Read Mpumpong Misāwā 20 Bible Online

Misāwā 20 - Mpumpong bible

Misāwā 20

¹Tɛ́m ɛ́tuūk lā ɓɛ lí í sí ékɛ́, Pɔ́l ɛ ɓúzī gwésɛl ɓót ō gós mí Yésus, ɛ jüē ɓɛ́ mɛlyôo. Phúla ték ɛ́, ɛ dānā nɛ nɔ̄ɔ̄, ɛ tɔ̄ ɓɛ̌ cǐl ɓwǎs Maseɗwân.

²Tɛ́m ā ɓɛ tí ɛthǎŋ Maseɗwán ékɛ́, ɛ ɓú titɔ́ nɛ ɛjüe ɓót ō gós mí Ɗá mɛlyóó ɛ́ɓwɛɛɓwɛɛ. Ɛ ɓúzī kā thaŋ ɛ kúm ɓɛ̌ Gɛlɛ̂s,

³ɛ kɛ́ sá pyǎŋ oŋgɔn olɛ̂l. Tɛ́m ā ɓɛ ɛ mú tí ɛnwɔ̌ŋ kukɛ nāá, á á tɔ́ ɓɛ pák ɓwǎs Silí ékɛ́, ɛ ɓú dā gwók nāá, Oyúɗɛn ɓɛ́ ɛ́ ɗǐ ɓomb nɛ ɗín lɛ̄ nāá, ɓá á sá ɛ́ ɛɓyôo. Ɛ ɓúzī ɓɛɛ nāá, í jé nāá, ɛ süîs ɓɛ̌ Maseɗwân.

⁴Ɓot o ɓá nɛ nɔ̄ɔ̄ ɓā kikɛ ndɔŋ ɓák yā ɓɛ nɛ Sopátɛɛ mwán mí Pilü̂s, mot khandǎ Ɓelé, nɛ Alistâak, nɛ Sekundǘs ɓot ō Tesaloník, nɛ Gaǘs mot Ɗɛ́ɛɓ, zī kā nwɔ̌ŋ Timoté, nɛ Tisîk, nɛ Tofím, ɓot o pák ɓwǎs Azî.

⁵Í ɓɔ̂ɔ ɓā nyee tɔ́ ɛsɔ́k ɓɛ̌ khandǎ Toás, ɓɛ̄ kɛ́ ɓwónd ɓés zá nɛ ɓɔɔ Pɔ̂l.

⁶Phúla ɓwók ímwâpha ɗí ta gbɔpa ɓík ɛ́, zyɔ̂ɔ zī ɓúkā kalɔɔ́ kukɛ ɓɛ ɛ́ɓóŋ ɛ̄ ɗyūū ɗí ɓɛ̌ Fílíp ê. Zā sâ mɛlú mɛ̄tɛ́n tí kɛnd ɗyuú nɛ ɗyūū, zī kɛ́ ɓyela ɓɛ́ ɓɛ̌ Toâs. Zí i sá náǎŋ sɔ́ndɔ thindî.

⁷Tí mwēs mɛ́nyɛɛ̄l mɛ sɔ́ndɔ ɔ́, zā ɓɛ zí í gwêsla tí ɛɗɛ íɗóó ī Zɛ́mb. Ɗɛ yá ɓɛ nāá Pɔ́l á á tɔ́ tí mwēs wā ɗum úkɛ́, ɛ ɓúzī nyee lüii nɛ ɓot ɛ́lüii lüii lüii í kɛ́ kum kúkǔ pum.

⁸Í i ɓɛ nɛ thūnd ólámba mitumbā pyaāt zā gwêsla ɓɛ̌ kwǒŋ njāā ɗí kwóó wūl ê.

⁹Nɔ̄l mwáámgbānj ŋgwát ɗín lɛ̄ nāá, Etíkǘs ā ɓɛ ndíndiīl tí wúndɛ̌ njāā têk. Ɗakɛ Pɔ́l ā ɓɛ ta lī kát ɛ́lüii ékɛ́, dɔ́ ī ɓúzī nwɔŋ mwáámgbānj têk, ɛ dā ɛ jésā nôl. Ɛ dá swál pyaāŋ tí wúndɛ̌ njāā lɛ́l wá ɓɛ kwóó mīl é, ɛ zí syâklǎ ɓɛ sī. Ɗɛ ɓɛ́ kā zī gbɛl ɛ́ ékɛ́, ɓɛ́ ɓyela nāá, ɛ́ ɛ́ jüe.

¹⁰Pɔ́l ɛ ɓúzī sul, ɛ kútɔɔ, ɛ khɛ̄ɛ̄ ɛ́ tí mɛɓɔ́, nyɛ nāá: «Ɓyá a gwók ɓā, a a jüē.»

¹¹Phúla ték ɛ́, ɛ ɓú ɓākā jwoŋ ɓɛ ɛ́kó ɓɛ̌ njāā ɓā ɓɛ ték ɔ̂. Ɛ ɓūk mwâpha íɗóó ī Zɛ́mb ī têk, ɛ ɗɛ̂. Nwɔŋā ā da ka nwɔŋ lüiī náǎŋ ékɛ́, nje mɛlyâm. Phúla ték ɛ́, ɛ ɓúzī kpâŋ.

¹²Phúla ték ɛ́, ɓɛ̄ ɓúkɛ̄ zye nɛ mwáámgbānj ā swâl tí wúndɛ ɔ́kɛ́, nyɛ tí ɛcyûk. Milyém mí ɓót mī ɓúzī sula ɛ́nwɔŋnwɔŋ.

¹³Zyɔ̂ɔ zā nyee tɔ́ ɛsɔ̂k, zī kálɔ̄ɔ̄ kukɛ, ī tɔ̄ nɛ nēs ɓɛ ɛ́ɓóŋ ɛ̄ ɗyūū ɛ̄ ɗí ɓɛ̌ Asós, gúmɛ̄ yá ɓɛ nāá, zá á nwɔ̌ŋ Pɔ́l ê. Nɛ dɔ nāá, nyɛ mot ték ā ɓɛ ɛ́ ɛ́ nwɔŋ wɛ̄ cyūklā nāá, á á thǎŋ kphaāk nɛ kphaāk.

¹⁴Ɗɛ Pɔ́l ā zi ɓyela ɓěs ɓɛ̌ Asós ékɛ́, zá nɛ nɔ̄ɔ̄ zī ɓúkā tɔ́ ndɔŋ ɗyūū nɛ ɗyūū, zī kɛ́ kǔm ɓɛ̌ khandǎ Mitilɛ̂n.

¹⁵Zī ɓúzī tɔ́, zī kɛ́ kum tí mɛ́l mɛ́lyám ɓɛ Cyô. Mwēs wā ka ɗum úkɛ́, zī ɓúzī kǔm ɓɛ̌ Samôs. Mwēs wā ɓaka ɗum wúzaāŋ úkɛ́, zī tūūlā ɓɛ̌ khanda Milɛ̂.

¹⁶Thūnd íkɛnd ɓīnɛ́ɛ̌ŋ tɔɔ̄p nāá, Pɔ́l ā kam nāá, ɛ ɓákā tyáá ɓɛ̌ khanda Efɛ̂ɛz, tí ɛkámb ɛ́ ɓákā ɗímbɛl tɛ́m ɓɛ pák ɓwǎs Azî. Ā jé nāá, ɛ tɔ́ ɛ kpās ɛ́kǔm ɓɛ̌ Yotósalɛm tí nāá, í wá ɓánda nâk, ɛ kɛ́ ɗɛ ɓwók paŋtekót pyaāŋ.

¹⁷Ɗakɛ Pɔ́l ā sulɛl ɓɛ̌ Milɛ́ ékɛ́, ɛ ɓúzī kɛnd mót nāá, ɛ kɛ́ɛ lɛ́ɛ́ ótōmbá o gós-óɓúkɛl ɓɛ̌ Efɛ̂ɛz nāá, ɓɛ zí i ɓyela ɛ́ náǎŋ.

¹⁸Ɗɛ Ótōmbá ōték ɓā kûl ékɛ́, ɛ ɓúzī lɛ́ɛ́ nɛ nɔ̄ɔ̄ nāá: «Ɓī tí gú kǒ-kɛnd wám tí ɓīm tɛ́m mí kpɛ̄njɛ̄l wák pāká nyēn, ī nyɛ́l mwēs ɛ́sɔ́k mā kûl wák tí pák ɓwǎs Azí ê.

¹⁹Mā sála Ɗá Yésus nɛ idɔt i nól, nɛ ɛjüé, nɛ mitūŋ. Oyúɗɛn ɓɛ̄ ɗiɗí mɛ́phomb nɛ ɗín lám tí nāá, ɓá á sá mɛ́ ɛɓyôo.

²⁰Tí yīl ɗí nāá, í nɛ nɔm tí mɛsú mén ékɛ́, ma á sɔl ɓén sá gwát nɛ gwát. Mí i lɛ́ɛ ɓeēn ɛkɛ́l ɛ mí Zɛɛ̄mb, mī lyōō ɓén sɔ̂kphɔ̌mb mot nyɛ̂ɛs, gú thɔ́k twóó minjāā myēn.

²¹Mā jijôo Oyúɗɛn nɛ ɓot ɓyɛ̂ɛs o ɗí ta ɓɛ Óyúɗɛn ɓák nāá, ɓɛ̄ cênj icyuk ɓyɔ̄ɔ̄, ɓɛ̄ jüe Zɛ́mb milyém myɔ̄ɔ̄, ɓɛ̄ ɓūklā Ɗá Yésus káwūnā.

²²Ɛ́chāak ɛ́, mi í tɔ́ ɓɛ̌ Yotósalɛm ɗakɛ Áchāāchǎnj Sisímb ɗí tí ɛmál mɛ́ nāá, mi sâ kê. Sá gwát, mā ā gū sá wā kúl mɛ́ pyaāŋ ê.

²³Yīl mí dā gú ékɛ́ í nāá, Áchāāchǎnj Sisímb ɛ́ ɛ́ césɛl mɛ́ nāá, má á ɓɛɛ mítūŋ ɛ́ɓuuɓu dala íkhanda, mi tɔ̄ mímbok

²⁴Sá gwát, mā ā ɓú gwók ɓā nɛ cyuk yâm. Sá mí dā jé ékɛ́ í nāá, mi tɔ̂ lōmōl Ɗá Yésus ā kɛnd mɛték ô, mi lwōndɛ̄l ló-sɛ̄ɛ̄ ā jüe mɛ ɔ́kɛ́, mi kɛ́ kǔm ɓɛ mɛ́sīl. Mí dalǎ nɛ ɛtyáá tūnd Tyâa Pɔ́ ipyaāt ɓyɛ̂ɛs ta ɓɛ nɛ ɓwɔ̄ŋ nāá, í ceece nāá, Zɛ̌mb ɛ nɛ tyaa lyém kpɛl nɛ ɓot.»

²⁵«Sá mí ɗí tí gú ɛ́chāak ɛ́nwɔŋnwɔŋ ékɛ́ í nāá, ɓyá ǎ ɓākā ɓɛɛ phɔ́mb nyaām, ɓyɔ̂ɔ ɓot o ɓɛ̄ mí í thaŋ pāká nyēn nɛ ɛtyáá tūnd Tyâa Pɔ́ Də́ə́ mí Zɛɛ̄mb ê.

²⁶Í yɛ́ mí ɗí tí ɛlɛ́ɛ́ sɔ̂kphɔ̌mb mot nyɛ̂ɛsa mús nāá, mǒt kā ɗímb tí ndɔŋ wēn nâk, Yá ǎ kā ɓɛ̌ tɔɔ̄p wâm, yá á ka jüák ɓyɔ̂ɔ ɓot otêk.

²⁷Nɛ dɔ nāá, mí í síl ɛ́lɛ́ɛ́ ɓén jwok mí Zɛɛ̄mb yɛ̂ɛs, ta sɔl sínɔŋ.

²⁸Kāndɔ̄ɔ̄ká mɛnól mēn, ɓī gú jüák íthɛmbɛ i mí Zɛɛ̄mb ɓyɛ̂ɛs, nɛ Áchāāchǎnj Sisímb ā jüe ɓeēn nāá ɓī ɓákɛl ɓîk. Ɗikāná oɓakɛl ō gós-óɓúkɛl o mí Zɛɛ̄mb. A ɓwâm yɛ́ nɛ chía nyɛ̄ nyɛ mot ték tí nāá, yá á ɗi yɛ̄.

²⁹Mi tí gú nāá, tɛ́m wā ɓɛ mí í kpáŋ ékɛ́, iɓyēm ɓyá á zye pāká nyēn, ɓá ǎ dós khāl itaa khɔɔ̄ŋ.

³⁰Í su pāká nyēn, yá á ɓɛ nɛ ɓɛ̄l ɓót wā tɔ́ nɛ ɛlɛ́ɛ́ ócāl tí nāá, ɓá á ɗul óɓúkɛl o mí Yésus ɓɛ pák wɔ̄ɔ̄.

³¹Jüenjɛlká phɛ̄, ɓyá a jesa nāá, táŋ mimbú milɛ́l, mwēs nɛ pum ɛ́, ma a kât ɛcésɛl ákɛl nɛ kɛl tí ndɔŋ wēn ísu mi nɛ myāŋɛ̂l.

³²Ɛ́chāak ɛ́, mí í gbá ɓén tí mɛɓɔ́ mí Zɛɛ̄mb. Tɛ̄lká ɛkɛ́l lɛ̄ ɓɛ sɔ̂k. Í lɛ́ ɗí tí ɛlyákɛ̌l kpɛɛ̄l Zɛ́mb ɗí nɛ yɛ́ zinjá ɓot ɓyɛ̂ɛs ê. Í lɛ́ ɗí nɛ khul ɛ́sá nāá, gós yēn ī gwée tí ɛɓūklā. Thɔ́k ɛ́, Zɛɛ̄mb ɛ́ ɛ́ jüe ɓén mɛnwɔŋ mɛ̄ ɗí ɛ́ ɛ́ kwōm tí ɛsú ɛ̄ ɓɛ̄l ɓyɛ̂ɛs ā tɔ̂p ɓâk.

³³Ma a gōmb mɔnī mót, gú thɔ́k gól nɛ kānd môt.

³⁴Ɓyɔ̂ɔ ɓot oték ɓī tí gú nāá, mā ɓɛ̄ mí i sála nɛ mɛɓɔ́ mám mák tí ɛsú ɛ̄ myám mot têk nɛ tí ɛsú ɛ̄ ɓɛ̄l zá nɛ nɔ̄ɔ̄ zā ɓɛ ndɔŋ ɓâk.

³⁵Mā ɓɛ mí i lyákɛl tɛ́m yɛ̂ɛs nāá, ɓī sála ɗyǎŋ ɗakɛ myám tí nāá, ɓyá á kɛm mípwêepweē, tí ɛsîmsa ɛ́kɛ́l ɛ̄ Ɗá Yésus nyɛ mot ték ā lɛ́ɛ nāá: “Í nɛ thūnd lɛ̄m tí ɛsú ɛ mot jüéna ɔ́, ī tháŋ nɔ̄l dá ɓwónd ɛjüeaa ɔ̂.”»

³⁶Phúla Pɔ́l ā sîl ɛlüii ékɛ́, ɛ ɓúzī kút mɛ́ɓɔ̄ŋ ɓá nɛ nɔ̄ɔ̄, ɛ dáklā tí ɛsú lɔ̄ɔ̄ ɓɛ́ ɓyɛ̂ɛs.

³⁷Ɓɛ́ ɓyɛ̂ɛsa ɓɛ̄ dá tól nɛ mɛjüê, ɓɛ̄ ɓyéndɛ̄l Pɔ́l tí ɛdána nɛ nɛ̄.

³⁸Sá yā ɓu thithês ɓɛ tí milyém ékɛ́, yā ɓɛ ɛkɛ́l ɛ̄ Pɔ́l ā lɛ́ɛ nāá: «Ɓyá ǎ kā ɓākā ɓɛɛ mɛ́ ê.» Phúla ték ɛ́, ɓɛ̄ ɓúkɛ̄ lyúkɛl ɛ́ ɓɛ̌ kukɛ.