɔ̄l wā ɗi ta ɓakɛl ɓén ɔ́kɛ́, ɛ́ ɛ́ ɓyen ɛ́ɓakɛl mɛ̂. Pha nɔ̄l wā ɓyen ɛ́ɓakɛl mɛ́ ɔ́kɛ́, ɛ ɓyen ɛ́ɓakɛl nɔ̄l ā thes mɛ ɔ̂.»

¹⁷Tɛ́m óphōn mɛkām tɛ̄n nɛ mɛ̄mbá nɛ ōɓá ɓīnɛ́ɛ̌ŋ ɓā kɛ ɓúla ékɛ́, ɓā ɓɛ lwōndlā nɛ mimyaŋla. Ɓɔ̂ɔ nɛ Yésus nāá: «Ɗâ, sá yɛ̂ɛsa zí ɓɛ̄ tí ɛlɛ́ɛ́ nɛ iɓyǒla ɓɛ̄ ísisímb nāá, ɓī sâ tí ɗín lɔ̂ ékɛ́, ɓɛ́ ɛ sâ!»

¹⁸Í náǎŋ Yésus ká lɛ́ɛ́ nɛ nɔ̄ɔ̄ nāá: «Mī ɓɛ̄ tí ɛɓɛɛ Sátan tí ɛɗüis ɓɛ̌ jwóó ɛ zí ɗumǎ ɓɛ sī ɗɛ̌ njües phī.

¹⁹Sá gwát gūká nāá, mí í jüe ɓén də́ə́ nāá ɓī nâl igûkaa nɛ iɓāmlwál, ɓī tīūɛ̄l də́ə́ mí Sátan yɛ̂ɛsa sínɔŋ ta sá ɓén.

²⁰Ī ɓú dā ɓɛ yɔ̂ɔ nāá, ɓyá a myaŋlǎ tɔɔ̄p nāá, iɓyǒla ɓɛ̄ ísisímb ɓī tí ɛgwók ɓén. Myaŋlaká tí tɔɔ̄p nāá, mín mēn mɛ́ mitilā ɓɛ ɗá mí Zɛɛ̄mb.»

²¹Tí tɛ́m gwát nɛ gwát ték ɛ́, Áchāāchǎnj Sisímb ɛ ɓúzī lwóndɛl Yésus kilís nɛ mimyanla. Yésus ɛ ɓú kā lɛ́ɛ́ nāá: «Mi tí ɛgúmɛl ɔ̂ Sāŋg waām, wɔ mot ɗí Ndə́ə́ jwóó nɛ iɓwaās ɔ̂. Nɛ dɔ nāá, sá wā sɔl océl nɛ miŋgûlū ékɛ́, ú ú lyákɛl ɓót ō ɗí ɗakɛ mwâthɛɛ̄mb ɓâk. Ɛ̂ɛŋ Sāŋg waām, wɔ mot ték wā kām nāá, ī sɛ́ɛ ɗyaāŋ.»

²²«Sāŋg waām ɛ́ ɛ́ jüe mɛ́ isá ɓyɛ̂ɛsa. Mot ā ā gū myám mot ɗí Mwán ɔ́ phúla Sāŋg waām nyɛɛmɛ̄t. Thɔ́k ɛ́, mot ā ā gū Sāŋg waām phúla Mwán nɛ ɓɛ̄l ō Mwán kpɛ́l ɛ́lyákɛl ɓɛ́ Sāŋg ɓâk.»

²³Phúla ték ɛ́, Yésus ɛ ɓúkā lyuŋg, ɛ jüāk nje ték ophōn ɓɛ̄, nyɛ nɛ nɔ̄ɔ̄ nāá: «Ɓí nɛ lɛ̄m tɔɔ̄p nāá, ɓī tí ɛɓɛɛ ísá ɓīnɛ́ɛ̌ŋ.

²⁴Sá ték ī ceece nɛ dɔ nāá, thūnd ógbɛ́sel o mítɔɔ̄p o mí Zɛɛ̄mb nɛ mikūmāndē ɓɛ́ ɛ́ sáŋ ɛ́ɓɛɛ sá ɓí ɗí tí ɛɓɛɛ e, sá gwát ɓɔ̂ɔ ta ɓɛɛ. Ɓɛ̄ sāŋ ɛ́gwók sá ɓí ɗí tí ɛgwók e, sá gwát ɓɔ̂ɔ ta gwôk.»

²⁵Yīl yêkle lɔ́a ī ɓúkā nwɔŋ ɛ́kɛ̂l, ɛ gús Yésus ɓɛ̌ ɗyūū kó, nyɛ nɛ nɛ̄ nāá: «Yêkle, mí dalǎ nɛ ɛsá yɛ̄ tí nāá, má á ɓyě cyuk mɛ́lú myɛ̂ɛsa?»

²⁶Yésus ɛ ɓúzī jí ɛ́ nāá: «Mɛtyuūŋ kámīnā mɛ́ lɛ̄ɛ̄ nā? Tɛ́m wɔ́ lāŋ mɛ́ ê, ú gwōk nā?»

²⁷Mot ónɔ́ɔ̌ŋ nɛ Yésus nāá: «“Ú dalǎ nɛ ɛkpɛl Ɗá Zɛ̌mb wɔ̂, nɛ lyém wɔ́ wɛ̂ɛsa, nɛ pek yɔ́ yɛ̂ɛsa, nɛ khul nyɔ̄ nyɛ̂ɛsa, nɛ ɛcélɔɔ lɔ́ lyɛ̂ɛsa.” Thɔ́k ɛ: “U kpɛ́l môt ndɔŋ yɔ́ ɗɛ ú kpɛ́l wɔ́ mot ték ê.”»

²⁸Yésus nɛ nɛ̄ nāá: «Í ku ɗyáŋ. Í dā je nāá, u sâ ɗyaāŋ i zyē wá á ɓyě cyuk.»

²⁹Yêkle lɔ́a ɛ ɓú ɓākā sáŋ nāá, á á suŋ nól tí ɛjí nɛ Yésus nāá: «Í zɛ̄ ɗí mot ndɔŋ yâm?»

³⁰Í náǎŋ Yésus ká nwɔ̌ŋ ɓwoŋa ɛ lɛ̄ɛ̄ nɛ nɛ̄ nāá: «Í i ɓɛ nɛ nɔ̄l mót ɛ́, ɛ ɗüís ɓɛ̌ Yotósalɛm tí ɛtɔ́ ɓɛ̌ Yetíko. Kɛ̄ kúl tí zye nák ɛ́, ɛ dá kɛ̄ ɗuma tí mɛɓɔ́ mɛ̄ Ɓááná-mimbām. Ɓɛ̄ ɗɛ̄s ɛ́ sá yɛ̂ɛs ā ɓɛ nɛ yɛ́ ékɛ́, ti nɛ mikānd myɛ̄. Ɓɛ̄ tū ɛ́ ɓyǒlǎ tüīī, ɓɛ̄ lyūk ɛ́ náǎŋ kwɔ̂k.

³¹Ta ɓwɛɛ nák ɛ́, yīl fata mɛ́tûnka ɛ ɓúzī thaŋ tí pyaāt têk. Ɛ ɓɛ́ɛ́ mót ɔ́nɔ́ɔ̌ŋ kwɔ̂k. Ɛ dá kpáŋ ta nwɔŋ ɛ́kɔɔ.

³²Jwok gwát nɛ gwát ɛ́, nɔ̄l mwán isɛ̄ɛ̄ ífata i mɛ́tûnka, ɛ ɓúzī kúl tí pyaāt têk. Ɗɛ ɛ́ ɓɛ́ɛ́ mót ɔ́nɔ́ɔ̌ŋ ékɛ́, ɛ dá Sákɛl ɛ́, ɛ kpāŋ thɔ́k ta nwɔŋ ɛ́kɔɔ.

³³Ɗakɛ nɔ̄l mót Samalí ā kûl tí pyaāt ték ékɛ́, ɛ ɓúzī ɓɛɛ ɛ̂. Ī ɓúzī sá ɛ́ nyuūŋ.

³⁴Ɛ jémbǎ ndumɛ nɛ nɛ̄, ɛ tínd ɛ́ mɛpyōŋ, ɛ lɔ́mb myeēt, ɛ dɛ̂l. Ɛ khɛ̄ɛ̄ ɛ́, ɛ kɛ́l ɛ́ kwóó yāŋgā yɛ̄. Ɛ tɔ̄ nɛ nɛ̄ ɓɛ̌ njāā ójôŋ, ɛ nīnwɔ́ŋ tūŋ wɛ̄.

³⁵Tí mɛlyám ɛ́, ɛ ɓúzī nwɔŋ ɛ́ɓīm ɛ̄ mɔnī twóó myanj wɛ̄, ɛ kɔ̄s sɛ́l njāā ójôŋ. Nyɛ nɛ nɛ̄ nāá: “Motôm, mí í dakla nɛ nɔɔ̄, nwɔ̌ŋ tūŋ mót ɔ̂. Tɛ́m mɛ́ wā kɛ̄ ɓúla ékɛ́, í ɓɛ̄ mɔnī ú wā ɓɛla nɛ yɛ́ é í í thǎŋ ɓīm mí lyūk é nâk, má á kā zī ɓúlɛl ɔ́ yīl kalɔɔ kwóó ték ê.”»

³⁶Yésus ɛ ɓúkā jí nɛ yêkle ílɔ́a nāá: «Tí ndɔŋ ɓót ōlɛ́l ɓīnɛ́ɛ̌ŋ, í wɔ́ɔ́ ɗí mot ndɔŋ mót ɓááná-mimbām ɓā ɓí ɛ ɗyaāŋ ɔ̂?»

³⁷Mot ɔ́nɔ́ɔ̌ŋ ɛ ɓúzī ɓɛ́s nɛ Yésus nāá: «Í mot sā mbɛ́l ónɔ́ɔ̌ŋ ɛnwɔŋ ɔ̂.» Yésus nɛ nɛ̄ nāá: «Ɛ̂ɛŋ, tɔ̂, u kɛ́ sá thɔ́k ɗyaāŋ.»

³⁸Ɗakɛ Yésus nɛ ophōn ɓɛ̄ ɓā ɓɛ tí ɛtɔ́ ékɛ́, ɓɛ̄ ɓúzī kɛ̄ túula tí līl ɗɛ́l. Nɔ̄l múmá ɗín lɛ̄ Mááta, ɛ ɓúzī nwɔŋ ɓɛ̂, ɛ tɔ̄ nɛ nɔ̄ɔ̄ ɓɛ̌ njāā wɛ̄.

³⁹Mááta ték ɛ́ ɛ ɓɛ nɛ thɛ́mb, ɗín lɛ̄ nāá, Malía. Malía ték ɛ ɓú kɛ̄ ɗi sī ndumɛ nɛ Yésus tí ɛgwókɛl sá ā lilɛ́ɛ ê.

⁴⁰Náǎŋ ɛ́, Mááta nyɛ ɛ kák ɛ́jǖīī tí isɛ̄ɛ̄ ī njāā. Ɛ ɓúkā zyé ɓɛ ɗá mí Yésus, nyɛ nɛ nɛ̄ nāá: «Ɗâ, jüāk ɗɛ thɛ́mb ám ɓyēt mɛ́ nɛ isɛ̄ɛ̄ myaamɛ̄t ê. Ɓā lɛ́ɛ́ ɛ́ nāá, ɛ zí i ɓyela mɛ̂.»

⁴¹Yésus ɛ ɓúkā ɓɛ́s nɛ nɛ̄ nāá: «Ɔɔ Mááta, u tí ɛthés nól nyɔɔ̄ tí thūnd ísínɔŋ.

⁴²Gū nāá, sá gwát ɗí nɛ nɔm. Malía ɛ náǎŋ ɛ́ ɛ́ tɔ́p tyâa ɛkɔɔ ɗí nɛ nāá, ɓá a ɓɛ̄ nɛ khul ɛɗüis ɛ́ lá lîk.»