Read Mpumpong Apokalîs 10 Bible Online

Apokalîs 10 - Mpumpong bible

Apokalîs 10

¹Phúla ték ɛ́, mi ɓúzī ɓɛɛ nɔ̄l éŋgeles nɛ khul tí ɛsǔl ɓɛ̌ jwôo. Sá ā ɓɛ nɛ yɛ́ mbwātā ɗɛ̌ kānd ékɛ́, yā ɓɛ ɓúk juūnd. Khūlyánd ɛ sā tyend tí ló wɛ̄. Phɔ̌mb nyɛ̄, mɛpɛn ɗɛ ɓuūm ɗwôo, mɛkǒ ɗɛ índindōl ī ɗû.

²Ā ɓɛ nɛ khikhūū mɛ́kanā ŋgunjā tí mbɔ̂. Ɛ ɓúzī tɛ́l koō ɛ́dóm tí mâŋ, koō ɛ́myɛɛ̄l tí iɓwaās.

³Ɛ ɓúzī ɓó ɛ́kāŋgā ɗakɛ̌ ziɓɔnd múŋɛl ê. Tɛ́m ā ɓô ɛkāŋgā ɛ̄ ték ékɛ́, okhɛ́l ō jwóó tɛ̄n nɛ ōɓá ɓɛ dá ɓámɓām ê.

⁴Ɗɛ ókhɛ́l ō jwóó tɛ̄n nɛ ōɓá ōték ɓā ɓâm ékɛ́, mi ɓúzī wā til sá ókhɛ́l ōték ɓā lɛ́ɛ́ ê. Títɛɛ̄l ŋgwát ɛ́, mí dá gwók jwōnd tí ɛlüǐ nɛ nǎm ɓɛ̌ jwóó, ī līlɛ̄ɛ̄ nāá: «Ɓakɛl sá ókhɛ́l ō jwóó tɛ̄n nɛ ōɓá ɓīnɛ́ɛ̌ŋ lɛ̄ɛ̄ ékɛ́, tí lyém wɔ̂. Wa a til yɛ̂.»

⁵Phúla ték ɛ́, éŋgeles mā ɓɛɛ ɛ títɛɛ̄l, wúk koō tí mâŋ, wúk tí iɓwaās ɔ́kɛ́, ɛ ɓúzī ɓén mbɔ́ ɛ́dóm wɛ̄ ɓɛ ɛ́kó.

⁶Ɛ káná tí ɗín ɛ̄ mót cyúk kɔ̌m tí nɛ kɔ̄m ɔ̂, nɔ̄l ā kus jwóó nɛ iɓwaās, nɛ máŋ, nɛ isá ɓyɛ̂ɛs i ɗí ték ɓîk. Nyɛ nāá: «Yá a ká ɓɛ nɛ tɛ́m ɛ́ɓwônd!

⁷Sá gwát, tɛ́m éŋgeles tɛ̄n nɛ mbá wā lwóŋ syōō ékɛ́, í tɛ́m ték jwok mí Zɛɛ̄mb ɗí sɔlā ékɛ́, wā lwónd ɗakɛ ā ɓa lɛ́ɛ osɛ́l ɓɛ̄, ogbɛ́sel o mítɔɔ̄p ɓɛ̄ ê.»

⁸Phúla ték ɛ́, jwōnd mā nyee gwôk ɓɛ̌ jwóó ékɛ́, ī ɓúzī ɓākā lɛ́ɛ́ mɛ́ nāá: «Tɔ̄ kɛ̄ nwɔ̌ŋ khikhūū mɛ́kanā ɗí ɗyǎŋ ŋgunjā tí mbɔ́ éŋgeles ɗí títɛɛ̄l, wúk kǒ tí mâŋ, wūl tí iɓwaās ê.»

⁹Mi ɓúzī jémbǎ ndumɛ nɛ éŋgeles, myam nɛ nɛ̄ nāá, ɛ jüê mɛ khikhūū mɛ́kanā ték. Nyɛ nɛ naām nāá: «Í nda, u ɗɛ̂, yá á sɔs tí nup wɔ́ ɗakɛ ódo! Sá gwát ɛ́, yá á ɓɛ ɛ́jüeejüee twóó mo wɔ̂.»

¹⁰Mi ɓúzī nwɔ̌ŋ khikhūū mɛ́kanā énɛ́ɛ̌ŋ tí mbɔ́ mí éŋgeles mi ɗɛ̂. Yā sɔs mɛ tí nup ɗɛ ódo. Sá gwát, tɛ́m mā ka min ékɛ́, yā ɓɛ i mú mɛ sá mɛ́jüee twóó mo wâm.

¹¹Ɓɛ́ ɓúkā lɛ́ɛ́ nɛ nǎm nāá: «Í je nāá, u kɛ̂ ɓākā lɛ́ɛ́ sá Zɛ́mb jüēs tí ɛsú ɛ̄ thūnd mɛ́yɔŋ, nɛ okanda, nɛ ilüii ɓyɛ̂ɛs tí nɛ mikūmāndē ê.»