Read Mpumpong Lókas 4 Bible Online

Lókas 4 - Mpumpong bible

Lókas 4

¹Ɗɛ Yésus ā ɓɛ́, ɛ mú lwóndlā nɛ Áchāāchǎnj Sisímb ékɛ́, Ɛ ɓúzī ɓúlǎ ɓɛ̌ mwɔ̄ŋ Yuuɗɛ̂n. Áchāāchǎnj Sisímb ɛ ɓúkā tɔ́ nɛ nɛ̄ ɓɛ̌ sɔ̄sā sī.

²Í pyaāŋ ɛ́ mú tí ɛkɛ̄ thaŋgɛl mɛ́lú mɛkām mɛ̄ná ta ɗɛ íɗóó nɛ mɛɗyūū twóó mɛphūɛ́l mí Sátan ê. Phúla mɛlú mɛkām mɛ̄ná, ɛ ɓúzī gwók zâ.

³Sátan nɛ nɛ̄ nāá: «Í ɓɛ̄ nāá, u Mwán mí Zɛɛ̄mb nâk, linj ɛ́kɔ̄k lík iɗóó.»

⁴Yésus ɛ ɓúzī ɓɛ́s nɛ nɛ̄ nāá: «Í tilā tí Mɛkanā mɛ̄ Zɛ́mb nāá: “Mot a á dā cyǔk tɔɔ̄p ɛ́ɗēē lɛ́ nɛ lɛ̂.”»

⁵Sátan ɛ ɓúzī ɓākā nwɔŋ ɛ́ náǎŋ, ɛ tɔ́ nɛ nɛ̄ ɓɛ pák kó. Títɛɛ̄l ŋgwát ɛ́, ɛ lyākɛ̄l ɛ́ idə́ə́ ɓɛ̄ íɓwaās ɓyɛ̂ɛsa.

⁶Nyɛ nɛ nɛ̄ nāá: «Wā ā ɓɛ́ɛ́ ɛ́, idə́ə́ ɓīnɛ́ɛ̌ŋ ɓyɛ̂ɛsa, myam ɗí nɛ ɓyɛ̂. Mi nɛ də́ə́ ɛ́jüe mót mí kám ɔ̂.

⁷Ú wā kút mɛ́ mɛɓɔ̄ŋ nâk, má á jüe ɔ́ idə́ə́ ī ték ɓyɛ̂ɛsa, nɛ mɛnwɔŋ mɛtêk.»

⁸Yésus nɛ nɛ̄ nāá: «Ɛkɛ́l ɛ̄ mí Zɛɛ̄mb lí lɛ̄ɛ̄ nāá: “Dā ɗúɛl Ɗá Zɛ̌mb wɔ̄ nyɛɛmɛ̄t.”»

⁹Ɛ ɓúzī ɓākā nwɔŋ Yésus ɛ́, ɛ tɔ̄ nɛ nɛ̄ ɓɛ̌ Yotósalɛm. Ɛ tɛ̄l ɛ́ tí pyaāt ákóókónj njāā Zɛ́mb nyɛ nɛ nɛ̄ nāá: «Í ɓɛ̄ nāá u Mwán mí Zɛɛ̄mb nâk, ɓyēt nôl nyɔɔ̄ pyǎŋ ɓɛ̄ ɛ́kó, u zí tyáá ɓɛ sī.

¹⁰Tí ɛsú ɛ̄ nāá, í tilā tí Mɛkanā mɛ̄ Zɛ́mb nāá: “Zɛɛ̄mb á á thes ɓééŋgeles ɓɛ̄ tí ɛzī ɓakɛl ɔ̂.”

¹¹“Ɓɛ̄ khɛ̄ɛ̄ ɔ́ tí mɛɓɔ̂ kámb nāá, koō wɔ́ wá a ɓwɔ̂ɔ tîndla tí ɛkɔ̄k.”»

¹²Yésus nɛ nɛ̄ nāá: «Í tilā tí ɛkɛ́l ɛ̄ mí Zɛɛ̄mb nāá: “Wa a ɓúɛl Ɗá Zɛ̌mb wɔ̂.”»

¹³Ɗɛ Sátan ā ɓɛɛ nāá, ɛ́ ɛ́ ɓúɛl Yésus mimbi myɛ̂ɛs ta ɓánda ékɛ́, ɛ ɓúzī tɔ́ ɛ́cetaceta, tí nāá, á á kā ɓwónd tel ɓīl ítɛ̂m.

¹⁴Yésus ɛ ɓúzī süís ɓɛ pák ɓwǎs Galilê, lwōndlā nɛ də́ə́ Áchāāchǎnj Sisîmb. Tɔɔ̄p wɛ̄ ū ɓúzī lüiiaa tí pák ɓwaās ték wɛ̂ɛsa.

¹⁵Ɛ ɓú titɔ́ tí mɛphānj mɛ̄ míndakla, ɛ līlyākɛ̄l ɓót ɛkɛ́l ɛ̄ mí Zɛɛ̄mb. Ɓot ɓɛ ɓú sisyókɛl ɛ̂.

¹⁶Yésus ɛ ɓúzī tɔ́ ɓɛ̌ Nazalɛ́ pyaāt ā ɓa ɓwɔk ê. Tí mwēs Saɓá, ɛ ɓúzī ní twóó phǎnj mindakla. Nɛ dɔ nāá, yā ɓɛ ŋgúma tíka tí ɛsú lɛ̄. Ɛ ɓúzī gbal tí ɛláŋ Ɛ́kɛ́l ɛ̄ mí Zɛɛ̄mb.

¹⁷Ɓɛ̄ ɓúzī jüe ɛ́ mɛkanā mí mgbɛ́sel mitɔɔ̄p mí Zɛɛ̄mb Izaî. Ɛ nwɔ́ŋ mɛ́, ɛ gûnj. Ɛ kɛ́ ɓyelǎ pyaāt ɗí tilā nāá:

¹⁸«Sisímb mí Zɛɛ̄mb í nɛ naām, Ɛ tɛ̄l mɛ́ nāá, mi lɛ́ɛ mipwêepweē Tyaa Pɔ̂. Ɛ thes mɛ́ nāá, mi zí í lɛ́ɛ́ nɛ mimbok nāá, ɓɛ̄ mú mitiā. Nɛ ɛlɛ́ɛ́ ɓááchīm nāá, ɓɛ̄ ɓákā nyɛl ɛ́ɓɛɛ. Nɛ ɛzī cis ɓɛ̄l ō ɗí tí mitūŋ ɓâk.

¹⁹Ɛ thés mɛ́ thɔ́k nāá, mi zí i lɛ́ɛ́ ɓót nāá, í í kúl mbú Zɛ́mb wā sá ɓɛ́ ɛnwɔŋ ê.»

²⁰Phúla ték ɛ́, Yésus ɛ ɓúzī gwól mɛ́kanā mɛ̄ têk, ɛ nwɔ̂ŋ, ɛ jüē sɛ́l phǎnj mindakla. Ɛ ɓūlɛ̄l nól nyɛ̄, ɛ ɗí sī. Ɓot ɓā ɓɛ náǎŋ ɓák ɛ́, ɓɛ ɓú jijüák ɛ̂.

²¹Í náǎŋ ɛ́ kā lɛ́ɛ́ nɛ nɔ̄ɔ̄ nāá: «Pyaāt Ɛ́kɛ́l ɛ ɓí gwōk ɗék ékɛ́, í í lwónd mús tí ɛsú ɛ̄ ɓyɔ̂ɔ ɓót o ɗí tí ɛgwókɛl mɛ́ ɓâk.»

²²Ɓɛ́ ɓyɛ̂ɛsa ɓā ɓɛ tí ɛlɛ́ɛ́ tɔɔ̄p mí Yésus, nɛ ɛpak mɛ́kɛ́l mɛ̄ lɛ̄m mā gbigbɔ̂m tí nup wɛ̄ mâk. Ɓɛ̄ ɓú lilɛ́ɛ́ nāá: «Syēék yá a ɓɛ̄ mwán mí Yósɛp ɛ?»

²³Yésus nɛ nɔ̄ɔ̄ nāá: «Mi tí gú nāá, ɓyá á ku mɛ́ kaān nāá: “Ɗɔ̂kta, jwom nôl nyɔ̌ nɛ khul nyɔɔ̄.” Ɓī ɓākā lɛ́ɛ́ thɔ́k nāá: “Zí í gwók mɛ́pɔ́ mɔ́ tí isá ú sā ɓɛ̌ khandǎ Kapɛtnaúm ê. Í je thɔ́k nāá, u zí í ɓākā sá ɓyɛ́ wák tí khanda yɔ̂.”»

²⁴Phúla ték ɛ́, nyɛ nāá: «Tí oceece, mgbɛ́sel mitɔɔ̄p mí Zɛɛ̄mb ā ā ɗūūlāā tí ɗɛɛ̄l lɛ̄.

²⁵Thɔ́k ɛ́, mí lɛ̄ɛ̄ ɓén twóó oceece nāá, tí tɛ́m mí mgbɛ́sel mitɔɔ̄p mí Zɛɛ̄mb Éli, í i ɓɛ nɛ thūnd míkús mī ɓúá ɓɛ Ízaɛ̂l. Tí tɛ́m ték ɛ́, yā ɓɛ í í sá mímbú mīlɛ́l nɛ pɛ̂s, phī ta nɔ̂. Za nyī ɓúzī nyúŋgla tí kanda ték nyɛ̂ɛsa.

²⁶Tí ɛkā ɓɛɛ nák ɛ́, Zɛɛ̄mb ɛ́ ɛ ɓyét míkús mī ɓúá myɛ̂ɛs myā ɓɛ ɓɛ̌ Ízaɛ́l ê. Ɛ dá kɛnd Éli ɓɛ kús mumá wā ɓɛ ɓɛ̌ Salɛ́pta tí cǐl ɓwaās Siɗɔ́ŋ ê.

²⁷Í i ɓaka ɓɛ thɔ́k nɛ thūnd mízízaām ɓɛ Ízaɛ́l tí tɛ́m Elizé ā ɓɛ mgbɛ́sel mitɔɔ̄p mí Zɛɛ̄mb ê. Tí ɛɓɛɛ nák ɛ́, mot ŋgwát nɛ ŋgwát tí ndɔŋ wɔ̄ɔ̄ a a ɓye ɗom, phúla Nāáman mot Silí nyɛɛmɛ̄t.»

²⁸Ɗakɛ ɓót ō ɓā ɓɛ twóó phǎnj mindakla ɓák ɓā gwôk mɛkɛ́l mīnɛ́ɛ̌ŋ ékɛ́, ɓɛ̄ dá gwók mɛ́ɓūk.

²⁹Ɓɛ̄ gbâl, ɓɛ̄ gbɔ̄m nɛ Yésus tí khanda. Ɓɛ̄ tɔ̄ nɛ nɛ̄ tí khɛl ɛcók ɛ̄ ɓā sum ɗɛɛ̄l ɛ̄ Nazalɛ́ ték ê. Tí nāá, ɓá á sáŋ ɛ́zyóŋgɛl ɛ́ ɓɛ pák ɛ́cók ɗí tí ɗím ê.

³⁰Ɛ dá thaŋ pāká nyɔ̄ɔ̄, ɛ kpâŋ.

³¹Yésus ɛ ɓúzī tɔ́ ɓɛ̌ khanda Kapɛtnaúm gūm nɛ Galilé ê. Tí mwēs Saɓá, ɛ līlyākɛ̄l ɓót ɓyɛ̂ɛsa ɛkɛ́l ɛ mí Zɛɛ̄mb.

³²Ɓot ɓā ɓɛ ɓɛ́ ɛ́ kám wɛ̄ lyāklā, nɛ dɔ nāá, lyāklā wɛ̄, wā ɓɛ nɛ də́ə́ Zɛ́mb ā jüe ɛ ê.

³³Í ɓyela náǎŋ ɛ́, twóó phǎnj mindakla ték ɛ́, í i ɓɛ nɛ ŋgúma mót tí ithēsā ī ɓyǒlǎ sisímb ā ɓɛ nɛ yɛ́ ê. Ɛ ɓúzī ɓó cīm, nyɛ nāá:

³⁴«Úú! Yésus mot Nazalɛ̂, yɔ́ í yɛ̄ nɛ nēs? U ka zyē wák nāá wá á zī samb ɓés ê? Mā ā jōk ɔ̂, wɔ ɗí Áchāāchānj Zɛ́mb ā thes ɔ̂.»

³⁵Yésus ɛ ɓúzī khákɔɔ nɛ ɓyǒlǎ sisímb têk, nyɛ nɛ nɛ̄ nāá: «Ɗyuɛ̌l nup wɔ̂. U gbɔ̄m tí nól mot ɔ́nɔ́ɔ̌ŋ!» Ɓyǒlǎ sisímb ték ī ɓúzī khɛnj ɛ́ sī, sɔ̂kphɔ̌mb mot nyɛ̂ɛs. Ī gbɔ̄m tí nól nyɛ̄ ta sá ɛ́ sínɔŋ.

³⁶Ɓot ɓyɛ̂ɛsa ɓɛ̄ ɓúzī kám sá têk. Ɓɛ̄ jījīīlā pāká nyɔ̄ɔ̄ nāá: «Yúk í wɔ́ɔ́ mbi mɛ́kɛ̂l? Ɓɛɛká mot tí ɛlɛ́ɛ́ nɛ iɓyǒla ɓɛ̄ ísisímb nāá, ɓī gbɔ́m ê, ɓī ɓándā gbɔ́m tí də́ə́ yɛ̄ ɛ!»

³⁷Í ɗyaāŋ ték ɓót ɓā nyɛl ɛlüii tɔɔ̄p mí Yésus tí cǐl ɓwaās ték yɛ̂ɛsa ê.

³⁸Yésus ā da gbɔ̂m tí phǎnj mindakla ték ɛ́, ɛ kɛ́ ní ɓɛ̌ njāā mí Símɔn. Í ɓyela náǎŋ ɛ́, cǐ mumá mí Símɔn ā ɓɛ tí ɛgwók ɛ́kpay lɛ̄ ɛ́jwôo. Ɓɛ̄ ɓúkā jí nɛ Yésus nāá, ɛ sâ sísīnɔ̄ŋ tí ɛsú lɛ̄.

³⁹Yésus ɛ ɓúzī lyáŋɔɔ tí mbɛ̂l. Ɛ lɛ̄ɛ̄ ɛ́jwóó ɛ́ ték nāá, lī ɗüís ɛ tí nôl. Títɛɛ̄l ŋgwát ɛ́, ɛkpay lɛ̄ ɛ́jwóó lī dá sí sî. Cī mí Símɔn ɛ dá gbǎl gbal ê. Ɛ nyɛ́l ɛ́ɓɛla nɛ nɔ̄ɔ̄.

⁴⁰Tɛ́m ɗwóó lā ɓɛ lí í ɓíl ékɛ́, ɓot ɓā ɓɛ thɔ́k nɛ myɔ̄ɔ̄ mímbɛ́l mimbi myɛ̂ɛsa ɓák ɛ́, ɓɛ̄ ɓúzī zyě nɛ myɛ́ ɓɛ ɗá mí Yésus. Yésus ɛ ɓúkā nyɛl ɛ́ kɛl ɓɛ́ mɛɓɔ́ tí milô, ɛ jwóm ɓɛ̂.

⁴¹Iɓyǒla ɓɛ̄ ísisímb ɓī ɓú gbigbás tí mɛnól mɛ̄ thūnd mímbɛ́l nɛ ɛcicím nāá: «Wɔ ɗí mwán mí Zɛɛ̄mb!» Yésus ɛ ɓú ɗiɗyuu ɓɛ̂. Nyɛ ta ɓyét nāá, ɓɛ̄ lüíí ê. Nɛ dɔ nāá, ɓá ɓɛ tí gú nāá, Yésus ā ɓɛ Kūmāndē Zɛ́mb ā kɛs ɔ̂.

⁴²Ɗɛ mɛ́lyám mā lyâmla ékɛ́, Yésus ɛ ɓúzī kpáŋ ɛ tɔ̄ ɓɛ̄ yīl pyǎt ta ɓɛ nɛ ɓot. Ɓot ɛ́ɓuuɓu ɓɛ̄ ɓúzī nyɛl ɛ́sáŋ ɛ̂. Ɗakɛ ɓā kɛ ɓyela ɛ́ ékɛ́, ɓɛ̄ zí sáŋ ɛ́ɓyee Yésus tí nāá, a a ɓwɔ̂ɔ ɓɛ́sa nɛ nɔ̄ɔ̄.

⁴³Yésus ɛ ɓúkā lɛ́ɛ́ nɛ nɔ̄ɔ̄ nāá: «Mí dalǎ nɛ ɛkɛ̄ lɛ́ɛ́ thɔ́k Tyaa Pɔ́ Də́ə́ mí Zɛ̌mb ɓɛ ɓīl íkhanda. Nɛ dɔ nāá, Zɛɛ̄mb ā thes mɛ tí tɔɔ̄p têk.»

⁴⁴Ɛ ɓúkā titɔ́ nɛ ɛlilɛ́ɛ́ Pɔ́ ték tí mɛphānj mɛ̄ míndakla mɛ̄ kanda Yuɗê.