Read Mpumpong Zwâk 2 Bible Online

Zwâk 2 - Mpumpong bible

Zwâk 2

¹Ɓwán ɓɛ̄ ónaāŋg ɓâm, yā ā jé nāá, ɓyɔ̂ɔ ɓot o ɗí ɓí í ɓûkla Ɗá káwūnā Yésus Kilís ɗí lwōndlā nɛ kúm ɔ́kɛ́, ɓī ɗî pák nɛ mot.

²Nī ɓá a lɛ́ɛ́ ká nāá, nɔ̄l kūm mót ɛ zí i ní twóó gɔ́s yēn, ɛ́ ɛ́ ɓwát ájǐnkhweēs sāwā nɛ gôl nɛ iɗim i míkānd, phúla ték ɛ́, wūl pwêepweē ū zí ní thɔ́k nɛ ɓɛ̄ óphulazyōŋ tí nól,

³ɓí wā jüe mót ɓwāt íɗim i míkānd ɔ́ thūnd ɗūū, ɓī lɛ̄ɛ̄ nɛ nɛ̄ nāá: «Wɔ, thā ɗi wák tí tyaa ɗiī ê.» Ɓī ká lɛ́ɛ́ nɛ pwêepweē nāá: «Wɔ ɗi títɛɛ̄l, gú thɔ́k nāá, thā ɗi wák tí iɓwaās sī mɛkoō mám» nák,

⁴ɓyá a ɓɛ̄ náǎŋ ɓí í nwɔŋ pák nɔ̄l ɛ? Ɓyá a ɓɛ̄ thɔ́k náǎŋ ɓot o dɔ̄s mítɔɔ̄p o ɗí nɛ iɓyǒla ɓí ósīmsā ɓâk ɛ?

⁵Ɓwán ɓɛ̄ ónaāŋg ō kpɛl ɓâm, gwōkkâ. Zɛɛ̄mb ā tɔ̂p ɓɛ̄l ō ɓót ɓɛ̄ íɓwaās ō ɓɛ́ ɛ́ nāá, ɓɛ́ mipwêepweē ɓák ɛ́, tí ɛsú ɛ̄ nāá, á á linj ɓɛ́ mikūm tí ɛɓūklā, i zyē ɓá á ní tí Kanda ā kɛs ɓɛ̄l ō ɗí tí kpɛl ɛ́ ɓâk.

⁶Sá gwát ɓyɔ̂ɔ, ɓí ɗyamɛl pwêepweē. Í ɓɔɔ zɛ̄ o gbā ɓén tí mitūŋ, nɛ ɛtɔ́ nɛ nēn ɓɛ mɛ́phānj mɛ̄ mítɔɔ̄p? Yá a ɓɛ̄ míkūm ɛ?

⁷Yá a ɓɛ̄ thɔ́k mikūm mīték ɗí tí ɛlüii ɛ́ɓyóóɓyóó nɛ tyaa ɗín ɛ Zɛ́mb ā jüe ɓēn lá lík ɛ?

⁸Tí oceece, ɓí wā ɗúɛl lɔ́a mí Zɛ̌mb mot ɗí Ndə́ə́ ɔ, ɗakɛ Ɓá á chāāchānj o Mítilā ɗí tí ɛlɛ́ɛ́ nāá: «Kpɛɛ̄l mwânɔ̌ŋg ɗakɛ ú kpɛ́l wɔ́ mot ték ékɛ́ nâk, ɓí í sá tí nwɔŋ.»

⁹Sá gwát, ɓí wā ɓɛ nɛ pák nɛ mot nâk, gūká nāá, ɓí í sɛ̂m. Náǎŋ ɛ́, ɓí í ɓyel tí lɔ́a, nɛ dɔ nāá, ɓyā ā ɗūɛ̄l yɛ̂.

¹⁰Nɛ dɔ nāá, mot ɗūɛ̄l lɔ́a yɛ̂ɛs, ɛ tháŋ ɛ́tyuūŋ ɛgwát ɔ́kɛ́, ɛ́ ɛ́ thaŋ lɔ́a yɛ̂ɛs.

¹¹Tí oceece, Zɛɛ̄mb ā lɛ́ɛ nāá: «Wa a sá ɛ́kɔnd ɔ́kɛ́, í Zɛɛ̄mb ŋgwát nɛ ŋgwát ték ā lɛ́ɛ nāá, wa a dó mót ɔ̂.» Ú wá ɗi ta sá ɛ́kɔnd, sá gwát u dō mót nák ɛ́, gū nāá, ú ú thaŋ lɔ́a.

¹²Mɛkɛ́l mɛ̄ ɓī gbɛ̄s tí minup myēn, nɛ sá yɛ̂ɛs ɓí sá ékɛ́, sāká yɛ́ ɗɛ ɓót ō ɗí tí gú nāá, ɓá á dɔ́saa nɛ lɔ́a ɗí tí ɛɗüis ɓót tí okwōm ê.

¹³Nɛ dɔ nāá, Zɛɛ̄mb a á ɓɛ nɛ ndōsā khɔ́ŋ nɛ nɔ̄l ɓɛ̄ ta dós ɓót khɔɔ̄ŋ ɔ́, tɛ́m ɛ́ wā cyúkɛl mítɔɔ̄p ê. Sá gwát ɛ́, nɔ̄l dōs ɓót khɔɔ̄ŋ ɔ́kɛ́, a a ɓɛ̄ nɛ ɓā nɛ mwēs dɔ̂s.

¹⁴Ɓwán ɓɛ̄ ónaāŋg ɓâm, mǒt lɛ̄ɛ̄ nāá, ɛ nɛ ɛɓūklā yɔ̂ɔ ta nyén tí isīsɛ̄ɛ̄ nâk, nɔm ték ú yɛ̄? Wūnɛ́ɛ̌ŋ mbi ɛ́ɓūklā lí nɛ khul ɛcis ɛ?

¹⁵Nī ɓá a nwɔŋká ɓwoŋa nāá, nɔ̄l mwânɔɔ̄ŋg, gú thɔ́k nɔ̄l kɛ̄l ɔ́ twóó ɛɓūklā, a a ɓɛ̄ nɛ sá ɛ́ɓwát mɛlú myɛ̂ɛs, gú thɔ́k sá ɛ́ɗɛ,

¹⁶nɔ̄l mót ŋgwát tí ndɔŋ wēn nɛ nɛ̄ nāá: «U ká gū tɔ̂, u kɛ́ ɓwát míkānd, u gú ɗɛ», ɓí ɗǐ ta jüe ɛ́ kānd, gú sá ɛ́ɗɛ nák, mɛkɛ́l ɓí wā lɛ́ɛ́ ɛ́ ɗyǎŋ mák ɛ́, má á jüe ɛ́ yɛ̄?

¹⁷Í thɔ́k ɗyǎŋ jwok gwát nɛ ɛɓūklā. Lí ɗǐ ta nyén tí isīsɛ̄ɛ̄ nák ɛ́, gū nāá, ɛ́ɓūklā ɛ̄ ték lí í jüe.

¹⁸Sá gwát, nɔ̄l mót ɛ́ wā lɛ́ɛ́ nāá: «Wɔ, u nɛ ɛɓūklā, myam mi nɛ isīsɛ̄ɛ̄ nák» má á ɓɛ́s nɛ nɛ̄ nāá: «Lyākɛ̄l mɛ́ ɗakɛ ɛ́ɓūklā lɔ́ ɗí nɛ khul ɛnyén ta ɓɛ nɛ isīsɛ̄ɛ̄ e. Myam má á lyákɛl ɔ́ ɛɓūklā lám tí isīsɛ̄ɛ̄ ɓyâm.»

¹⁹Wa a ɓɛ̄ tí ɛɓûkla nāá, Zɛ̌mb ɛ ŋgwát ɛ? Tí ɛsá ɗyáŋ í tí nwɔŋ. Iɓyǒla ɓɛ̄ ísisímb ɓyɔ̂ɔ thɔ́k ɓí tí ɛɓûkla ɗyáŋ, ɓī pwōk tí ɓwɔ̄ŋ.

²⁰U nɛ ogoō! U tí ɛkam nāá, mi lyákɛl ɔ nāá, ɛɓūklā ɛ ɗí ta ɓɛ nɛ isīsɛ̄ɛ̄ lík lá a ɓɛ̄ nɛ nɔm ɛ?

²¹Zɛɛ̄mb ā nwɔŋ sǎŋg-phāmb káwūnā Áɓilam nāá, ɛ zwēs tí yɛ̂? Yá a ɓɛ tí isīsɛ̄ɛ̄ ɛ? Yá a ɓɛ nɛ dɔ nāá, ā ɓɛ ɛ́ ɛ́ gbá mwán wɛ̄ Ízak tí pyaāt mɛ́tûnka tí ɛjüe Zɛ́mb nyaā?

²²Ū ɓɛɛ nāá, ɛɓūklā lɛ̄ nɛ isīsɛ̄ɛ̄ ɓyɛ̄ ɓyā titɔ́ ndɔŋ. Ɛɓūklā lɛ̄ lā ɓɛ lí í lwónd tɔɔ̄p ísīsɛ̄ɛ̄ ɓyɛ̄.

²³Í ɗyaāŋ ték sá ɗí tilā tí Ɓaáchāāchānj ō Mítilā yā lwónd e, yā lɛ́ɛ nāá: «Áɓilam ɛ́ ɛ ɓɛ nɛ ɛɓūklā nɛ Zɛɛ̄mb, Zɛ̌mb ɛ ɓúzī nwɔŋ ɛ́ ɗakɛ̌ zwēs tɔɔ̄p ɛ́ɓūklā lɛ̄.» Nyɛ thɔ́k jóó ɛ nāá, sɔ̄ wɛ̄.

²⁴Ɓí í ɓɛɛ náǎŋ nāá, Zɛɛ̄mb ɛ́ nwɔŋ mót ɗakɛ̌ zwēs, ta dá ɓɛ̌ nje ték tɔɔ̄p nāá, ɛ́ ɛ́ ɓûkla sá gwát, tí nɛ tɔɔ̄p ísīsɛ̄ɛ̄ ɓyɛ̄.

²⁵Yā sɛ́ɛ thɔ́k ɗyǎŋ Jwok gwát tí ɛsú ɛ̄ mí Laáɓ, sapák múmá. Zɛɛ̄mb ā ɓɛ ɛ́ ɛ́ nwɔŋ ɛ ɗakɛ̌ zwēs tí isīsɛ̄ɛ̄ ɓyɛ̄. Nɛ dɔ nāá, ā ɓɛ ɛ́ ɛ ɓakɛl ɓot ɓɛ̄ ízaɛ́l ɓā lwómaa ɓák tɛ́m ɓā kum ɓɛ yɛ̄ e, nyɛ thɔ́k kɛm ɓɛ́ tí nāá, ɓɛ̄ káa ɓúlɛ̌l ɓɛ nyīl zyé.

²⁶Jwok gwát, ɗɛ nól ɗí ta ɓɛ nɛ ŋgúl cyuk nyík ɗí nyí í jüe ékɛ́, ɛɓūklā ɛ̄ ɗí thɔ́k ta ɓɛ nɛ isīsɛ̄ɛ̄ lík, lí í jüe.