Read Mpumpong Lókas 5 Bible Online

Lókas 5 - Mpumpong bible

Lókas 5

¹Mwēs ŋgwát ɛ́, Yésus ā ɓɛ tí ɛphanj ɛ̄ jembe mɛ́ɗyūū ɗí ɓɛ̌ Zenezalɛ́ ê. Mɛthum mɛ ɓót mɛ̄ ɓúzī luŋ ɛ́ tí nāá, ɓá á gwókɛl ɛ́kɛ́l ɛ̄ mí Zɛɛ̄mb.

²Yésus, ɛ dá ɓɛɛ óɓyɛ́l ōɓá tí mwɔ̄ŋ. Ɓot ɓā ɓɛ tí ɛsá gba mɛ́ɗyūū ɓák ɛ́, ɓɛ́ ɛ́ sul tí oɓyɛ́l ōtêk. Ɓɛ́ tí ɛsüesɛl íphūndā ɓyɔ̄ɔ̄.

³Yésus ɛ ɓúzī kalɔɔ tí ɓyɛ́l mí Símɔn. Nyɛ nɛ Símɔn nāá, ɛ ɓáa wā títɔ̄ nɛ ɓyɛ́l ɓɛ pák sɔ̂k. Ɗɛ Símɔn ā ɓɛ ɛ́ ɛ́ tɔ́ nɛ ɓyɛ́l ɓɛ pák sɔ́k ékɛ́, Yésus ɛ ɓúzī ɗi sī twóó ɓyɛ̂l. Ɛ nyɛ́l ɛ́lyákɛl ɓót ɛkɛ́l ɛ̄ mí Zɛɛ̄mb.

⁴Ɗakɛ ā kât ɛlüii ékɛ́, Ɛ ɓúzī lɛ́ɛ́ nɛ Símɔn nāá: «Khɛ́ɛ tɔ́ nɛ ɓyɛ́l ɓɛ pák somb. Ɓɛ̌ pyaāt ɗí tí ɗím ê. Phúla ték ɛ́, ɓī gús íphūndā ɓyēn, ɓyá á dó ósû.»

⁵Símɔn nɛ nɛ̄ nāá: «Ɓɛɛ́, Yêkle, zí í gus íphūndā mús tí ŋgúmǎ pum wɛ̂ɛsa, kát ɛ́tɔt phâk. Ɗɛ ɗí nāá, ú ú lɛ́ɛ́ mɛ́ ɗyaāŋ ékɛ́, má á gus tí lɔ́ŋ wɔ̂.»

⁶Ɓɛ̄ ɓúzī gus íphūndā ɓyɔ̄ɔ̄, osú ɓɛ̄ nī ték ɛ́mbī. Iphūndā í ték ɓī nyɛ́l ɛ́kat.

⁷Ɓɛ̄ ɓúzī kwáp ɓót ō ndɔŋ yɔ̄ɔ̄ ɓā ɓɛ tí nɔ̄l ɓyɛ́l ɓák nāá, ɓɛ zí i ɓyela ɓɛ̂. Ɓot ō ndɔŋ yɔ̄ɔ̄ ɓɛ̄ ɓúzī zye nɛ wɔ̄ɔ̄ ɓyɛ̂l. Ɓá nɛ nɔ̄ɔ̄ ɓɛ̄ lwōndɛ̄l ósú twóó oɓyɛ́l ōɓá ɓyɛ̂ɛsa. Oɓyɛ́l ɓɛ̄ nyɛ́l ɛ́ɗinda tí mɛɗil mɛ̄ ósû.

⁸Ɗɛ Símɔn Pyɛ̂ɛ ɓɛ́ɛ́ ɗyáŋ ékɛ́, ɛ dá kút mɛ́ɓɔ̄ŋ sɔ̂phɔɔ̄mb mí Yésus. Nyɛ nɛ nɛ̄ nāá: «Ɗâ, ɗi ɛ́cetaceta nɛ naām. Nɛ dɔ nāá, myam mi mot misɛ̄m!»

⁹Tí ɛnyɛl tí Símɔn, kum tí ɓot ɓá nɛ nɔ̄ɔ̄ ɓā ɓɛ ndɔŋ ɓák, ɓyɛ̂ɛsa ɓwɔ̄ŋ nɛ ɓwɔ̄ŋ, tí ɛɓɛɛ thūnd ósú ɓā dô ɗyaāŋ ê.

¹⁰Zwák nɛ Zwáŋ, ɓwán o mí Zeɓeɗe ɓot o ndɔŋ o mí Símɔn ɓā ɓɛ thɔ́k nɛ ɓwɔ̄ŋ tí sá têk. Í náǎŋ Yésus ká lɛ́ɛ́ nɛ Símɔn nāá: «Wa a kāmb sínɔŋ, tí ɛkā nyɛl ɛ́chāak ɛ́, wá á kā ɗi nɔ̄l wā ɗul ɓót ɔ̂.»

¹¹Ɓɛ̄ ɓúzī tɔ́ nɛ oɓyɛ́l ɓɛ cīnd. Ɓɛ̄ dá phyám ísínɔŋ ɓyɛ̂ɛsa náǎŋ ɛ́, ɓɛ̄ ɗū Yésus.

¹²Tí wūl mwēs ɛ́, Yésus ā ɓɛ tí yīl khanda. Nɔ̄l mót ā ɓɛ nól zaām nɛ zaām ɔ́ ɛ ɓúzī zye sɔ̂kphɔɔ̄mb mí Yésus. Ɛ kūt mɛ́ɓɔ̄ŋ, ɛ ɓūt phómb sī, tí ɛdakla nɛ Yésus. Nyɛ nɛ nɛ̄ nāá: «Ndə̂ə, ú wā kam nák, kōt yám í chánjɔ̄ɔ̄ nâk, yá á chánjɔɔ.»

¹³Yésus ɛ ɓúzī kɔ́s mbɔ̂ ɛ kūnā nɛ nɛ̄, nyɛ nɛ nɛ̄ nāá: «Mí í kam. Kōt yɔ́ ī chánjɔɔ ê!» Thɔ́k títɛɛ̄l ŋgwát ɛ́, zaām yɛ̄ ī dá sí sî.

¹⁴Yésus nɛ nɛ̄ nāá: «Dā tɔ́ ɛ́phūm. Wa a lɛ́ɛ́ môt. U kɛ́ lyákɛl fata mɛ́tûnka nól nyɔɔ̄. Phúla ték nák ɛ́, u gbā mɛ́phɔ̄k mɛ̄ Moís ā ɓā lɛ́ɛ mâk. Ī zyē ɓot ɓá á kū gú nāá, zaām yɔ́ í í sî.»

¹⁵Ísu ɗɛ Yésus ā lɛ́ɛ́ ɛ ɗyaāŋ ékɛ́, Pɔ́ nyɛ̄ nyā da titɔ́ tɔ̂. Thūnd ɓót ɓɛ̄ ɓú zyě ɓɛ yɛ̄ tí ɛzī gwókɛl sá ā lilɛ́ɛ é, nɛ ɛsáŋ nāá, ɛ jwóm ɓɛ mɛkpay mɔ̄ɔ̄.

¹⁶Sá gwát ɛ́, Yésus ɛ dá jyúú nól nyɛ̄, ɛ tɔ́ ɛ́cetaceta nɛ ɓot, ɓɛ̌ pyaāt ā titɔ́ tɛ́m yɛ̂ɛs tí ɛkɛ̄ sá míndakla ê.

¹⁷Tí wūl mwēs ɛ́, Yésus ā ɓɛ tí ɛlyákɛl ɓót ɛkɛ́l ɛ̄ mí Zɛɛ̄mb. Ofatizyɛ́ŋ nɛ iyêkle ɓɛ̄ ílɔ́a ɓā ɓɛ yes. Ɓɛ̄ tyāā ɓɛ mɛ́l mɛ̄ pák Galilé, nɛ Yuɗê, zī kā nwɔ̌ŋ Yotósalɛm. Khul mí Zɛɛ̄mb nyā ɓɛ nɛ nɛ̄. Ɛ ɓú jijwom mímbɛ̂l.

¹⁸Ɓɛ̄l ɓót ɓɛ̄ ɓúzī zye nɛ yīl ɓōkā, ɓɛ̄ khɛ̄ɛ̄ ɛ́ tí dídɔɔ̄ŋ, ɓɛ̄ sāŋ ɛ́ní nɛ nɛ̄ tí nāá ɓá á ka ɛ́ sɔ̂kphɔɔ̄mb mí Yésus.

¹⁹Á ɓɛ́ gū nāá, ɓɛ̄ tháŋ wɛ̄ nɛ myǎk ɓot? Í náǎŋ ɓɛ́ kā kalɔɔ kwóó mǐ nɛ nɛ̄. Ɓɛ̄ tūū ɛ́lond. Ɓɛ̄ ɓúkā sul mbɛ́l wɔ̄ɔ̄ tí dídɔɔ̄ŋ yɛ̄ nɛ mikɔɔ̄l kúkǔ ɓot sɔ̂kphɔɔ̄mb mí Yésus.

²⁰Ɗɛ Yésus ɓɛ́ɛ́ ɛ́ɓūklā lɔ̄ɔ̄ ékɛ́, ɛ ɓúzī lɛ́ɛ́ nɛ ɓōkā ték nāá: «Mwán aām, ú ú ɓye íjukā ī mísɛ̄m myɔ̂.»

²¹Ɗɛ Ófatizyɛ́ŋ nɛ iyêkle ɓɛ̄ ílɔ́a gwōk ɗyáŋ ékɛ́, ɓɛ̄ ɓúzī nyɛl ɛ́sîmsa ɗêk: «Nɔ́k nyɛ ɛ ku yɔ̂ɔ zɛ̄? Ɓā gwókká ɗɛ ɛ́ ɗí tí ɛɓáwɛl Zɛ́mb nɛ wūnɛ́ɛ̌ŋ mbi mɛ́kɛ́l ê! Zɛ̄ ɗí nɛ khul ɛju mót misɛ̄m tí iɓwaās ɓík phúla Zɛ̌mb nyɛɛmɛ̄t ɔ̂!»

²²Ɗakɛ Yésus ā ɓɛ tí gú ósīmsā ɓɔ̄ɔ̄ ékɛ́, ɛ ɓúkā jí nɛ nɔ̄ɔ̄ nāá: «Í yɛ̄ ɓí ɗí nɛ wūnɛ́ɛ̌ŋ mbi ósīmsā ê?

²³Nɛ ɛlɛ́ɛ́ nɛ mbɛ́l nāá: “Mí í ju ɔ́ misɛ̄m myɔ̂.” Nɛ ɛlɛ́ɛ́ nɛ nɛ̄ nāá: “Gbal é u nyɛ́l kɛnd.” Í yɔ́ɔ́ ɗía?

²⁴Ɛ̂ɛŋ, gūká nāá, myam Mwán mí mot mi nɛ də́ə́ nāá, mi jû ɓot misɛ̄m wák tí iɓwaās ɓîk.» Phúla ték ɛ́, nyɛ nɛ ɓōkā nāá: «Gbal ê! U nwɔ́ŋ dídɔɔ̄ŋ yɔ̂, u tɔ̄ ɓɛ̌ njāā wēn!»

²⁵Títɛɛ̄l ŋgwát ɛ́, ɓōkā ɛ dá gbǎl gbal ê. Ɛ khɛ̄ɛ̄ dídɔɔ̄ŋ yɛ̄, ɛ kpāŋ ɓɛ̌ njāā wɔ̄ɔ̄ nɛ ɛgúmɛl Zɛ́mb.

²⁶Sá ték ī ɓúzī sála ɓôt. Ɓot ɓɛ̄ gwōk ɓwɔ̄ŋ nɛ ɛgúmɛl Zɛ́mb. Ɓɔ̂ɔ nāá: «Mús tí mwēs ɔ́kɛ́, zí í ɓɛɛ sá ɗí ɓot ɓá a ɓá nyēē ɓiɓɛɛ ê.»

²⁷Phúla ték ɛ́, Yésus ɛ ɓúzī kpáŋ ɛ kɛ́ ɓyela nɔ̄l mót itɔ́ya ɗín lɛ̄ nāá, Levî. Leví ték ā ɓɛ nɗínɗiīl twóó njāā ísɛ̄ɛ̄ ɓót o lapô. Yésus nɛ nɛ̄ nāá: «Ɗū mɛ̂!»

²⁸Levî ɛ dá gbǎl gbal ê. Ɛ lyūk ísínɔŋ ɓyɛ̂ɛs, ɛ ɗū Yésus.

²⁹Phúla ték ɛ́, Leví ɛ ɓúkɛ̄ sá Yésus ɗína ɓɛ̌ njāā wɛ̄. Thūnd ɓót ɓɛ̄ ítɔ́ya nɛ ɓɛ̄l ɓót ɛ́ɓuuɓu ɓā ɓɛ thɔ́k tí ɗína têk.

³⁰Ofatizyɛ́ŋ nɛ iyêkle ɓɛ̄ ílɔ́a ɓā ɓɛ wɔ̄ɔ̄ pák ɓák ɛ́, ɓɛ̄ ɓúkā nyɛl ɛ́nyúŋ sá Yésus ā ɗiɗɛ nɛ ɓot ɓīnɛ́ɛ̌ŋ ndɔŋ ê. Ɓɛ̄ jí nɛ ophōn ō mí Yésus nāá: «Í yɛ̄ sá nāá, ɓyā nɛ ɓot ō lapó, nɛ ɓɛ̄l ɓááɓyóóɓyóó ō ɓót, ɓí ɗɛ̂ iɗóó nɛ mɛɗyuú pyaāt gwát ê?»

³¹Yésus ɛ ɓúzī ɓɛ́s nɛ nɔ̄ɔ̄ nāá: «Minjés myá a ɓɛ̄ nɛ njeā nɛ ɗɔ̂kta. Sá gwát ɛ́, í mimbɛ̂l.

³²Ma a zí jóó ɓɛ̄l ō ɓɛ́ɛ́ nāá, ɓɛ́ mizwēs ɓâk. Sá gwát, mi zi jōō ɓɛ̄l ō gū nāá, ɓɛ́ ɓot o mísɛ̄m ɓák tí nāá, ɓá á lúm míkɔŋ nɛ mɛɓyóó mɔ̄ɔ̄.»

³³Ofatizyɛ́ŋ ɓɛ ɓúzī lɛ́ɛ́ nɛ Yésus nāá: «jüāk nāá, ophōn ō mí Zwáŋ nɛ ɓēs óphōn ɓɛ́ nɛ ɓānā ɛ́sá ci íɗóó nɛ mɛɗyūū, nɛ ɛsá míndakla. Í yɛ̄ ɓɔ́ óphōn ɓā ā sā ci íɗóó nɛ mɛɗyūū ê?»

³⁴Í náǎŋ Yésus ká ɓɛ́s nɛ nɔ̄ɔ̄ nāá: «Ɓí ɓɛɛ nāá, ɓɛ́ nɛ khul ɛkambɛl ɓót o ɓāndlāā ɓɛ̌ ɓwók ɛ́ɓá ɓák iɗóó nɛ mɛɗyūū ɓyela nāá, ndôm mumá, mot ɓāndɛ̄l ɓɛ́ ɔ́kɛ́, ɓá nɛ nɔ̄ɔ̄ ɓɛ́ ndɔŋ ɛ?

³⁵Tɛ́m ɓɛ́ wā ɗüis ɓɛ́ ndôm mumá ékɛ́, ī tí ɛzye. Í tí tɛ́m ték ɓɛ́ wā sá ci íɗóó nɛ mɛɗyūū ê.»

³⁶Yésus ɛ ɓúzī ɓākā nwɔŋ ɓɛ̄ ɓwoŋa nāá: «Ɓá a ɓɛ̄ nɛ khul ɛnaŋ pɛ́s kānd myēnj tí nāá, ɓá á gbá pɛ́s ték ɛɓāākā tí ndǒmb kānd. Ɓɛ̄ wā sá ɗyáŋ nâk, ɓɛ́ ɛ́ samb pɛ́s kānd myēnj, thɔ́k ɛ́, pɛ́s kānd ték yá a ɓɛ̄ nɛ khul ɛdóka tí ndǒmb kānd.

³⁷Ɓā ā nwɔ́ŋ mɛ́nɔk mɛ̄ myēnj mɛ̄ ɗí ta ɓā pé mák ɛ́, ɓɛ̄ ɗyúɛ̄l mɛ́ twóó mindoōmb mī íthak ī kōt. Ɓɛ́ wā sá ɗyáŋ nák ɛ́, mɛnan mɛ mɛ́nɔk má á naŋ íthak ī kōt. Mɛnɔk mɛ̄ süéé sī, ithak ī kōt ī ték ɓī sɛ̂mb.

³⁸Í je nāá, ɓɛ̄ gbâ mɛnɔk mɛ̄ myēnj mɛ̄ ɗí ta ɓā pé mák ɛ́, tí ithak ī kōt ī mímyēnj, ɓɛ̄ ɓúkā ɗyúɛl.

³⁹Thɔ́k ɛ́, tɛ́m mót ɗí ɛ́ ɛ́ nyēē ɗɛ̌ ndoōmb mɛ́nɔk mɛ ɗí mɛ́ ɛ́ pé mák ékɛ́, ā ā ká kpɛl nāá, ɛ ɓáka ɗɛ mɛ̄l mɛ̄ myēnj mɛ̄ ɗí ta ɓā pé mâk. Nɛ dɔ nāá, ɓɛ̄ lɛ́ɛ nāá: “Í ndoōmb mɛ́nɔk ɗí mɛ́ ɛ́ pé mák ɛ́, ɗí tí nwɔŋ.”»