Read Mpumpong Eɓelê 10 Bible Online

Eɓelê 10 - Mpumpong bible

Eɓelê 10

¹Lɔ́a mí Moís yá a gú ɓɛ̌ jwoklā ísá ī ɗí ceece ɓîk. Sá gwát lɔ́a ték ɛ́, í nɔŋlǎ nɛ mɛnwɔŋ mɛ wā zye mâk. Í yɛ́ ɗí nāá, yá a ɓɛ̄ nɛ khul ɛsá nāá, ɓót ō ɗí tí ɛjémbǎ ndumɛ nɛ Zɛ̌mb mimbú myɛ̂ɛs, tí ɛsá mbi mɛ́tûnka mɛ phwát ɗí ta ɓɛ nɛ ɛchēs mák, ɓɛ̄ ɗí ta ɓɛ nɛ jüas.

²Ī ɓɛ̄ nāá, wúzǎŋ mbi mɛ́tûnka ū chānjɛ̄l mísɛ̄m mī ɓót ō sā mɛ́ ɓák ceece nâk, phú mwáályém wɔ̄ɔ̄ a á ká lɛ́ɛ́ ɓɛ́ nāá ɓɛ́ ɛ́ sɛ̂m. Thɔ́k, phú ɓá á kát ɛsá mɛ́tûnka.

³Sá gwát tí oceece, ɓot o sā mbi mɛ́tûnka mɛték ɓák ɛ́, ɓā ā jésā mísɛ̄m myɔ̄ɔ̄, ɓɛ̄ tí ɛsîmsa myɛ́ mimbú myɛ̂ɛs.

⁴Nɛ dɔ nāá, mɛchía míndóm mī íthɛɛ ɗí ɛ́mūmūmū mík, nɛ mindóm mī íthamaka má a ɓɛ̄ nɛ khul ɛɗüis mísɛ̄m.

⁵Í yɛ́ ɗí nāá, tɛ́m Kūmāndē Zɛ́mb ā kɛs ɔ́ ā ɓɛ ɛ mú tí ɛzye tí iɓwaās ékɛ́, ā lɛ́ɛ nɛ Zɛɛ̄mb nāá: «Wa a je mɛphɔ̄k gú mɛtûnka. Sá gwát, í wɔ wā jüe mɛ nól nyîk.

⁶Yā ā zyē ɔ́ khós otīt ō ɓɛ́ ɗīs tí pyaāt mɛ́tûnka, Tí nɛ mɛtûnka ɓɛ́ sā tí ɛsú lɛ̄ íjukā ī mísɛ̄m ê.

⁷Mi ɓúkā lɛ́ɛ́ nāá: “Ɛ̂ɛŋ Zɛɛ̄mb, myam mot ték mi tí ɛzyě ɓɛ yɔ̂, Tí ɛzī sá njeā wɔ̂ Ɗɛ í ɗí tilā tí Ɓaáchāāchānj ō Mítilā zinjá nyaām ê.”»

⁸Kūmāndē Zɛ́mb ā kɛs ɔ, ɛ ɓúzī nyēē lɛ́ɛ́ nāá: «Wɔ wa a kam nāá, ɓɛ̄ sá ɔ mɛtûnka, gú mɛphɔ̄k, gú otīt ō ɓā ɗîs ɓɛ̌ pyaāt mɛ́tûnka ɓâk, gú thɔ́k mɛtûnka mɛ̄ íjukā ī mísɛ̄m. Ɓyá a zye ɔ khôs.» Ɓyela nāá, ɓā sâ mɛtûnka mɛték ɛ́, ī dálā nɛ ɗakɛ lɔ́a ɓá lɛ́ɛ́ ê.

⁹Phúla ték ɛ́, ɛ ɓúzī ɓākā lɛ́ɛ́ nāá: «Myam mot ték mi zyē tí ɛzī sá njeā wɔ̂.» Nyɛ thɔ́k ɗüis mɛ́tûnka mɛ myá, ɛ jílā nɛ mɛ̄l mɛ̌ myēnj.

¹⁰Yésus Kilís ɛ́ ɛ́ sá njeā mí Zɛɛ̄mb. Ɛ gbā nól nyɛ̄ tí mɛtûnka nje kɛnd gwát. Í ɗyaāŋ ték ɛ́ chānjɛ̄l káɓiná tí misɛ̄m kámīnā ê.

¹¹Fata mɛ́tûnka yɛ̂ɛs, ɛ́ tyá á títɛ̌l mɛlú myɛ̂ɛs tí ɛsú lɛ́ ɛ́sála ló-sɛ̄ɛ̄ wɛ̄. Ɛ́ sā ítɛ́m ɓyɛ̂ɛs mbi mɛ́tûnka mɛ phwát ɗí má a ɓɛ̄ nɛ khul ɛɗüis mísɛ̄m ɗwóó ɛgwát mâk.

¹²Kūmāndē Zɛ́mb ā kɛs ɔ́, nyɛ ā da sá nje mɛtûnka mɛ̄ phwát tí ɛsú ɛ̄ mísɛ̄m, tí ɛsú ɛ kɔ̌m tí nɛ kɔ̄m. Phúla ték ɛ́, ɛ ɓú kɛ̄ ɗî ndíndiīl ɓɛ pák mbɔ́ ɛ́dóm mí Zɛɛ̄mb.

¹³Ɛ́chāak ɛ́, ɛ mú ká ɓwónd nāá, Zɛ̌mb ɛ sá nāá, ɛ kálɔɔ mizīzyūŋ myɛ́ kwóó milô.

¹⁴Ɗyaāŋ ték ɛ́, tí mɛphɔ̄k mɛ̄ phwát ɛ́, ɛ́ ɛ sā nāá, ɓɛ̄l ɛ̄ chānjɛ̄l ɓɛ́ tí misɛ̄m myɔ̂ɔ ɓák ɛ́, ɓɛ̄ ɗí tɛ́m yɛ̂ɛs ta ɓɛ nɛ ijüas.

¹⁵Áchāāchānj Sisímb nyɛ thɔ́k ɛ tí ɛlɛ́ɛ́ káɓiná nāá, í ɗyaāŋ. Tí oceece, ā nyee lɛ́ɛ́ nāá:

¹⁶«Ɗá ɛ lɛ̄ɛ̄ nāá: Phōn mí wā lat nɛ ɓot ɓīnɛ́ɛ̌ŋ phúla mɛlú mɛték ɛ́, nyɛ́ eē. Má á gbá ílɔ́a ɓyám twóó milyém myɔ̄ɔ̄, Mi til ɓyɛ́ twóó osīmsā ɓɔ̄ɔ̄.»

¹⁷Phúla ték ɛ́, ɛ ɓúzī ɓākā lɛ́ɛ́ nāá: «Ma á ɓākā sîmsa mísɛ̄m myɔ̄ɔ̄ nɛ mɛɓyóó mɔ̄ɔ̄.»

¹⁸Nɛ dɔ nāá, tɛ́m mísɛ̄m mi ɗí mí í juaa ékɛ́, yá a ká ɓɛ nɛ zye nāá, ɓɛ̄ ɓākā sá mɛ̄l mɛ́phɔ̄k tí ɛsú lɛ̄ ɛ́ɗüis mísɛ̄m mītêk.

¹⁹Ɗyaāŋ ték ɛ́, ɓwán ɓɛ̄ ónaāŋg, nī mú ka nɛ zye nāá, nī ní ka tí pyaāt ɗí tí ɓū chánjɔɔ e, tí chía mɛtûnka mí Yésus.

²⁰Yésus ɛ́ ɛ́ ɗii káɓiná zyě myēnj pyaāt ní wá kɛ́ ɓye ká cyuk, tí ɛthaŋ tí kānd káá ípyaāt ī ɓááchāāchānj ê. Kānd ték ú tian nāá, nól nyɛ̂.

²¹Nī mú ká nɛ ánénén fata mɛ́tûnka ɗí ló njāā mí Zɛɛ̄mb ɔ̂.

²²Pha, nī jémbaka ɓɛ ɗá mí Zɛ̌mb nɛ milyém kámīnā myɛ̂ɛs lwōndlā nɛ mɛjendɛɛ̄l, nɛ dɔ nāá, chía mí Yésus nyí chánjɛl mílyém kámīnā tí isá lyākɛ̄l káɓiná nāá yīl káyīnā í í sí ê, ɛ jüíí káɓiná nɛ mɛɗyūū mɛ̄ áfúúfûp.

²³Ná a tyak ká tí ɛɓakɛl mɛjendɛɛ̄l ní ɗí tí ɛtyáá ká tūnd ték mák ɛ́nwɔŋnwɔŋ. Nɛ dɔ nāá, Zɛɛ̄mb ā ā ɗí ta lwóndɛl íkɛs ɓyɛ̂.

²⁴Í je nāá, ákɛl nɛ kɛl ɛ nwɔ̂ŋ ɛkɔɔ nɛ mot ndɔŋ yɛ̄, i zyē yá á jwómɛ̌l kpɛɛ̄l káyīnā, nī sā ká tyaa isīsɛ̄ɛ̄.

²⁵Ná a ɓɛ́sa ká nɛ igós káɓīnā ɗɛ ɗí tíka tí ɛsú ɛ ɓɛ̄l ɓót ê. Sá gwát ɛ́, nī léllaka pāká kányīnā, ɗɛ ɗí ɓī tí ɛɓɛɛ́ mwēs mí Ɗâ tí ɛkúnɔɔ ê.

²⁶Ní wā sɛ́m ká nɛ ɛɓeēs ɓyela nāá, nī mú tí gú ká oceece nâk, yá a ká ɓɛ tel nɛ mɛ̄l mɛ́tûnka tí ɛsú lɛ̄ ɛ́tind mísɛ̄m.

²⁷Sá da kā līs káɓīnā ékɛ́, í phónd dɔ́s mí Zɛ̌mb nɛ ɓwɔ̄ŋ, ti nɛ ɗū lɛ́ ájwóójwóŋ wā zī ɗís ɓót ō mɛ́ɓūn lîk.

²⁸Í ɓɛ̄ nāá, mot ɛ́ ɓyasi lɔ́a mí Moís, ɓot ōɓá, gú ólɛ́l ɓɛ̄ kám nāá, ɛ́ ɛ sá ɗyáŋ, ɓɛ̄ dō ɛ́ ta dós ɛ́ khɔɔ̄ŋ nâk,

²⁹á yá á ká mɛ̄ɛ̄ ɓɛ ná, tí ɛsú ɛ nɔ̄l ɓyásī Mwán mí Zɛɛ̄mb, ɛ ɓɛ́ɛ́ nāá, chía phōn nyā chánjɛl ɛ nyík nyá a ɓɛ̄ nɛ nɔm, ɛ ɓáká ɓyasǐ Sisímb sā nāá nī gú kā ɛ́nwɔŋ ɛ lyém mí Zɛɛ̄mb ɔ̂?

³⁰Nɛ dɔ nāá, nī tí gú ká mot ā lɛ́ɛ nāá: «Í myam ɗí nɛ phɔlā ɔ̂. Í myam wā jüe ákɛl nɛ kɛl myána myɛ̄ ɔ̂.» Nyɛ thɔ́ ɓākā lɛ́ɛ́ nāá: «Ɗá á á dɔ́s ɛ́yɔŋ lɛ̄ ɔ̂.»

³¹Í tí ɓú pípɔ tɛ́m mót ɗúmā tí mɛɓɔ́ mí Zɛɛ̄mb ɗí tí ɛcyuk ɔ̂.

³²Sīmsāká mɛlú mɛ̄ mɛ́nyɛɛ̄l tɛ́m ɓyā ɓye ɛɓyakɔɔ ɛ mí Zɛɛ̄mb ê. Ɓyā ɓɛ ɓí i ɓɛɛ thūnd mítūŋ, ɓī lūmlā njés ɛ́lūmūl ta tyak.

³³Tí ɓīl ítɛ́m ɛ́, ɓɛ̄l tí ndɔŋ wēn ɓā ɓɛ tí ɛlə́ə́aa nɛ ɛɓíaa tí mís mɛ̄ ɓôt. Ɓyela nāá, ɓɛ̄l tí ndɔŋ wēn ɓā ɓɛ tí ɛkam ɛɗi pák nɛ ɓot o ɓā sisáwaa ɗyǎŋ ɓâk.

³⁴Tí oceece, ɓyā ɓɛ tí ɛkaala mítūŋ mī ɓót ō ɓā ɓɛ tí mimbok ɓâk. Tɛ́m ɓā ɗɛ̂s ɓěn ɛkūm lēn ékɛ́, ɓyā ɓyēt yɛ́ nɛ mimyaŋla, nɛ dɔ nāá, ɓyā ɓɛ tí gú nāá, ɓí nɛ ɛkūm ɛ̄ ɗí tí ɓú nwɔŋ lík, ɗí kɔ̌m tí nɛ kɔ̄m ê.

³⁵Ɓyá a ɗímbɛl phɛ̄ ɛɓyes lēn, í lɛ́ wā sá nāá, ɓī ɓyê ánénén myána ê.

³⁶Í tí ɛje ɓén mbán, tí ɛlwóndɛ̌l njeā mí Zɛɛ̄mb, tí nāá, ɓyá á ɓye sá ā kɛs ê.

³⁷Tí oceece, í tilā nāá: «Ī tí ɛlīs ɓīɓyɔ̄k tɛ̂m, títɛ̄m kéké, Mot dálā ɛ́zye ɔ́kɛ́, á á zye, Thɔ́k ɛ́, ɛzye lɛ̄ lá ǎ kā ɓwɛɛ.

³⁸Zɛ̌mb ɛ ɓúzī lɛ́ɛ́ nāá, mot ɗí zwēs tí mís mám ɔ́kɛ́, á á cyuk tí ɛɓūklā. Sá gwát ɛ́, ɛ́ wā ɓākā jüák phús nák ɛ́, ma á ɓɛ nɛ mimyaŋla nɛ nɛ̄.»

³⁹Nyɔ̂ɔ ká, ná a ɓɛ̄ ká tí ndɔŋ ɓót ō jüák phús tí nāá, ɓɛ̄ tɔ̄ ɓɛ ɗīmbɛ́l ɓâk. Sá gwát, ní ka tí ndɔŋ ɓót ō ɓūklā Zɛ́mb, Zɛɛ̄mb ɛ cís káɓiná ɓâk.