Read Mpumpong Eɓelê 1 Bible Online

Eɓelê 1 - Mpumpong bible

Eɓelê 1

¹Tɛ́m ɛsɔ́k ɛ́, Zɛɛ̄mb ā thaŋ tí minup mī ógbɛ́sel o mítɔɔ̄p ɓɛ̄ tí ɛlüii nɛ osǎŋg-phāmb káɓīnā ikɛnd ikɛnd, tí mitɛ̄lā mimbi mimbi,

²sá gwát ɛ́chāak tí itɛ́m ī mɛ́sīl ɓík ɛ́, ɛ thaŋ tí nup Mwán wɛ̄ tí ɛlüii nɛ kányīnā. Í tí kɔŋ Mwán wɛ̄ ték Zɛ́mb ā kus jwóó nɛ iɓwaās ê. Ī thɔ́k nyɛ Zɛ́mb ā tɛ́l tí nāá, á á ɗi Ndə́ə́ tí isá ɓyɛ̂ɛs ɔ̂.

³Ɛɓyakɔɔ ɛ kúm mí Zɛɛ̄mb lī thaŋ tí nyɛ tí nāá, ná á ɓɛɛ kâ. Ɛ da swōk Zɛ́mb. Ɛ́ sūk sá yɛ̂ɛs nɛ ɛkɛ́l lɛ̄ ɗí nɛ khul lîk. Phúla ā ɓɛ ɛ́ ɛ́ chánjɛl ɓót tí misɛ̄m myɔ̄ɔ̄ ékɛ́, ɛ ɓúkɛ̄ ɗi twóó ijwóó ɓɛ pák mbɔ́ ɛ́dóm mí Zɛ̌mb mot də̄ə̄ ísínɔŋ ɓyɛ̂ɛs ɔ̂.

⁴Mwán mí Zɛɛ̄mb ɛ mú ɛ́ ɛ́ thaŋ ɓééŋgeles. Nɛ dɔ nāá, ɗín ɛ̄ Zɛ́mb ā jüe ɛ lík ɛ́, lí í thaŋ lɔ̄ɔ̄.

⁵Tí oceece, Zɛ̌mb a a ɓá lɛ́ɛ́ ɗwóó ɛgwát nɛ éŋgeles wɛ̄ ŋgwát nāá: «U mwán aām, Mús ɛ́, mí í ɓyá ɔ̂.» Thɔ́k a a ɓá lɛ́ɛ́ ɗwóó ɛgwát zinjá nɔ̄l éŋgeles nāá: «Má á ɗi ɛ́ Sāŋg, Ɛ ɗí mɛ́ Mwân.»

⁶Sá gwát, tɛ́m Zɛ́mb ā ɓɛ ɛ ɛ́ thes Mwán ɛsɔ́k wɛ̄ tí iɓwaās ékɛ́, ā lɛ̄ɛ̄ nāá: «Ɓeéŋgeles ō mí Zɛɛ̄mb ɓyɛ̂ɛs ɓɛ́ dala ɛ́ɗúɛl ɛ̂!»

⁷Ɛ ɓúkā lɛ́ɛ́ tí ɛsú ɛ̄ ɓééŋgeles nāá: «Mí ɓɛlǎ nɛ ɓeéŋgeles ɛ́, ɗɛ mí ɓɛ́lā nɛ puūp ê. Thɔ́k ɛ́, ɓɛ́ sālā mɛ́ ɗɛ̌ ndol ɗû.»

⁸Sá gwát, tí ɛsú ɛ̄ Mwán ɛ́, ɛ ɓúkā lɛ́ɛ́ nāá: «Wɔ u Zɛɛ̄mb, ɗiī də́ə́ yɔ́ ī tɛ̄lāā tí ɛsú ɛ̄ ndǒmb ɗiī. Ú də̄ə̄ kánda wɔ̌ nɛ oceece.

⁹Ú kpɛl ísá ī ɗí ɛ́dalá ɓîk, u ɓyén ɛ́ɓyôo. Í yɛ́ ɗí nāá, Zɛɛ̄mb, Zɛ̌mb wɔ̄ ɛ́ ɛ́ tɔ́p ɔ́ tí ɛsú lɛ̄, Tí ɛlɔmb ɔ́ múl mɛ̌ ɓwók tí lô. Ɛ́ ɛ́ tɔɔ̄p wɔ́, ɛ lyūk ɓót ō ndɔŋ yɔ̂.»

¹⁰Zɛɛ̄mb ɛ ɓúzī lɛ́ɛ́ thɔ́k nāá: «Ɗâ, tí mɛnyɛɛ̄l ɛ́, í wɔ wā kus iɓwaās. Jwóó í thɔ́k isɛ̄ɛ̄ ī mɛ́ɓɔ́ mɔ̂.

¹¹Isá ɓīnɛ́ɛ̌ŋ ɓyɛ̂ɛs ɓyá á ɗîmb, sá gwát wɔ wá á ɗi ítɛ́m ɓyɛ̂ɛs. Jwóó nɛ iɓwaās ɓyá á sín ɗɛ míkānd mī ɗí mí í silɔɔ mîk.

¹²Wá á nyuk ɓyɛ́ ɗɛ ɓɛ́ nyúk míkānd ê, Ɓɛ̄ cēnj ɓyɛ́ ɗɛ ɓɛ̄ cēnj míkānd ê. Sá gwát, wɔ u da ɓɛ̄ nje jwok gwát, thɔ́k cyuk yɔ́ yá a ɓɛ̄ nɛ ɛchēs.»

¹³Zɛ̌mb a a ɓā lɛ́ɛ́ nɛ éŋgeles ŋgwát nɛ ŋgwát ɗwóó ɛgwát nāá: «Thā ɗǐ ɓɛ mbɔ́ ɛ́dóm wâm, Má á sá nāá, U kálɔɔ mizīzyūŋ myɔ́ tí milô.»

¹⁴Ɓeéŋgeles ɓyɛ̂ɛs ɓɛ da ɓɛ̄ nje ték isisímb ī ɗí tí ɛsála Zɛ́mb ɓîk. Ɛ́ kɛnd ɓɛ́ nāá, ɓɛ̄ kɛ́ɛ kɛm ɓót ɛ́ wā cis ɓâk.