Read Mpumpong 1 Kolɛ̂ŋt 3 Bible Online

1 Kolɛ̂ŋt 3 - Mpumpong bible

1 Kolɛ̂ŋt 3

¹Í ceece nāá, ɓwán ɓɛ̄ ónaāŋg ɓâm, yá a ɓánda nāá mi lüíi nɛ nēn ɗɛ mot lüíí nɛ ɓot o ɗí nɛ Sisímb mí Zɛɛ̄mb ɓâk. Sá gwát, mā da lüii nɛ nēn ɗɛ mót lüíí nɛ ɓot o sī nyúk, ɗɛ mot lüíí nɛ ɓot o ɗí ɗɛ ɓwâthɛɛ̄mb tí ɛɓūklā ɓâk.

²Mā jüe ɓěn mɛɗyūū mɛ̄ ɛ́ɓɛ̂l, ta ɓɛ íɗóó ī ɓɛ́ nāámb nāmb é ɓîk. Nɛ dɔ nāá, ɓyá a wā kwok ɛnâmb. Í su ɛ́chāak, ɓyá a ɓɛ̄ nɛ khul ɛkwok ɓyɛ̂.

³Nɛ dɔ nāá, ɓī jína tí ɛcyǔk ɗakɛ ɓót ō sī nyûk. Tɛ́m jína nɛ mɛzyūŋ nɛ mɛgɔ́ya pāká nyēn é, ɓyā ā lyākɛ̄l náǎŋ nāá, ɓí ɓot o sī nyúk ɛ́, tí ɛkɛ thɔ́k ɗakɛ ɓót ō sī nyúk ɛ́?

⁴Tɛ́m mót ŋgwát tí ndɔŋ wēn lɛ̄ɛ̄ nāá: «Myam mi mot mí Pɔ̂l.» Nɔ̄l nāá: «Myam mi mot mí Apolós é,» ɓyā ā sā náǎŋ ɗɛ ɓót ɓɛ̄ íɓwaās sá ékɛ́?

⁵Apolós nyɛ ɛ́ ku yɔ̂ɔ zɛ̄? Á Pɔ́l nyɛ ɛ zɛ̄? Zi da ɓɛ̄ nje ték osɛ́l ō mí Zɛɛ̄mb ɓɛ̄l ɓā sâ nāá, ɓī ɓûkla ɛ̄ ɓâk. Ákɛl nɛ kɛl tí ndɔŋ wēs dā lwóndɛl náǎŋ wɛ̄ ló-sɛ̄ɛ̄ Ɗá ā jüe ɛ ô.

⁶Myam mā ɓɛ phɛk, Apolós nyɛ ɛ só mɛɗyūū têk, sá gwát í Zɛɛ̄mb ā sâ nāá, ī pás e.

⁷Ɗyaāŋ ték ɛ́, nɛ mot ɓɛ́ phɛk, nɛ mot só mɛ́ɗyūū ték ɔ́, ɓá a ɓɛ̄ yīl sínɔŋ. Í Zɛ̌mb nyɛɛmɛ̄t ɗî. Nyɛ mot sā nāá phɛk ī pâs kɔ̂.

⁸Nɛ mot ɓɛ́ phɛk, nɛ mot só mɛ́ɗyūū ték ɔ́kɛ́ ɓɛ́ ɛ́dalâ. Zɛɛ̄mb á á dā jüe ákɛl nɛ kɛl myɛ̄ myána ī dálā nɛ ɓyɛ̄ ísɛ̄ɛ̄.

⁹Nɛ dɔ nāá, zí sālā ísɛ̄ɛ̄ ī mí Zɛ̌mb ndɔŋ. Ɓyɔ̂ɔ, ɓí pyeēmb mí Zɛɛ̄mb. Ɓí thɔ́k njāā Zɛ́mb ɗí tí ɛsum ɔ̂.

¹⁰Zɛɛ̄mb ɛ́ ɛ jüe mɛ thúmb nāá, mi tɛ̂l mɛkɔ̄k ɓɛ́ wā ɓén ípaāp ī njāā ték é, ɗɛ mót zuūm ɗí tí gú ísɛ̄ɛ̄ ɓyɛ̄ ɔ̂. Ɛ́chāak ɛ́, nɔ̄l mot ɛ tí ɛsum tí mɛkɔ̄k mɛ̄ték. Sá gwát í dá je nāá, ákɛl nɛ kɛl ɛ gû jüák ɗɛ nyɛ́ súm ê.

¹¹Nɛ dɔ nāá mɛkɔ̄k ɓɛ́ ɓēn ípaāp ī njāā ték mák ɛ́, mɛ̄ mú mitɛ̄lā, mɛkɔ̄k mɛ̄ték mɛ́ Yésus Kilîs. Thɔ́k ɛ́, nɔ̄l mót a a ɓɛ̄ nɛ khul ɛ ɓākā tɛ́l mɛ̄l mɛ́kɔ̄k mɛ̄ süîs.

¹²Ɓɛ̄l ɓá á ɓɛla nɛ gôl, nɛ zanj gú thɔ́k iɗim i mɛ́kɔ̄k tí ɛsum tí pyaāt têk. Ɓɛ̄l ɓɛ̄ ɓɛ́lā nɛ ilē, nɛ ikā gú ozɔkakūt.

¹³Sá gwát, isɛ̄ɛ̄ ī mɛ̄ ákɛl nɛ kɛl ɓyá á nyén tí ɛɓyakɔɔ tí mwēs Zɛ́mb wā cyúkɛl mítɔɔ̄p ê. Nɛ dɔ nāá, mwēs ték wá á ɓɛ mwēs ánénén ɗû. Í ɗú ɛ̄ wā lyákɛ̌l ɗɛ isɛ̄ɛ̄ mɛ̄ ákɛl nɛ kɛl ɗí ê.

¹⁴Mot isá ā ɓɛla nɛ ɓyɛ́ tí ɛsǔm njāā kwɔ́ɔ́ ɛkɔ̄k ɛ̄ ték wā ɓɛ ta ɗyúk tí ɗú ɓík ɛ́, á á ɓye myána.

¹⁵Sá gwát, mot ɗú wā ɗís ísá ī ték ɔ́kɛ́, a á ɓye myána. Nyɛ mot ték á á cyuk. Sá gwát, yá á ɓɛ̌ ɗakɛ mót pɔ́m tí mɛɗyúk ê.

¹⁶Ɓyā ā gū nāá, ɓí njāā ánénén mí Zɛɛ̄mb, thɔ́k ɓí oɗia ō Sisímb mí Zɛɛ̄mb ɛ́?

¹⁷Ɗyaāŋ ték ɛ́, mot ɛ́ samb njāā ánénén mí Zɛɛ̄mb nâk, Zɛɛ̄mb á á samb nyízaāŋ. Nɛ dɔ nāá, njāā ánénén mí Zɛɛ̄mb u ɛ́chāāchānj. Thɔ́k í ɓyɔ̂ɔ ɗí njāā ánénén têk.

¹⁸Mot a a kwɔ́ŋ nyɛ́ mot têk: Mot ŋgwát tí ndɔŋ wēn sīmsā nāá, ɛ nɛ pek tí mbɛā ɓót ō sī nyúk ɔ́kɛ́, ɛ ɗî goō. I zyē yá á gū nyén nāá, ɛ nɛ pek.

¹⁹Nɛ dɔ nāá, pek tí mbɛā ɓót ō sī nyúk, í ŋgúma ógoō tí mís mí Zɛɛ̄mb. Tí oceece, Ɓaáchāāchānj ō Mítilā ɓɛ́ lɛ̄ɛ̄ nāá: «Zɛɛ̄mb ɛ́ mɛ̄t mipipēk tí lámb yɔ̄ɔ̄, ɓɔ̂ɔ ɓot otêk.»

²⁰Ɓaáchāāchānj ō Mítilā ɓɛ̄ ɓākā lɛ́ɛ́ thɔ́k nāá: «Ɗá ɛ tí gú ósīmsā ō mipipēk, ɛ tí gú thɔ́k nāá, osīmsā ōték ɓɛ́ títoōk.»

²¹Ɗyaāŋ ték ɛ́, mimyaŋla mi mót myā ā dálā ɛté tí mot ipûnd. Nɛ dɔ nāá sá yɛ̂ɛs í yēn:

²²Nɛ Pɔ́l, nɛ Apolôs, gú Pyɛ̂ɛ, nɛ sī, nɛ cyuk, nɛ ɛsüee, nɛ isá ī ɗí ɛ́chāak ɓîk, nɛ ɓīl ī wā zye ɓík ɛ́, ɓyɛ́ ɓyɛ̂ɛs ɓí ɓyēn.

²³Sá gwát, ɓyɔ̂ɔ ɓí tí ɛsú ɛ̄ Kūmāndē Zɛ́mb ā kɛs ɔ̂, Kūmāndē Zɛ́mb ā kɛs ɔ́kɛ́, ɛ tí ɛsú ɛ̄ mí Zɛɛ̄mb.