Read Mpumpong 1 Pyɛ̂ɛ 2 Bible Online

1 Pyɛ̂ɛ 2 - Mpumpong bible

1 Pyɛ̂ɛ 2

¹Milyém myēn myā ā dálā ɛ́ɗi phɛ̄ nɛ ɛɓyôo, kātká ocāl, nɛ mɛpek, nɛ mɛgômb, nɛ mɛsâala.

²Sá gwát ɛ́, ɗiká ɗɛ íthɔmâ. Ɗakɛ íthɔmá kpɛ́l mɛ́ɓɛ́l mɛ̄ ónaāŋg ɓɔ̄ɔ̄ ékɛ́, ɓyɔ̂ɔ thɔ́k ɓū kpɛlká ɛkɛ́l ɛ̄ mí Zɛ̌mb ɛ ɗí mɛɗyūū mɛ̄ ɛ́ɓɛ́l ɗí ɛ́chāāchānj mâk. Ī zyē tɛ́m ɓí wā ɗiɗɛ lɛ́ ékɛ́, ɓyá á gwêe, ɓī ɓyé cyuk.

³Tí oceece: «Ɓí í ɓɛɛ́ ɗakɛ Ɗá Yésus ɗí tí nwɔŋ ê.»

⁴Jēmbāká ndumɛ nɛ Ɗâ, nyɛ mot ɗí ɛkɔ̄k ɛ̄ ɗí tí ɛcyuk lîk. Ɓot ɓɛ̄ íɓwaās ɓā ɓɛ ɓɛ́ ɛ́ myas lɛ̄. Sá gwát Zɛ̌mb nyɛ mot ā tɔ̂p lɛ́ ɔ́kɛ́, ɛ́ ɛ ɓɛɛ nāá, lí nɛ nɔm tí ɛsú lɛ̄.

⁵Ɓyɔ̂ɔ thɔ́k ɛ́, ɗikānā ɗakɛ mɛ́kɔ̄k mɛ̄ ɗí tí ɛcyuk mâk. Tí nāá, Zɛɛ̄mb á á nwɔŋ ɓén, ɛ súm njāā sisímb yɛ̄ ɛ́ wā ɗi ték ê. Ɓyá á ɗi ífata i mɛ́tûnka tí ɛsú ɛ̄ mí Zɛɛ̄mb tí ɛsú ɛ̄ nāá, ɓyá á sála ɛ́ nɛ lyém ŋgwát ɗɛ ɛ́ kpɛ́l ékɛ́ tɔɔ̄p mí Yésus Kilîs.

⁶Nɛ dɔ nāá, Ɓaáchāāchānj o Mítilā ɓɛ́ lɛ́ɛ́ nāá: «Mí í tɔ́p ɗim ɛ́kɔ̄k. Myam thɔ́k tɛ́l lɛ́ ɓɛ̌ Siɔ́ŋ tí nāá, ɗim ɛ́kɔ̄k ɛ̄ ték lá á ɗǐ ɗɛ ɛ́kond ɛ̄ sǎŋg pyétɛ̄l njāā lík. Mot wā jendɛl lɛ̄ ɔ́kɛ́, a á salɔɔ ɗwóó ɛgwát.»

⁷Ɛkɔ̄k ɛ̄ ték lí nɛ njés nɔm tí ɛsú ɛ̄ ɓyɔ̂ɔ ɓot o ɗí oɓúkɛl ɓâk. Sá gwát, tí ɛsú ɛ̄ ɓɛ̄l ō ɗí ta ɓûkla ɓák ɛ́: «Ɛkɔ̄k ɛ̄ ɓót ō zúm ɓā myas lík, Lí í kā linja ɛ́kɔ̄k ɛ̄ pyétɛ̄l njāā ɗɛ ɛ́kond ɛ sāŋg lîk.»

⁸Í thɔ́k tilā tí yīl pyaāt nāá: «Í ŋgúma ɛ́kɔ̄k ɛ̄ ɗí tí ɛsá nāá, ɓot ɓɛ̄ kwɔ̂ɔ ɛɓɔɔ̄k ték lîk, Í ɛkɔ̄k ɛ̄ ték ɗí tí ɛsá nāá, ɓot ɓɛ̄ ɗúma ê.» Ɓot ɓā kwɔɔ ɛɓɔɔ̄k ték tɔɔ̄p nāá, ɓā ɓɛ ɓɛ́ ɛ́ ɓyen ɛ́ɗúɛl Ɛ́kɛ́l ɛ̄ mí Zɛɛ̄mb. Zɛ̌mb nyɛ mot ték ā jües nāá, yá á sɛ́ɛ́ ɓɛ́ ɗyaāŋ.

⁹Sá gwát ɓyɔ̂ɔ ɛ́, ɓī kúl ɓót o Zɛɛ̄mb ā ɓɛ ɛ́ ɛ́ tɔ́p ê. Ɓī ifata ī mɛ́tûnka i mí Kūmāndē. Ɓí kúl ɓót o ɗí tí ɛsú ɛ̄ mí Zɛɛ̄mb ê. Ɓí ɛyɔŋ ɛ mí Zɛɛ̄mb. Ā tɔ̂p ɓēn tí ɛsú ɛ̄ nāá, ɓyá á lɛ́ɛ́ ɓót tyaa isá ɛ́ ɓɛ̄ ɛ́ ɛ́ sá ɓîk, nyɛ mot ɗüis ɓén tí khɔmwaāl, ɛ thés ɓén ɓɛ tyâa ɛɓyakɔɔ lɛ̄ ɔ̂.

¹⁰Tɛ́m ɛsɔ́k ɛ́, ɓyá a ɓɛ ɛyɔŋ ɛ mí Zɛɛ̄mb. Sá gwát ɛ́chāak ɛ́, ɓī mú ɛyɔŋ lɛ̄. Tɛ́m ɛsɔ́k ɛ́, Zɛ̌mb a a dôs ɓěn khɔɔ̄ŋ. Sá gwát ɛ́chāak ɛ́, ɓí í ɓyě ndōsā khɔ́ŋ wɛ̄.

¹¹Osɔ̄ ɓâm, ɓyɔ̂ɔ ɓot o mí ɓū kpɛl ɓâk. Ɓyá a jesa nāá, ɓí ojóŋ tí iɓwaās ɓîk. Thɔ́k ɓí wák tí ɛsú ɛ̄ ɓīɓyɔ̌k tɛ̂m. Í yɛ́ mí ɗí tí ɛlɛ́ɛ́ ɓén nāá, ɓī kándɔɔ ɛsá mínjeā mí ipúnd ê. Isá ɓīnɛ́ɛ̌ŋ ɓí dā lûmla nɛ ɓyɔ̂ɔ ɓot otêk.

¹²Ɗiká nɛ tyaa kǒ-kɛnd sɔ̂kphɔ̌mb ɓot o ɗí ta gú Zɛ́mb ɓâk. Tɛ́m ɓí wā sá ɗyáŋ ékɛ́, ísu ɓɛ̄ lüíí ɛ́ɓyóóɓyóó nɛ mín mēn nāá, ɓī tí ɛsá ɛ́ɓyóó ɛ́, tyaa isīsɛ̄ɛ̄ ɓyēn ɓyá á sá nāá, ɓɛ̄ gúmɛ̄l Zɛ̌mb mwēs ɛ́ wā zī lüií nɛ nɔ̄ɔ̄ ê.

¹³Ɗūɛ̄lká tɔɔ̄p mí Ɗâ, mot nyɛ̂ɛs ɗí nɛ də́ə́ tí iɓwaās ɓík ɔ, ti nɛ kūmāndē kánda Lóm mot ɗí ndə̂ə mikūmāndē myɛ̂ɛs ɔ̂.

¹⁴Ɗūɛ̄lká thɔ́k miŋgɔ́mina kūmāndē kánda Lóm ā tɛ̂l ɓɛ tí ɛsú lɛ̄ ɛ́pɔ́nɛs ɓɛ̄l ō sā tí ɓyóó nɛ ɛmyaŋla nɛ ɓɛ̄l ō sá tí nwɔŋ ɓák.

¹⁵Nɛ dɔ nāá, Zɛɛ̄mb ɛ́ kpɛl nāá, ɓī sâ ɛnwɔŋ, ī zyē yá á ɗyuɛl mínup mi ɓót ō ɗí ɗɛ ígoō, ɓɛ̄ ɓáká ɗǐ nɛ ɛjók ɓâk.

¹⁶Kǒ-kɛnd wēn ū ɗî ɗakɛ ɓót ō ɗí ɓá a ká ɓɛ tí okwōm ɓâk. Sá gwát, ɓyá a sîmsa nāá, tɛ̄lā ɓī ɗí ta kā ɓɛ tí okwōm ékɛ́, ɓyá á ɓɛla nɛ wɛ́ tí ɛsú lɛ̄ ɛ́sɔl ɛ́ɓyôo. Sá gwát, sā ká ɗakɛ ósɛ́l ō mí Zɛɛ̄mb.

¹⁷Ɗūɛ̄lká mot nyɛ̂ɛs, ɓī kpɛ́l ɓót ō ndɔŋ yēn oɓúkɛl. Kāmbká Zɛɛ̄mb, ɓī ɗūɛ̄l kūmāndē Lóm.

¹⁸Ɓyɔ̂ɔ osɛ̂l, sulká mɛnól mēn sɔ̂kphɔ̌mb omása ɓēn, ɓī ɗūɛ̄l ɓɛ́ ɛ́ɓuuɓu. Ɓyá a dā ɗúɛ̌l nje ték ɓɛ̄l ō ɗí tí nwɔŋ ta lyel ícyuk ɓâk. Sá gwát, ɗūɛ̄lká thɔ́k ti nɛ ɓɛ̄l ō ɗí tí lyel ícyuk ɓâk.

¹⁹Tí oceece, ī tí nwɔŋ nāá, mot ɛ jísɔɔ mitūŋ ɛ́ ɓɛ̄ ta dala ɛ́ɓye mík ɛ́ tɔɔ̄p nāá, ɛ tí ɛɗúɛl Zɛ́mb.

²⁰Ɓɛ́ pɔ̄nɛ̄s ɔ́ tí tɔɔ̄p ú ɗí nɛ mɛkua ték ɔ, u jísɔɔ nâk, ú ɓwōnd nyɔ́ɔ́ kûm? Sá gwát, ú sā ɛ́nwɔŋ, ɓɛ̄ pɔ̄nɛ̄s ɔ, u jísɔɔ nâk, ī tyaa sínɔŋ tí mís mí Zɛɛ̄mb.

²¹Zɛɛ̄mb ā jôo ɓēn tí tɔɔ̄p têk, nɛ dɔ nāá, Kūmāndē ā kɛs ɔ́ nyɛ mot ték ā ɓɛ ɛ́ ɛ́ ɓɛɛ mítūŋ tí mɛsú mēn. Ā lyákɛl ɓěn ndɛm tí nāá, ɓyá á ɗú kǒ-kɛnd wɛ̄.

²²Nyɛ a a sɛ̂m ɗwóó ɛgwát. Thɔ́k ɛ́, a a lɛ́ɛ ocāl ɗwóó ɛgwát.

²³Tɛ́m ɓā lilə́ə́ ɛ ékɛ́, a a ɓiɓɔla. Tɛ́m ɓā gbigbá ɛ tí mitūŋ ékɛ́, a a ŋgan nɛ mot, sá gwát ā da nwɔŋ tɔɔ̄p wɛ̄, ɛ jüé Zɛ́mb nyɛ mot cyūkɛ̄l mítɔɔ̄p ɛ́dalá ɔ̂.

²⁴Ā ɓɛ ɛ́ ɛ́ khɛ́ɛ́ mísɛ̄m kámīnā twóó nól nyɛ̄ tɛ́m ɓā ɓomɛl ɛ tí kolos ékɛ́ tí ɛsú ɛ̄ nāá, ná á jüe ká tí sɛ̄m, nī cyúk ká ɗakɛ Zɛ́mb kpɛ́l ê. Í tí mɛpyɔ̄ŋ mɛ̄ ɓyā ɓyela cyuk ê. Í tí mɛpyōŋ ɓā ɓáwɛl ɛ mák ɓyā cyuk ê.

²⁵Tɛ́m ɛsɔ́k ɛ́, ɓyā ɓɛ ɗakɛ ítaa i ɗí ɓí í ɗímb ɓîk, sá gwát ɛ́chāak ɛ́, ɓí í ɓúlǎ ɓɛ ɗáá mbákɛl wēn, mot ɗí tí ɛnón ɓén ɔ̂.