Read Mpumpong Apokalîs 20 Bible Online

Apokalîs 20 - Mpumpong bible

Apokalîs 20

¹Phúla ték ɛ́, mi ɓúzī ɓɛɛ éŋgeles tí ɛsul, ɛ ɗüís ɓɛ̌ jwóó nɛ sap ɗǐmla tóŋ tí mbɔ̂, zī kā nwɔŋ ánénén dɔpɔ.

²Ɛ ɓúzī mɛ́t sá Tīt ta timbɛl, ndoōmb nwɔ́ŋ ɔ́nɔ́ɔ̌ŋ ɗí ɓyǒla môt, thɔ́k Sátan ɔ́kɛ́, ɛ gwōl ɛ́ nɛ dɔpɔ tí ɛsú ɛ̄ mímbú mîl.

³Phúla ték ɛ́, ɛ ɓúzī gus ɛ́ twóó ɗǐmla tôŋ, ɛ pét yɛ́ nɛ ɛŋgoŋ tí nāá, sá tīt ta timbɛl a a ɓākā kwóŋ ókanda ī kɛ́ kum tɛ́m mímbú míl wā sí ê. Phúla ték ɛ́, ɓá á ɓākā ɓyét ɛ́ ɛɓīm ɛ̄ tɛ̂m.

⁴Mi ɓúzī ɓākā ɓɛɛ íɗiī īdə̂ə: Ɓot o ɓā ɓɛ mindíndiīl ték ɓák ɛ́, ɓɛ̄ ɓúzī jüeaa də́ə́ ɛ́dɔ́s ɓôt. Mi ɓúzī ɓākā ɓɛɛ thɔ́k ɓot o ɓā cyûklaa miló tɔɔ̄p ɓā ɗúɛl oceece o Yésus ā gbɛ̂s ɓâk, nɛ tɔɔ̄p ɓā ɗúɛl ɛkɛ́l ɛ̄ mí Zɛɛ̄mb ê. Ɓɔ̂ɔ ɓá a ɗúɛl tīt ɔ́nɔ́ɔ̌ŋ, gú thɔ́k vekle yɛ̄. Ɓá a ɓye ɛjüeēs lɛ̄ tí phɔɔ̄mb, gú thɔ́k tí mbɔ̂. Ɓɔ̂ɔ ɛ́, ɓā ɓɛ ɓɛ́ ɛ́ pas tí nāá, ɓá nɛ ɓɔɔ Kilís ɓá á də́ə́ táŋ mimbú mîl.

⁵Yīnɛ́ɛ̌ŋ í ɛpas ɛ mímúŋ lɛ̄ ɛ́sɔ̂k. Mīl mímúŋ ɛ́, myá á ká pas tɛ́m mímbú míl wā ɓɛ mí í sí ê.

⁶Lɛ̄m nɛ ɓɛ̄l ō pás tí ɛpas ɛ mímúŋ lɛ̄ ɛ́sɔ́k ɓâk! Ɓɔ̂ɔ ɓɛ̄ tí ɛsú ɛ̄ mí Zɛɛ̄mb, ɛsüee ɛ mbá lá a ká ɓɛ nɛ də́ə́ tí ɓɔ̂ɔ. Ɓá á ɗi ífata i mí Zɛ̌mb nɛ ɓīl ī mí Kūmāndē Zɛ́mb ā kɛs ɔ̂, thɔ́k ɛ́, ɓá nɛ ɓɔɔ Kūmāndē Zɛ́mb ā kɛs ɔ́, ɓá á də́ə́ táŋ mimbú mîl.

⁷Tɛ́m mímbú míl wā sī ékɛ́, Sátan á á ɗüisaa tí mbok,

⁸á á tɔ́ tí ɛkɛ́ kwóŋ ókanda ɓyɛ̂ɛs tí sī mipák mīná ɓâk, okanda oték ɓɛ́: Gɔ́k nɛ Magɔ̂k. Á á gwésɛl ɓɛ́ tí ɛsú lɛ̄ ɛ́lūmūl. Ɓá á ɓǔ ɗakɛ mɛ́syɛ́ɛ́ tí mwɔ̄ŋ mâŋ.

⁹Í ɗyǎŋ ɓɛ́ ɗí tí ɛtɔ́ dala sī nyɛ̂ɛs, ɓɛ̄ káwɛ̄l khanda Zɛ́mb ɓú kpɛl ê. Pyaāt ɓót ō mí Zɛɛ̄mb ɗí ê. Sá gwát ɛ́, ɗú lī ɓúzī ɗüǐs ɓɛ jwôo, lī zī ɗís ɓɛ́ ɛ́sɛkɛ.

¹⁰Náǎŋ ɛ́, ɓyǒla mót ā kikwôŋ ɓɛ ɔ́kɛ́, á á gusaa twóó somb ɗú nɛ pit ɗí tí ɓū ɗísa ê, pyaāt ɓā myas tīt ɔ́nɔ́ɔ̌ŋ ɓá nɛ mgbɛ́sel mitɔɔ̄p míkɔ́ŋ ê. Pyaāŋ ɛ́, ɓá á ɗi tí mitūŋ mwěs nɛ pum ndǒmb ɗiī nɛ ndǒmb ɗî.

¹¹Phúla ték ɛ́, mi ɓúzī ɓɛɛ ánénén ɗiī də́ə́ ɛ́puupum nɛ mot ndíndiīl kwóó têk. Jwóó nɛ iɓwaās ɓī ɓúzī kámb sɔ̂kphɔ̌mb nyɛ̄, mot ta ká ɓākā ɓɛɛ ɓyɛ́ tel.

¹²Mi ɓúzī ɓākā ɓɛɛ thɔ́k mimûŋ, otōmbá nɛ ɓwâthɛ̌mb mitítɛɛ̄l sɔ̂kphɔ̌mb ɗǐ də̂ə. Okhuu o mɛ́kanā ɓɛ̄ ɓúzī ɗiaa. Nɔ̄l khûu mɛkanā ɛ ɓúzī ɓākā ɗiaa, nyízaāŋ ték ā ɓɛ khuu mɛkanā mɛ̄ cyuk. Mimúŋ mī ɓúzī dɔ́saá dala nɛ isá ɓá ɓa sâ ɓík, ɗakɛ yā ɓɛ tilā twóó okhuu o mɛ́kanā mɛ̄ték ê.

¹³Máŋ mɛ̄ ɓúzī ɓúlɛl mímúŋ myɛ̂ɛsa ā ɓɛ̄ nɛ myɛ́ mîk. Ɛsüee nɛ pyǎt mímúŋ ɓɛ̄ ɓūlɛ̄l thɔ́k myɔ̄ɔ̄ mímûŋ ɓā ɓɛ nɛ myɛ́ mîk. Ɓɛ̄ dɔ̄s ɓɛ́ ɓyɛ̂ɛs, ákɛl nɛ kɛl dala nɛ misāwā myɛ̄.

¹⁴Phúla ték ɛ́, ɛsüee nɛ pyaāt mímúŋ ɛ́, ɓɛ̄ ɓúzī gusaa twóó somb ɗú nɛ pit ɗí tí ɓū ɗísa ê. Somb ɗú, í ɛsüee ɛ mbá.

¹⁵Thɔ́k ɛ́, mot nyɛ̂ɛs ā ɓɛ ta ɓɛ nɛ ɗín tilā twóó khuu mɛkanā mɛ̄ cyuk ɔ́kɛ́, ā ɓɛ ɛ́ ɛ́ gusaa twóó somb ɗû.