Read Mpumpong Misāwā 12 Bible Online

Misāwā 12 - Mpumpong bible

Misāwā 12

¹Tí tɛ́m ték ɛ́, ndə́ə́ ɓɛ́ jōō nāá Elôd ɔ́kɛ́, ā ɓɛ tí ɛlûmla nɛ ɓɛ̄l ɓót tí ɓot ō gós mí Yésus.

²Ɛ ɓúzī kɛnd ísóda ɓyɛ̄ nāá, ɓɛ̄ kɛ́ ɛdó Zwák mwânaāŋg mí Zwáŋ nɛ Paasɔŋ.

³Ɗɛ ndə́ə́ ɔ́nɔ́ɔ̌ŋ ā ɓɛɛ nāá, ɛsüee ɛ mí Zwák lí i jüe Óyúɗɛn mimyaŋla ékɛ́, ī ɓúzī ɓākā jüe ɛ́ khul nāá, ɛ mɛ̂t thɔ́k Pyɛ̂ɛ. Yá ɓɛ tɛ́m ɓwók mwâpha ta ɓɛ nɛ levü̂ü.

⁴Ɗɛ ɓā mɛ̂t Pyɛ̂ɛ ékɛ́, ɓɛ̄ ɓúzī gbá ɛ́ tí mbok. Ɓɛ̄ tɛ̄l khāmb isóda inâ tí ɛɓakɛl ɛ̂, ɓɛ̄ sīsā vâa ōná ōnâ. Elôd ā kam nāá, á á dɔ́s ɛ́ phúla ɓwók páska Óyúɗɛn, tí mís mɛ̄ mót nyɛ̂ɛs.

⁵Tɛ́m Pyɛ̂ɛ ā ɓɛ twóó njāā mbok ékɛ́, gós-óɓúkɛl í ɓúzī gbá nól tí mindakla tí ɛsú lɛ̄.

⁶Pum wá ɓɛ nāá, Elôd á á dɔ́s Pyɛ̂ɛ tí mɛlyám mɛ̄ték ékɛ́, Pyɛ̂ɛ ā ɓɛ tí dɔ́ pāká isóda iɓá, ŋgwōlā nɛ idɔpɔ iɓá, ɓīl ísóda tí ɛɓakɛl ɛ́gbɛ̄s ɛ̄ njāā mbok.

⁷Títɛɛ̄l ŋgwát ɛ́, éŋgeles mí Ɗá ɛ dá sulǎ sulâ, ɛɓyakɔɔ lī zyě pyaāt ɓā ɓɛ ê. Ɛ thɛ́nj Pyɛ̂ɛ tí iphānj tí ɛjem ɛ̂, nyɛ nɛ nɛ̄ nāá: «Kpās ɛ́gbal!» Idɔpɔ i ɓā gwôl Pyɛ̂ɛ mɛɓɔ́ nɛ ɓyɛ́ ɓík ɛ́, ɓī dá kǔt kut ê.

⁸Éŋgeles ɛ ɓúzī ɓākā lɛ́ɛ́ ɛ́ nāá: «Cyuŋɛ̌l mbaāmb wɔ́, u ɓwāt ísapát ɓyɔ̂.» Ɛ ɓúzī sá ɗakɛ éŋgeles ā ɓā lɛ́ɛ́ ɛ ê. Éŋgeles ɛ ɓú ɓākā lɛ́ɛ́ nɛ nɛ̄ nāá: «Ɓwǎt kānd ɛ́jwóó wɔ́, u ɗū mɛ̂!»

⁹Pyɛ̂ɛ ɛ ɓúzī ɗú ɛ́, ɓɛ̄ gbās ndɔŋ. Sá gwát, a a gú nāá, sá éŋgeles á sâ ɗyaāŋ ékɛ́, yá ɓɛ ceece. Ā da sîmsa nāá, ɛ tí ɛjem líma ta ɓɛ tí dɔ̂.

¹⁰Ɓɛ ɓú nyee thǎŋ khāmb isóda ɓī ɛ́sɔ̂k. Ɓɛ ɓákā thaŋ yīl mbá, ɓɛ̄ ɓúkɛ̄ kǔm ɓɛ ɛ́gbɛ̄s lɛ̄ ídōō, ɗí līl ɛ̄ mɛ́sīl ɓɛ́ gbās ték, tí ɛní twóó khanda ê. Ɛgbɛs ɛ ték lī dá ɗií nɛ khul nyɛ̄ sɔ̂kphɔ̌mb nyɔ̄ɔ̄, ɓɛ̄ ɓúzī gbâs, ɓɛ̄ nyɛ́l kɛnd tí kphaāk, éŋgeles ɛ dá ɗímb náǎŋ ɛ́sɛ̄n.

¹¹I náǎŋ ósīmsā ɓɛ̄ mú tí ɛkɛ̄ tyâa, nyɛ nāá: «Aááa! Í kǔ ceece nāá, Ɗá Zɛ́mb thes éŋgeles wɛ̄ nāá, ɛ zí i pɛ́s mɛ́ tí mɛɓɔ́ mí Elôd nɛ tí isá íɓyōō ɓyɛ̂ɛs Óyúɗɛn ɓɛ̄ tí ɛkpɛl nāá, ɓī kûl mɛ ɓîk.»

¹²Ɗakɛ ósīmsā ɓɛ́ ɓā ɓɛ ɓɛ́ ɛ́ zye, ɛ gū sá ɗí yá a lwɔ̂ɔ thaŋ ékɛ́, ɛ ɓúzī tɔ́ ɓɛ ɗá ɓɔ̂ɔ Malía naāŋg mí Zwâŋ ɓā jijóó ɛ Máákus ɔ̂. Í ɓyela náǎŋ nāá, thūnd ɓót ɓɛ́ ɛ́ gwêsla pyaāŋ tí ɛsá mindakla.

¹³Pyɛ̂ɛ ɛ ɓúzī kwɔ́kɛl ɛ́gbɛ̄s ɛ̄ pɛ̂nj, nɔ̄l mwán isɛ̄ɛ̄, mwân mumá ɓɛ́ jōō nāá, Lôɗ ɔ́kɛ́, ɛ ɓúzī jémbǎ ɓɛ̄ ɛ́gbɛ̄s, nyɛ thɔ́ jí nāá: «Í wɔ zɛ̄?»

¹⁴Ɛ ɓúzī jwǒk jwōnd mí Pyɛ̂ɛ. Tí thūnd mimyaŋla ā ɓɛ nɛ myɛ́ ékɛ́, ɛ dá kā jesa ɛɗii ɛ́gbɛ̄s ɛ́, ɛ süǐs kāmb tí ɛkɛ̄ nyēē lɛ́ɛ́ ɓót ō njāā nāá: «Pyɛ̂ɛ ɛ mú kák ɓɛ ɛ́gbɛ̄s.»

¹⁵Ɓɔ̂ɔ nɛ nɛ̄ nāá: «U nɛ ogo ó!» Sá gwát, nyɛ ta ɓúlɛl nól phús tí ɛlɛ́ɛ́ nɛ nɔ̄ɔ̄ nāá, í ku Pyɛ̂ɛ. Ɓɛ̄ ɓúzī lɛ́ɛ́ nāá: «Í nɛ khul ɛ ɓɛ éŋgeles wɛ̄!»

¹⁶Ti tɛ́m ték ɛ́, Pyɛ̂ɛ ā da ɓɛ tí ɛkwɔ́kɛl ɛ́gbɛ̄s. Tɛ́m ɓā ka zi ɗii ɛgbɛ̄s ékɛ́, ɓɛ ɓúzī ɓɛɛ nāá, í Pyɛ̂ɛ. Ɓɛ́ ɓyɛ̂ɛsa ɓɛ̄ lwōnd tí okāmāmā.

¹⁷Ɛ ɓúzī ní twóó njāā, ɛ lyók ɓɛ́ nɛ mbɔ́ nāá, ɓɛ̄ ɗî ɛ́phūm. Ɛ ɓúkā nyɛl ɛ́lɛ́ɛ́ ɓɛ́ ɗɛ Ɗá gbɛ̄s ɛ́ tí mimbok ê. Á kɛ gɔl lüii yɛ̄ ɗêk: «Tɔ́ kɛ̄ lɛ́ɛ́ká Zwâk, nɛ ɓɛ̄l óɓúkɛl ɓyɛ̂ɛs sá têk.» Phúla ték, ɛ ɓúzī kpâŋ, ɛ súlā kphaāk, ɛ tɔ̄ tí yīl pyaāt.

¹⁸Ɗɛ mɛ́lyám mā lyâmla ékɛ́, isóda ɓyā ɓɛ ɓī mú tí ozǎmzǎm. Ɓɛ jījī sá kūl Pyɛ̂ɛ ê.

¹⁹Elôd ɛ ɓúzī kɛnd ɓót nāá, ɓɛ̄ kɛ́ ɛnwɔ̌ŋ Pyɛ̂ɛ ɓɛ̄ zyē nɛ nɛ̄. Sá gwát ɛ́, ɓá a ɓyela ɛ. Ɛ ɓúzī jóó isóda, ɛ jī ɓɛ́ sá ɓā thaŋ ê. Phúla ték nyɛ nāá, ɓɛ̄ dô ɓɛ. Elôd ɛ ɓúkā tyáá náǎŋ ɓɛ̌ Yuɗé, ɛ sul ɓɛ̌ Sezalé tí ɛɓā kɛ́ kpɛ́njɛl ɛ́ɓim ɛ̄ mɛ́lú pyaāŋ.

²⁰Tí tɛ́m ték ɛ́, ndə́ə́ Elôd ā ɓɛ nɛ ánénén ɛɓūk nɛ ɓot ō Tîi nɛ Siɗɔ̂ŋ. Ɓot ō Tîi nɛ Siɗɔ́ŋ ɓɛ̄ ɓúzī ɗi cyūŋ nāá, ɓá á kɛ́ ɓɛɛ́ Elôd. Ɓɛ̄ ɓú kɛ̄ ɓɛɛ́ Ɓalatús nónel thɔ́ɔ́ mí kūmāndē nāá, á á kɛ̄ kwombɛl pāká ɓá nɛ ɓɔɔ Elôd. Nɛ dɔ, iɗóó ɓyɔ̄ɔ̄ ɓyā ɗiɗüis ɓɛ yɛ̄.

²¹Tí mwēs ɓā ɓɛ nāá, ɓá á ɓoma ɔ́kɛ́, Elôd ɛ ɓúzī ɓwát míkānd mī ókūmāndē, ɛ kɛ́ kalɔɔ́ ɓɛ̌ ɗia də́ə́ yɛ̄, ɛ nyɛ́l ɛ́lüii nɛ ɓot.

²²Mɛthum mɛ ɓót mā ɓɛ náǎŋ mák, mɛ̄ ɓúzī lɛ́ɛ́ nāá: «Yúk yá a ɓɛ̄ mót ɗí tí ɛlüii ɗék ɔ̂. Í ŋgúma zɛ́mb!»

²³Tí tɛ́m gwát nɛ gwát ték ɛ́, eŋgeles mí Ɗá ɛ ɓúzī gbá ɛ́ ɛkpay tɔɔ̄p nāá, a a ɓyêt nāá, kúm nyī ɗî nyīl mí Zɛɛ̄mb. Inaām ɓī ɓúzī ló ɛ́, ɛ jüê.

²⁴Ɛkɛ́l ɛ mí Zɛɛ̄mb lɔ̂ɔ tí ɛtɔ́ nɛ ɛnaman.

²⁵Ɗɛ ɓā ɓɛ ɓɛ́ ɛ́ kɛnd Sɔ́l ɓá nɛ Ɓaanáɓas ɓɛ̌ Yotósalɛm ékɛ́, ɓɛ̄ ɓúzī süánjɛl ló-sɛ̄ɛ̄ wɔ̄ɔ̄, ɓɛ̄ nwɔ́ŋ Zwâŋ ɓɛ́ ɓākā jóó ɛ́ nāá, Máákus ɔ, ɓɛ̄ ɓūlā nɛ nɛ̄ ɓɛ̌ Aŋtiós.