Read Mpumpong Galât 3 Bible Online

Galât 3 - Mpumpong bible

Galât 3

¹Ɓyɔ̂ɔ Ogalât, í o ké ɓí í téaa mílyêm. Í zɛ̄ thūndɛ̄l ɓén ɗék ɔ̂? Ɓyela nāá ɓɛ́ ɛ ku lɛ́ɛ ɓěn ɛ́nwɔŋnwɔŋ ɗakɛ Yésus Kilís ā jüe tí kolos é, ɗɛ mót ké ɓyā ɓɛ yes.

²Má á dā jī ɓén mīā ŋgwát. Ɓi ɓyeē Áchāāchǎnj Sisímb tɔɔ̄p nāá ɓī tí ɛɗúɛl lɔ́a, gú tí tɔɔ̄p ɛ́ɓûkla Tyâa Pɔ̂?

³Ɓí kā sá ɗék ɗɛ ɓót o tēyāā mílyém é tí yɛ̄? Í yɛ̄ sā nāá, sá ɓyā nyɛl nɛ Áchāānchǎnj Sisímb é, ɓī kâ kɛ̄ sáŋ ɛ́síl yɛ́ nɛ mɛkhul mēn ɓyɔ̂ɔ ɓot oték ê?

⁴Ɓyā ɓɛ ɓí i ɓoma nɛ thūnd mítūŋ, ɓí kam ɛ́lɛ́ɛ́ nāá mitūŋ mīték myá á jüe thuk ɛ́? Māā ɓɛ́ɛ́ nāá mitūŋ mīték myá á jüě thuk.

⁵Zɛɛ̄mb ɛ́ ɛ́ jüe ɓén Áchāāchǎnj Sisímb ɛ sā thɔ́k mɛsimbā pāká nyēn. Ye nāá ɛ jüē ɓén Áchāāchǎnj Sisímb nɛ ɛsá thɔ́k mɛsimbā tɔɔ̄p nāá, ɓī tí ɛɗúɛl lɔ́a? Yāā, ɛ sā yɛ́ tí tɔɔ̄p nāá, ɓí í gwók Tyâa Pɔ́, ɓī ɓûkla.

⁶Í ɗyaāŋ ték Mɛ́kanā mɛ̄ Zɛ́mb ɗí tí ɛlɛ́ɛ́ zinjá mí Áɓilam nāá: «Áɓilam ā ɓɛ ɛ́ ɛ́ ɓûkla Zɛ́mb, yɛ́ yā sâ nāá, Zɛ̌mb ɛ lɛ́ɛ nāá, Áɓilam ɛ zwēs sɔ̂kphɔ̌mb nyɛ̄ ê.»

⁷Gūká nāá, í ɓɛ̄l ō ɓūklā Zɛ́mb ɓák ɛ́, ɗí tyaa ɓwán ō mí Áɓilam.

⁸Yā ɓɛ í i tilaa tí Mɛkanā mɛ̄ Zɛ́mb nāá, ɓīl íkúl ī ɗí ta ɓɛ Óyúɗɛn ɓík ɛ́, ɓyá á ɓûkla Zɛ́mb, Zɛ̌mb ɛ lɛ̄ɛ̄ nāá, ɓɛ́ mizwēs sɔ̂kphɔ̌mb nyɛ̄. Í yɛ́ Zɛ́mb ā lɛ́ɛ Áɓilam Tyaa Pɔ̂ nyík nāá: «Má á lɛ́mɛl íkúl ɓyɛ̂ɛsa tí kɔŋ wɔ́ ê.»

⁹Áɓilam ā ɓɛ ɛ́ ɛ ɓûkla Zɛɛ̄mb, Zɛ̌mb ɛ lɛ̄mɛ̄l ɛ̂. Jwok gwát ɓɛ̄l ō wā ɓûkla thɔ́k Zɛɛ̄mb ɓák ɛ́, Zɛɛ̄mb á á lɛ́mɛl ɓɛ́ ɗakɛ nyɛ́ Áɓilam ā ɓɛ ê.

¹⁰Nā ā jōk ká nāá ɓot o ɗí tí ɛsîmsa nāá, ɓá á ɗi míswēs tɔɔ̄p ɛ́ɗúɛl lɔ́a ɓák ɛ́, ɓɛ́ tí mikēlōk. Nɛ dɔ nāá, í tilā nāá: Mot ɗí ta ɗúɛ̌l lɔ́a yɛ̂ɛs ɗí tilā tí Mɛkanā mɛ̄ Zɛ́mb tɛ́m yɛ̂ɛs ɔ́kɛ́, nyízaāŋ ték á á ɓɛ̌ kālā.

¹¹Nī tí ɛgū gwók ká ɛ́nwɔŋnwɔŋ nāá, mot ŋgwát nɛ ŋgwát a á ɗǐ zwēs tí mís mí Zɛ̌mb tɔɔ̄p ɛ́ɗúɛl lɔ́a. Nɛ dɔ nāá, í tilā nāá: «Nɔ̄l Zɛ́mb lɛ̄ɛ̄ ɛ́ nāá, ɛ zwēs tɔɔ̄p nāá, ɛ́ ɛ́ ɓûkla ɛ́ ɔ́kɛ́, nyízaāŋ ték, á á cyuk.»

¹²Ɓyela nāá, ɛɗúɛl lɔ́a tí nāá wá á cyuk ɛ́, yá a ɓɛ̄ ɗakɛ ɛɓûkla Zɛ́mb tí nāá wá á cyuk. Í yɛ́ ɗí tilā nāá: «Í mot ɗí tí ɛɗúɛl lɔ́a yɛ̂ɛsa ɔ́kɛ́, wā cyuk ték ê.»

¹³Í Kilís ā kálaa tí ɛsú lɛ̄ ɛ́tii káɓiná tí pyaāt yā ɓɛ nāá, nyɔ̂ɔ nī kálaa ka tí tɔɔ̄p nā ɓɛ ta ɗúɛl ká lɔ́a yɛ̂ɛsa ê. Nɛ dɔ nāá, Mitilā mí lɛ̄ɛ̄ nāá: «Mot ɗí ɛ́ ɛ́ ɓomlaa tí lē ɔ́kɛ́, nyízaāŋ ték ɛ́ ɛ́ kálaa.»

¹⁴Sá ték yā sɛ́ɛ ɗyaāŋ tí tɔɔ̄p nāá, tí kɔŋ mí Yésus ɛ́, ilɛ̄m ī Zɛ́mb ā kɛs Áɓilam ɓík ɓī kûm ɓɛ ɓīl íkúl, nī ɓyé ká thɔ́k Áchāāchǎnj Sisímb Zɛ́mb ā kɛs ɔ́ tí ɛɓūklā.

¹⁵Ɓwán ɓɛ̄ ónaāŋg ɓâm, nī ɓâ nwɔŋ ká ɓwoŋa nɛ misāwā mī ísínɔŋ nyɔ̂ɔ ká ɓot. Tɛ́m mót ɗí ɛ́ ɛ́ til mɛ́kanā mɛ̄ ílyúk mɛ̄ ɗakɛ í dála ékɛ́, Yá a ɓɛ̄ nɛ mot ɗí nɛ khul ɛgbanj yɛ́ gú ɛkɛl yīl sínɔŋ têk.

¹⁶Í thɔ́k jwok gwát nɛ gwát, ɗɛ íkɛs i Zɛ́mb ā sâ Áɓilam nɛ mwán wɛ̄ ê. A a lɛ́ɛ chīlā yɛ̄ ɗɛ mót ké yā jüâk thūnd mímyaā mi ɓót, í dā jüák mót ŋgwát, mot ték í Kilîs.

¹⁷Mí kam ɛ́lɛ́ɛ́ nāá, Zɛɛ̄mb ā nyɛl nɛ ɛsá mɛ́kanā mɛ̄ ílyúk ɗakɛ í dála ê. Ɛ ɓúkā zī jüě Moís lɔ́a ɓɛ nāá, í í thaŋ mímbú mithyet miná nɛ mimbú mɛkām mɛ̄lɛ̂l. Lɔ́a ték ī gbánj mɛ́kanā mɛ̄ ílyúk nâk, phú ikɛs i mí Zɛɛ̄mb ɓyá a ɓɛ̄ nɛ nɔm.

¹⁸Mǒt līs nɛ ilyúk ī mí Zɛ̌mb tɔɔ̄p nāá, ɛ tí ɛɗúɛl lɔ́a nâk, yá a ká ɓɛ tel ikɛs i mí Zɛɛ̄mb. Ɓyela nāá, í zinjá ikɛs Zɛ́mb ā lyákɛl Áɓilam ɛnwɔŋ ɛ lyém lɛ̄ ê.

¹⁹Ɗyaāŋ ték nâk, á ɓā tɛ̂l lɔ́a yɔ̂ɔ tɔɔ̄p yɛ̄? Zɛɛ̄mb ā ka kɛl lɔ́a tí ikɛs tɔɔ̄p nāá, mot á á gú mísɛ̄m myɛ̄, ī kɛ́ kum tɛ́m mwán ā ɓyɛ̂l tí chīlā mí Áɓilam ā ɓɛ nɔ̄l ikɛs ɔ́ wā kúl ê. Zɛɛ̄mb ā thes lɔ́a ték nɛ ɓeéngeles nāá ɓɛ̄ zí i jüe ŋgúma mót tí nāá, mot ték á á doŋga ɓót ō sī nyúk yá.

²⁰Sá gwát ndoŋgla ɛ́ tyāā pāká ɓot oɓá, sá gwát tɛ́m Zɛ́mb ā sá Áɓilam ikɛs iték ékɛ́, Zɛɛ̄mb ā ɓɛ nyɛɛmɛ̄t.

²¹Í tian nāá lɔ́a í nɛ zyāālā nɛ ikɛs i mí Zɛɛ̄mb ɛ́? Yāā! Nɛ dɔ nāá, nī ɓɛ̄ ká nɛ lɔ́a jüē ɓót cyuk é nâk, phú Zɛɛ̄mb ɛ́ jōō káɓiná nāá, mizwēs tí tɔ̂p ɛ́ɗúɛl lɔ́a.

²²Sá gwát Mɛkanā mɛ̄ Zɛ́mb mɛ́ lɛ̄ɛ̄ nāá, sī nyɛ̂ɛs nyí tí də́ə́ sɛ̄m. Tí nāá, sá Zɛ́mb ā kɛs ɓot ékɛ́, ɓɛ ɓyê yɛ́ tɔɔ̄p ɛ́ɓūklā lɔ̄ɔ̄ zinjá mí Yésus Kilîs.

²³Ɛsɔ́k nāá, tɛ́m ɛɓûklǎ Kūmāndē Zɛ́mb ā kɛs ɔ́ ī kûl kɛ́, nā ɓɛ ka tí mimbok mī lɔ́a. Tí ɛɓwónd nāá, Zɛ̌mb ɛ lyákɛl ɓot zyě ɛɓūklā.

²⁴Í ɗyaāŋ lɔ́a yā ɓɛ mbakɛl káwūnā, tí ɛɓwónd ɛ́kúl ɛ̄ mí Kūmāndē Zɛ́mb ā kɛs ɔ́, tí nāá Zɛɛ̄mb á á jóó káɓiná mizwēs tí ɛɓūklā.

²⁵Ɛ́chāak ɗɛ ɗí tɛ́m ɛ́ɓūklā í í kúl ékɛ́, ná a ká ɓɛ ká tí də́ə́ mbákɛl ték.

²⁶Nɛ dɔ nāá ɓěn ɓyɛ̂ɛs ɓí ɓwán ō mí Zɛ̌mb zinjá ɛɓūklā ɛ́ lat ɓén nɛ Yésus Kilís ê.

²⁷Ɓěn ɓyɛ̂ɛs o ɗí ɓí í ɗua tí ɗín ɛ̄ mí Kūmāndē Zɛ́mb ā kɛs ɔ́ ɓák ɛ́, ɓi mú ɗakɛ nyɛ̂.

²⁸Yá a ká ɓɛ nɛ mbɔ̄k pāká Yúɗɛn ɛ́, nɛ Gɛlɛ̂k, pāká kwōm ɛ́, nɛ mot ɗí ta ɓɛ̌ kwōm ɔ̂, pāká mumá, nɛ motôm, nɛ dɔ nāá ɓěn ɓyɛ̂ɛs ɓí ɛ́dalá tí lɛt ɓyá nɛ ɓɔɔ Kūmāndē Zɛ́mb ā kɛs ɔ̂.

²⁹Í ɓɛ̄ nāá ɓí ɓot o mí Kūmāndē Zɛ́mb ā kɛs ɔ́ nák, ɓí phɛ̄ chīlā mí Áɓilam, ɓot o līs nɛ ilyúk ɗakɛ Zɛ́mb ā kɛs é ɓâk.