Read Mpumpong Misāwā 17 Bible Online

Misāwā 17 - Mpumpong bible

Misāwā 17

¹Pɔ́l ɓá nɛ Sílas ɓɛ̄ ɓúzī thǎŋ ɓɛ̌ khandǎ Aŋfipolís nɛ khandǎ Apolonî, ɓɛ̄ kɛ́ kǔm ɓɛ̌ khandǎ Tesaloník, gúmɛ̄ njāā míndakla Óyúɗɛn wā ɓɛ ê.

²Ɗɛ yā ɓɛ ŋgúma tíka tí ɛsú lɛ̄ ékɛ́, Pɔ́l ɛ ɓúkɛ̄ ní ɓɛ̌ njāā míndakla. Ɛ ɓúzī tɔ́ ɗyáŋ táŋ isaɓá īlɛ̂l. Ɓá nɛ ɓot o ɓā ɓɛ twóó njāā ték ɓák ɓɛ̄ ɓūɓúl ɛ́kɛ́l ɛ mí Zɛɛ̄mb.

³Ɛ ɓú titimbɛl ɓɛ́ nɛ ɛlɛ́ɛ́ ɓɛ́ nāá, ɛkɛ́l ɛ̄ mí Zɛɛ̄mb ɛ ték lí lɛ́ɛ́ nāá: «Kūmāndē Zɛ́mb ā kɛs ɔ́kɛ́, ā ɓɛ nāá, á á ɓoma nɛ mitūŋ, ɛ jüê. Zɛɛ̄mb ɛ sā nāá, ɛ gbal tí ɛvit.» Kūmāndē ték Zɛ́mb ā kɛs ɔ́kɛ́, yá a ɓɛ̄ nɔ̄l mót süís phúla Yésus mí ɗí tí ɛlüií tɔɔ̄p wɛ̄ ɗék ɔ̂.

⁴Mɛkɛ́l mɛ̄ték mɛ̄ ɓúzī sála ɛ́ɓim lɛ́ Óyúɗɛn ɓā ɓɛ náǎŋ ɓák tí milyêm. Oyúɗɛn oték ɓɛ̄ ɓúzī ní tí ndɔŋ mí Pɔ́l ɓá nɛ Sílas, zī kā nwɔ̌ŋ thūnd Ígɛlɛ́k ɗūɛ̄l Zɛ́mb ɓík, nɛ thūnd ɓáánénén ō ɓúá.

⁵Sá gwát ɛ́, ɓɛ̄l Óyúɗɛn ɓá a kpɛl sá têk. Ɓɛ̄ ɓúzī nwɔŋ ɓīl íyāmblā kphǎk nɛ kphaāk tí nāá, ɓá á sá ɛ́tuūk twóó khanda yɛ̂ɛs. Sá ték í i sá nāá, mɛthum mɛ ɓót mɛ̄ gwêsla. Ɓɛ ɓúzī tɔ́ ɓɛ̌ njāā mí Yasɔ́n tí ɛkɛ̄ sáŋ ɛ́mɛ́t Pɔ́l ɓá nɛ Sílas tí nāá, ɓá á kɛ́ tɛ́l ɓɛ́ tí mís mɛ̄ ɓôt.

⁶Ɗɛ ɓā ɓɛ ta ɓyela ɓɛ́ ékɛ́, ɓɛ̄ ɓúzī mɛ́t Yasɔ́n ɓá nɛ ɓɛ̄l ɓót ō mí Yésus, ɓɛ̄ tɔ́ nɛ nɔ̄ɔ̄ ɓɛ ɓót ō dɔ̄s mítɔɔ̄p tí khanda ték ɓâk. Ɓɛ̄ ɓú cicím ɗêk: «Ɓot ɓák ɓɛ̄ tí ɛgbá ɛ́tuūk tí sī nyɛ̂ɛs, ɛ́chāak ɓɛ́ ɛ́ kum nɛ yɛ́ wâk.

⁷Í Yasɔ́n ɔ́kɛ́, ɗí tí ɛɓakɛl ɓɛ́ twóó njāā wɛ̄! Ɓot oték ɓyɛ̂ɛs ɓā ā ɗūɛ̄l ílɔ́a i mí Kɛ̂ɛza. Nɛ dɔ nāá, ɓɛ́ lɛ̄ɛ̄ nāá, ī mú nɛ nɔ̄l ndə́ə́ süís ɗín lɛ̄ nāá, Yésus.»

⁸Mɛkɛ́l mɛ̄ték mɛ̄ ɓúzī té mɛthum mɛ ɓót nɛ ɓot o phǎnj mitɔ̌p mɛkoō sī.

⁹Ɓɛ̄ ɓúzī nwɔ̌ŋ Yasɔ́n ɓá nɛ ɓot ɓá nɛ nɔ̄ɔ̄ ɓā mɛ́taa ɓák mitûnd, phúla ték ɛ́, ɓɛ̄ ɓyēt ɓɛ̄.

¹⁰Ɗɛ̌ pum wā jüîndla ékɛ́, oɓúkɛl ɓɛ̄ ɓúzī sá nāá, Pɔ́l ɓá nɛ Sílas ɓɛ̄ tɔ̂ ɓɛ̌ khandǎ Ɓelê. Ɗɛ ɓɛ́ kɛ̄ kǔm pyaāŋ ékɛ́, ɓɛ̄ ɓúzī tɔ́ ɓɛ̌ njāā míndakla Óyúɗɛn.

¹¹Oyúɗɛn ō Ɓelé ōték ɓā ɓɛ nɛ tyaa sāwā ísínɔŋ ī tháŋ ɓɛ̄l ō Tesalonîk. Ɓɛ̄ ɓúzī da ɛ́kɛ́l ɛ̄ Zɛ́mb mɛɓɔ́ mɛ̄mbá. Ɓɛ̄ fīfyál lɛ́ mɛlú myɛ̂ɛs tí ɛɓɛɛ gú sá Pɔ́l ā lilɛ́ɛ ɓɛ ékɛ́, yā ɓɛ ɛ́dalá ɗɛ ɓá ɗǐ tilā ê.

¹²Thūnd ɓót pāká nyɔ̄ɔ̄ ɓɛ̄ ɓúzī ɓûkla. Tí ndɔŋ Ígɛlɛ́k ɛ́, ɓǎnénén ō ɓúá nɛ thūnd ɓótóm ɛ́, ɓɛ́ ɛ ɓûkla thɔ́k Yésus.

¹³Sá gwát ɛ́, ɗakɛ Óyúɗɛn ō Tesaloník ɓā gwôk nāá, Pɔ́l ɛ tí ɛtyáá tūnd ɛ́kɛ́l ɛ̄ mí Zɛ̌mb ɓɛ̌ khandǎ Ɓelé ékɛ́, ɓɛ̄ ɓúzī tɔ́, ɓɛ̄ kɛ́ nyɛl ɛ́sá ɛ́tǔk nɛ ɛ́sá thɔ́k asôklo.

¹⁴Ɗɛ óɓúkɛl ɓā ɓɛɛ ɗyaāŋ ékɛ́, ɓɛ̄ ɓúzī sá nāá Pɔ́l ɛ kpás ɛtɔ́ ɓɛ pák mâŋ. Sílas ɓá nɛ Timoté ɓɔ̂ɔ ɓɛ līs náǎŋ ɓɛ̌ Ɓelê.

¹⁵Ɓot o ɓā tɔ́ nɛ Pɔ́l ɓák ɛ́, ɓɛ́ ɛ kɛ kum nɛ nɛ̄ ɓɛ̌ khandǎ Atɛ̂n. Pɔ́l ɛ ɓúzī ɓúlɛl ɓɛ́ nɛ twōm nāá, ɓɛ̄ kɛ́ɛ lɛ́ɛ́ Sílas nɛ Timoté nāá, ɓɛ̄ kpás ɛkɛ̄ ɓyela ɛ́ pyaāŋ.

¹⁶Tɛ́m Pɔ́l ɗí tí ɛɓwónd Sílas ɓá nɛ Timoté ɓɛ̌ Atɛ́n ékɛ́, lyém wɛ̄ ū ɓúzī lwónd tí phimb tí ɛɓɛɛ́ ɗakɛ ɓót ō khanda ɓā ɓɛ ɓɛ́ ɛ́ gbá mɛ́nól tí ɛɓûkla ózɛɛ̄mb ō míkpakā ê.

¹⁷Ɓá nɛ Oyúɗɛn nɛ ɓɛ̄l ō ɗí ta ɓɛ Óyúɗɛn ō ɗūɛ̄l Zɛ́mb ɓák ɛ́, ɓɛ̄ ɓú lilɛ́ɛla twóó njāā míndakla Óyúɗɛn. Thɔ́k tí mɛphānj ɛ́, ɛ́ ɛ lilɛ́ɛla nɛ ɓot ɓyɛ̂ɛs ɓá nɛ nɔ̄ɔ̄ ɓā ɓiɓoma ɓák.

¹⁸Ɓɛ̄l ócél ō sāŋ ɛ́pind mɛ́tē mɛ̄ ísínɔŋ ɓák ɛ́, ɓɔ̂ɔ thɔ́ ɓɛ̄ ɓúzī zye ɓá a ɓɔɔ Pɔ̂l, ɓɛ̄ nyɛ́l ɛ́lɛ́ɛla. Yā ɓɛ igós īɓá, nɛ ɓot o ɗū Epikuu ɓák ɛ́, nɛ ɓot o ɗū Zenɔ́ŋ ɓák. Ɓák ɓɛ̄ ɓú jijí nāá: «Kpatap ɔ́kɛ́ kam ɛ́ kū lɛ́ɛ́ yɛ̄?» Ɓɛ̄l nāá: «Ɛ́ dala ɛ́lüii náǎŋ tɔɔ̄p ózɛɛ̄mb o ɓīl íkûl.» Ɓā lɛ́ɛ ɗyǎŋ tɔɔ̄p ɓā gwôk Pɔ́l tí ɛtityáá tūnd Tyâa Pɔ́ mí Yésus, nɛ tɔɔ̄p ɛ́pas ɛ mímúŋ ê.

¹⁹Ɓɛ̄ ɓúzī nwɔŋ Pɔ́l ɓɛ̄ tɔ̄ nɛ nɛ̄ ɓɛ phānj mitɔɔ̄p. Ɓɛ́ jōō phānj ték nāá, Aleopâz kwól ɛcôk. Ɓɔ̂ɔ thɔ́k jí ɛ́ nāá: «U nɛ khul ɛtimbɛl ɓés ɗɔ́ktɛ̌n myēnj ú ɗí tí ɛlyákɛl ɓót ékɛ́?

²⁰Nɛ dɔ nāá, isá ú ɗí tí ɛlɛ́ɛ́ ɓés ɓík ɛ́, í isá ī ɗí mimyēnj tí mɛlɔ́ mēs ê. Í yɛ́ zí ɗí tí ɛkam ɛ́gú mɛ́timbɛɛ̄l mɛték ê.»

²¹Í kū nyēé ɓyela náǎŋ nāá, ɓot ō Atɛ́n ɓyɛ̂ɛs nɛ ojóŋ ō ɗí twóó khanda ték ɓák, ɓā thithaŋgɛl tɛ́m yɔ̄ɔ̄ tí ɛlilɛ́ɛ́ nɛ ɛgwók mímyēnj mī ísínɔŋ.

²²Pɔ́l ɛ ɓúzī gbal títɛɛ̄l twóó phānj mitɔɔ̄p nyīnɛ́ɛ̌ŋ, nyɛ nāá: «Ɓyɔ̂ɔ ɓot ɓɛ̄ Atɛ̂n, mí ɓɛɛ nāá, ɓí ɓot o ɗí tí kpɛl ɛɗúɛl ózɛɛ̄mb tí mitɛ̄lā myɛ̂ɛs ɓák ê.

²³Tɛ́m mí ɓɛ̄ tí ɛjáŋ twóó khanda yēn ékɛ́, mí i ɓɛɛ ipyaāt ɓí ɗí tí ɛɗúɛl ózɛɛ̄mb ɓēn ê. Mí i ɓɛɛ thɔ́k yīl pyaāt mɛ́tûnka nɛ mitilā nāá: “Tí ɛsú ɛ̄ zɛ́mb ɗí mot ā ā gū ɛ́ ɔ̂.” Ɛ̂ɛŋ! Zɛɛ̄mb ték ɓí ɗí tí ɛɗúɛl ta gú ɔ́kɛ́, í nyɛ mí ɗí tí ɛzī lɛ́ɛ́ ɓén tɔɔ̄p wɛ̄ ɗék ɔ̂.

²⁴Zɛɛ̄mb ték ā kus jwóó nɛ iɓwaās nɛ isínɔŋ ɓyɛ̂ɛs ɗí twóó ték ɓîk. Nyɛ ɗí Ndə́ə́ jwóó nɛ iɓwaās, ā ā ɗí tí minjāā mí Zɛɛ̄mb mí ɗí sumā ɓót ɓɛ̄ íɓwaās ê.

²⁵Ā ā jé yīl sínɔŋ nɛ ɓot ɓɛ̄ íɓwaās, nɛ dɔ nāá, yīl sínɔŋ yā ā lūk ɛ̂. Í nyɛ jüe mót nyɛ̂ɛs cyuk, nɛ ŋgúl cyuk, nɛ ɓīl ísínɔŋ ɓyɛ̂ɛs.

²⁶Ā tyâa tí mot ŋgwát tí ɛkus íkúl ī sī ɓyɛ̂ɛs. Ɛ ɓúzī sá nāá, íkul ī ték ɓyɛ̂ɛs ɓī dála sī nyɛ̂ɛs. Ɛ tɛ́l ítɛ́m ɓyɔ̄ɔ̄, ɛ gbā mɛ́chyēs mɛ̄ ókanda ɓɔ̄ɔ̄.

²⁷Zɛɛ̄mb ā sâ isá ī ték ɓyɛ̂ɛsa tí nāá, ɓot ɓɛ̄ sáŋ ɛ. Thɔ́k ɛ́, tí ɛsú ɛ̄ nāá, ɓɛ́ jwokla ɛ́sáŋ ɛ́ nâk, ɓɛ́ nɛ khul ɛkɛ̄ ɓyela ɛ̂. Sá ɗí ceece ékɛ́ í nāá, Zɛ̌mb ɛ ndumɛ nɛ mot nyɛ̂ɛs.

²⁸Tí oceece, “Zɛɛ̄mb ɗí tí ɛsá nāá, nī cyûkka, ní kúúlākâ, nyɛ sā nāá, nī ɗíka sá ní ɗíka ê.” Ɗakɛ ɓɛ̄l ótilel o mɛ́kanā ɓén ɓā lɛ́ɛ nāá: “Níkana chīlā mí Zɛɛ̄mb ê.”

²⁹Ɗyaāŋ ték ɗɛ ɗí nāá, níkana chīlā mí Zɛɛ̄mb ékɛ́, nā ā dálā ɛ́sîmsaká nāá, Zɛɛ̄mb ɛ́ nɔŋlǎ nɛ yīl sá mót ɗí tí ɛsîmsa nāá, ɛ nɛ khul ɛkpak yɛ́ nɛ gôl, nɛ izanj gú thɔ́k nɛ mɛkɔ̄k ê.

³⁰Ɛsɔ́k ɛ́, ɓot ɓā ɓɛ ɓɛ́ ɛ́ jók Zɛ́mb. Sá gwát ɛ́, Zɛɛ̄mb ā ā nwɔ́ŋ ɛ́kɔɔ nɛ ɛjók lɔ̄ɔ̄. Ɛ́chāak, ɛ́ jōō ɓót ɓyɛ̂ɛs, pyaāt yɛ̂ɛsa nāá, ɓɛ̄ cênj icyuk ɓyɔ̄ɔ̄.

³¹Nɛ dɔ nāá, ā ɓɛ ɛ́ ɛ́ tɛ́l ŋgúmǎ mwēs tí ɛsú lɛ̄ ɛzī cyúkɛ̌l tɔɔ̄p ɛ́dalá pāká nyɛ nɛ ɓot. Dɔ́s ték yá á thǎŋ zinjá mot ŋgwát ā ɓɛ ɛ́ ɛ́ tɛ́l ɛ́ tí ɛsú ɛ̄ ték ɔ̂. Ɛ ɓúzī lyákɛl ɓót ɓyɛ̂ɛsa nāá, í mot ték ɗí nɔ̄l ā tɛ̂l ɔ́kɛ́, tí ɛgbɛl ɛ́ pāká mimûŋ.»

³²Ɗɛ ɓā gwôk Pɔ́l tí ɛlüií tɔɔ̄p ɛ́gbal ɛ̄ mɛ́vit ékɛ́, ɓák ɓót ɓɛ̄ ɓúzī cwét ɛ́, ɓɛ̄l nɛ nɛ̄ nāá: «Tí yīnɛ́ɛ̌ŋ pyaāt ɛ́, wá á kā zī lɛ́ɛ́ ɓés tí yīl kɛnd.»

³³Pɔ́l ɛ ɓúzī lyúk ɓɛ̂, ɛ kpāŋ yɛ̄.

³⁴Ɓyela nāá, ɛ́ɓīm ɛ̄ ɓót tí ɓɛ̄l ō ɓā ɓɛ tí ɛgwókɛl ɛ́ ɓák ɛ́, ɓɛ́ ɛ ɓûkla, ɓɛ̄ ɗū ɛ̂. Tí ndɔŋ wɔ̄ɔ̄ ɛ́, yā ɓɛ nɛ Ɗenís nɔ̄l mót phānj mitɔɔ̄p nyɔ̄ɔ̄, nɛ nɔ̄l múmá ɗín lɛ̄ nāá, Ɗamalîs, zī kā nwɔŋ ɓɛ̄l.