Read Mpumpong 1 Kolɛ̂ŋt 8 Bible Online

1 Kolɛ̂ŋt 8 - Mpumpong bible

1 Kolɛ̂ŋt 8

¹Ɛ́chāak ɛ́, nī mú tí ɛkā zī lüii ká tɔ̌p ɓuɓuka tīt[2] ɓɛ́ dō tí ɛsa íɓyǒla ɓī ózɛ̌mb mɛtûnka nɛ yɛ́ ê. Í ceece nāá, ɓináká ɓyɛ̂ɛs ní ka nɛ ŋgūā tí tɔɔ̄p ték, ɗakɛ ɓí ɓā ɗi tí ɛlɛ́ɛ́ ê. Sá gwát ŋgūā ték ū tí ɛjüe mót ɛɓén ɛ̄ nól, ɓyela nāá, kpɛl ɗí tí ɛsá nāá, gós-óɓúkɛl ī gwée tí ɛɓūklā.

²Mot sīmsā nāá ɛ tí gú sínɔŋ ɔ́kɛ́, a a ɓá lī gú ɗakɛ mót dálā nɛ ɛgú ê.

³Sá gwát mot kpɛ́l Zɛ́mb ɔ́kɛ́, Zɛɛ̄mb ɛ́ ɛ́ lwāā gú ɛ̂.

⁴Ɗyaāŋ ték nâk, i nɛ zyeē nāá mot ɛɗɛ̂ ɓuɓuka ótīt ɓɛ́ sâ íɓyǒla ɓī ózɛ̌mb mɛtûnka nɛ yɛ́ ékɛ́? Nī tí gúká nāá, iɓyǒla ɓī ózɛɛ̄mb ɓá a ɓɛ̄ yīl sínɔŋ tí iɓwaās ɓík, nī tí gúká thɔ́k nāá, i da ɓɛ̄ Zɛ́mb ŋgwát.

⁵Í ceece nāá, twóó jwóó nɛ iɓwaās ɛ́, í nɛ thūnd ísínɔŋ ɓót ō ɗí tí ɛnwɔ̌ŋ ɗɛ ózɛɛ̄mb, thɔ́k ɛ́, í nɛ thūnd íɓyǒla ɓī ózɛɛ̄mb ɛ́, nɛ iɓyǒla ɓī ódə̂ə,

⁶sá gwát tí ɛsú kálīnā, i da ɓɛ̄ nje Zɛɛ̄mb ŋgwát, nyɛ mot ɗí Sāŋg, nɔ̄l ā kus isínɔŋ ɓyɛ̂ɛs ɔ́, ní cyúkká thɔ́k tí ɛsú lɛ̄ ɔ̂. I da ɓɛ̄ thɔ́k Ɗá ŋgwát, Yésus Kilís, Zɛ́mb ā kus isínɔŋ nɛ nɛ̄ ɔ́, ní cyúkká thɔ́k tí kɔŋ wɛ̄ ɔ̂.

⁷Sá gwát yá a ɓɛ̄ mót nyɛ̂ɛs gū óceece otêk. Ɓɛ̄l ɓā ɓɛ ɓɛ́ ɛ́ ɓū jíka nɛ iɓyǒla ɓī ózɛɛ̄mb tí tɛ̄lā ɗí nāá, tɛ́m ɓɛ́ ɗɛ̄ íɓuɓuka ɓī ótīt ō mɛ́tûnka mɛ̄ ózɛɛ̄mb oték ékɛ́, ɓɛ́ ɗɛ̄ nɛ osīmsā nāá, ɓá a sā íɓyǒla ɓī ózɛ̌mb mɛtûnka nɛ otīt ōtêk. Tí tɛ́m ték ɛ́, mwáályém wɔ̄ɔ̄ a a ɓɛ̄ nɛ khul, ɓɛ́ ɓɛɛ nāá, tīt ték ɛ́ ɛ́ lɔs ɓɛ̂.

⁸Ɓyela yɔ̂ɔ nāá, yá a ɓɛ̄ íɗóó wā sá nāá, nī kúnɔɔka nɛ Zɛɛ̄mb. Í su nī ɗí ta ɗɛkâ, ná ǎ ɗímbɛlká sínɔŋ. Í su nī ɗɛ̄kâ, ná ǎ ɓyeká sínɔŋ.

⁹Ɓī gú ɓakɛl. Sá gwát, ɗɛ ɓí ɗí nɛ zye nāá ɓī sâ sá ɓí kpɛ́l ékɛ́, yā ā je nāá, ɓí kâ sá yīl ɗí nāá, yá á ɗum ɓɛ̄l ō ɗí tí tyak tí ɛɓūklā ɓâk.

¹⁰Nɛ dɔ nāá, mot ɗí tí tyak ti ɛɓūklā ɔ́, ɛ́ ɓɛɛ wɔ́ mot ɗí nɛ ŋgūā, twóó njāā íɓyǒla ɓī ózɛɛ̄mb tí ɛɗɛ íɓuɓuka ɓī ótīt ō ɓɛ́ sā mɛ́tûnka nɛ ɓɛ́ ɓák nâk, ú ɓɛɛ nāá, mwáályém wɛ̄ a á júŋgɛl ɛ́ nāá, ɛ ɗɛ̂ thɔ́k ɛ́?

¹¹Í ɗyaāŋ mwânɔɔ̄ŋg jína tí tyak tí ɛɓūklā, nɔ̄l Kūmāndē Zɛ́mb ā kɛs ɔ́, ā jüe tí ɛsú lɛ̄ ɔ́kɛ́, wā ɗímb tí tɔ̌p ŋgūā wɔ́ ê.

¹²Tí ɛsɛ́m ɗyáŋ zinjá ɓwán ɓɛ̄ ónaāŋg ɓēn, nɛ ɛɓáwɛl mwáályém wɔ̄ɔ̄ ɗí tí tyak ɔ́kɛ́, ɓí sɛ̄m náǎŋ nɛ Kūmāndē Zɛ́mb ā kɛs ɔ́kɛ́ nyɛ mot têk.

¹³Í ɓɛ̄ nāá, ɗóó mí ɗí tí ɛɗɛ é, í nɛ khul ɛsá nāá, mwânǎŋg waām ɛ ɗúma nâk, ma á kā ɓākā ɗɛ tel tīt. Kám nāá, mwânǎŋg waām a a ɓwɔ̂ɔ ɗuma tí sɛ̄m.