Read Mpumpong 2 Kolɛ̂ŋt 7 Bible Online

2 Kolɛ̂ŋt 7 - Mpumpong bible

2 Kolɛ̂ŋt 7

¹Osɔ̄ ō kpɛɛ̄l ɓâm, ɗɛ ɗí nāá íkɛs iték ɓí tí ɛsú ɛ̄ kálīnā ékɛ́, nī chánjɛl ka mɛnól kámīnā tí sá yɛ̂ɛs lɔ́sɛ̄l ípúnd nɛ sisímb ê. Kǒ-kɛnd káwūnā wɛ̂ɛs ū ɓɛ̂ ɛ́chāānchānj twóó okɛ̄nd ō mí Zɛɛ̄mb.

²Ɗiiká ɓěs milyém myēn! Zá a sā mót līl ɛ́ɓyôo, zá a sá nāá, mot ɛɗímbɛl ɛɓūklā. Zá a nwɔ́ŋ sá mót tí mikɔ̂ŋ.

³Mā ā lüíí ɗyáŋ tí ɛsú lɛ̄ ɛ́jüe ɓén mɛɓɛɛ̄. Nɛ dɔ nāá, mí i nyēē lɛ́ɛ́ ɓén nāá: Zī tí ɓū kpɛl ɓén, gú ɓī cyûk, gú ɓī jüe, zá ǎ kát ɛ́kpɛl ɓén.

⁴Mi nɛ ánénén mɛjendɛɛ̄l nɛ nēn. Lyém wám ú lwōndlā nɛ mimyaŋla tí mɛsú mēn. Zī tí ɛɓū ɓɛɛ mítūŋ, sá gwát mā ā ɓūlɛ̄l nól phûs, mi thɔ́k nɛ mimyaŋla ɛ́ɓuuɓu.

⁵Twóó oceece, tɛ́m zā kum ɓɛ̌ Maseɗwán ékɛ́, zá a ɓɛ̄ nɛ ɛgbalā. Zí i gûp mimbi mí mítūŋ myɛ̂ɛs: Nɛ mɛgɔ́ya ɓɛ̌ koōl ɛ́, nɛ lyém ɓā nɛ ɓā.

⁶Sá gwát, Zɛ̌mb nyɛ mot lélɛ̄l ɓót ō ɗí ɓɛ́ ɛ́ tyak ɓák ɛ́, ɛ́ ɛ lelɛl ɓěs nɛ ɛkúl ɛ̄ mí Tît.

⁷Yá a da ɓɛ nje ték ɛkúl ɛ̄ mí Tít lā lelɛl ɓeēs. Í thɔ́k ndɔ nɛ lellā ɓyɔ̂ɔ ɓyā lelɛl ɛ ê. Ā lɛ́ɛ ɓeēs nāá, ɓi ɓɛ̄ nɛ khós ɛɓɛɛ mɛ́ ɛ́ɓuuɓu. Ɛ syɛ́ɛ́ ɓés phimb nyēn zinjá nyaām, nɛ ɗɛ ɓyā ɓɛ ɛ́thīnd tí ɛkambɛl mɛ́ ê. Í náǎŋ mímyaŋla myám myā ka ɓu thaŋ ê.

⁸Tí oceece, ī ɓɛ̄ nāá, mɛkanā mā til ɓeēn mák, mɛ́ ɛ gbâ ɓeēn tí phimb nák ɛ́, yā ā ndɛ̄kɛ̄l mɛ̂. Sá gwát, í i ndɛ́kɛl mɛ tɛ́m mā gwôk nāá, mɛkanā mɛ̄ték mɛ́ ɛ jüe ɓěn phimb tí ɓīɓyɔ̄k tɛ́m yɛ́ nɛ yɛ́ ê.

⁹Ɛ́chāak ɛ́, mi nɛ mimyaŋla, ta ɓɛ tí tɔɔ̄p nāá, mɛkanā mɛ̄ték mɛ́ ɛ jüe ɓěn phimb. Sá gwát, tɔɔ̄p nāá phimb nyēn nyí í sá nāá, ɓi cyênj icyuk ɓyēn. Phimb ték ɛ́, nyí ɗakɛ Zɛ́mb kpɛ́l ê. Ɗyaāŋ ték ɛ́, zá a sâ ɓěn līl ɛ́ɓyôo.

¹⁰Nɛ dɔ nāá, tɛ́m mót phímb ɗɛ Zɛ́mb kpɛ́l ékɛ́, phimb ték nyí tí ɛcyénj cyuk yɛ̄. Náǎŋ ɛ́, Zɛɛ̄mb á á cis ɛ́ tí sɛ̄m wɛ̄, mot ték ta kā ɓākā lɛ́ɛ́ nāá, mi gú nâk. Sá gwát, tɛ́m mót phímb ɗakɛ ɓót ō sī ékɛ́, phimb ték nyí kɛnd ɛ́ ɓɛ ɛ́süee.

¹¹Ɓɛɛká mɛsūklā mɛ̄ phímb nyēn ɗí ɗɛ Zɛ́mb kpɛ́l ê: jüākká ɛ́chāak ɗɛ ɓí mú tí ɛkā kpâsla tɛ́m kūl nāá ɓī sá sínɔŋ ê! jüākká ɗɛ ɓī mú tí ɛkā lyákɛl nāá, ɓyá a kpɛl sá ték ê! jüākká ɗɛ ɓí mú nɛ mɛɓūk tí sá ték ê! jüākká ɗɛ ɓí mú tí ɛgwók ɓwɔ̄ŋ ɛ́ɗi ta sá tí nwɔŋ ê! jüākká ɗɛ ɓí mú nɛ thūnd khós ɛɓākā ɓɛɛ mɛ́ ê! jüākká ɗɛ ɗí ɓí í gbá mɛ́nól mēn tí ɛkɛm mɛ́ ê! jüākká ɗɛ ɓí mú nɛ kpɛlā ɛ́pɔ́nɛs mót sā ɛ́ɓyóó ɔ̂! Ɓí í lyákɛl mímbi myɛ̂ɛs nāá, ɓyá a gū tɔɔ̄p ô.

¹²Í ɓɛ̄ phɛ̄ nāá, mí i til ɓén nák ɛ́, ma a tíl ɓén tí ɛsú ɛ̄ mót sā ɛ́ɓyóó ɔ̂, gú thɔ́k tí ɛsú ɛ̄ mót ɓɛ́ sā ɛ́ ɛɓyóó ɔ̂. Sá gwát, i ɓɛ̄ tí ɛsú ɛ̄ nāá, ɓyá á ɓɛɛ ɛ́nwɔŋnwɔŋ sɔ̂kphɔɔ̄mb mí Zɛ̌mb ɗɛ ɓí ɗí ta mɛ́t ɛ́ɓɔ̄ŋ tɛ́m ɓí gwōktā nāá, tɔɔ̄p ú ɗǔm nɛ nēs ê.

¹³Í yɛ́ ɗí nāá, sá ɓyā sâ é, yā ɓɛ í í jüe ɓés khul ê. Yá a da jüe ɓěs khul nyɛ́ nɛ nyɛ̂, sá gwát mimyaŋla myā ɓɛ mí í ɓākā lwónd ɓés tí milyém tí ɛɓɛɛ́ ɗakɛ Tít ā ɓɛ tí mimyaŋla tí sá ɓén ɓyɛ̂ɛs ɓyā sâ nāá, lyém wɛ̄ ū ɗî ɛ́sɔ̄ŋ ê.

¹⁴Nɛ dɔ nāá, ī ɓɛ̄ nāá, mí i lɛ́ɛ nól nɛ Tít tí mɛsu mēn nák ɛ́, í tɔɔ̄p nāá, ɓyá a jüe mɛ sɔ̂n. Sá gwát, ɗɛ zí līlɛ̄ɛ̄ ɓén oceece itɛ́m ɓyɛ̂ɛs ékɛ́, í thɔ́k ɗyǎŋ jwok gwát tyâa mɛpɔ́ mēn zā lilɛ́ɛ Tít mák ɛ́, mā nyên nāá, mɛ́ oceece ê.

¹⁵Ɗyaāŋ ték ɛ́, kpɛɛ̄l Tít ɗí nɛ yɛ́ zinjá nyēn ékɛ́, í í ka ɓākā thaŋ, tɛ́m ɛ́ sīmsā ɗɛ ɓén ɓyɛ̂ɛs ɓyā gwók ɛ́, nɛ ɗakɛ ɓyā ɗúɛl ɛ nɛ ɛpwók ɛ̄ nól, nɛ ɓwɔ̄ŋ ê.

¹⁶Ɓɛ wám pák ɛ́, mi nɛ mimyaŋla tí ɛɓɛɛ nāá, mi nɛ khul ɛjendɛl ɓén tí isínɔŋ ɓyɛ̂ɛs.