Read Mpumpong Lókas 22 Bible Online

Lókas 22 - Mpumpong bible

Lókas 22

¹Ɓwók ɓót ɗɛ̄ ímwâpha ɗí ta gbɔpa é yā ɓɛ í í kúnɔɔ. Ɓwók ɓɛ̄ jōō nāá: «Páska óyúɗɛn ê.»

²Ɓǎnénén ɓɛ̄ ífata i mɛ́tûnka nɛ iyêkle ɓɛ̄ ílɔ́a ɓɛ̄ ɓú sisáŋ mɛ́zyeē mɛ̄ ɛ́dó Yésus. Sá gwát ɛ́, ɓā ɓɛ tí ɛkámb mɛ́thum mɛ ɓót.

³Í náǎŋ Sátan mú tí ɛzī ní twóó nɔ̄l phōn ŋgwát tí ndɔŋ óphōn kām nɛ ōɓá ɗín lɛ̄ nāá Yúɗas, ɓɛ́ jōō ɛ́ thɔ́k nāá, Iskayót ɔ̂.

⁴Yúɗas ɛ ɓúzī tɔ́ ɛ kɛ̄ ɓyela ɓáánénén ɓɛ̄ ífata i mɛ́tûnka nɛ odə́ə́ ɓɛ̄ ísóda ī njāā Zɛ́mb ánénên. Ɓá nɛ nɔ̄ɔ̄ ɓɛ ɓúzī pǐs tɔɔ̄p ɛ́ɓɔ́ma Yésus.

⁵Odə́ə́ ōték ɓɛ̄ ɓúzī myaŋla sá ték ɛ́ɓuuɓu, ɓɛ̄ kɛ́s Yúɗas mɔnī.

⁶Yúɗas ɛ ɓúzī kam. Ɛ nyɛ́l ɛ́sáŋ tyâa tɛ́m ɛ́ɓɔ́mǎ Yésus sɔɔ̄.

⁷Tí mwēs ɓwók ímwâpha ɗí ta gbɔpa ékɛ́, ī ɓúzī kúl tɛ́m ɓɛ́ dálā nɛ ɛdó ɓwán ɓɛ̄ ítaa tí ɛsá mɛ́dámb mɛ̄ páska Óyúɗɛn ê.

⁸Yésus ɛ ɓúzī nyēē kɛnd Pyɛ̂ɛ ɓá nɛ Zwáŋ ɓɛ sɔ̂k. Nyɛ nɛ nɔ̄ɔ̄ nāá: «Tɔ̄ kɛ̄ kwomsa káɓiná mɛdámb mɛ̄ páska.»

⁹Ɓɛ̄ ɓúkā jí nɛ nɛ̄ nāá: «Ú kam nāá zī kɛ̂ kwomsa yɛ́ wɛ̄?»

¹⁰Yésus ɛ ɓúzī ɓɛ́s ɓɛ́ nāá: «Tɛ́m ɓí wā ní twóó khanda ékɛ́, ɓyá á ɓoma nɛ motóm tí ɛɓúlǎ ɓɛ̌ ɗyūū nɛ ɓwomb tí lô. Dā ɗú ká nyɛ. Pyaāt ɛ́ wā ní ékɛ́,

¹¹ɓī lɛ̄ɛ̄ mót njāā ték nāá: “Yêkle jī nāá: Pyaāt ɛ́ wā ɗɛ iɗóó ī ɓwók páska ɓá nɛ ophōn ɓɛ̄ ékɛ́, í wɛ̄ ê?”

¹²Á á lyóó ɓén nyīl thɔ́ɔ́ ánénén ɓɛ ɛ́kó nɛ isínɔŋ ɓyɛ̂ɛs ɓɛ twóó. Í náǎŋ ɓí wā sá mɛ́dámb ê.»

¹³Ophōn ōɓá ōték ɓɛ̄ ɓúzī khɛ̂ɛ, ɓɛ̄ tɔ̂. Tɛ́m ɓɛ́ kɛ̄ kǔm pyaāŋ ékɛ́, ɓɛ́ dā kɛ̄ ɓyelǎ ɗakɛ Yésus ā ɓā lɛ́ɛ́ ê, ɓɛ̄ ɓúzī kwomsa íɗóó ī páska.

¹⁴Tɛ́m ɛ́wolo lɛ̄ ɛ́ɗēē lā ɓɛ lí í kúl ékɛ́, Yésus ɛ ɓú kɛ̄ ɗi sī ɛ ɗɛ̄ ɓā nɛ ophōn kām nɛ ōɓá ɓɛ̄.

¹⁵Ɛ ɓúzī lɛ́ɛ́ nɛ nɔ̄ɔ̄ nāá: «Mi ɓɛ̄ nɛ njeā nāá, nī ɗɛ́ ka iɗóó ī ɓwók páska ékɛ́ ndɔŋ, myam ta ɓā ɓɛɛ mítūŋ.

¹⁶Gūká nāá, phúla yúk kɛnd ɛ́, má á dā kā ɗɛ íɗóó ɓík ɛ́, tɛ́m Zɛ́mb wā lwóndɛl mɛ́tiān mɛ̄ ɓwók ték twóó Kanda mí Zɛɛ̄mb ê.»

¹⁷Phúla ték ɛ́, ɛ ɓúzī nwɔŋ kɔ́p mɛ́nɔk, ɛ sā míndakla, nyɛ nɛ milwōmtwōm myɛ̄ nāá: «Nwɔŋká kɔ́p mɛ́nɔk ékɛ́, ɓī pyâkla.

¹⁸Nɛ dɔ nāá, tí ɛnyɛl ɛ́chāak ɛ́, ma á kā ɓākā ɗɛ mɛ́nɔk mɛ phúm nyīnɛ́ɛ̌ŋ, ī kɛ́ kum tɛ́m Də́ə́ mí Zɛɛ̄mb wā zye ê.»

¹⁹Phúla ték ɛ́, ɛ ɓúzī nwɔŋ mwâpha. Ɛ sā míndakla, ɛ ɓūk yɛ́ ipɛ́s ipɛ̂s, ɛ jüē mílwōmtwōm myɛ̄, nyɛ nāá: «Ipúnd ɓyám ɓyéeē mí jüē ɓén ɗék ê. Sākāná ɗyaāŋ ɛ́, tí ɛsîmsa mɛ̂.»

²⁰Phúla ɓā ɓɛ ɓɛ́ ɛ́ síl ɛɗɛ íɗóó ékɛ́, Yésus ɛ ɓúzī ɓākā nwɔŋ thɔ́k kɔ́p mɛ́nɔk nyɛ nāá: «Kɔ́p ékɛ́, í myēnj phōn Zɛ́mb lǎt nɛ chía nyǎm süee tí ɛsú lēn ê.

²¹Sá gwát ɛ́, mot wā ɓɔ́ma mɛ́ ɔ́kɛ́, ɛ wák zá nɛ nɛ̄ mindíndiīl tí têble.

²²Í ku yɔ̂ɔ nāá, Mwán mí mot á á jüě ɗakɛ Zɛ́mb ā cyúkɛl ê. Sá gwát í nāá, ɛkɔ̌p nɛ nɔ̄l wā ɓɔ́ma ɛ́ ɔ̂.»

²³Í náǎŋ mílwōmtwōm myɛ̄ kā jíila pāká nyɔ̄ɔ̄ nāá, í zɛ̄ tí ndɔŋ káwūnā ɗí nɛ khul ɛsá wūnɛ́ɛ̌ŋ mbǐ sínɔŋ ɔ̂.

²⁴Ophōn ō mí Yésus ɓɛ̄ ɓúzī nyɛl íɓuluk pāká nyɔ̄ɔ̄ tí ɛsáŋ ɛ́gú mót ɗí ánénên tí ndɔŋ wɔ̄ɔ̄ ɔ̂.

²⁵Yésus nɛ nɔ̄ɔ̄ nāá: «Odə́ə́ ɓɛ̄ íɓwaās ɓɛ̄ tí ɛlyákɛl də́ə́ yɔ̄ɔ̄ zinjá ɓot. Ɓɛ̄ sá nāá, ɓot ɓɛ́ ɗí tí ɛdə́ə́ ɓɛ́ ɓák ɓɛ̄ jóó ɓɛ nāá: “Ɓot ɓɛ̄ ɛ́nwɔŋ.”

²⁶Sá gwát ɓyɔ̂ɔ ɛ́, ɓyá a sá ɗakɛ ɓɔ̂ɔ. Sāká nāá, nɔ̄l ɗí tōmbá tí ndɔŋ wēn ɔ́kɛ́, ɛ ɗí ɗakɛ mwâthɛɛ̄mb. Nɔ̄l ɗí ndə́ə́ ɔ́kɛ́, ɛ ɗî ɗakɛ sɛ̂l.

²⁷Í zɛ̄ pūkú ɗi tōmbâ ɔ̂? Í mot ɗí tí ɛɗēē tí têble ɔ́kɛ́? Gú thɔ́k mot zyē ɛ́ nɛ iɗóó ɔ̂? Í mot ɗí tí ɛɗēē tí têble ɔ̂. Jüākká nāá, myam mi twóó nyěn ɗakɛ sɛ̂l.

²⁸Tɛ́m ɓót ɓā lilûmla nɛ naām ékɛ́, ɓyɔ̂ɔ ɓyá a kámb mɛɛ̄.

²⁹Í yɛ́ ɗí nāá, má á jüe ɓén də́ə́ ɗakɛ Sāŋg waām ā jüe mɛ də́ə́ ê.

³⁰Ɗyaāŋ têk ɛ́, ná á ɗɛ ká ɓɛ̌ pyaāt Də́ə́ yâm, ɓī ɗí tí iɗiī ī mɛ́tond tí nāá, ɓyá á dɔ́s íkúl kām nɛ īɓá ɓɛ̄ Ízaɛ̂l.»

³¹Yésus ɛ ɓúzī lɛ́ɛ́ nɛ Símɔn Pyɛ̂ɛ nāá: «Símɔn, kɔ̄nj ɛ́lɔ̂ u gwôk. Zɛɛ̄mb ɛ́ ɛ́ ɓyét Sátan nāá, ɛ gbâ ɓeēn tí mitūŋ.

³²Sá gwát ɛ́, mí i dakla tí ɛsú lɔ́ kām nāá, ɛɓūklā lɔ́ lá a ɓwɔ̂ɔ ɗîmb. Thɔ́k ɛ́, tɛ́m ú wā ɓākā sula tyâa zyeē ékɛ́, wa a jesa ɛ́lelɛl ɓwán ɓɛ̄ ónɔɔ̄ŋg.»

³³Pyɛ̂ɛ nɛ nɛ̄ nāá: «Ɗâ, mi mú wák kwômsā tí nāá, í kūl ɔ́ mbok gú ɛsüee nâk, nī tɔ̄ ndɔŋ.»

³⁴Yésus ɛ ɓúzī lɛ́ɛ́ ɛ́ nāá: «Pyɛ̂ɛ, mús tí pum ɔ́kɛ́, wá á kála mɛ́ ikɛnd ilɛ́l ɛsɔ́k nāá kúú ɛ kwɔ́k ê.»

³⁵Phúla ték ɛ́, Yésus ɛ ɓúzī lɛ́ɛ́ nɛ ophōn ɓɛ̄ nāá: «Tɛ́m mā kɛnd ɓěn ta ɓɛ nɛ mɔnī, ta ɓɛ nɛ myanj, ta ɓɛ nɛ inalɓwaās e, yīl sínɔŋ í i yâk ɓeēn ɛ̂?» Ɓɔ̂ɔ nɛ Yésus nāá: «Sínɔŋ yá a yâk ɓeēs.»

³⁶Yésus ɛ ɓúkā lɛ́ɛ́ nɛ nɔ̄ɔ̄ nāá: «Ɛ́chāak ɛ́, mot ɗí nɛ mɔnī ɔ́kɛ́, ɛ nwɔ́ŋ ê. Mot ɗí nɛ myanj ɔ́kɛ́, ɛ nwɔ̂ŋ. Mot ɗí ta ɓɛ nɛ paasɔŋ ɔ́kɛ́, ɛ nwɔ́ŋ kānd wɛ̄, ɛ ɓɔ́ma, ɛ ɓwām paasɔŋ.

³⁷Mí lɛ̄ɛ̄ ɓén nāá, pyaāt ɗí tí ɛlɛ́ɛ́ tí Mitilā nāá: “Ɓɛ́ ɛ láŋ ɛ́ tí ndɔŋ ɓááɓyóóɓyóó ō ɓót ékɛ́,” í dalǎ nɛ ɛlwónd zinjá nyaām. Ɗyaāŋ ték ɛ́, yīl ɗúm nɛ myam ékɛ́, í ǐ kǔm ɓɛ mɛ́swānjɛ̄l.»

³⁸Ophōn ɓɛ̄ ɓɛ̄ ɓúzī lɛ́ɛ́ nɛ nɛ̄ nāá: «Ndə̂ə, ɓɛ mípaasɔŋ mimɓá myéeē.» Yésus nɛ nɔ̄ɔ̄ nāá: «Ī ɗî ɗyaāŋ.»

³⁹Yésus ɛ ɓúzī gbɔ̂m, ɛ tɔ́ ɗakɛ ā titɔ́ itɛ́m ɓyɛ̂ɛsa ɓɛ ɛ́cók lɛ̄ ílē ɓɛ́ jóó nāá, Olivyé ê. Ophōn ɓɛ̄ ɓɛ̄ ɓúzī ɗú ɛ̂.

⁴⁰Tɛ́m ɓɛ́ kɛ̄ kǔm pyaāŋ ékɛ́, nyɛ nɛ nɔ̄ɔ̄ nāá: «Ɗaklakâ, tí ɛkámb nāá, ɓyâa ɓwɔ̂ɔ ɗuma tí mɛphūɛ̂l.»

⁴¹Ɛ ɓúkā lyúk ɓɔ̂ɔ náǎŋ ɛ́, ɛ tɔ̄ ɓɛ pák sɔ̂k, ɛ kūt mɛ́ɓɔ̄ŋ, ɛ nyɛ́l míndakla.

⁴²Nyɛ nāá: «Sāŋg waām, ú wā kpɛl nâk, u ɗüís mɛ́ kɔ́p mítūŋ ê. Sá gwát ɛ́, wa a sá yīl myám kám ê. Ɗâ, sá yīl wɔ́ kám ê.» [

⁴³Í náǎŋ éŋgeles ká ɗüǐs ɓɛ̌ jwôo, ɛ zyē ɓɛ ɗá mí Yésus tí ɛzī lelɛl ɛ́ ê.

⁴⁴Ɓwɔ̄ŋ nɛ ɓā ī ɓúzī sá Yésus. Ɛ ɓúzī ɓākā nyɛl míndakla nɛ khul nyɛ̂ɛs. Ɗiɗyuk ī gbīgbɔ̄m ɛ́ tí nól ɗakɛ mɛ́tɔ̄ mɛ̄ chía tɔ̄lā tí iɓwaās ê.]

⁴⁵Ɗakɛ ā sínɛl mindakla ékɛ́, ɛ ɓúzī gbal, ɛ tɔ̄ kɛ̄ ɓyela óphōn ɓɛ̄. Ɛ́ ɓyela ɓɛ́ tí idɔ́ mɛnól mɛ́ ɛ́ cyak ɓɛ́ tí okhwɔɔka

⁴⁶Nyɛ nɛ nɔ̄ɔ̄ nāá: «Ɓí dā yɛ̄? Gbalkâ, ɓī dâkla, kám nāá, ɓyá a ɓwɔ̂ɔ ɗuma tí mɛphūɛ̂l.»

⁴⁷Ɗɛ Yésus ā ɓɛ ɛ jína tí ɛlüii ékɛ́, mɛthum mɛ ɓót mɛ̄ dá túulǎ tūūlâ. Ɛsɔ́k ɛ̄ ndɔŋ lā ɓɛ Yúɗas, nɔ̄l phōn tí ndɔŋ óphōn kām nɛ ōɓá ɓɛ̄. Ɛ ɓúzī zyě ɓɛ ɗá mí Yésus tí nāá, á á swes ɛ́, ɛ ɓyéndɛ̄l ɛ̂.

⁴⁸Sá gwát ɛ́, Yésus nɛ nɛ̄ nāá: «Yúɗas, ú thaŋ tí mɛsüesol tí nāá, wá á ɓɔ́ma Mwán mí mot nɛ mizīzyūŋ myɛ̄ ɛ́?»

⁴⁹Ɗɛ óphōn ɓɛ̄ ɓā ɓɛɛ ɗyaāŋ ékɛ́, ɓɛ̄ ɓúzī jí nɛ Yésus nāá: «Ndə̂ə, zī gbɛ̂s mipaasɔŋ tí ɛlûmla nɛ nɔ̄ɔ̄ ɛ?»

⁵⁰Ɓɛ̄ jína tí ɛlüii ɗyáŋ nák ɛ́, mot ŋgwát tí ndɔŋ wɔ̄ɔ̄ ɛ dá gbɛ́s paasɔŋ yɛ̄, ɛ cyūkɛ̄l sɛ́l mí fata ánénén ɛlɔ́ lɛ̄ ɛ́dôm.

⁵¹Yésus ɛ dá kā lɛ́ɛ́ nāá: «Ɓyētkānâ, ī ɗî ɗyaāŋ.» Ɛ ɓúzī kúna nɛ pyaāt ɛ́lɔ́ ɛ mót têk, ɛlɔ́ lī ɓúzī jilǎ ɗakɛ lā ɓā ɓɛ ê.

⁵²Phúla ték ɛ́, Yésus ɛ ɓúkā lɛ́ɛ́ nɛ ɓǎnénén ɓɛ̄ ífata i mɛ́tûnka nɛ odə́ə́ ɓɛ̄ ísóda, zī kā nwɔŋ mílílō mī Óyúɗɛn ɓā zye tí ɛzī mɛ́t ɛ́ ɓák nāá: «Ɓí zyē tí ɛzī mɛ́t mɛ́ nɛ mipaasɔŋ, nɛ ilē ɗɛ mót ké nāá, mi nɔ̄l ána-mimbām ɛ!

⁵³Mi ɓiɓɛ̄ wák pāká nyěn mɛlú myɛ̂ɛsa twóó njāā Zɛ́mb ánénên, ɓyɔ̂ɔ ta kwok ɛ́mɛ́t mɛ̂. Sá gwát ɛ́, ī mú ɛ́chāak tí ɛwolo lēn, də́ə́ khɔmwaāl ī tí isɛ̄ɛ̄.»

⁵⁴Ɓɛ̄ ɓúzī mɛ́t Yésus ɓɛ̄ tɔ̄ nɛ nɛ̄ ɓɛ̌ njāā ndə́ə́ ífata i mɛ́tûnka. Pyɛ̂ɛ ā ɓɛ ɛ́cetaceta nɛ nɔ̄ɔ̄. Ɛ ɓú ɗiɗú ɓɛ́ cícyɔ̄k cícyɔ̄k.

⁵⁵Í ɓyela nāá, ɓɛ́ ɛ́ tita ɗú tí ɛsyaŋ. Ɓot ɓɛ́ mindíndiīl tí ɛjwóɛl. Pyɛ̂ɛ ɛ ɓúzī zye, ɛ ɗí sī pāká nyɔ̄ɔ̄.

⁵⁶Nɔ̄l múmá ā sisála náǎŋ ɔ́kɛ́, ɛ ɓúzī jwok Pyɛ̂ɛ, nyɛ nɛ nɛ̄ nāá: «Motóm ɔ́kɛ́, ā ɓɛ thɔ́k phōn mí Yésus!»

⁵⁷Pyɛ̂ɛ nɛ nɛ̄ nāá: «Mumá e, ɓɛɛ́ mā ā gū ɛ̂.»

⁵⁸Ta ɓwɛɛ nák ɛ́, nɔ̄l mótóm ɛ́ ɛ́ ɓākā jwok Pyɛ̂ɛ. Nyɛ nɛ nɛ̄ nāá: «Wɔ thɔ́k u ku tí ndɔŋ wɔ̄ɔ̄!» Pyɛ̂ɛ nāá: «Ocāl! Yá a ɓɛ̄ myâm!»

⁵⁹Ī ɓúzī kpáŋ tɛ̂m. Nɔ̄l mótóm ɛ dá syuŋgɛl Pyɛ̂ɛ ɛ́ɓwɔ̄ɔ̄, Nyɛ nāá: «Í kǔ oceece nāá, mot ɔ́kɛ́, ɓá nɛ ɓɔ̂ɔ Yésus ɓā ɓɛ ndɔŋ nɛ dɔ nāá, ɛ mot Galilê.»

⁶⁰Pyɛ̂ɛ nɛ mot ɔ́nɔ́ɔ̌ŋ nāá: «Ɓɛɛ́, mi náǎŋ mā ā gū sá ú kám ɛ́lɛ́ɛ́ ê.» Títɛɛ̄l ŋgwát ɛ́, kúú ɛ ɓúzī kwɔ̂k.

⁶¹Ɗá Yésus ɛ ɓúzī lyuŋg, ɓá nɛ Pyɛ̂ɛ ɓɛ̄ ɓóma mîs. Í náǎŋ Pyɛ̂ɛ mú tí ɛzī sîmsǎ ɗɛ ā lɛ́ɛ́ ɛ nāá: «Wá á kála mɛ́ táŋ ikɛnd ilɛ́l kúú ta ɓā kwɔ́k ê.»

⁶²Pyɛ̂ɛ ɛ dá gbás ɛ́, ɛ kɛ́ je ɓyǒla.

⁶³Ɓot ɓā ɓɛ tí ɛɓakɛl Yésus ɓák ɓɛ̄ ɓúzī zɛm ɛ́, nɛ ɛɓí ɛ̂.

⁶⁴Ɓɛ̄ dɛ́l ɛ́ kānd tí mîs, ɓɔ̂ɔ nɛ nɛ̄ nāá: «Tūɛ̄l mót ɓī ɔ̂!»

⁶⁵Ɓɛ̄ ɓákā lə́ə́ ɛ́ mimbi myɛ̂ɛs.

⁶⁶Ɗakɛ ɗwóó lā ɓɛ lí í gbal ékɛ́, milílō mī Óyúɗɛn nɛ odə́ə́ ɓɛ̄ ífata i mɛ́tûnka nɛ iyêkle ɓɛ̄ ílɔ́a, ɓɛ̄ ɓúzī gwêsla, ɓɛ̄ nwɔ́ŋ Yésus ɛ́, ɓɛ̄ tɔ̄ nɛ nɛ̄ ɓɛ phǎnj mitɔɔ̄p nyɔ̄ɔ̄.

⁶⁷Ɓɔ̂ɔ nɛ nɛ̄ nāá: «Lɛ̄ɛ̄ ɓés, í ɓɛ̄ nāá, wɔ ɗí Kūmāndē Zɛ́mb ā kɛs ɔ́ nâk.» Yésus nɛ nɔ̄ɔ̄ nāá: «Í su nāá mi lɛ̄ɛ̄ ɓén ɗyaāŋ, ɓyá a ɓûkla mɛ̂.

⁶⁸Mí kā lɛ́ɛ́ nāá, mí jī ɓén mīā nâk, ɓyá a ɓɛ̄ nɛ khul ɛɓɛ̂s.

⁶⁹Sá gwát í nāá, tí ɛkā nyɛl ɛ́chāak ɛ́, Mwán mí mot á á ɓɛ ndíndǐl ɓɛ mbɔ́ ɛ́dóm mí Zɛ̌mb mɛkhul myɛ̂ɛs.»

⁷⁰Ɓɛ́ ɓyɛ̂ɛsa nāá: «Í lyákɛl nāá, u Mwán mí Zɛɛ̄mb ô?» Yésus ɛ ɓúkā ɓɛ́s nɛ nɔ̄ɔ̄ nāá: «Ɓyɔ̂ɔ ɓot oték ɓī tí ɛkū lɛ́ɛ́ nāá, mi Mwán wɛ̄.»

⁷¹Í náǎŋ ɓɛ́ kā lɛ́ɛ́ nāá: «Á ní kā ɓākā sáŋ ká tel wɔ́ɔ́ mót tí nāá, á á zī lɛ́ɛ́ káɓiná oceece ɔ̄ tɔɔ̄p mót ɔ̂. Ɓyela nāá, nyɔ̂ɔ ká ɓot oték ní í gwókká mɛkɛ́l mɛ gbās tí nup wɛ̄ mâk!»