Read Mpumpong Lomɛ̂ 11 Bible Online

Lomɛ̂ 11 - Mpumpong bible

Lomɛ̂ 11

¹Mi ɓúkā jí nāá: Zɛɛ̄mb ɛ́ ɛ́ lúm kɔŋ nɛ ɛyɔŋ lɛ̄? Yāā! A a lûm kɔŋ nɛ lɛ̂! Nɛ dɔ nāá, myam mot ték mi mot Ízaɛ̂l. Mi tí chīlā mí Áɓilam, tí ɗú ɛ̄ njāā mí Ɓɛŋzwamɛ̂.

²Zɛ̌mb a a lūm kɔŋ nɛ ɛyɔŋ lɛ̄ ā nyee tɔ̂p lîk. Ɓī tí gú pyaāt Ɓááchāāchānj ō Mítilā ɗí tí ɛlɛ́ɛ́ nāá, Éli ā ɓɛ tí ɛje nɛ ɗín lɛ̄ Ízaɛ́l sɔ̂kphɔɔ̄mb mí Zɛɛ̄mb ê.

³«Ɗâ! Ɓwán ɓɛ̄ Ízaɛ́l ɓɛ́ ɛ́ dó ógbɛ́sel o mítɔɔ̄p ɓɔ̂, ɓɛ̄ ɓūk ípyaāt i mɛ́tûnka ɓyɔ̂: Mi da ka līs myaamɛ̄t. Ɓɛ́ thɔ́k tí ɛsáŋ ɛ́dó mɛ̂.»

⁴Zɛɛ̄mb ā yalan ɛ nā? Ā yalan ɛ nāá: «Mi nɛ ɓot omíl tɛ̄n nɛ ōɓá mí gbā ɓɛ́ tí ɛphanj tí ɛsú lâm, ɓɛ̄l ō ɓā ɓɛ ta kút mɛ́ɓɔ̄ŋ sɔ̂kphɔɔ̄mb mí zízɛɛ̄mb ɓɛ́ jōō ɛ́, Ɓáál ɔ̂.»

⁵Jwok gwát nɛ gwát ɛ́chāak ɛ́, í nɛ ɓuɓuka ɓót Zɛ́mb ā tɔ̂p tí ɛnwɔŋ ɛ lyém lɛ̄ é ɓâk.

⁶Ā tɔ̂p ɓɛ tí ɛnwɔŋ ɛ̄ lyém lɛ̄, ta ɓɛ̄ tí isīsɛ̄ɛ̄ ɓyɔ̄ɔ̄. Ī ɓɛ̄ tí tɔɔ̄p ísīsɛ̄ɛ̄ ɓyɔ̄ɔ̄ nâk, phú ɛnwɔŋ ɛ lyém ɛ̄ mí Zɛɛ̄mb lá a kū kā ɓɛ ɛ́nwɔŋ ɛ̄ lyêm.

⁷Í tian phɛ̄ nā? Í tian nāá, sá ɓwán ɓɛ̄ Ízaɛ́l ɓā sisâŋ ékɛ́, ɓá a ɓyela. Sá gwát, í nje ték ɛɓīm ɛ̄ Zɛ́mb ā tɔ̂p pāká nyɔ̄ɔ̄ lík ɛ́, lā da ɓyela. Í kā ɓɛ ɓɛ̄l nâk, Zɛɛ̄mb ɛ́ ɛ sâ nāá, ɓɛ̄ ɗî ta kā gwók njōwōl wɛ̄.

⁸Ɗakɛ Ɓááchāāchānj ō Mítilā ɗí tí ɛlɛ́ɛ́ nāá: «Zɛɛ̄mb ɛ́ ɛ ɗímbɛl ɓɛ́ ipek ɓyɔ̄ɔ̄, ɛ sā nāá mís mɔ̄ɔ̄ ma a kā ɓɛɛ́, mɛlɔ́ mɔ̄ɔ̄ ta kā gwôk, ī zí kǔm mwēs ó mûs.»

⁹Ɗávit ɛ́ lɛ̄ɛ̄ thɔ́k nāá: «Í je nāá, iɗína ɓyɔ̄ɔ̄ ɓī ɗí ɓɛ ŋgúmǎ lâmb, Ŋgúm ɓē tí nāá, ɓá á ɗuma ték ɛ́, Zɛɛ̄mb ɛ pɔ́nɛ̄s ɓɛ̂.

¹⁰Í je nāá, ɓɛ̄ sûl thīm, ɓɛ̄ ɗí ta kā ɓɛɛ́, Ɛ sā nāá, ɓɛ̄ ɗî mikūtwā tí mitūŋ myɔ̄ɔ̄.»

¹¹Mi ɓúkā jí nāá, tɛ́m Óyúɗɛn ɓā kwɔɔ ɛɓɔɔ̄k, ɓɛ̄ ɗúma é, ɓā ɗuma ceece é? Kât! Yá a ɓɛ ɗyāaŋ. Sá gwát, sɛ̄m wɔ̄ɔ̄ ú ú sá nāá, Zɛɛ̄mb ɛ cîs ɓot o ɗí ta ɓɛ Óyúɗɛn ɓâk. Ī sā nāá, Oyúɗɛn ɓɛ̄ gōmb ɓɛ̂.

¹²Ɗɛ ɗi nāá, sɛ̄m Óyúɗɛn ték ú ú sá nāá, ɓot o sī nyúk ɓɛ̄ ɓyê njés ɛ́nwɔŋ, nje wɔ̄ɔ̄ ū sā nāá, ɓɛ̄l ō ɗí ta ɓɛ Óyúɗɛn ɓák ɛ́, ɓɛ ɓyê njés ɛ́nwɔŋ ê, á Oyúɗɛn ɓyɛ̂ɛs ɓɛ̄ ká mě ɓûkla Yésus nâk, phú ɛnwɔŋ ɛ ték lá ǎ kā mě thaŋ ɛ́ɓwɔk ɛ́?

¹³Mí kā lüii ɛ́chāak nɛ nēn, ɓyɔ̂ɔ ɓot o ɗí ta ɓɛ Óyúɗɛn ɓâk. Myam mi lwōmtwōm ɓɛ̄l ō ɗí ta ɓɛ Óyúɗɛn ɓâk, tí tɛ̄lā wám ték ɛ́, mi tí ɛmyaŋla ló-sɛ̄ɛ̄ wám têk.

¹⁴Mi nɛ mɛjendɛɛ̄l nāá, kúl yám ɓá á gómb mɛ̂, i zyē Zɛɛ̄mb á á cis līl ɛ́ɓīm tí ndɔŋ wɔ̄ɔ̄.

¹⁵Tí ɛgū ɓɛɛ ɛ́, ɗɛ Zɛ́mb ā nwɔŋ ɓɛ́, ɛ gbā ɓɛ́ tí ɛphanj ékɛ́, í í sá nāá, ɛ kwómbɛl nɛ sī. Í yɛ̄ wā kúl tɛ́m ɛ́ wā ɓākā nwɔŋ ɓɛ́ ê? Yá á dā ɓɛ̌ ɗakɛ mót jüê, ɛ pás ê.

¹⁶Í ɓɛ̄ nāá, pɛ́s mwâpha ɛ́sɔ̂k í tí ɛsú ɛ̄ mí Zɛɛ̄mb nâk, ɓuɓuka mwâpha ték nyɛ̂ɛs í thɔ́k tí ɛsú lɛ̄. Í ɓɛ̄ nāá, mipeēnd mǐ lē, mí tí ɛsú ɛ̄ mí Zɛɛ̄mb nâk, miláá mīték mí thɔ́k tí ɛsú lɛ̄.

¹⁷Ɓwán ɓɛ̄ Ízaɛ́l ɓɛ́ ɗakɛ̌ lē phúm ɓɛ́ jōō nāá, olivyé ɓa ɓɛ ɓɛ́ kê. Ɓɛ́ ɛ cyúkɛl mīl míláá tí lē ték, í nwɔŋ ɓyɔ̂ɔ ɓot o ɗí ɗakɛ míláá mī olivyé ɗyuk ɓák ɛ́, ɓá á nɛt ɓén tí pyaāt ɓā cyúkɛl mīl míláá mī lē olivyé ɓā ɓɛ ɓɛ́ kê. Ɛ́chāak ɛ́, ɓí nɛ khul ɛ kā kalɔɔ tín tí ɛɗɛ mɛ́ɗyūū mɛ̄ lē ɗüís ɓɛ mípeēnd mī lē ték ɓyá nɛ miláá myɛ̄.

¹⁸Í yɛ́ ɗí nāá, ɓyā ā dálā ɛ́ɓyasi míláá mī lē ɓā ɓɛ ɓɛ́, myā cyúklaa mîk. Ɓyá á kā sáŋ ɛ́ɓén mɛ́nól náǎŋ nā? Yá a ɓɛ̄ ɓyɔ̂ɔ khɛ̄ɛ̄ mípeēnd, sá gwát í mipeēnd mi khɛ̄ɛ̄ ɓén.

¹⁹Ɓí nɛ khul ɛlɛ́ɛ́ mɛ́ nāá: «Ɓá a cyúkɛ̄l mīl míláá tí nāá, ɓá á nɛt ɓés ɛ̂!»

²⁰Í ku ɗyáŋ, ɓā cyūkɛ̄l myɛ́ tɔɔ̄p nāá, myā ɓɛ̄ ta ɓɛ nɛ ɛɓūklā. Ɓyɔ̂ɔ ɓī kā zī nwɔ̌ŋ ɗia yɔ̄ɔ́ tɔɔ̄p nāá, ɓí nɛ ɛɓūklā. Sá gwát ɓya a ɓén mɛ́nôl, ɓí dalǎ ɗi nɛ ɗyênd.

²¹Nɛ dɔ nāá, í ɓɛ̄ nāá, Zɛɛ̄mb ɛ́ ɛ cyúkɛl míláá mī lē ɓā ɓɛ ɓɛ́ é nâk, ɛ nɛ khul ɛsá ɓyɔ̂ɔ thɔ́k jwok gwát.

²²Jüák ɗɛ Zɛ́mb lyākɛ̄l ɗɛ ɛ́ɗí tí nwɔŋ nɛ ɗɛ ɛ́ɗí ta yek mót ê. Ā ā yék ɓɛ̄l ō ɗí ɓɛ́ ɛ́ ɗuma tí sɛ̄m ɓâk. Sá gwát ɓyɔ̂ɔ, ɛ́ ɛ́ sá ɓén ɛnwɔŋ. Í dā je nāá, ɓya a jesa nāá, Zɛɛ̄mb ɛ cis ɓén tɔɔ̄p nāá, ɛ tí nwɔŋ. Ī ɓɛ̄ ta ɓɛ ɗyāaŋ nâk, á á cyúkɛl ɓén thɔ́k ɗakɛ ɓɛ́ cyūkɛ̄l miláá ê.

²³Í wā kúl nāá, Oyúɗɛn ɓɛ́ kam ɛ́ɓûkla nâk, Zɛɛ̄mb á á nwɔŋ ɓɛ́, ɛ ɓákā zī nɛt ɓɛ́ pyaāt ɓá nyee ɓiɓɛ ê. Nɛ dɔ nāá, Zɛɛ̄mb ɛ nɛ də́ə́ ɛ́ɓākā zī nɛt ɓɛ̂.

²⁴Ɓyɔ̂ɔ ɓot o ɗí miláá mī lē olivyé ɗyuk, ɓā cyúkɛl, ɓɛ̄ zí nɛt tí lē olivyé ɓā ɓɛ ɓɛ́ kê. Tí ɛsá ɗyáŋ ɛ́, yā ā dála nɛ ɗakɛ ísínɔŋ dálā nɛ ɛsɛ́ɛ́ ê. Oyúɗɛn ɓɛ wɔ̄ɔ̄ pák ɛ́, ɓɛ́ míláá mǐ lē olivyé ɓā ɓɛ ɓɛ́ kê. Ɓɛ yɔ̄ɔ̄ yā ā túŋ ɗía tí nāá, Zɛɛ̄mb ɛ ɓáka zī nɛt ɓɛ́ tí lē yɔ̄ɔ̄.

²⁵Ɓwán ɓɛ̄ ónaāŋg ɓâm, mi tí ɛkam nāá, ɓī gû jwok Zɛ́mb ɗí sɔlā ê. Ɓyá a ɓwɔ̂ɔ nwɔŋ nāá, ɓí ɓot o ɗí nɛ pek ɓâk. Sá ték í nāá, līl ɛ́ɓīm ɛ̄ ɓwán ɓɛ̄ Ízaɛ́l ɓá á ɗi nɛ ɛlyel ɛ̄ lyém, ī kɛ́ kum tɛ́m mɛ̄l mɛ́yɔŋ myɛ̂ɛsa wā ɓûkla ê.

²⁶Í ɗyaāŋ Zɛ́mb wā sá tí nāá ɓwán ɓɛ̄ ízaɛ́l ɓyɛ̂ɛs ɓá á cyuk é, ɗakɛ a lɛ́ɛ tí Mɛkanā mɛ̄ nāá: «Cisa yá á ɗüǐs ɓɛ̌ khandǎ Siɔ̂ŋ, Ti ɛzī ɗüis lúk mɛ́lɔ́ chīlā mí Yákɔp.

²⁷Phōn mí wā sá nɛ nɔ̄ɔ̄, Tɛ́m mí wā ɗüis ɓɛ́ misɛ̄m myɔ̄ɔ̄ ékɛ́, nyɛ́ têŋ.»

²⁸Tí yīl jüāk mbyenā Óyúɗɛn ɓā ɓyen ɛgwók Tyâa Pɔ́ ékɛ́, ɓɛ́ mizīzyūŋ mi Zɛɛ̄mb tí ɛsú ɛ̄ nɔm yēn. Sá gwát, ī ká ɓɛ̄ yīl ɗúm nɛ ɓot o Zɛ́mb ā tɔ̂p ɓɛ ɓák ɛ́, Zɛ̌mb ɛ jína nɛ kpɛ̌l nɛ nɔ̄ɔ̄ tí tɔɔ̄p ósǎŋg-phǎmb ɓɔ̄ɔ̄.

²⁹Nɛ dɔ nāá, Zɛɛ̄mb ā ā ɓákā nwɔŋ sá ɗí ɛ́ ɛ́ jüéna ê. Ā ā cēnj íjwok ɓyɛ̄ zinjá ɓɛ̄l o ɗí ɛ́ ɛ́ jóó ɓɛ́ ɓâk.

³⁰Tɛ́m ɛsɔ́k ɛ́, ɓyā ɓɛ ɓí í sá lúk mɛ́lɔ́ nɛ Zɛɛ̄mb. Sá gwát ɛ́chāak ɛ́, Zɛɛ̄mb ɛ́ ɛ́ dós ɓén khɔ̌ŋ tɔɔ̄p nāá, Oyúɗɛn ɓɔ̂ɔ ɓa ɓɛ ɓɛ́ ɛ́ kā zī sá lúk mɛ́lɔ́ nɛ nɛ̄.

³¹Jwok gwát ɛ́, Oyúɗɛn ɓɛ́ ɛ sá lúk mɛ́lɔ̂. Ɛ́chāak ɛ́, lúk mɛ́lɔ́ yɔ̄ɔ̄ í í sá nāá, Zɛɛ̄mb ɛ dôs ɓěn khɔɔ̄ŋ, i zyē nāá ɛ́chāak ɛ́, ɓɔ̂ɔ thɔ́k ɓá á ɓyě ndōsā khɔ́ŋ têk.

³²Zɛɛ̄mb ā sâ nāá, ɓot ɓyɛ̂ɛs ɓɛ̄ ɗî ɗɛ mímbok, nɛ dɔ nāá, ɓɛ́ ɛ sá ɛ́ lúk mɛ́lɔ́, i zyē á á lyákɛl ɓɛ́ ɓyɛ̂ɛs ndōsā khɔ́ŋ wɛ̄.

³³Ɛnwɔŋ ɛ lyém ɛ̄ mí Zɛɛ̄mb zinjá ɓot lī tí ɓwɔk! Pek yɛ́, nɛ ŋgūā wɛ̄ ī tí ɗîm. Zɛ̄ ɗí nɛ khul ɛtimbɛl mícyūklā myɛ̄? Zɛ̄ ɗí nɛ khul ɛgú íjwok ɓyɛ̄?

³⁴Ɗakɛ Ɓááchāāchānj ō Mítilā lɛ̄ɛ̄ nāá: «Í zɛ̄ gū ósīmsā ō mí Ɗá ɔ̂? Í zɛ̄ ɗí nɛ khul ɛɗi mót mɛlyóó wɛ̄?

³⁵Í zɛ̄ ā nyee jüe ɛ sínɔŋ tí nāá, yá á ɓɛ ŋgúmǎ mɔ̄kōl tí nāá nyɛ ɛ ɓúlɛl ɛ yá ɔ̂?»

³⁶Nɛ dɔ nāá, sá yɛ̂ɛs í ɗüǐs ɓɛ yɛ̄. Í nyɛ ā kus isá ɓyɛ̂ɛs, tí ɛsú lɛ̂. Kúm nyī ɗí nɛ Zɛɛ̄mb itɛ́m ɓyɛ̂ɛs! Aamɛn.