Read Mpumpong Apokalîs 12 Bible Online

Apokalîs 12 - Mpumpong bible

Apokalîs 12

¹Phúla ték ɛ́, njés sínɔŋ ī ɓúzī nyén tí jwôo: Ŋgúm múmá ɛ́ ɛ́ ɓwát ɓum ɗwóó ɗɛ mót ɓwāt kānd ê, álwǒmb sī mɛkoō mɛ̄, nɛ ɛkoo lɛ̄ ókūmāndē tí ló wɛ̄, nɛ ocwēēcwēn kām nɛ ōɓá ték.

²Ā ɓɛ ɛ mú ɛ́thúlɛlɛ, ɛ ɓú cicím mɛ́kpay mɛ̄ suŋla.

³Phúla ték ɛ́, yīl sínɔŋ ī ɓúzī ɓākā nyēn tí jwôo: Sá tīt ɗyaāŋ ta timbɛl mɛtwamb ɗɛ ɗû. Ā ɓɛ nɛ miló tɛ̄n nɛ mīmbá, nɛ ithɔ́ŋ kām. Miló mīték myɛ̂ɛs myā ɓɛ nɛ mɛkoo mɛ̄ də̄ə̄.

⁴Ɛ ɓúzī gwámbɛl ɛ́kɔɔ ɛgwát tí mɛkɔɔ mɛlɛ́l mɛ̄ ócwēēcwēn ō jwóó nɛ koōnd wɛ̄, ɛ gús ɓɛ́ ɓɛ sī tí iɓwaās. Ɛ tyāā sɔ̂kphɔ̌mb mumá ā ɓɛ tí suŋla ɔ, tí ɛɓwónd nāá, mwán ɛ́ dá ɓyɛ́l nâk, ɛ tékā ɛ̂.

⁵Mumá ték ɛ ɓúzī ɓyá mwâmotôm, mwán ték á á də́ə́ ókanda ɓyɛ̂ɛs nɛ syǔk dōō. Ɓɛ̄ ɓúzī tɔ́ nɛ mwán ték ɓɛ ɗá mí Zɛɛ̄mb gúmɛ̄ ɛ́ ɗí tí ɗǐ də́ə́ yɛ̄ ê.

⁶Mumá nyɛ ɛ dá kāmb ɛ́, ɛ kɛ́ swɔɔ́ ɓɛ̌ sɔ̄sā sī, pyaāt Zɛ́mb ā kwomsa tí nāá, á á kɛ́ dámblaa táŋ mɛlú míl nɛ mithyet mimbá nɛ mɛkǎm twōō.

⁷Ɗɔmb lī ɓúzī sɛ́ɛ́ ɓɛ jwôo. Mísɛɛ́l ɓá nɛ ɓeéŋgeles ɓɛ̄ ɓɛ̄ ɓúzī lûmla nɛ sá tīt ta timbɛl ɓá nɛ ɓɛ̄ ɓééŋgeles.

⁸Sá gwát ɛ́, sá tīt énɛ́ɛ̌ŋ ɓá nɛ ɓeéŋgeles ɓɛ̄ ɓá a ɓɛ nɛ khul. Ɓɛ̄ ɓúzī ɗímbɛ̌l pyaāt yɔ̄ɔ̄ ɓɛ̌ jwôo.

⁹Sá tīt énɛ́ɛ̌ŋ ī ɓúzī gusaá ɓɛ̌ koōl. Í nyɛ ɗí ndoōmb nwɔ̂ŋ, í nyɛ ɓɛ́ ɓākā jóó nāá, Ɓyǒla mót ɔ, gú thɔ́k Sátan, mot ɗí tí ɛkwóŋ sī nyɛ̂ɛs ɔ̂. Ɓá nɛ ɓeéŋgeles ɓɛ̄ ɓɛ̄ ɓúzī gusaá ɓɛ̌ íɓwaās.

¹⁰Phúla ték ɛ́, mi ɓúzī gwók lyěllǎ jwōnd ɓɛ̌ jwóó ī līlɛ̄ɛ̄ ɗêk: «Ɛ́chāak ɛ́, í í kúl tɛ́m ɛ́kot ɓôt! Ɛ́chāak ɛ́, Zɛɛ̄mb ɛ́ ɛ́ lyákɛl khúl nyɛ̄ nɛ də́ə́ yɛ̄! Ɛ́chāak ɛ́, Kūmāndē Zɛ́mb ā kɛs ɔ, ká ɗi nɛ də̂ə! Nɛ dɔ nāá, mot ā ɓiɓɛ tí ɛput ɓwán ɓɛ̄ ónaāŋg ɓēs mwēs nɛ pum ɓɛ ɗá mí Zɛɛ̄mb ɔ́kɛ́, ɛ́ ɛ́ sɔaá ɓɛ̌ jwóó, ɛ gúsāā ɓɛ sī.

¹¹Sá gwát ɛ́, ɓwán ɓɛ̄ ónaāŋg ɓēs ōték ɓā ga ɛ tí khul chía mwâthɛmbɛ, nɛ tɔɔ̄p nāá, ɓɛ́ ɛ lɛ́ɛ́ ɓót nāá, Ɛkɛl ɛ̄ mí Zɛɛ̄mb lí oceece. Ɓá a cwáŋ nɛ icyuk ɓyɔ̄ɔ̄, ta kámb ɛ́süee.

¹²Í yɛ́ ɗí nāá, jwóó, nɛ ɓyɔ̂ɔ ɓot o ɗí pyǎŋ ɓák ɛ́, Myaŋlakâ! Sá gwát, ɛkɔ̌p nɛ mâŋ, nɛ ɓot ɓɛ̄ íɓwaās! Nɛ dɔ nāá, ɓyǒla mót ɛ́ ɛ́ sǔl pyǎŋ ɓɛ yěn Lwōndlā nɛ ánénén ɛɓūk, Nɛ dɔ nāá, ɛ tí gú nāá, tɛ́m yɛ̄ i līs kékê.»

¹³Ɗakɛ sá tīt énɛ́ɛ̌ŋ ā ɓɛɛ nāá, ɛ́ ɛ́ gusaá ɓɛ sī ékɛ́, ɛ dá nyɛ̌l ndüīī tí ɛɗú múmá ā ɓyâ mwâmotóm ɔ̂.

¹⁴Sá gwát, mumá ɔ́nɔ́ɔ̌ŋ ɛ ɓúzī jüeaa mɛ́phaāp mɛ̄ ánénén phyél tí nāá, ɛ pílɛl, ɛ tɔ́ ɓɛ̌ sɔ̄sā sī, ɛ́cetaceta nɛ sá tīt énɛ́ɛ̌ŋ, pyaāt Zɛ́mb ā kwomsa tí ɛsú lɛ̄ e, gúmɛ̄ ɓɛ́ wā didámbɛl ɛ́ táŋ mimbú mīlɛ́l nɛ oŋgɔn twōō ê.

¹⁵Nwɔ́ŋ ɔ́nɔ́ɔ̌ŋ ɛ ɓúzī kpánj thūnd mɛ́ɗyūū ɗɛ njés sǒmb ɗyūū phûs kɔŋ múmá tí nāá, mumá ɛ gúŋɛl ê.

¹⁶Sá gwát iɓwaās ɓī ɓúzī ɓôl, ɓī mín sǒmb ɗyūū ndoōmb nwɔ́ŋ ā kpánj é tí ɛzye múmá ɔ́nɔ́ɔ̌ŋ mɛkhɛɛ̄m.

¹⁷Ɗakɛ̌ ndoōmb nwɔ́ŋ ɔ́nɔ́ɔ̌ŋ ā ɓɛ ɛ mú nɛ ɓyǒla ɛ́ɓūk nɛ mumá ékɛ́, ɛ dá kpáŋ, ɛ kɛ́ lûmla nɛ ɓuɓukǎ chīlā múmá têk. Ɓɛ̄l ō ɗūɛ̄l mɛ́tyuūŋ mí Zɛ̌mb nɛ ɛɓakɛl óceece o Yésus ā gbɛ́s ɓâk.

¹⁸Ɛ ɓúzī kɛ̄ tyáá tí mɛsyɛ́ɛ́ mɛ̄ mwɔ̄ŋ mâŋ.