Read Mpumpong Misāwā 6 Bible Online

Misāwā 6 - Mpumpong bible

Misāwā 6

¹Ɗakɛ óphōn ō mí Yésus ɓā ɓɛ tí ɛɓu tí tɛ́m ték ékɛ́, oɓúkɛl ɓɛ̄ Óyúɗɛn o lüíí Gɛlɛ́k ɓák, ɓā ɓɛ tí ɛsá mbunuk nɛ Óyúɗɛn ɓā lîs ɓɛ̄ Ízaɛ́l ɓâk. Ɓɛ̄ ɓú lilɛ́ɛ́ nāá, ɓɛ̄ tí ɛjesa míkús myɔ̄ɔ̄ mɛlú myɛ̂ɛs tɛ́m ɓɛ́ káá íɗóó ê.

²Milwōmtwōm kām nɛ mīmbá mī ɓúzī gwésɛl óphōn ō mí Yésus ɓyɛ̂ɛs, ɓɔ̂ɔ nɛ nɔ̄ɔ̄ nāá: «Yā ā nwɔ́ŋ nāá, zī ɓyêt ɛlɛ́ɛ́ ɓót ɛkɛ́l ɛ̄ mí Zɛɛ̄mb ɛ́, tí ɛsú lɛ̄ ɛ́kɛ̄ kaa íɗôo.

³Ɓwán ɓɛ̄ ónaāŋg ɓés, tɔ̄pká pāká nyēn ɓotóm tɛ̄n nɛ ōɓá ɗí nɛ tyaa mɛpɔ́ ɓâk, milwōndlā nɛ Áchāāchǎnj Sisímb nɛ pek, i zyē zá á jüe ɓɛ́ wúzǎŋ ló-sɛ̄ɛ̄.

⁴Náǎŋ yá á sá nāá, zī ɓɛ̄ nɛ tɛ́m tí ɛsú lɛ̄ ɛsisá míndakla nɛ ɛlilɛ́ɛ́ ɓót ɛkɛ́l ɛ̄ mí Zɛɛ̄mb.»

⁵Mot nyɛ̂ɛs ɛ ɓúzī kǎm jwok têk. Ɓɛ̄ ɓúzī tɔ́p Étyɛn ŋgúma mót lwōndlā nɛ ɛɓūklā, nɛ Áchāāchǎnj Sisîmb, nɛ Fílíp, nɛ Pookɔ̂ɔ, nɛ Nikanɔ̂ɔ, nɛ Timɔ̂ŋ, nɛ Paamenás ka zī nwɔ̌ŋ Nikolá mot Aŋtiós ā ɓɛ ɛ́ ɛ́ ní yɛ̄ɓē Óyúɗɛn kúkuū ɔ̂.

⁶Ɓɛ̄ ɓúzī zye nɛ nɔ̄ɔ̄ sɔ̂kphɔ̌mb milwōmtwōm. Milwōmtwōm mī ɓúzī dakla tí mɛsú mɔ̄ɔ̄, ɓɛ̄ kɛ́l ɓɛ́ mɛɓɔ́ tí milô

⁷Ɛkɛ́l ɛ̄ mí Zɛɛ̄mb lī ɓúzī naman. Ophōn ɓɛ̄ ɓúzī ɓǔ ɓɛ̌ Yotósalɛm. Thūnd ífata i mɛ́tûnka ɓā ɓɛ tí ɛɗúɛl mílyāklā mī óɓúkɛl.

⁸Zɛɛ̄mb ā ɓɛ ɛ́ ɛ́ lɛ́mɛl Étyɛn, ɛ jüē ɛ́ khul. Étyɛn ték ɛ́, ɛ ɓú sisá ɓáánénén ō mɛ́simbā nɛ ɓīl ísá ī ɓót ɗí tí ɛsɛ́mɛ ɓík ɛ́, twóó ɓot.

⁹Ɓɛ̄l ɓót ɓā ɓɛ tí ɛsá íɓuluk nɛ nɛ̄. Yā ɓɛ ɓot ō njāā míndakla ɓɛ́ jōō nāá: Njāā ɓót ō ɗí ɓɛ́ ɛ́ ɗüis tí okwōm nɛ ophala ɓâk. Ɓot oték ɓā ɓɛ Oyúɗɛn ɓā ɗüis ɓɛ̌ Silɛ́n nɛ ɓɛ̌ Alɛkzaŋdilí kā zī nwɔŋ ɓɛ̄l ɓā ɗüis ɓɛ̌ Silisí nɛ ɓɛ̌ cǐl ɓwǎs Azí ɓâk.

¹⁰Sá gwát ɛ́, ɓá a kikwok ɛ. Nɛ dɔ nāá, á lilüii nɛ pek Áchāāchǎnj Sisímb á jijüe ɛ ê.

¹¹Ɗɛ yā ɓɛ í í thaŋ ɓɛ́ khûl ékɛ́, ɓɛ̄ ɓúzī ɓwám ɓót tí nāá, ɓɛ̄ zí i lɛ́ɛ́ ócǎl zinjá mɛ̄ Étyɛn nāá: «Zí i gwók ɛ́ tí ɛlə́ə́ Moís, nɛ ɛlə́ə́ Zɛ́mb!»

¹²Í ɗyaāŋ ték ɓā lwópɛl ɓot nɛ otōmbá ɓɛ̄ Óyúɗɛn, nɛ ɓot ō tímbɛ̄l ílɔ́a ɓák ê. Phúla ték ɛ́, ɓɛ̄ ɓúzī mɛ́t Étyɛn ɓɛ̄ tɔ̄ nɛ nɛ̄ ɓɛ phǎnj mitɔɔ̄p mī Óyúɗɛn.

¹³Ɗɛ ɓā zi tɔ́ ékɛ́, ɓɛ̄ ɓúzī ɓākā nwɔŋ ɓɛ̄l ɓót ɓɛ̄ ócāl tí nāá, ɓá á kɛ̄ jüe Étyɛn mitɔɔ̄p nāá: «Mot ɔ́kɛ́ ā ā kāt ɛlüii ɛ́ɓyóóɓyóó zinjá njāā Zɛ́mb ánénén nɛ zinjá ílɔ́a i mí Moís!

¹⁴Za ɓɛ zí i ɓaka gwók ɛ tí ɛlɛ́ɛ́ nāá, Yésus mot Nazalɛ́ á á ɓúk ánénén njāā Zɛ́mb, ɛ cēnj thɔ́k mɛtum mɛ̄ Moís á lyûk ɓěs nɛ mɛ́ mâk.»

¹⁵Mís mɛ̄ ɓót ō phǎnj mitɔɔ̄p myɛ̂ɛs mā ɓɛ ɓɛ yɛ̄. Ɓɔ̂ɔ thɔ́ zī ɓɛɛ nāá, phɔ̌mb nyɛ̄ nyā ɓɛ nyī mú ɗakɛ phɔ́mb éŋgeles.