Read Mpumpong Lomɛ̂ 2 Bible Online

Lomɛ̂ 2 - Mpumpong bible

Lomɛ̂ 2

¹Wɔ mot dɔ̄s ɓót ɔ̂, ɓá ǎ ju ɔ́, ísu u ɓɛ̄ zɛ̄. Nɛ dɔ nāá, tɛ́m ú dɔ̄s ɓót ō ndɔŋ yɔ́, u ɓākā sá ɗakɛ ɓɔ̂ɔ ékɛ́, gū nāá, ú ú síl ɛ́dɔ́saa, u kú tí dɔ́s, têk.

²Ɓyela nāá, Ni tí gú ká nāá, ɓot o sā mbi ísá ī ték ɓák ɛ́, Zɛɛ̄mb ɛ́ dɔ̄s ɓɛ́ tí oceece.

³Wɔ mot dɔ̄s ɓót ō sá mbi ísá ī ték ɔ́, ɓyela nāá, u tí ɛsá jwok gwát ɗɛ ɓɔ̂ɔ ɔ̂, ú sīmsā nāá, wá á pɔm tí tɛ́m Zɛ́mb wā cyúkɛ̌l tɔɔ̄p pāká ɓá nɛ ɓot ékɛ́?

⁴Nɛ gú thɔ́k ú ɓyasi Zɛ́mb tɔɔ̄p nāá, ɛ tí ɓū nwɔŋ, ɛ nɛ ɓīsɔ̄ɔ̄, nɛ dǎlǎ lyém ɛ́? Wā ā gū nāá, ɛnwɔŋ ɛ mí Zɛɛ̄mb lí tí ɛsú lɛ̄ ɛ́lwópɛl ɔ́ nāá, u cyênj cyuk yɔ́?

⁵Ɗɛ ú sā lúk mɛ́lɔ́ ta kpɛl thɔ́k ɛcénj cyuk yɔ́ ékɛ́, gū nāá, u tí ɛjóó ánénén ɛɓūk ɛ̄ mí Zɛ̌mb zinjá nyɔɔ̄, tí tɛ́m Zɛ́mb wā sul ɛ́ɓūk lɛ̄, nɛ ɛcyúkɛ̌l tɔɔ̄p tí oceece pāká ɓá nɛ ɓot ê.

⁶Mwēs ték ɛ́, á á jüe mót myána mi dálā nɛ mɛkoō mɛ̄ kɛnd mɛ̄ ê.

⁷Zɛɛ̄mb á á jüe ɓɛ̄l ō ɗí ta tyak tí ɛsá ɛ́nwɔŋ ɓák cyuk mɛ́lú myɛ̂ɛs, tí nāá, ɓá á ɓye kúm, nɛ ɗūū, ɓá a ɓɔɔ nɔ̄ɔ̄ ɓɛ̄ cyúk ndǒmb ɗî.

⁸Sá gwát, tí ɛsú ɛ ɓɛ̄l ō sā mɛ́ɓūn nɛ nɛ̄, ɓɛ̄ ɓyén óceece, ɓɛ̄ ɓyēt nāá, ɛɓyóó lī də̂ə ɓɛ ɓák ɛ́, á á lyákɛl ɓɛ́ ánénén ɛɓūk lɛ̄.

⁹Mitūŋ nɛ ithēsā ɓyá á kúl ɓót ɓyɛ̂ɛs o sā ɛ́ɓyóó ɓâk. Oyúɗɛn ɛsɔ̂k, ɓɛ̄l ō ɗí ta ɓɛ Óyúɗɛn ɓák ɛ́, ɓɛ̄ ɗûm.

¹⁰Sá gwát, mot nyɛ̂ɛs sā ɛ́nwɔŋ ɔ́kɛ́, Zɛɛ̄mb á á jüe ɓɛ́ kúm, nɛ ɗūū, nɛ ɛpyaala. Oyúɗɛn ɛsɔ̂k, ɓot o ɗí ta ɓɛ Óyúɗɛn ɓák ɛ́, ɓɛ̄ ɗûm.

¹¹Nɛ dɔ nāá, Zɛɛ̄mb a a ɓɛ̄ nɛ pák nɛ mot.

¹²Ɓot ɓyɛ̂ɛs ɓā sɛ̂m ta ɓɛ nɛ lɔ́a mí Moís ɓák ɛ́, ɓá á jüe ísu ɓɔ̂ɔ ta ɓɛ nɛ lɔ́a têk. Sá gwát, ɓot ɓyɛ̂ɛs ɓā sɛ̂m ɓyela nāá, ɓɛ́ ɛ́ gú lɔ́a ték ɓák ɛ́, ɓá á dɔ́s ɓɛ́ nɛ lɔ́a mí Moís.

¹³Nɛ dɔ nāá, yá a ɓɛ̄ ɓɛ̄l ō dá gú ɛ́gwók ta sá ɗakɛ lɔ́a mí Moís ték lɛ́ɛ́ é ɓák ɛ́, Zɛ́mb nwɔŋ ɓɛ́ ɗakɛ mízwēs sɔ̂kphɔ̌mb nyɛ̄ ɓâk. Sá gwát í ɓɛ̄l ō gwôk, ɓɛ̄ sā ɗakɛ lɔ́a ték lɛ́ɛ́ ɓák ɛ́, Zɛ́mb nwɔŋ ɓɛ́ ɗakɛ mízwēs sɔ̂kphɔ̌mb nyɛ̄.

¹⁴Tɛ́m ɓot ō ɗí ta ɓɛ Óyúɗɛn ɓák sā ɗakɛ lɔ́a mí Moís lɛ́ɛ́ é, ɓyela nāá, ɓā ā gū sá Zɛ́mb ā lɛ́ɛ tí lɔ́a ték ékɛ́, ɓɛ̄ tí ɛlyákɛl nāá, ɓɛ̄ tí gú sá ɓɛ́ dálā nɛ ɛsá gú ɓā ā dálā nɛ ɛsá ê. Ísu ɗɛ ɗí nāá, ɓá a ɓye lɔ́a mí Moís ê.

¹⁵Ɓɛ́ lyākɛ̄l náǎŋ nāá, sá lɔ́a lɛ́ɛ́ ékɛ́, í tilā twóó milyém myɔ̄ɔ̄. Mwáályém wɔ̄ɔ̄ ɛ tí ɛlɛ́ɛ́ thɔ́k ɗyaāŋ. Ɛ́ lɛ̄ɛ̄ ɓɛ́ nāá, ɓɛ́ ɛ́ sá ɛ́ɓyôo, gú ɓɛ́ ɛ́ sá ɛ́nwɔŋ.

¹⁶Í sá wā sɛ́ɛ́ mwēs Zɛ́mb wā dɔ́s ísá ī ɓót ō sā tí sɔɔ̄, ī dá dala nɛ Tyaa Pɔ́ mí ɗí tí ɛtyáá tūnd ték é, ɛ tháŋ tí kɔŋ mí Yésus kilís ê.

¹⁷Sá gwát, wɔ mot khɛ̄ɛ̄ ɗín ɛ̄ Yúɗɛn ɔ̂, wɔ mot tyāā tí lɔ́a mí Moís ɔ̂, wɔ mot lɛ̄ɛ̄ nól nāá, Zɛɛ̄mb ɛ Zɛɛ̄mb wɔɔ̄ ɔ̂.

¹⁸Wɔ mot ɗí tí gū sá Zɛ́mb kpɛ́l é, lɔ́a í lyākɛ̄l ɔ́ nāá, u tɔ̂p sá ɗí tí nwɔŋ ê.

¹⁹Wɔ mot ɓūklā nāá, u mot lyākɛ̄l ɓááthīm zyeē ɔ̂. Nāá, u ɛɓyakɔɔ tí ɛsú ɛ̄ ɓót ō ɗí tí khɔmwaāl ɓâk,

²⁰nāá, u mot lyōō míŋgwoŋg ɔ̂, yêkle ɓót ō ɗí ɗɛ ɓwâthɛɛ̄mb ɓâk, nɛ dɔ nāá, u tí ɛɓûkla nāá, lɔ́a í tí ɛjüe ɔ́ gūā wɛ̂ɛs nɛ oceece.

²¹Á wɔ mot lyōō ɓɛ̄l ɓót ɔ̂, wā ā ká lyóó wɔ́ mot ték phɛ̄ tí tɔɔ̄p yɛ̄? Ú lɛ̄ɛ̄ nɛ ɓot nāá, ɓá a jyûu, wɔ tí ɛjyûu!

²²U lɛ̄ɛ̄ nāá, ɓot ɓá a sá ɛ́kɔnd, wɔ tí ɛsá mɛ́kɔnd! Ú lɛ̄ɛ̄ nāá, u tí ɛɓyěn tɔɔ̄p ózɛɛ̄mb o míkpakā, sá gwát u tí ɛní twóó minjāā mī ózɛɛ̄mb oték, u kɛ́ sínɛl ísá ī míkpakā īték tí ɛjyûu.

²³Ú lɛ̄ɛ̄ nól tɔɔ̄p nāá, u tí gú lɔ́a, sá gwát u tí ɛsɛl Zɛ́mb tɛ́m ú ɗí ta sá ɗakɛ lɔ́a ték lɛ́ɛ́ ê.

²⁴Tí oceece, Ɓǎchāāchānj ō mítilā mí lɛ̄ɛ̄ nāá: «Ɓot o ɗí ta ɓɛ Óyúɗɛn ɓák ɛ́, ɓɛ̄ tí ɛlüii ɛ́ɓyóó nɛ ɗín ɛ̄ mí Zɛɛ̄mb tɔɔ̄p wēn.»

²⁵Tí ɛɓɛɛ ɛ́nwɔŋnwɔŋ ɛ́, ú ɗūɛ̄l lɔ́a nák ɛ́, zaŋgo í nɛ nɔm tí ɛsú lɔ̂. Sá gwát, tɛ́m ú ɗí ta ɗúɛl lɔ́a ékɛ́, ísu ú ú sáwǎ zaŋgo, u ɗakɛ mót ɗí a a ɓá sáwǎ zaŋgo ɔ̂.

²⁶Mot ɗí a a sāwāā zaŋgo ɔ̂, ɛ́ ɗūɛ̄l lɔ́a nâk, Zɛɛ̄mb a á nwɔŋ ɛ́ ɗakɛ mót ɗí ɛ́ ɛ́ sáwǎ zaŋgo ɔ́kɛ́?

²⁷Mot ɗí ta sáwǎ zaŋgo, sá gwát, ɛ ɗūɛ̄l lɔ́a ɔ́kɛ́, á á dɔ́s wɔ́ mot ɗí ú ú sáwǎ zaŋgo, u ɓáká ɗi nɛ lɔ́a, sá gwát, wɔ ta ɗúɛl lɔ́a ték ɔ̂.

²⁸Nák ɛ́, tyaa Yúɗɛn a a ɓɛ̄ nɔ̄l ɓɛ́ dā ɓɛɛ ɛ́ tí mís ɔ̂, gū thɔ́k tɔɔ̄p nāá, ɓɛ́ ɛ́ ɓɛɛ tí nól nyɔɔ̄ nāá, ú ú sáwǎ zaŋgo ɔ̂.

²⁹Sá gwát ɛ́, tyaa Yúɗɛn, ɛ nɔ̄l ɗí Yúɗɛn twóó lyém ɔ̂. Thɔ́k ɛ́, tyaa zaŋgo, í yǐl lyêm. Zaŋgo ték í sāwā Sisímb mí Zɛɛ̄mb, ta ɓɛ yīl ɗí tilā tí lɔ́a ê. Tyaa Yúɗɛn ték, ɛ nɔ̄l Zɛ́mb myáŋlā ɛ́ ɔ̂, ta ɓɛ nɔ̄l ɓót myâŋla ɔ̂.