Read Mpumpong 1 Tímotê 1 Bible Online

1 Tímotê 1 - Mpumpong bible

1 Tímotê 1

¹Í myam Pɔ́l ɗí tí ɛtil mɛ́kanā mâk, mi lwōmtwōm mí Yésus Kilís tí cyūklā mí Zɛ̌mb Cis-ɓot káwūnā, nɛ Yésus Kilís mɛjendɛɛ̄l kámīnā.

²Mí til ɔ́, wɔ Timoté tyaa mwán aām tí ɛɓūklā. Í je nāá, Zɛ̌mb Sāŋg nɛ Yésus Kilís Ɗá káwūnā ɓɛ̄ lɛ́mɛl ɔ, ɓɛ̄ dōs ɔ́ khɔɔ̄ŋ, ɓɛ̄ jüē ɔ́ ɛpyaala!

³Ɗǐ ɓɛ̌ khandǎ Efɛ́ɛz ɗakɛ mā lɛ́ɛ ɔ tɛ́m mā ɓɛ tí ɛtɔ́ ɓɛ̌ cǐl ɓwǎs Maseɗwán ê. Í nɛ ɓot pyǎŋ tí ɛlyákɛl íɓyǒla imílyāklā, lɛ̄ɛ̄ ɓɛ́ nāá, ɓɛ̄ kát ê.

⁴Lɛ̄ɛ̄ ɓɛ́ nāá, ɓɛ̄ kát ɛkus mílɔ̂ŋ, nɛ tɔ̌p ɛ́ɗú thūnd íthānd ɓī ósǎŋg-phǎmb ɓɔ̄ɔ̄. Tí ɛgū ɓɛɛ ɛ́, ɓīnɛ́ɛ̌ŋ ísínɔŋ ɓí dā jóó íɓuluk, ɓyā ā kɛ́m nāá, jwok mí Zɛɛ̄mb ī lwónd ê. Jwok ték í lwōnd tí ɛɓūklā.

⁵Nɔm mɛ́chēsɛ́l mɛ̄ték í nāá, kpɛl ɓwán ɓɛ̄ ónaāŋg ī ɓwɔ́k ê. Kpɛ̂l ték ī tē tí lyém ɗí tí fúp ɔ́, nɛ tí tyaa mwáályém, nɛ tí ɛɓūklā ɛ̄ ɗí ta ɓɛ nɛ mɛpek lîk.

⁶Ɓɛ̄l ɓɛ́ ɛ́ jüásɛl kǒ-kɛnd têk, ɓɛ kɛ́ ɗímb tí iɓuluk i ɗí ta ɓɛ nɛ ló nɛ koōnd ɓîk.

⁷Ɓɛ́ lɛ̄ɛ̄ nāá, ɓɛ́ iyêkle ɓɛ̄ ílɔ́a i mí Zɛɛ̄mb. Sá gwát, ɓɔ̂ɔ ɓot oték ɓā ā gwōk sá ɓɛ́ lɛ́ɛ́ ékɛ́, ísu yīl ɓɛ́ lyākɛ̄l ɓót nɛ mɛjendɛɛ̄l nāá, í ɗyaāŋ ékɛ́, ɓā ā gwōk thɔ́k yɛ̂.

⁸Nī tí gú ká nāá, lɔ́a ī tí nwɔŋ ɛ́, tí tɛ́m nī ɓɛ́lā ká nɛ yɛ́ ɗɛ í dála ê.

⁹Ná a jesa ká thɔ́k nāá, ɓá a sá lɔ́a tí ɛsú ɛ ɓót ō kɛ̄ ɛ́dalá ɓâk. Sá gwát ɛ́, ɓā sâ yɛ́ tí ɛsú lɛ̄ ósɛ́l ɓɛ̄ ɛ́ɓyôo, nɛ ɓot o mɛ́ɓūn, nɛ mimbēōt, nɛ ɓot o mísɛ̄m, nɛ ɓot o ɗí ta ɗúɛl Zɛ́mb, nɛ isá ī ɗí ɛ́chāāchānj ɓîk, nɛ ɓot o dō ósāŋg nɛ onaāŋg ɓɔ̄ɔ̄ ɓâk, ndɔ nɛ ɓot o dō ɓɛ̄l ɓót ɗyǎŋ zama zama ɓâk,

¹⁰nɛ ɓót o sā ímɔlā zama zama ɓâk, nɛ ɓotóm ō sá ímɔ̄lā nɛ ɓot ǒ ndɔŋ yɔ̄ɔ̄ ɓotóm ɓâk, nɛ ɓot o ɓɔ̄msā, gú ɛɓwám míkwōm ɓâk, nɛ ɓot kána ɓɔ̂ɔ ta kā lwóndɛl ɓâk, zī kā nwɔŋ ɓot o sā mímbi mī ísínɔŋ ɓyɛ̂ɛs ī lūmlā nɛ tyaa milyāklā ɓâk.

¹¹Sukúl ték í tí ɛdala nɛ Tyaa Pɔ́ ɓā jüe mɛ ê, Tyaa Pɔ́ ték lüíí tɔɔ̄p Zɛ́mb ɗí nɛ kúm ɔ̂, Zɛ̌mb mot kpɛ́l ɛ́nwɔŋ ɛ kálīnā ɔ̂.

¹²Mi tí ɛmyaŋla nɛ Yésus Kilís Ɗá káwūnā nyɛ mot jüē mɛ́ khul nāá, mi sála ló-sɛ̄ɛ̄ wám ɔ. Mí tí ɛmyaŋla nɛ nɛ̄ nyɛ mot ɓɛ̄ ɛ́ ɛ́ ɓɛɛ nāá, mi nɛ khul ɛsála, ɛ nwɔ́ŋ mɛ́ tí ísɛ̄ɛ̄ ɓyɛ̄ ɔ̂.

¹³Ísu ɗɛ mā ɓɛ mí í lüii ɛ́ɓyóóɓyóó nɛ ɗín lɛ̄ tí mɛlú mɛ̄phús ê, nɛ ɗɛ mā ɓɛ mí í lûmla nɛ nɛ̄, mī lə́ə́ ɛ́ ékɛ́, Zɛɛ̄mb ɛ́ ɛ́ dós mɛ́ khɔɔ̄ŋ, nɛ dɔ nāá, ma a ɓɛ nɛ ɛɓūklā, ta gú thɔ́k sá mā ɓɛ tí ɛsisá ê.

¹⁴Ɗá káwūnā ɛ́ ɛ́ ɓū sá mɛ̄ ɛnwɔŋ, ɛ́ ɛ́ jüe mɛ́ ɛɓūklā nɛ kpɛɛ̄l ɗüís tí lɛt zá nɛ Yésus Kilís ê.

¹⁵Ɛkɛ́l ɛ mí mú tí ɛlɛ́ɛ́ ɗék lík ɛ́, lí oceece. Mot nyɛ̂ɛs ɛ́ dalǎ nɛ ɛkam thɔ́k lɛ̂. Ɛkɛ́l ɛ̄ ték lí nāá: Yésus ā zye tí sī nyúk tí ɛzī kɔt ɓót o mísɛ̄m. Tí ndɔŋ wɔ̄ɔ̄ ɛ́, myam ɗí mot ɓɛ̄ ɛ́ ɛ́ ɓū thaŋ ɛ́sɛ́m ɔ̂.

¹⁶Sá gwát ɛ́, Zɛɛ̄mb ā ɓɛ ɛ́ ɛ́ dós mɛ́ khɔɔ̄ŋ. Ā kam nāá, Yésus Kilís ɛ lyákɛl ɛdaa ɛ̄ lyém lɛ̄ tí myam mot ɗí tí ɓū thaŋ ɛ́sá ɛ́ɓyóó ɔ́kɛ́, tí nāá, yá á ɓɛ ŋgúmǎ ndɛm tí ɛsú ɛ ɓɛ̄l ō wā ɓûkla ɛ́ ɓâk, ī zyē, ɓá á ɓyě cyuk mɛ́lú myɛ̂ɛsa ɓâk.

¹⁷Ī je nāá, mot nyɛ̂ɛs ɛ ɗúɛl Zɛɛ̄mb ɛ jüē ɛ́ kúm itɛ́m ɓyɛ̂ɛs. Í nyɛ ɗí Kūmāndē ɗí tí ɛcyǔk kɔ̌m tí nɛ kɔ̄m ɔ, ā ā jüê, mot ā ā ɓɛ́ɛ́ ɛ̂, nyɛ dá ɗi Zɛ́mb nyɛɛmɛ̄t. Aamɛn!

¹⁸Mwán ǎm Timotê, mí jüē ɔ́ mɛkɛ́l mák ī dálā nɛ ɗakɛ ógbɛ́sel o mítɔɔ̄p mí Zɛɛ̄mb ɓā lwaa lɛ́ɛ zinjá nyɔɔ̄ ê. Mɛkɛ́l mɛ̄ték má á jüe ɔ́ khul tí nāá, wá á tyáá ték tí ɛlûmla tyâa ɛlūmūl,

¹⁹nɛ ɛ́ɓūklā, nɛ tyaa mwáályêm. Ɓɛ̄l ɓót tí ndɔŋ wɔ̄ɔ̄ ɓɛ́ ɛ́ ɓyen ɛ́gwók mwáályém wɔ̄ɔ̄. Sá ték ī ɓúzī sá nāá, ɓɛ̄ ɗímbɛl ɛɓūklā lɔ̄ɔ̄.

²⁰Tí ndɔŋ ɓót ōték ɛ́, yā ɓɛ nɛ Imené ɓá nɛ Álɛkzaŋdɛ́, mā ɓɛ mí í gbá ɓɛ́ tí mɛɓɔ́ mí Sátan i zyē ɓá á gú nāá, ɓā ā dálā ɛ́ɓākā ɓyasi Zɛ́mb.