Read Mpumpong Efezyɛ̂ŋ 6 Bible Online

Efezyɛ̂ŋ 6 - Mpumpong bible

Efezyɛ̂ŋ 6

¹Ɓwân, ló-sɛ̄ɛ̄ wēn sɔ̂kphɔɔ̄mb mí Ɗâ ú nāá, ɓī ɗúɛl osāŋg ɓēn nɛ onaāŋg ɓēn. Nɛ dɔ nāá, tí ɛsá, ɗyáŋ ī tí nwɔŋ.

²Tí ndɔŋ mɛ́tyuūŋ ɛ́, līl lí lɛ̄ɛ̄ nāá: «Ɗūɛ̄l sɔ̌ŋg nɛ nɔɔ̄ŋg.» Í ɛtyuūŋ lɛ̄ ɛ́sɔ́k ɛ̄ ɗí nɛ ikɛs lîk.

³Ikɛs ī ték ɓí lɛ̄ɛ̄ nāá: «Ú wā sá ɗyáŋ nâk, wá á ɓye ílɛ̄m, u ɗɛ̄ mɛ́gwɛ̄ɛ̄ mɛ̌ gund.»

⁴Ɓyɔ̂ɔ osāŋg nɛ onaāŋg, ɓyá a sá nāá, ɓwán ɓēn ɓɛ̄ tɛ̂l miló tí tɔɔ̄p íɓyǒla ɓɛ̄ ísīsɛ̄ɛ̄ ɓyēn. Sá gwát, ɓɔská ɓɛ́ ɗɛ Ɗá kám é nɛ tyaa mɛlyóó mɛ̄ ɗüíí ɓɛ ɗá mí zɛɛ̄mb é.

⁵Ɓyɔ̂ɔ mikwōm, ɗūɛ̄lká omása ɓēn tí iɓwaās ɓík, ɓī sɛ̄mɛ̄ ɓɛ̄, ɓī ɗí nɛ okɛ̄nd zinjá nyɔ̄ɔ̄. Ɓī sālā ɓɛ́ nɛ tyaa milyém ɗɛ mót sālā Kūmāndē Zɛ́mb ā kɛs ɔ́ kê.

⁶Ɓyā ā dálā ɛ́dā sá ɗyáŋ tɛ́m ɓɛ́ ɗí tí ɛnón ɓén é tí nāá, yá á nyēn tí mís mɔ̄ɔ̄ nāá, ɓī tí ɛsá ɛ́nwɔŋnwɔŋ. Sá gwát, lwōndɛ̄lká njeā mí Zɛ̌mb nɛ milyém myēn myɛ̂ɛs ɗɛ míkwōm mí Kūmāndē Zɛ́mb ā kɛs ɔ̂.

⁷Sālāká omása ɓēn nɛ tyaa milyém ɗɛ mot ké ɓí sālā Ɗá, ta ɓɛ̄ môt.

⁸Ɓyā ā jōk nāá, mot á á dā ɓye myána sɔ̂kphɔɔ̄mb mí Ɗá, dala nɛ ɛnwɔŋ ɛ́ ɓɛ̄ ɛ́ ɛ́ sá lík, gú ɛ kwōm, gú a a ɓɛ̄ kwōm.

⁹Omása, ɓyɔ̂ɔ thɔ́k ɗiká nɛ tyaa miŋgul zinjá mikwōm myēn, ɓī kāt ɛ́zɛm ɓɛ̂. Ɓyá a jesa nāá ɓyá nɛ nɔ̄ɔ̄ ɓi da ɓɛ̄ Ndə́ə́ gwát ɗí ɓɛ̌ jwóó ɔ̂, nyɛ ā ā gbā mímbɔ̄k pāká ɓot.

¹⁰Tí ɛkɛ̄ gɔl ɛ́, lelɛlká mɛnól mēn ɓyɔ̂ɔ ɓot oték twóó khul mí Ɗá ɗí kwóó mɛkhul myɛ̂ɛs ê.

¹¹Ɓwātká isá ī ɗɔ́mb ɓyɛ̂ɛs Zɛ́mb jüē ɓén ɓík, tí nāá ɓyá á pet mɛ́koō sī sɔ̂kphɔ̌mb mɛpek mí Sátan

¹²Ɗɔmb ɛ ní lūmlā ká lík ɛ́, lá a ɓɛ̄ nɛ ɓot ɓɛ̄ ípûnd, sá gwát ní lūmlā ká nɛ mɛkhul mɛ̄ íɓyǒla ɓɛ̄ ísisímb ī ɗí pāká jwóó nɛ iɓwaās ɓîk. Nī lūmlā ká nɛ odə̂ə, nī lūmlā ká nɛ idə̂ə, zī kā nwɔŋ mɛ́khul mɛ ɗí tí də́ə́ sī kwɔmwaāl nyík ê.

¹³Í yɛ́ ɗí nāá, ɓí ɗala ɛ́nwɔŋ ísá ī ɗɔ́mb ī mí Zɛɛ̄mb ɓyɛ̂ɛs ê. I zyē tɛ́m mwēs mɛ́lyel wā kúl ékɛ́, ɓī gú pet mɛ́koō sī. Phúla ɓí wā ɓɛ ɓí í lûmla ī kɛ́ kum mɛ́sīl ékɛ́, ɓyá á ɓakɛ̌l tɛ̄lā wēn.

¹⁴Ɗiká phɛ̄ mikwomsā, oceece ɓɛ̄ ɗí ɓěn kandā ɓí dálā ɛ́lyembɛl tí mikuū myēn ê. Kɛ̄kāná ɛ́dalá tí nāá kǒ-kɛnd wēn ték wá á ɗi ɓén ɗɛ̌ laāmb ɗɔ̂mb.

¹⁵Khul ɛkɛ̄ lɛ́ɛ́ Tyâa Pɔ́ ɛpyaala, ī ɗî ɓěn ɗɛ̌ sapát ɓí dálā ɛ́ɓwát ê.

¹⁶Ɗiká itɛ́m ɓyɛ̂ɛs nɛ ɛɓūklā ɗakɛ khûu ɗɔmb wēn tí ɛsú lɛ̄ ɛ́ɗím míndol mi ɗí tí mɛkwɔɔ̄ŋ mí Sátan mîk.

¹⁷Kamká ɛɓyě cyuk ɗɛ mót ɓwāt ɛkoo ɛ ɗɔ̂mb. Ɓī ɓyé Ɛkɛ́l ɛ̄ mí Zɛɛ̄mb ɗí ɗakɛ paasɔŋ Áchāāchǎnj Sisímb ā jüe ɓeēn ê.

¹⁸Ɗaklaká itɛ́m ɓyɛ̂ɛs. Jīká Zɛ̌mb isínɔŋ nɛ mindakla tí khul Áchāāchǎnj Sisîmb. Ɗīká nɛ ɗyênd, ɓī dáklā tí ɛsú ɛ̄ ɓwán ō mí Zɛɛ̄mb ɓyɛ̂ɛs ta tyak.

¹⁹Daklaká thɔ́k tí ɛ́sú lâm, ī zyeē tɛ́m mí wā lwii ékɛ́, Zɛɛ̄mb ɛ jüé mɛ mɛkɛ́l mɛ̄ ɗí ɛ́dalá mâk. Mi lɛ̄ɛ̄ Tyâa Pɔ́ nyā ɓɛ sɔlā nyík ta gwók ɓwɔ̄ŋ.

²⁰Myam ɗí mot ɓɛ́ kɛnd nāá, ɛ kɛ́ɛ lɛ́ɛ́ Tyâa Pɔ́ ték, í su ɗɛ mí ɗí twóó njāā mbok ê. Daklaká phɛ̄ tí nāá, mi lɛ́ɛ Pɔ́ ɗakɛ mí dálā nɛ ɛlɛ́ɛ́ é ta gwók ɓwɔ̄ŋ.

²¹Mwânaāŋg káwūnā Tisík ɗí mot ndɔŋ káwūnā ɗí ɛ́dalá tí isɛ̄ɛ̄ ī mí Ɗá ɔ́kɛ́, á á lɛ́ɛ́ ɓén tɛ̄lā wám kák, nɛ ísá ī mí ɗí tí ɛsá ɓîk.

²²Mi thes ɓén nyaā tí nāá, á á zī lɛ́ɛ́ ɓén ɗakɛ zí ɗí kák é, nɛ tí nāá, á á lelɛl ɓén thɔ̂k.

²³Í je nāá, Zɛ̌mb Sāŋg káwūnā nɛ Ɗá Yésus Kilís ɓɛ̄ jüê oɓúkɛl ɓyɛ̂ɛs ɛpyaala, nɛ kpɛ̌l ti nɛ ɛɓūklā.

²⁴Í je nāá, Zɛ̌mb ɛ lɛ́mɛl mót nyɛ̂ɛs ɗí tí kpɛl Ɗá káwūnā Yésus Kilís nɛ kpɛɛ̄l ɗí ta sí ê.