Read Mpumpong Eɓelê 3 Bible Online

Eɓelê 3 - Mpumpong bible

Eɓelê 3

¹Ɓwán ɓɛ̄ ónaāŋg ɓâm, ɓí ɓot o mí Zɛɛ̄mb, ɓí ɓɛ̄l ā jôo ɓâk. Ɗyaāŋ ték ɛ́, kɛnd ká osīmsā ɓēn tí Yésus, í nyɛ ɗí lwōmtwōm, ɛ ɓákā ɗi ánénén fata mɛ́tûnka ɛ́ɓūklā zí ɗí tí ɛtyáá tūnd ték lîk.

²Tí oceece, í Zɛɛ̄mb ā tɛ́l ɛ nāá, ɛ sála ló-sɛ̄ɛ̄ têk. Thɔ́k, ā sála wɛ́ ɛ́dala ɗakɛ Zɛ́mb kpɛ́l e, jwok gwát ɗɛ̌ Moís ā sâ twóó njāā mí Zɛɛ̄mb wɛ̂ɛs ê.

³Mot súm njāā ɔ́kɛ́, ɛ́ gūmlāā ī tháŋ njāā ɛ́ sūm ô. Ɗyaāŋ ték ɛ́, Yésus ɛ́ dala ɛ́gûmlaa ī tháŋ Moís.

⁴Tí oceece, njāā wɛ̂ɛs ú nɛ mot ā sum. Thɔ́k ɛ́, í Zɛɛ̄mb ā sum isínɔŋ ɓyɛ̂ɛs.

⁵Moís ɓɛ wɛ̄ pák ɛ́, ā ɓɛ ɛ́ ɛ́ kɛ ɛ́dalá ɗɛ Zɛ́mb kpɛ́l ékɛ́ twóó njāā mí Zɛɛ̄mb wɛ̂ɛs, tí tɛ̄lā sɛ́l jüēāā ló-sɛ̄ɛ̄ ɛ́lɛ́ɛ́ ísá í ɓyā ɓɛ nāá, Zɛ̌mb á á lɛ́ɛ́ ɓîk.

⁶Sá gwát, Kūmāndē Zɛ́mb ā kɛs ɔ́kɛ́, nyɛ ā kɛ ɛ́dalá tí tɛ̄lā Mwán sāŋg ā tɛ̄l ɛ̄ nāá, ɛ ɗî ló twóó njāā wɛ̄ ɔ̂. Njāā wɛ̄ ték ɛ́ í nyɔ̂ɔ kâ, í dā je nāá, nī ɓákɛl ka mɛjendɛɛ̄l kámīnā nɛ mbyes ɗí sá ɛ́lɛ́ɛ́ ɛ nól kálīnā ê.

⁷Í yɛ́ ɗǐ nāá, ɗakɛ Áchāāchǎnj Sisímb ɗí tí ɛlɛ́ɛ́ nāá: «Mûs, ɓí wā gwók jwōnd mí Zɛɛ̄mb nâk,

⁸Ɓyá a lelɛl mílyém ɗakɛ tɛ́m ɓyā sâ mɛɓǔn nɛ nɛ̄ Tí mwēs ɓyā ɓúɛl ɛ ɓɛ̌ sɔ̄sā sī ê.

⁹Pyaāŋ ɛ́, oɗá ɓēn ɓā ɓɛ ɓɛ́ ɛ́ gus myám Zɛ̌mb mɛsɔŋ, ɓɛ̄ ɓūɛ̄l mɛ̂, Ísu ɗɛ ɓā ɓɛ ɓɛ́ ɛ́ ɓɛɛ ísá ɓyɛ̂ɛs mā sâ

¹⁰tí mimbú mɛkām mɛ̄ná ɓík ê. Í yɛ́ mā gwôk ɛɓǔk nɛ nɔ̄ɔ̄, Mi ɓúzī lɛ́ɛ́ nāá: Tɛ́m yɛ̂ɛs ɛ́, osīmsā ɓɔ̄ɔ̄ ɓā ā ɓwɛ́ɛ́ nɛ ɛdɛ̂l Ɓá a kpɛl ɛ́thaŋ tí mɛzyeē mā kwomsa tí mɛsú mɔ̄ɔ̄ ê.

¹¹Twóó ɛɓūk lám ɛ̄ ték ɛ́, mi ɓúzī kana. Myam nāá: Ɓá ǎ ní ɗwóó ɛgwát tí kanda mí kwomsā ɓɛ́ ɛgbālā ték ɔ̂!»

¹²Ɓwán ɓɛ̄ ónaāŋg ɓâm, ɓī gú ɓakɛl. Yāā jé nāá, mot ŋgwát tí ndɔŋ wēn ɛ ɓɛ̂ nɛ ɓyǒla lyém nɛ lúk ɛ́ɓūklā, ɗí nɛ khul ɛtínd ɛ́ nāá, ɛ lûm kɔŋ nɛ Zɛɛ̄mb ɗí tí ɛcyuk ɔ̂.

¹³Sá gwát ɛ́, lellaká pāká nyēn mɛlú myɛ̂ɛsa tɛ́m yɛ̂ɛs mús Mɛ́kanā mɛ̄ Zɛ́mb ɗí tí ɛlɛ́ɛ́ ékɛ́, jína yes ê. Kámb nāá, mot ŋgwát nɛ ŋgwát tí ndɔŋ wēn a a ɓwɔ̂ɔ lelɛl lyém, tí ɛɓyét nāá, sɛ̄m ū kwɔ́ŋ ɛ.

¹⁴Tí oceece, ní wā ɓakɛl kāná mɛjendɛɛ̄l nā ɓɛ ka nɛ mɛ́ tí mɛnyɛɛ̄l, ī kɛ́ kǔm ɓɛ mɛ́sīl nâk, náǎŋ ɛ́, ní kana ɓot ō ndɔŋ o mí Kūmāndē Zɛ́mb ā kɛs ɔ̂.

¹⁵Ɗyaāŋ ték ɛ́, Ɓaáchāāchānj ō Mítilā ɓɛ́ lɛ̄ɛ̄ nāá: Mûs, ɓí wā gwók jwōnd mí Zɛɛ̄mb nâk, Ɓyá a lelɛl mílyém ɗakɛ tɛ́m ɓyā sâ mɛɓǔn nɛ nɛ̄ ê.

¹⁶Í yɔ̂ɔ ɓɔɔ zɛ̄ ɓā gwôk jwōnd mí Zɛɛ̄mb, ɓɛ̄ sâ mɛ́ɓǔn nɛ nɛ̄ ɓâk? Í ɓot ɓyɛ̂ɛs Moís ā gbâs nɛ nɔ̄ɔ̄ ɓɛ kánda Egíptɛn ɓâk.

¹⁷Í ɓɔɔ zɛ̄ Zɛ́mb ā gwôk ɛɓūk nɛ nɔ̄ɔ̄ táŋ mimbú mɛkām mɛ̄ná ɓâk? Yā ɓɛ ɓot ɓā sɛɛ̄m, mimúŋ myɔ̄ɔ̄ mī sā ɛ́ɓēsɓěs ɓɛ̌ sɔ̄sā sī ɓâk.

¹⁸Tɛ́m Zɛ́mb ā lüii tɔɔ̄p ték, ɛ kána nyɛ nāá: «Ɓyá ǎ ní ɗwóó ɛgwát tí kanda mā kwomsa ɓěn ɛgbālā ték ɔ̂», ā lüii tɔɔ̄p ó zɛ̄? Á lüii tɔɔ̄p ɓót ō ɓā sá mɛɓǔn nɛ nɛ̄ ɓâk.

¹⁹Í sá ték ní ɓɛ́ɛ́ ká nāá, ɓá ǎ kā ní tí ɛgbalā ɛ̄ ték nɛ dɔ nāá, ɓā ɓɛ ɓɛ́ ɛ́ ɓyen ɛ́ɓûkla.